صبآح الخير وان شاء الله كامل راكم بخير !
هذا الموضوع جاني قبل البارح في الليل كي كنت رايحة نغفى حلاتلو يقلقني في راسي
واليوم وين كتب ربي نكتبو مي معرف علاه كي تحطيت نكتب الموضوع راحولي الكلمات
المعبرة لي جاوني المرة اللولة كي كنت رايحة نغـفى خخخ
المهم حبيت نحكي على زعمة ليطا الجديد لي وصلت ليه لبلاد بعد الفوضى هذي تاع
التقشـف وما تقـشف وما فهمنا صح رايحة تخلـى لبلآد ولا جـuـست باه يلقاولنا عذر
ويلقاو جوآب لـسؤال: وين راحو دراهم الشعب !!
درك ولينا كل ما نوضوا الصباح ونشوفو الجرنان ولا المواقع نلقاو تقريبا نفس العناوين
- الدينار يواصل تقهقره { 200 دج = 1 أورو }
- أسعار النفط تتواصل في الانهيار
- وزير الموارد المائية: سنزيد في تسعيرة الماء وسيستفيد المواطن
من الماء مرة كل 3 أيام
واللخرة فيهم باه تكمل علينا أو قاللكم بوناطيرو راه متوقع زلزال عنيف على شمال الجزائر
شغل منين تدور تلقى Sujet واحد يحكو عليه في الإعلام وفي الشارع وفي المواقع حتى
ملينا وكرهنا وولينا نتخيلو بلي قادرين نباتو وما نصبحوش !! {قادرة تصرا بقدرة ربي}
بصح كي نشوفو الشي هذا ونشوفو المقابل تاعو واش دارو؟ نلقاو بلي ما دارو والو !!
من غير/ - يخفضوا الأجور ويزيدو الأسعار والدينار أو غيرو طايح هات ما يصراش تضخّم برك
زعمة تقشـّف بصح/
- بما أنو ربي غضب علينا وحرمنا من الشتاء السنة يعني الشمس الله الله عليها ديما مضوية بصح
تعلي راسك تشوف ليكليغاج pـيبليك شاعل !! في الشتاء وقت كانت مظلمة الحالة وماكانش تقشف
ما كانوش يخلوه شاعل !! { بصح رانا تقشّف}
- زعمة رانا شايحين وكون ما لطفش ربي بزغبات تاع مطر كانو رايحين يعلنو الجفاف بصح منين تمشي
تلقى الماء يسيل لي فويث معبيين لرض والماء يخرج من لرض وما يسيلش من العين { بصح رانا تقشّف
ورايحين يزيدولنا في تسعيرة الماء ونستفادو منو مرة كل 03 أيام} !!!
- زعمة الدراهم ماكانش بصح خصتنا في الجزائر دار أوبرا أم راهم يديرولنا فيها كيما طلبنا منهم !!!
نروحو للشعب زعمة واش راهو يدير في أزمة التقشّف
- والله ما علابالو بالدنيا مازالو يشري الصباط بـ 5000 دج ويضرب الحطة الطوطال تاعها
قريب 5 ملاين وعادي ما مكسرش راسو
- مازالو ياكل ويشرب ويصرف كيما كان ونعلبوه تقشّف كان تهردت تتهرد عالكل وكان منعنا
يطلع ما حرمش روحو من اللول
- باقي داير لايك على لي pages في الفايسبوك تاع السياسة لي فيهم غير الأخبار لي تعيي
باه يطيح فيهم في وجهو عالصباح ويفرغ غشو فيهم بكاش تعليق ولا زوج يكون لاباس تحسنت
نفسيتو بعد ما عبر على شعورو يخرج عند صحابو يشوف واحد من صحابو من بعيد هيا يشاورلو
ويتبسم معاه ويكون كاش صحفي ولا في طريقو يحكمو بالعدسة تاعو يتبسم يدير بيه إحصائيات
ويدي مرتبة " أسعد شعب" ونوغمال !!!
وقت الأزمة الاقتصادية في أمريكا ما حكاوش عليها أبدا كانو في الإعلام يبثولهم غير لحوايج
تاع التفاءل والأمل والفرحة باه ما يدمروش نفسية الشعب تاعهم ويتعاونو مع بعض ويفوتو
الأزمة مي عندنا احنا لعرب تغلط أزمة وتجي في الطريق: الجرنان بأسمائه يحكي غير عليها
الأخبار في التيلي غير عليها وشوية هك يديرولك مسلسل وفيلم يحكي عليها وكي يخطوك
هذو تدخل للفايسبوك تلقى لي باج في وجهك يدمروك مورالك وكي تطيش عليك التكنولوجيا
تخرج برا تفوت على القهوة تسمع عمي عمّار بصوتو الصادي يحكي على نفس الشي !!
المهم حبيت نقول احنا مازال واقفين والحمد لله لي الدنيا بيد ربي
حبيت نقول الضغط عاد كبير علينا ولازم نكونو واعيين وما نتهوروش
حبيت نقول بلي الجزاير راهي تاع الشعب وبرك وبيدو يحافظ عليها ولا يضيعها
حبيت نقول ربي يجيبلنا الخير ويبعد علينا الشـــر / ...
وحبيت نعبر شوية على شعوري وعبّرت
وسلآمي للجميـع
