رد: رجال حقارين ............. ارواحو تعرفو علاه
سلام عليكم
~
وشراكي ختي ؟
ندور ندور ونلقا روحي دخلت لمواضيعكك
ماشاء الله عليك
انا للأسف معنديش ومرزقنيش رب بأخ سواء كبير أو صغير ..رغم اني كنت نتمنى هاذ الشي
وفعلا لاحظتها عند صديقاتي ولا زميلاتي
في كل مرة نتطرقو لهذا الموضوع ونقولهم تمنيت يكون عندي أخ ..يقولولي هبلتي؟او عندك الزهر أو تهنيتي
وانا شفت هاذ الظاهرة عند اغلب البنات..
سواء من خلال العايلة ولا الوسط اللي نعيش فيه..لانو كيما تعرفي الرجل الشاوي معروف بالقسوة شوي وصعيب وواعر ونادرا ما تسمعي منو كلام مليح مقارنة بالآخرين
لاحظت انو الاخ حتى لما يبغي حاجة من ختو يقولها "اثاي" ولا "آشم" بمعني .."نتي"وكانو معندهاش اسم!
واللي لفت انتباهي تاني وحدة من العائلة..من كثرة ما اخوانها واعرين معاها ويعسوها على الطالع والهابط ويشكو فيها لدرجة قادر واحد فيهم يفوت عليها يضربها بلا سبة..رجعت دير حوايج ممنوعين عليها زكارة كيما نقولو
وكي سقسيتهت قاتلي "كي كنت عاقلة وخاطيني محبوش يصدقوني..ملا خلي ندير رايي" لانو في كل الاحوال رح نلقى نفس المعاملة +دارت رخصة السياقة بالسيف عليهم
والحاجة لي تغيض فعلا انو لما تزوجوا تغيرو تماما..طبعا مع نساهم فقط وقبل الزواج كانوا يهددواينددوا بحجة رح يديرولهم الجلباب ويحبسوهم فالدار و و و ..والنتيجة كانت العكس ..ووين وصلت بيهم الوقاحة ..منعو اختهم تكمل ماستر فقط لانو زوجة واحد فيهم ماعطاوهاش ماستر !!يعني اذا هي حبت تزوج وخيرت الزواج علا لقراية فما ذنب الاخيرة !!ختى انها ولات تهدد بالهروب من البيت
وبالمقابل..كاينين اخوة فيهم الضو ..وهم يعدون علا الاصابع..تلقايه يعامل اختو مليح فواش يقولو عليه لخرين ؟!!مهوش راجل !!
وفي كلتا الحالتين..انا نقول للبنات اللي عندهم اخوة احمدو ربي لانو عندكم كنز ترفعو فيه راسكم وعكاز تستندو عليه اذا قسات عليكم الدنيا ولا غابو عليكم والديكم لا سمح لها
انا والدي كي كان يسافر بكري كي كان يخدم كنا نجوزو يامات رعب والدار ما تسوا والو بلا بيه
كان جارنا هو اللي يطبطب علينا يسقسينا كشما بغينا ..جمع ما بين صفات الاب و الاخ والام والجد وكولش ..واعر كيما واعرين معاكم خاوتكم لكن جامي كرهناه..لانو كل ما كان واعر معانا حسينا بحنانو اكتر
عندو غير بنات وفي حياتو..ولا مرة في عمرو تبعنا ولا عسنا لانو عرف وش ربا..وبنت الاصل متوصلش روحها للضرب...صحيح فرض علينا حاجات خوفا علينا..وتنازلنا علا احلامنا لارضائه
لكن ربي سبحانو قادر يعوضهالنا فحاجة اخرى
وصدقيني قبل لحظات فقط من قراءتي لموضوعك كنت نبكي لانو خرج من الدار زعفان
فما بالك لوكان يغيب علينا لا قدر الله!
آسفة ربما خرجت عن الموضوع لكن حبيت برك نبين بلي الاخوة علا اختلاف طبوعهم وعقلياتهم..رح يجي نهار وين يوليو في مقام الاب...ورح يزوجو ويجيبو بنات وولاد..وبنتو رح تشوف وتعيش نفس اللي عاشاتو اختو
وفي نفس الوقت موضوعك رسالة لاعضاء اللمة لمن عندو اخت..يحسن معاملتها لانو البطن اللي حملاتو كانت اخت لاحدهم ذات يوم..ورح يتحاسب يسأل عليها يوم القيامة
تحياتي
