حتى المدارس و مافيهمش لامان على وليداتنا

[أم لينة]

السلام عليكم و رحمة الله و بركاته

الوقت يالحباب عاد يخوف و ماعادش لامان حتى في واحد ، حبيت نحكي على واش راه يصرا في بعض المدارس الابتدائية او المتوسطات لانو وليدك او بنتك في هاد المرحلة ينخاف عليه اكثر ما يكون في الليسي على الاقل يكونو كبرو و يعرفو لي تضرهم
تخلعت و انا نسمع في كلام و وقائع صرات في مدارس ابتدائية ، منين نحذر ابني و الا بنتي من رفقاء السوء و الا من حارس البوابة و الا من المعلم نفسو ؟؟؟؟
تخيلو في ام قاتلي انو بنتها قاتلها منزيدش نروح للمرحاض على خاطر كي نروح ليه يشوفونا تلاميذ السنة الرابعة و الخامسة و يجو لينا يدخلو علينا في الحمامات و.......
و الله تخلعت ربي يستر على وليداتنا .وين راهي الحراسة ؟
وكاين معلمين مرضى نفسيا يقومو باشياء عيب قدام تلاميذهم سواء بالقول او الفعل . هل هذا مربي اجيال ؟ شكون لي ينلام ؟؟
و نزيدكم من الطين بلة و انا اليوم نقرا في في جرائد اليوم صادفني هاذ المقال ** ندّدت جمعيات أولياء التلاميذ ونقابات التربية بالاعتداءات الأخيرة التي تعرّض لها تلاميذ ابتدائية بباب الوادي، إثر إقدام حارس المدرسة على التحرش جنسيا بالمتمدرسين، وبعملية اقتحام غرباء ثانوية بدرارية واحتجاز تلميذات...**
ياربي الواحد يقول الله لاكان قراية .
و الاسئلة لي تطرح نفسها
بعض حراس البوابات المدرسية لي اشكالهم فقط و خلي تصرفاتهم تخلع الكبير قبل الصغير شكون لي يعينو و على اي اساس يتعين ؟
و الحراسة داخل المؤسسة التربوية اين هي ؟
لكن كيما يقولو اذا صلح المدير تصلح المؤسسة بعمالها ، و اذا فسد المدير واش راح نتوقع من باقي عمالها ..
ربي يستر وليداتنا و يبعد عليهم اولاد الحرام و يحفظهم من كل شر يارب.

​

 

[السلطانة]

رد: حتى المدارس و مافيهمش لامان على وليداتنا

وعليكم السلام

صح يااختي كاين منها

لما كنت ندرّس

لاحظت امور من هذا القبيل

تلميذين في القسم يتحسسان بعضهما البعض

ولما خبرت بعض الزميلات

قالولي تسكتي خيرلك

تهدري تولي في حصلة والاولياء تاعهم ماش راح يصدقوك

وممكن تولي في شرطة وحصلة

وليت غيرتلهم مكانهم وفقطط

وقتنا صعيب صح

بارك الله فيك

 

[أم لينة]

رد: حتى المدارس و مافيهمش لامان على وليداتنا

اهلين اختي و شكرا على الاعتماد
شفتي وين وصلنا اذا ناديتي على الحق تتحقري و ماتلقاي حتى واحد في صفك من المفروض كامل المعلمين ينددو لمثل هاذ التصرفات و يديرو حاجة كتنبيه على مثل هاذ الشريحة من التلاميذ باش ميعاودوهاش .
ربي يبعد علينا .
شكرا على مروروك و تعقيبك اختي الغالية .

 

[السلطانة]

رد: حتى المدارس و مافيهمش لامان على وليداتنا

اهلين اختي و شكرا على الاعتماد
شفتي وين وصلنا اذا ناديتي على الحق تتحقري و ماتلقاي حتى واحد في صفك من المفروض كامل المعلمين ينددو لمثل هاذ التصرفات و يديرو حاجة كتنبيه على مثل هاذ الشريحة من التلاميذ باش ميعاودوهاش .
ربي يبعد علينا .
شكرا على مروروك و تعقيبك اختي الغالية .

