كيف اتعامل مع الامر ؟؟؟؟؟؟؟؟

[مشكلتي]

السلام عليكم

اود طرح مشكلتي التي اتمنى ان تساعدوني ببعض النصائح من اجلها

بعد 5 سنوات من الزواج انجبت فتاة بصحة جيدة والحمد لله

ابنتي سمراء البشرة تماما مثل والدها مع العلم اني بيضاء البشرة
هذا الامر صار يزعجني اجل
ليس لكون ابنتي سمراء بالعكس فاني اراها جميلة جدا واحمد الله على نعمة الصحة والعافية
المشكل في بعض الناس من العائلة مثل ام زوجي
دائما تسخر من ابنتي وتنعتها بالكحلة
لان بقية احفادها بيض وابنتي هي السمراء الوحيدة بينهم
صارت تستغل كل فرصة تكون فيها العائلة موجودة لتذكرني ان ابنتي سمراء وابنتي الان عمرها عامين
اشعر انها لاتحب جدتها
فكلما راتها تقول لها الكحلة منين جابوك ويديك واش كحولا
تعبت كل مرة هل من الضروري ان تعيد الامر امام العائلة

اخاف ان تكبر ابنتي وتصير لها عقدة نفسية من الامر

اجيبها مرات انها تشبه والدها فتقول لي ابني راجل
وزين وبنتك ماتشبه لوالو

ساعدوني كيف اتعامل مع الامر اصبت بالاحباط
هل هي مشكلة ان اكون بيضاء وابنتي سمراء ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
فالله من خلقها ورزقنا اياها بعد طول انتظار الحمدلله على هذه النعمة
استغفر الله واتوب اليه
​

 

[prince of love]

رد: كيف اتعامل مع الامر ؟؟؟؟؟؟؟؟

السلآم عليكم

ربي يهدي ما خلق .. في كل الاحوال هي حفيدتها


انا تبانلي الأفضل تخبار والدها بالامر هو من يستطيح حل المشكل


ربي يجعل الخير .. والصح ماشي في الزين ولا لابوتي المفيد هو التربية ​

 

[لؤلؤة قسنطينة]

رد: كيف اتعامل مع الامر ؟؟؟؟؟؟؟؟

السلام عليكم
لا حول ولا قوة إلا بالله
يعني في 2016 وداخلين بعد 6 اشهر على 2017 ومازالت الناس بهاد العقلية؟؟
الناس اي تخمم كيفاه تعيش في القمر وحنا مازلنا نعسو في السمراء والبيضاء، الاجانب تلقى واحد اسود يدي وحدة بيضاء
ولا وحدة سوداء تدي واحد ابيض وعادي خلاااااص هادا خلق الله ولا خلقنا؟ يا سبحان الله
شوفي ختي لعزيزة هاد الامورات حطيها ورا ظهرك تقول كحلة ولا بيضا ولا خضرا تدخل من ودن وتخرج من الودن الاخرى
نتي كي تصلي احمدي ربي لي رزقك بطفيلة الله يبارك الناس اي تحلم تسمع كلمة بابا وماما واحمدي ربي على الصحة
لي مدهاك لبنتك كاين لي عطاه ربي الاولاد ومراض مساكن يعني هاد الشي كامل يعتبر نعمة ويستحق تكوني سعيدة بسبتو
وبنتك نتي لي تعززيلها ثقتها بنفسها لأنو الطفلة او الطفل لما يلقى والديه يمدحوه ويقولو ولدي الله يبارك وولدي شباب
وولدي نفتخر بيه تخليها تحس بلي راكي فرحانة بيها وفخورة بيها صدقيني ماتولي تسمع بكلام الناس + ربي بنتك على
الدين والطريق الصحيح خاطر لي يربي ولدو من الصغر على طاعة الله رايح حب الله يكبر في قلبو وتولي هاد الامور الدنيوية بلا
معنى بالنسبة ليه، على هادي ماتقلقي روحك ماوالو ختي لعزيزة بالعكس اغتانمي هاد الوقت من عمر بنتك والعبي
معاها وافرحي بيها وربي يهدي ما خلق ان شاء الله المهم نتي قانعة ببنتك وتحبيها اما الناس ربي يهديهم
وربي يحفظلك هاد الكتكوتة ويجعلها ذرية صالحة ان شاء الله
تحياتي
​

