- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يا ناس لمتي الأعزاء
ان شاء الله راكم لاباس؟؟
والله هاد الايام قابلتني واحد الظاهرة قلت غير ناس اللمة لي نشاركهم بيها
انا بصراحة ماعجبتنيش :smile02: بصح كل شخص ورأيو وكل شخص كيفاه طريقة تفكيرو في هاد الحياة, مالا تبعوني نقولكم
قبل ايام معدودة كنا في تجمع للعائلة وكل شخص يجيب هدرة وكل شخص يناقش موضوع
حتى لحقنا لموضوع الحجاب :-r ولي معظم العائلة تتفلسف فيه وواحد مامطبقو على اصولو , وهنا قامت وحدة من العائلة تتكلم على بنتها وتتفاخر وأصلا هي بعد الحجاب مدايرتو صورة فقط وتقول:
" انا بنتي قلتلها ديري الحجاب اصلا درك بعد لبستها راهي تاع حجاب خاصها غير الخمار من فوق وخلاص" ( وهي لابسة سروال مشبوح تنسف عليه يتقطع وتريكو درعيه عريانين وتقولك لبسة تاع حجاب ؟:-o ) المهم لا علينا بقينا نسمعو في الثرثرة تاعها حتى وصلت لواحد الجملة وقالت:
" أصلا باباها قالها كن ديري الحجاب نعطيك 4 ملاين كادو؟؟ :s "
بقيت نشوف :s تدير الحجاب يعطيها 4 ملاين؟؟؟ مالا كي تتزوج يعطيها دار , أوّلا تخلعت من التبذير تاع الدراهم, وخاصة تقدم 4 ملاين لطفلة تقرا في المتوسط والناس برا راهي تطايش ,
يعني تفكير مثقف الله يبارك :down: , ومن جهة خلاف بقيت نشوف للوقت لي وصلنالو ولاو ولادنا
باه يديرو أي خطوة بالكادوات والدراهم, عندي بنت عمتي كي جات رايحة تجوز السيزيام قالت ليماها و الله كن ماتشريليش tablette والله مانديلك السيزيام , ويماها اكيد قالتلها غير اديلي السيزيام ونجيبلك واش تحبي, سبحان الله
ولينا نطلبو الرحمة من ولادنا؟كن ماتشريليش مانقراش وكن ماتشريليش مانصليش وكن ماتشريليش مانتحجبش ,
كي تحب بنتك تتحجب كاين نصائح وكاين قصص وكاين مواعظ باه تحببها في الحجاب, ماشي تتحجبي ونعطيك الدراهم, هادي ولات تجارة :down: , أصلا بنتك تتحجب على مصلحة وعلى الدراهم وقادرة غدوة ينقصوها الدراهم تنحيه خلاص خاطر مادارتوش على حق وعلى محبة فيه كسترة ولباس المرأة المسلمة
حاب ولدك يحب الصلاة فهمو و ديرلو قصص عن الصالحين, وخبرو بلي الفرق بين المسلم و الكافر هو الصلاة, القراية نفس الشي فهمو بلي هادا مستقبلو ويقدر بيه يقرا القرآن ويقدر بيه يقرا الجرائد ويوصل لأبعد الحدود بقرايتو, ماشي اقرالي ونشريلك
حنا بكري طرف قماش صغير نفرحو بيه , نروحو نقراو وحوايجنا مقطعين والبرد والتلج علينا ونروحو فرحانين كلي ماكاين والو , اذا قرينا نقراو لعمرنا وإذا نجحنا ننجحو لعمرنا
ودركا جيبلي وديرلي ووفرلي وإلا مانديرلكش واش حاب , كلي تهديد من ولادنا
وهادا كامل راجع للوالدين, كاين أولياء لي يقولك مانعيشوش ولادنا في القهر لي عشناه حنا
وكي عشت في القهر ولا الفقر واش صرالك؟؟ الفقر والشقا خرجو النسا والرجال الله يبارك, أصلا ماقلنالكش ضيع ولادك بالشر, قلنالك براك من التبذير وتفسد في طبايع ولادك حتى تولي تحت رحمتهم
وكاين تاني أولياء لي يقولك تحفيز, معليش تحفز ولادك وتتفكرهم بهدايا وتفرحهم , بصح كاين لي تعداو الحدود, كاين والدين والله العظيم كل نقطة تاع مادة معينة بكادو, وماش أي نوع كادو غير من زوج ملاين وروح , واشوا التمسخير هادا
والله انا نكره مثل هاد الأمور بصح قلت نزيد نشوف رايكم لربما مختلف
ولربما انا فيا خطأ , وكاين جوانب مانشوفهاش في المجتمع
نستنا آراءكم القيمة مالا تبخلوش عليا بردودكم
اتهلاو في روحكم وسلآم