الامور هادي خطيرة جدا في الميدان الدراسي
وراكي شفتي الناس اليوم كيفاه ولات
تروح تنصح تولي انت الغالط ويكذبو ك
كاين اولياء تاني ربي يهديهم برك
يكذبك في وجهك ويطلع ابنو بريء
علابيها الناس تخاف تهدر.
ربي يستر.

 

[mà_dikrà]

رد: حتى المدارس و مافيهمش لامان على وليداتنا

السلام عليكم

حنا عندنا مدير إبتدائية غلط بحق التلاميذ تاعو وفقنالو غي السنة لي فاتت
وبنتو صاحبتي مسكينة كي سمعت بالخبر تصدمت بزاااااف
والابتدائية بحي بعيد علينا منعرفهاش مي يسكنوا بحذانا
الله يستر والله يهدي ويغفر

أخلاق لا تليق بمسلم !

مشكورة

 

[Salam Fleur]

رد: حتى المدارس و مافيهمش لامان على وليداتنا

السلام عليكم

شتي و الله ولينا في غابة ...حنا في جيل مدير مدرسة ابتدائية اعتدى على تلميذتين تاع السنة 2 ابتدائي ..... و كاين معلم مدرسة قرانية اعتدى على طفل في عمره 6 سنوات .........

و الله شعرك يوقف وين رانا عايشين ... كيفاه رايحين نربيو ولادنا في الغابة هاذي ..... و الله ربي يستر .... و الله قلبك يوجعك ... حسبي الله و نعم الوكيل .....


اما حكاية الاولياء تقولهم توله لوليدك يولي يقلبها عليك .. هاذي صرات في متوسطة ... استاذة قالت لوالدة واحدة من البنات تتوله لبنتها لانه راهي تمشي في طريق ماشي مليحة .. الام هاذيك كذبت الاستاذة فاتو ليام ... و جا يوم الفضيحة ....... مدير المتوسطة حكم بنتها و طفلة اخرى في وضعية مخلة بالحياء .......... ماشي فضيحة للطفلة حتى حنا مجتمعنا الله يبارك حكاية يفوت عليها دهر ماينسوهاش يقعدوا يحكيو فيها لاجيال

ربي يسترنا و يستر وليداتنا

شكرا على موضوعك القيم

تقبلي مروري​

 

[لؤلؤة قسنطينة]

رد: حتى المدارس و مافيهمش لامان على وليداتنا

السّلام عليكم
موضوع قيّم أختي, ربي يحفظلنا ولادنا اجمعين ان شاء الله
والله وقت يخوف وخاصة كيما قلتي الإبتدائي مازالو لولاد مايعرفوش صلاحهم
ماش كيما تاع الليسي على الاقل واعي شوي
ونشفى عليها العام لي فات لا ماكدبتش دارو حصة في التلفاز على الأولاد الصغار لي يقراو في الإبتدائي واش راهو
صاير فيهم من اعتداءات وغيرها
كاين لي داخل فيها معلمين وكاين لي داخل فيها حراس المدرسة
لأني شفت في هاد الحصة, حارس مدرسة شاب في العشرينات ماكانش طفل من المدرسة إلا واعتدى عليه
وهذا طبعا بمعاونة من المدير , يعني كي نهدر عليهم برك قلبي قريب يتقيا حاشاك
نحشم ونعاف نسميهم بشر, اذا طفل براءة مارحمتوش شكون لي ترحم مالا؟؟
اذا قلبك ماحنش على طفل صغير يسما راك حجرة بالنسبة لياو بالاك الحجرة أرحم
يعني واش نقولو غير ربي يهدينا, ودرك وصلنا قريب طفل عمرو 4 شهر نحذروه لدرجة نخافو من الواقع الموحش لي عايشينو
بارك الله فيك اختي على الموضوع القيم
تحياتي لك​

 

[Hakan]