 

[السلطانة]

رد: كيف اتعامل مع الامر ؟؟؟؟؟؟؟؟

وعليكم السلام
متعمريش راسك
الصحة والعافية هي الاساس ولي يعلق قولو راك تعترض على خلق الله يعني ربي لي يخلق مايشاء ماش من حقنا نعلقو ونضحكو ياعجابة ياربي عيشي حياتك ومتقلقيش روحك وربي يحفظلك بنتك

 

[نجيب]

رد: كيف اتعامل مع الامر ؟؟؟؟؟؟؟؟

مكانش حتى حل غير تصبري و تساعفيها خاصة الى هدي امراة كبيرة فالسن

الراجل ميقدرش يلوم أمه الا ادا استعمل دكائه و خاطبها بشيء من المزاح

ميقدرش الراجل يتخاصم مع امه على هد لكلام

حاولي تبينيلها بلي هد لكلام راه يزعجني و لا اعطيها جواب عن طريق المزاح و فقط .

عندك حق في كلامك بصح الله غالب هدي ام زوجك و بلاك كبيرة بزااف ف العمر

شكرا لطرحك المشكلة

و اتمنى ان تستفيدي اكثر من النصائح التي تقدم لك من طرف الاعضاء الكرام ​

 

[دعاء الجنات]

رد: كيف اتعامل مع الامر ؟؟؟؟؟؟؟؟

[/COLOR

راح نعطيك نصيحة وامشي بيها وراح تستفيدي باذن الله
وهي لما تلقاي عجوزتك تقول على بنتك بلي سمرا ماتبينيش روحك مقلقة تماما قدامها بل العكس اظحكي عادي وقوليلها نورمال مهما تكون هي بنت وليدك ... وبالاك تبيني روحك مزعفة ولا مقلقة على خاطر هكذا تزيد.....
ونزيد نقولك هاذي جدتها وكبيرة والطفلة ماتتعقد ماوالو تكبر وتوليلها ذكريات عادي تاع الطفولة والصغار كي يكبرو يولو يتفكرو على اساس ماضي برك وانت ماتتقلقيش ونقولك كيما يقول المثل "لولم يكن المسك اسودا لما كان يباع غاليا""" هاذي بنتك واكبر نعمة وهاذي الحادثة ماشي ڨراف يجي وقت تتفكريها تظحكي عيشي حياتك وماتعمريش راسك​

]

 

[BLEU PEARL]

رد: كيف اتعامل مع الامر ؟؟؟؟؟؟؟؟

السلام عليكم
أولا أختي مبارك عليك هذه اللؤلؤة
تتربى فعزك وتعيا وتغرحك ان شاء الله
شوفي أختي ماتديىي والو في بالك عجوزتك مرا كبيرة وتجاهليها
صراحة بنت خالي الصغيرة والبكرة سمراء وختها وبنات عمها كامل بيوضا خرجت لخالي وتشبهلو
والله صرا نفس المشكل ماني بنيتها تضحك وتقولها الكحلة دوريندا بوجبهة .....راكي عارفة ههههه
هي ذرك عندها 03 سنين ولات تقول لماماها ماما أنا صح كحلة؟!وأختي شابة عليا!زعف خالي وصرا شوي زعاف
مرت خالي غاضها شوي الحال مي تصرفت بذكاء ولات تقوللها معليش كحلة وفحلة ولا سمرة وحلوة كي التمرة
وحكمت ماني قاتلها سمعنا طفل برا يعاير فيها بواشراكي تهدري وتعايري فيها ووليدك زعف وقريب ضرب طفل الصغيرو ....كانت حيلة منها ومن عند راجلها وكانت كلما تجي تعايرها ترميلها كلمة بالصحك
وذرك والله وتقولي تعايرها وااالو ماني ماقصدهاش تذلها تحبها وتموت عليها وتنحيها من لحمها باه تشريلها قعدت هذوك لحساسيات بالمعايرة كي تهبلها نحاتهم وذرك رجعت ضحكة برك
المهم أختي ربي يهديكم كامل وماتبقاش بيناتكم هاذ النقطة السودة وكوني حيلية
ربي يوفقك....
وهذا هو الشعب الجزايري ههههه​

 

[Soumia hadj mohammed]

