- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلآم عليكُم يآ نآس اللّمة الغآليين
أوّلاً نشكُر كل عضو شآركني في آخر قصّة وضعتها
ولي كانت تروي معاناتي مع أول عام لِي في الجامعة،
شُكراً لكلّ تعليقاتكُم المشجّعة، وحتّى لمن لم يترُك بصمتهُ في الموضوع
يكفيني وُقوفه عند الموضوع وإعطائي من وقته كلّ تلك الدقآئق
شُكراً لكم جميعاً ، وربي يحفظكم
أما بعد، المعروف أنّ المرحلة الإبتدائية هي أهم مرحلة في حياة الطّفل ، بالاك ينسى كل مراحل دراستو إلاّ المرحلة الإبتدائية ، لأنو هي الفرع الثابت لي تبني منو الطفل ،
و بالنسبة ليّا في المرحلة الإبتدائية بالاك تعلّمت حوايج درك كي كبرت ما تعلمتهمش،
تعلّمت مليح كيفاه تمشي الدنيا هادي، وكيفاه القوّي يتحكم في الضعيف ، وكيفاه بزوج كلمات قادر تحطم إنسان ، وبزوج كلمات ترفع إنسان ، بالاك العقل صغير مايفهمش،
لكن القلب يحس، المهم أنا المرحلة الإبتدائية كانت مشوّهة بسبب المعلّمين ولكن
اليوم رايحة نحكيلكم على أهم زوج مواقف لي بقات راسخة في الذاكرة
وما حبتش تروح .
أول موقف لي مازلت نتفكرو ، لما كنت نقرا في السنة الرابعة ابتدائي ، وفي يوم من الايام دق الجرس لي من المفروض نخرجو لما نسمعوه ولكن المعلمة زادت حكمتنا واحد العشر ولا 15 دقيقة حسب واش نذكر، ونتوما اتخيلو أب يستنا وماتخرجش بنتو ،الجرس دق والناس كامل خرجت وبنتو مابانتش وخاصة الدنيا ماتعجبش ، مالا بابا تكلم مع المدير وقالو وينهم ولادنا دق الجرس ومابانوش والمعلمة ماخبرتناش إذا رايحة تحكمهم دقائق إضافية،
ولسوء الحظ وافقوه مجموعة من الأولياء وناضت فوضى ماش كبيرة بزاف ولكن لحقت للمعلّمة
تاعنا ومن تما ولات المعلمة تشوف فيا السبب الرئيسي لهاديك الفوضى،
وباه تخرج الغل تاعها ،اليوم لي من وراه زادت مكرا 15 دقيقة من ورا ما دق الجرس بصح أنا ماكنتش ضمن هادوك الدقائق ، لأنو مع سمعت الجرس شافت فيا وقاتلي "هزي حوايجك واخرجي مارانيش حابة لمشاكل"، وليت لميت حوايجي وخرجت ووليت كل يوم هكا نخرج والتلاميذ لخرين يبقاو يقراو وأنا نتحرم من حقي في الدراسة، ومن بعد ولات تقولي "كي تسمعي الجرس اخرجي وحدك مانبقاش انا كل يوم نقولك" ، ومن بعد وليت مع نسمع الجرس نهز حوايج ونخرج ، وساعات لما تشوفني خارجة توبخني وتقولي كيفاه أنا ما كملتش الدرس ونتي خارجة ؟؟ ، بصراحة ما لقيت ما ندير وفي نفس الوقت ما قدرتش نخبر والديا لأنو في الأخير رايحة نكون أنا الضحية ،صدقوني رغم عقلي الصغير هاداك الوقت لكن فهمت مليح واش معناها الظلم.
الموقف الثاني لي مازال تاني ماراحش من راسي هو حكايتي مع "بنت المير"، هاداك الوقت كانت تقرا معايا وحدة "بنت المير" ، باباها يبان في التلفزيون ويوصلها الشوفور للمدرسة ، وراكم تعرفو الباقي وتعرفوا المعاملة كيفاه رايحة تكون ، بصبعها تحرك المدرسة كاملة ،الموقف لي صرالي معاها يا خاوتي كان لما كنت نقرا في السنة السادسة إبتدائي ، خرجتنا المعلمة بعد ما دق الجرس ودرنا الصف في الدروج وبقينا نستناو وهاداك الوقت كانو الاولاد لي يقراو معايا يتقابدو مع ولاد من قسم آخر وبداو يدزو في بعضاهم وأنا دزوني ولسوء الحظ كنت هازة
parapluie في يدي وبلا مانفيق قست بنت المير في عينها ، أنا قاعدة حتى نسمع في الطفلة تبكي ، وتقولي عميتيلي عيني، انا قلت كلمات تاع سماح يفريو الأمر،
بقيت نقولها اسمحيلي مادرتهاش بالدمة وأنا نظن بلي الأمر خلاص ، لكن بمجرد ماشافو المعلمين الطفلة تبكي حتى نلقاهم جاو يجريو وتجمعو عليا كامل،
معلمين المدرسة كاملة دارو بيا، كن صابو قتلوني ،وحدة تقولي ماش متربية، وحدة تقولي ماتحشميش، وحدة تقولي واش دارتلك باه ديريلها هكا ، حسيت روحي متهم حكموا عليه بالإعدام قبل ما يسمعو رايو ، وبقيت غير ساكتة و كنت نخبي في دموعي قد ما نقدر،
صدقوني بالاك ننسى كامل ذكريات حياتي إلا اللحظة هادي لأني حسيت روحي أضعف إنسان على وجه الأرض، نسمع في الإهانات وماش قادرة ندافع على روحي ،وليت بعد ما خلصو معايا التحقيق والكلام تاعهم المليح ولاو طلقوني وراحو ليها وحدة تواسي ووحدة تداوي وراكم تعرفو الباقي، أنا مع خرجت كنت مقهورة خلاص لحسن الحظ لقيت ماما تستنا فيا ، ومع شافتني فهمتني
، لأنها تعرفني من وجهي وتحس بيا قبل ما نهدر، وبعدأخذ ورد حكيتلها واش صرا،
ساع ولات ليهم وحطتلهم النقاط على الحروف ، والحاجة لي عجبتني أنو قالتلهم
"بنتي متربية ومستحيل دير حاجة كيما هكا وبالدمة ونظن الأمر هادا يخص المعني فقط ماشي المدرسة كاملة "، حسيت تما صح بقيمة الوالدين وبقيمة الأم لي دافعت عليا و خلاتني نحس بلي مارانيش وحدي ، ومن وراها ولات المدرسة كاملة تشوف فيا بنظرة غريبة " تقول قاتلة أرواح " ، بالاك كن تقاس عبد خلاف ما يديروش هكا ، ودامت المعاملة السيئة في هاديك المدرسة 6 سنوات من حياتي ،ومن هنا تعلمت ثاني درس أنو الناس طبقات في المجتمع
وبطبقتك المنخفة على الناس لخرين رايح تتعرض لمعاملات قاسية.
كل ذكريات طفولتي لي كان لازم نعيشهم مليح كانو قاسيين عليا وخلاونين نتعلم دروس قبل أوانهم، هادا جزء من الطفولة تاعي لي شوهوهالي المعلمين حبيت نشارك بيه ناس اللمة الغاليين على قلبي، ولأول مرة في حياتي ، وماتحرمونيش من آراءكم ومشاركاتكم المميزة
سامحوني طولت عليكم ولكن هادا القلب لي راهو يشكي ،
تحياتي للجميع واتهلاو في رواحكم وصح فطوركم
سلآم