رد: حتى المدارس و مافيهمش لامان على وليداتنا

كي نقرى مواضيع كيما هذا قلبي يخرج
لكن لكل الاشيااء سبب ونضن سبب الهيجان الجنسي لبعض
الوحوش او لكثير من المسلمين اليوم هو هاته الموااقع
التي تنشر الاباحية بكل انواعها يعني وااش تستناي من حارس بوابة عندو هاتف
مليء بالفيديوهات الخليعة
واش تستناي من طفل صغير في عمرو 10 سنوات يتفرج مع خوه الكبير
افلاام خليعة اللي تحبسلك راسك وقلبك
ربي يبعدنا عليهم و يبعدنا من هذو النااس
واله الامور عادت تخوف الشذوذ الجنسي لعدد معتبر من الجزائريين
راهو يخوف يابن عمي الكفاار وما تلقااش عندهم واش راهو صاري عندنا ربي يستر برك .. ويحفظ خاوتنا..​

 

[أم لينة]

رد: حتى المدارس و مافيهمش لامان على وليداتنا

شكرا اخوتي على ردودك كلها تصب في ايطار واحد كلنا خايفين على اولادنا خاوتنا الصغار اذا ولات مؤسسة التربية و التعليم يعني تربي قبل ما تعلم ..منديرش فيها لامان على وليدي وين لامان يكون اذا ؟؟؟
راه التسيب و من هب و دب يدخل للمؤسسات التربوية نحى عليها هذيك الحرمة و الوقار و الهيبة و اكيد راح ينجر عليها واش رانا نشوفو و نسمعو الان .​

 

[Perle Blanche]

رد: حتى المدارس و مافيهمش لامان على وليداتنا

السلام عليكم
الصلاة و السلام عليك حبيبي يا رسول الله
أين أنت من غريزة الأمومة قبل أن تكوني ولية تلميذة ؟؟؟؟؟؟؟
أين أنت من تلك الغزيزة التي يجب أن أدافع عل إبني ليكون حقه اليوم هو بيدي و ليس بيد غيري
أين أنت من القيام بحملة تندد ما يحدث؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الا نتوماا محكيتوش شكون يحكي الا نتوما فلاذات كبادكم مقدرتوش تحكو عليهم شكون يحكي عليهم
أين جمعية أولياء التلاميذ من القضية؟؟؟؟معليش الجمعية مجابتش حقي أنا نجيب حق ولادي
إستفزني الموضوع صراحة لأان نقلك انا بصراحة عارفة بلي احساس وحدة عازبة مش كي احساس وحدة أم
صراحة حوايج كيما هاذي متستناش منكم تكتبو مواضيع لأانو القلم ميعالجهاش
روحي في بلد غربي تلقاي كامل الامهات متضامنين مع ام وحدة و يخرجو للشارع و يديروو حاجة تلفت
يعني و اسمحيلي مش قضية لازم تتعالج هناا قضية راهي مسؤوليتكم كأولياء مش تخافي تبعثي وليدك يقراا
نبعث بني يقراا و كي تصرا حاجة منلقاش روحي وحدي فيها نلقاا كامل امهات الجزائر معاياا
قالي و قتلك هاذي معندها مديري صراحة
تقبلي مروري
​

 

[Perle Blanche]

رد: حتى المدارس و مافيهمش لامان على وليداتنا

صلاح المجتمع من صلاح ألاسرة يعني ربي نتياا وليدك مليح تلقاي المليح و تلقاي وليدك الحاجة اللي صرات يقلهالك مش وليدك يتعرض لتحرش جنسي نتياا فالدار اصلا معرفتيلوش معتى التحرش الجنسي و من بعد تجي تبكي و تقولي وليدي و بنتي
ايه كونو شوية منطقيين _هاذي راهي اصلا داخلة في أساسيات التربية يا ختي
كاين حالات وين الطفل يكون اكثر امانا في المدراس مش فالبيوت يعني بكل بساطة نرجع للحاجة اللولة
صلاح ابنك نابع منكم _كأسرة_نقطة إنتهى
​