رد: كيف اتعامل مع الامر ؟؟؟؟؟؟؟؟

لا حول ولا قوة الا بالله ،ربي يهديها
حاولي تحكي معهاوتوصليلها ان الامر يزعج بطريقة غير مباشرة وان زادت فحاوريها
ربي يوفقك ختي
​

 

[BLEU PEARL]

رد: كيف اتعامل مع الامر ؟؟؟؟؟؟؟؟

[/COLOR

راح نعطيك نصيحة وامشي بيها وراح تستفيدي باذن الله
وهي لما تلقاي عجوزتك تقول على بنتك بلي سمرا ماتبينيش روحك مقلقة تماما قدامها بل العكس اظحكي عادي وقوليلها نورمال مهما تكون هي بنت وليدك ... وبالاك تبيني روحك مزعفة ولا مقلقة على خاطر هكذا تزيد.....
ونزيد نقولك هاذي جدتها وكبيرة والطفلة ماتتعقد ماوالو تكبر وتوليلها ذكريات عادي تاع الطفولة والصغار كي يكبرو يولو يتفكرو على اساس ماضي برك وانت ماتتقلقيش ونقولك كيما يقول المثل "لولم يكن المسك اسودا لما كان يباع غاليا""" هاذي بنتك واكبر نعمة وهاذي الحادثة ماشي ڨراف يجي وقت تتفكريها تظحكي عيشي حياتك وماتعمريش راسك​

]

لالالالالا أختي أبدا تضحكي على بنتك كي يعايروها تكون ذكية فالإجابة إذا ضحكتلهم يولي الي جا يعايرها أبدا النصيحة هاذي ماتمشيش مع مجتمعنا​

 

[دعاء الجنات]

رد: كيف اتعامل مع الامر ؟؟؟؟؟؟؟؟

لالالالالا أختي أبدا تضحكي على بنتك كي يعايروها تكون ذكية فالإجابة إذا ضحكتلهم يولي الي جا يعايرها أبدا النصيحة هاذي ماتمشيش مع مجتمعنا​

بالاك ماراكيش فاهمة قصدي... اقراي قبل مانقولها اظحكي قلت تجاهلي ياك تعرفي العجايز كي يشوفوك تقلقتي من حاجة يزيدو يديروها ويكرهولك حياتك... اما اذا اعتبرتيها عادي مهما كان راهي جدتها... هكذا بشوي بشوي تولي ماتعايرهاش... هذا الكلام كيعادت عجوزتها برك الله غالب ام راجلها وعزيزة
بصح لوكان واحد آخر صح تتبدل العقلية
تحياتي

 

[BLEU PEARL]

رد: كيف اتعامل مع الامر ؟؟؟؟؟؟؟؟

بالاك ماراكيش فاهمة قصدي... اقراي قبل مانقولها اظحكي قلت تجاهلي ياك تعرفي العجايز كي يشوفوك تقلقتي من حاجة يزيدو يديروها ويكرهولك حياتك... اما اذا اعتبرتيها عادي مهما كان راهي جدتها... هكذا بشوي بشوي تولي ماتعايرهاش... هذا الكلام كيعادت عجوزتها برك الله غالب ام راجلها وعزيزة
بصح لوكان واحد آخر صح تتبدل العقلية
تحياتي

فهمتك يا أختي لعزيزة ولكن صدقيني والله عمرو لكان الضحك حل مانيش نقولك تزبط وجهها ولكن تبين ردة فعل بلي ضد هاذ الشي مثلا تقوللها يايما هاذي لي راكي تضحكي عليها بالاك تلقاي فيها الخير علينا
ولا تقوللها مثلا بالإبتسامة والسمرة وش خصها زينة البنات! وكيما قلت من قبل تقوللها سمرة وحلوة كي التمرة فهمتي!!!
لوكان تضحك برك وتطلق روحها وتسكت راح تكون النتيجة ماتفرحش ويعيا ويولي فتان ويدورو عليها يقولوها أنت كنت ساكتة و أنت وأنت....
هاذوهوما لعجايز وتبقى تبقى حفيدتها لازم بلهقل بلعقل تقطعهالها
فهمتي أختي!
:regards01:

 

[GI Joe]

