والله راني نكتب والدمع في عيني علاخاطر تفكرت جدي لي نحبو بزااااف الله يرحمو ويرحم هاذوك ليام الزينين ، كيما كنا نعيشو في بيت العايلة الكبيرة جد وأعمام والأطفال ، وكان جدي شيخ معروف بزاف بذكائو وكان كيما يحكي يظحك الجمايع كامل يحبوه ويحبو يسمعو كلامو "وشحال توحشتك يا جدي" وكان جدي يديني معاه كيما تكون كاينا *زردة* وهذا هو موضوعنا ،، كنت نروح معاه ونجي بلا مانعرف واش راهوم يديرو حتى كبرت عرفت ، لكن نتفكر مليح كان يروح مع الشيوخ وعمي و..و.. في منطقة جبلية يعني معارفو ويكونو جمعات كبيرة ، النسا يطيبو والشيوخ مجتمعين يشطحو ويغنو وكان رقص البعض ماشي نورمال كي كنت نسقسي يما وانا صغيرة تقول لي -هاذوك يطيحو في الحضرة - مانفهمش علاه ... علابالي بالاك حرام بصح انا نحكي واش كنت نشوف يشطحو ويغنو ، ومن بعد كامل يتلمو باه يتعشاو كامل الرجال يدورو بقصعة واحدة معمرة طعام وجاج ، وهاذي بالاك من أجل أولياء الصالحين ، ويبقاو سهرانين حتى الليل ومن بعد كل واحد يروح لدارو وانا نروح مع جدي العزيز للدار ....
المهم اذا كان هاذ الشي حرام نطلبو من ربي يسامحهوم ويغفرلهوم ، بصح يبقاو يامات شابين بزاف عمري ماننساهوم.
المهم اذا كان هاذ الشي حرام نطلبو من ربي يسامحهوم ويغفرلهوم ، بصح يبقاو يامات شابين بزاف عمري ماننساهوم.