 

[أم لينة]

رد: حتى المدارس و مافيهمش لامان على وليداتنا

اهلين اختي و شكرا على ردك .
انا اولا بنتي مازالها صغيرة على المدرسة عمرها 3 سنوات فقط و كي تدخل للمدرسة ان شاء الله راح نكون عليها و ابوها بحسبة ألف رقيب يا أختي العزيزة ربي يقدنا على ذلك بحول الله . انا بوضعي للموضوع كتحذير فقط ربما البعض من الاهل غافل عما يحدث ..وهذا لا يعني انو كامل مدارسنا فيها الفساد .
و ايضا لاتقارنيننا بالغرب لانو العقليات تختلف هل تصرا انو ام عندنا تخرج وحدها و دير احتجاج ؟ هذي بلادنا و منغطوش الشمس بالغربال . اذا ام صرا و بنتها اعتدى عليها احد جنسيا في المدرسة راح ترفع لافتات في الشارع ؟؟؟
ماناش اهل الاختصاص لنضع الحلول لمثل هذه الممارسات . و يد واحدة ما تصفق و شكون لي قالك بلي الامهات مش يشكو ؟ اولياء التلاميذ راهم يديرو لي عليهم لكن اذا المؤسسة في حد ذاتها غطات على المسألة كيما نقولو تكاموفلي الحالة ماعندها مادير الام او الاب ..
نحن هنا يا اختي من خلال مواضيعنا نسلط الضوء على مايحدث في الجزائر العميقة و اضعف الايمان انا نحكو على واش راه يصرا في بلادنا ...و اعتبريها رسالة توعوية.
على العموم شكرا على مرورك اختي .
​

 

[Perle Blanche]

رد: حتى المدارس و مافيهمش لامان على وليداتنا

ما يحدث في الجزائر هو من صنعنا يعني حنا كشعب مناش نغيرو و نلومو في بعضانا كل واحد راه يلقي المسؤولية على خوه
حنا من بكري منتقارنوش فالغرب في اي حاجة انا عطيتك مثال و ايه و علاه عيب و لا عار كي تكون قضية تحرش جنسي تخرج كل الامهات ؟؟؟؟؟؟؟

و نزيدك المؤسسة متقدرش تغطي كي تكون جمعية اولياء التلاميذ واقفة صح قوليلي كي متحبش الجمعية الحكاية متخرجش للعلن نقلك هنا اعرفي بلي المشكل في ذيك الجمعية
أنا منيش ضد تسليط الضوء أنا فكرتي واضحة شفتي يد وحدة متصفقش كي تكون القضية راهي تعني وليد فلانة المهم مجاتش في وليدي أنا هاذي هي_يعني الجمرة تحرق مولاها_
الرسالة التوعية تاعك لازملها ناس فالميدان مش الناس كامل عندها نات مش الناس كامل راهي رايحة في ديارها هنا و نكتبو
خلاص روحو للمدارس الريفية لأصحاب الريف الناس الزواولة اللي متعرفش وعيوهم خبروهم وصلولهم الفكرة
:regards01:
​

 

[لؤلؤة قسنطينة]