رد: كيف اتعامل مع الامر ؟؟؟؟؟؟؟؟

barkawna!! l wahed yed3i lil w nhar 3la dheria w mzel chi ness yahedrou 3la samra w baydha w sawdha :down::down:

nti l hadja li themek c bentek machi men doka 2ans mathebech djedahi w tdjik nrml, matkhalihech tet3a9ed 3la hadi, mieux vaut papaha y3ayetlha l kahloucha ta3i tefhemha que rah y3azezha que tesme3ha men 3and ness bach yblissiwha
w m3a 3djouztek ki tkounou binetkom fahmiha que maye3djebkch l hel aki 3aycha m3ha w ta3erfi kifeh l 3a9lia

( des jeunes filles zaama 9ariyet w fahmet w 3andhom had l complxe alr la 3djouz mich b yedha)

​

 

[hadil2044]

رد: كيف اتعامل مع الامر ؟؟؟؟؟؟؟؟

ابنتك نعمة من الله سبحانه وتعالى والكثير محرومون منها
ليس الجمل في البياض او السواد هذا ليس الاساس
وعجوزتك خليها تقول وش تحب
مادام هي بصحة جيدة احمدي الله ماذا يهم الجمال اذا كانت مصابة بمرض والعياذ بالله

وبنتك ما خليهاش تسمع لياسر ناس ديما خليها تعرف ماهوش السواد والبياض هو الجمال

​

 

[بقايا إنسان]

رد: كيف اتعامل مع الامر ؟؟؟؟؟؟؟؟

سلام الله عليكم ورحمة الله وبركاته وبعد:أين موضع قول الله في قلبك والذي يقول هو الذي يصوركم في الأرحام كيف يشاء لا إله إلا هو العزيز الحكيم)
وانتي مؤمنة بأن الخلق خلق الله ولايد لنا فيه
وهذي ام زوجك لما تسخر من خليقة ربي فمن الافضل تشوف لوليدها قبل ثم تحكي ياك يقولو: من شابه أباه فما ظلم
متعمريش قلبك ختي بهذي الافكار والتي تاخذ من وقتك النفيس ليل نهار
وخلي الصور لمن خلقها الواحد القهار وقولي الحمد لله الذي رزقني بفلذة كبد وربي يكبرها في حب والديها وطاعة ربها
نتمى جوابي كان وافي دمتي اختنا في رعاية الله وحفظه

 

[اسمهان25]

رد: كيف اتعامل مع الامر ؟؟؟؟؟؟؟؟

اختي الاولاد زينة الحياة الدنيا و لا تسمحي لها ان تجعلك تقنطين و قولي لها ان من السمراوات اكثر جاذيبة و ليست العبرة باللون الابيض و ان المهم ان تكبر على الدين و الطاعة فهي الدنيا و مافيها فثقفي ابنتك و علميها و اتركي سفاسف الامور لانها تدني المستوى

 

[Hakan]

رد: كيف اتعامل مع الامر ؟؟؟؟؟؟؟؟

انا لوكان جيت في بلاصتك نقولها
ما نعرف شكون جابت الكحلوش اللي جاب الكحلة هذي اللي راهي قداامك ههه
ياك تشبه لباباها
سلاام ختي معليهش راهي تكبر البنت نتاعك ربيها تربية صالحة
ودايما قوليلها انو جداتها انسانة كبيرة الله غالب عليها
​

 

[أبو عاتكة]

رد: كيف اتعامل مع الامر ؟؟؟؟؟؟؟؟

السلام عليكم .
الله اعلم .
عجوزتك تستمتع باغاضتك وهاذي الامور موجودة تقريبا في كل بيوتنا ليس بالغريب او الجديد . فلما شافتك تتنرفزي وتتقلقي ولات تعجبها الطريقة وخاصة لما يكون الحضور .
ماذا نفعل في هذه الحالة ؟ كخطوة نتفادى بها العدائية مستقبلا .

ناخذ البنت او الولد ونخرجه من هذه الدائرة اللي يكون وسطها الزوج × العجوزة . نخرج هذه البنت بعيدا بعيدا لا نجعلها تكره اي عنصر او فرد من العائلة مهما قال او فعل . لان الاقوال والافعال التي تقع بين الزوجة وعجوزتها اكيد راح يكون جلها خاطئ وانفعالي وفيه مقاصد اخرى والصح نكذبوه والكذب نصدقوه المهم ان ينتصر واحد من الطرفين باي طريقة ولو كانت على حساب الاطفال والبراءة .