رد: حتى المدارس و مافيهمش لامان على وليداتنا

اسمحولي على التدخل في الموضوع
فقط كتعقيب على رد الأخت perle blanche
حبيبتي نقدر الخوف تاعك والغيرة على هاد الأطفال, بصح ختي لعزيزة
راهم من ديارهم يهزو لولاد ويخطفوهم فمابالك بالمدرسة ؟
شفت مرة حصة في التلفاز, الأب يوصل ابنو ماش لباب المدرسة, لداخل القسم, ولا نهارالإبن راح للمدرسة وحدو
مسكين يخلي خدمتو ويروح يوصل ولدو, بصح بنو تعرض للتحرش الجنسي, قوليلي وينهو دور الأب هنا؟
يدخل يقرا في القسم مع بنو ولا كيفاه؟؟ اذا المدير مديار رايو و الحارس مداير رايو في ملائكة عمرو 5 سنين
قوليلي واش دور التربية هنا؟؟ اصلا راهو في مكان تاع تربية واش نزيدو كتر من هكا
ونتي قلتي الناس توقف ودير حملة, صدقيني كاينة عائلة رفعو دعوة قضائية على شاب اعتدى على ولدهم صاحب الست سنوات
وبحكم المعتدي ولد شخص غني وعندو مكانتو في البلاد, خرج هو لي عندو الحق والطفل مسكين راح فيها
قوليلي واش يديرو الوالدين هادو مساكن لي لقمة تاع نهار قريب يتحرمو منها ؟
داوها غير دموع , هنا مانقدروش نلومو الأولياء, اذا كانت المدرسة فيها خطر كاشما بقا؟
يديوهم للاسواق خير مالا
سامحيني على التدخل حبيت برك نضيف هاد الكلمات
تحياتي​

 

[Perle Blanche]

رد: حتى المدارس و مافيهمش لامان على وليداتنا

بصح بنو تعرض للتحرش الجنسي

التحرش الجنسي ميصراش في يوم و تخلص الحكاية الضحية راهي تكون مقدمات باينة
ارجعي لتعليق درتوو قلت كي يتعلمو لولاد واش هو التحرش الجنسي تماا انا نقدر نبدل رايي
ايه اكيد نحكي على التربية وليدك كي نتياا تصاحبيه كي نتيا تكوني هو بشكل مصغر يحكيلك على كل حاجة وحدك وحدك رايحة تعرفيي حووايج مسبقة
​

 

[أم لينة]

رد: حتى المدارس و مافيهمش لامان على وليداتنا

يعني انا لم افهمك اختي العزيزة لي قلقك هل لاني كتبت على هذا الموضوع ؟ لست انا اول او آخر واحدة راح تكتب على هذه المواضيع . ونزيد نقلك محال ام جزائرية تشيع على بنتها او ابنها انو اعتدي عليه جنسيا و امام الملا .. هذا مش حل ..
ما اردته من خلال كتابتي لهذا الموضوع ان اوصل فكرة انو نأخذ الحيطة و الحذر على صغارنا و لازم يكون في تواصل دائم بين الاسرة و المدرسة ، و اكيد تربية الطفل داخل البيت و اشدد على التربية الجنسية يعني اني مثلا نقول لبنتي او ابني انو انا امك الوحيدة لي لازم نشوفك عريان فقط و لااحد عندو الحق انو يشوفك ، و لازم تحكيلي اذا مسك اي شخص في اعضاءك الجنسية و اشياء من هذا القبيل و اكيد نشدد على الزيارات الدورية لمدرسة ابنك ..
يعني باه نتفاداو واش راه يصرا في المدارس لازم تكون فيه خطط تربوية من قبل المؤسسة في حد ذاتها او مديريات التربية لتسليط اشد العقوبات اذا حصل مايضر المصلحة المشتركة و الهدف الاسمى من التربية و التعليم و تكون المدرسة كالبيت الثاني فيها الامان على اولادنا .
هذا فقط الرسالة التي اردت ان اوصلها يا أختي .

 

[لؤلؤة قسنطينة]

رد: حتى المدارس و مافيهمش لامان على وليداتنا

ختي لعزيزة, نوافقك في هدرتك, التوعية من الوالدين لازمة
هاديا لنقطة ماكانش فيها اشكال, بصح هاو حكالك ولدك وسمعتيلو ولقيتي صح راهو يعاني
ومن بعد؟؟ تروحي تشكي؟؟ على من تشكي وضد من تشكي ووين تشكي؟؟
تشكي فيبلاصة الرشوة مدايرة رايها, انا نقولك ناس ولدهم عمرو 6 سنين يعني كي نقول ست سنين تجيني الدمعة
ورفعو قضية ضد المعتدي ووقف ضد العدالة وخرج براءة
ووصلت تى زاد جاهم الشاب المعتدي للدار وقالهم" راكم مادرتو فيها والو "
قوليلي وينو الحق؟؟ ويني التربية؟ ويني التوعية تاع الوالدين
ربما صح نقولو لازم الوالدين يوعيو ولادهم ويصاحبوهم
بصح راهم في مكان تعليمي ماش في سوق
يعني راهي مهرودة من فوق خلاااص​

 

[Perle Blanche]

رد: حتى المدارس و مافيهمش لامان على وليداتنا

يعني انا لم افهمك اختي العزيزة لي قلقك هل لاني كتبت على هذا الموضوع ؟ لست انا اول او آخر واحدة راح تكتب على هذه المواضيع . ونزيد نقلك محال ام جزائرية تشيع على بنتها او ابنها انو اعتدي عليه جنسيا و امام الملا .. هذا مش حل ..
ما اردته من خلال كتابتي لهذا الموضوع ان اوصل فكرة انو نأخذ الحيطة و الحذر على صغارنا و لازم يكون في تواصل دائم بين الاسرة و المدرسة ، و اكيد تربية الطفل داخل البيت و اشدد على التربية الجنسية يعني اني مثلا نقول لبنتي او ابني انو انا امك الوحيدة لي لازم نشوفك عريان فقط و لااحد عندو الحق انو يشوفك ، و لازم تحكيلي اذا مسك اي شخص في اعضاءك الجنسية و اشياء من هذا القبيل و اكيد نشدد على الزيارات الدورية لمدرسة ابنك ..
يعني باه نتفاداو واش راه يصرا في المدارس لازم تكون فيه خطط تربوية من قبل المؤسسة في حد ذاتها او مديريات التربية لتسليط اشد العقوبات اذا حصل مايضر المصلحة المشتركة و الهدف الاسمى من التربية و التعليم و تكون المدرسة كالبيت الثاني فيها الامان على اولادنا .
هذا فقط الرسالة التي اردت ان اوصلها يا أختي .

أنا منعرفكش باه نتقلق منك و لا علاه كتبتي الموضوع
موضوعك أختي _أم لينة_-بقلم '''أم''' -يعني هذا لي خلاني نكتب أكثر من رد
راكي عارفة و أحسن مني الأم كي يتقاس ولدها واش دير قادرة تستعمل قوى الخير و بلاك قوى الشر أكثر باه تحميه
ردك هذا الأخير كان لازم يكون جزء من الموضوع و لا نقلك مش جزء كان يكون لب الموضوع تاعك
:regards01:
​

 

[Hakan]

رد: حتى المدارس و مافيهمش لامان على وليداتنا

ملخص الموضوع
شويا من الحنة وشويا من رطابة اليدين
يعني الوالدين يربيو تربيتهم ويحذرو ابناائهم
وكذالك اخذ الحيطة والحذر
مالغري كاين فساد مي كاين ناس اخير هذي ما لازمش ننساوهاا
يعني الاعتداء على الاطفاال حاجة
وممارسة الاطفال للفعل مع بعضهم البعض حاجة
رفع الدعوة لازم في حالة وقوع الفاس على الرااس
وفي الاخير ربي يحفظ اولاد الجميع ورااكم كاامل في نفس الطريق
واللي هو طريق الحرص على الابناء والخوف عليهم ...بارك الله للجميع
يغلق الموضوع خخخخخخخخخخخ ​

 

[أم لينة]

رد: حتى المدارس و مافيهمش لامان على وليداتنا

صحيت حكيم و لؤلؤة نوافقكم و نقلك انا كأم ندير لي عليا معنديش العصا السحرية و راح نغير واش راه يصرى في بلادي من خراب و هاي مدارسنا مسها ايضا هذا الخراب . انا نقوم بكل مانقدر عليه باه نحمي ولدي و انت تخدمي مع وليدك لي تقدري عليه و هو ايضا .هذه الرسالة لي حبيت نوصلها من خلال موضوعي .
وراكي قلتيها راهي خاربة من الفوق .