لا ننمي بجهل مقابل منا الفكرة الجاهلية ( تصنيف البشر حسب الوانهم ) .
لا نغرس ولا نرسخ في ذهن البنت ان هذا الكلام صحيح مزعج وهو اهانة وتمييز وتصنيف وانه فعلا اللي تزيد كحلة او سمرة هو نقص وعيب في الخلقة .
ولاننا لا نستطيع التخلص من بعض الجاهلية الراكدة في مجتمعنا فاننا يجب ان نعتبرها اخطاء ونعرفها لاولادنا على انها جهل وضلال .

اكيد يوجد عدة حلول وطرق تعالجين بها الامر ومن هذه الطرق واهمها هو الحفاظ على نظافة تفكير وعقل ابنتك وزرع الافكار الصحيحة فاذا كان فكرها محصن فلا تقلقي عليها من العقد .

اكيد جدتها تحبها مثل الجميع وربما اكثر لانو تميزها بلون البشرة مثلا يجعل الانسان يميل الى هذا التميز وكما هو شائع في مجتمعنا السمرا محبوبة وخفيفة وحلوة اكيد تحبها لكنها تستمتع باغاضة من حولها وليس البنت بحد ذاتها . فلا تتدخلو في هذه العلاقة بالعكس لازم نرسخ الحب بين الاولاد وذويهم اذا كرهت البنت جدتها فهذا سيكون بسبب شخص ثالث ودخول تأثير اخر في العلاقة بينهما . فقط اتركوها ودعوا الامور كما هي .

المهم لا تجعلوا الاطفال وسيلة ازعاج او استفزاز او اغاضة وابعدوهم عن دائرة الصراعات والصدامات وان شاء الله لن يقعوا في عقد او مشاكل .

والله اعلم .

 

[سماح4]

رد: كيف اتعامل مع الامر ؟؟؟؟؟؟؟؟

انا صراتلي وحد العفسة على بنتي وكان عندها عام برك وكانت تحب السبابط واللبسة ولي تشوفو لبس لبسة جديدة تقلو سه سه يعني بلغتنا حاجة مليحة وتبدي اعجابها بصح هما ولاو يقلولها غيورة رغم انها عمرها عام فقط وتماداو وكثروا فانزعجت من الامر وحطيتهم عند حدهم وقلتلهم نزيد واحد يعاودها مانتفاهمش معاه ومنها حبسو ،وانتي ماتقوليهاش مباشرة لعجوزتك بحكم انها مثل امك واستغلي فرثة انو يقولها واحد من العاءلة ووضعيهم عند حدهم بتش مايعقدوش الطفلة مايحشموش يعلقو على خلق ربي زهلى الصبيان .وتفاداي المشاكل وماتقيميهمش ابدا يحوسو يستفزوك انتي ماشي الطفلة.

 

[فيتامين سي]

رد: كيف اتعامل مع الامر ؟؟؟؟؟؟؟؟

قليلها مديلي لادريس مين جابو ولادهم باش نروح نشري...متعانديهاش و تقدري متزيديش تروحي خير متعقدلك بنتك هدي هي

 

[السراج المنير]

رد: كيف اتعامل مع الامر ؟؟؟؟؟؟؟؟

بارك الله لك في مولودتك و جعلها بكرمه من الصالحات المصلحات باذنه تعالى
اما بخصوص مشكلتك فأنصحك بأن لا تبدي تأثرك بكلام الجدة و خصوصا في حضور ابنتك فقط ردي عليها بأن تحمدي الله على نعمة تمام الخلقة و اهتمي كما أسلفت أختي الكريمة لؤلؤة قسنطينة في ردها بأن تهتمي بترببتها و أن تحرصي على أن تعلقي قلبها بالله لأن الثقة بالله و القرب منه هو أصل السعادة في هذه الدنيا ..و بذلك لن تتاثر بهذا الكلام عندما تكبر لأنه كلام فارغ لا يقدم و لا يؤخر ..أعانك الله و تذكري أنه كم من جميل هو عند الله ذليل فالعبرة ليست بجمال الظاهر بل بسلامة الباطن من كل ما يخالف الشرع