بسم الله الرحمن الرحيم
السلام عليكم
جيت نهاشتاgي هاشتgاوني كامل بسباب ختي فيولا لي عرفتنا بيه خخخخ
المهم بلاكو تغلطو معايا راهي عقلية الهاشتاg هههه
قالك انا نمشي في أمان الله حتى نشوف شيء غريب يتجه الي ...
يامحاينك عجوزة بالماكياج وأي ماكياج
تشوف غير فمها سابغاتو بلون برتقالي
انا فالاول حسابتلي راهي تاكل التشينا وهو الغوجالاف ههه
زادت ضاربا صاك برتقالي وتجبد يا محاينك تلفيون ايه ايه عمرو راسكم برتقالي اللون تانيت
قالك زعما أسوغتي
عقلية الآسوغتي لابس سروال غوز مع سبيبيط غوز وتريكو غوز ويدودر بيهم
خصتهم غير الزعكة ملور يولو الميكي تاع لابونتاغغ غوز هههه
وضرك اللبسة كي يلبسوها لازملها تخطيط
الى هذا اللون يخرج مع هذا وحتى الطونوبيل لازم آسوغتي
والآسوغتي تانيت وصلت حتى لديور والديكور تاع الصالو
انا نسبغ فالدار ويما تقولي اصبر يا وليدي راح نشري شورا بهذا اللون لازم تسبغ كيما هي باش تخرج آسوغتي
كاين وحدة تكولي ماشي مزوجة وعندها الدار تدخل لدارها دوخ كلش موف اللون
الدالدوسول موف السبيغة موف الفايونس موف
الفراش تاع الصالو موف
تقولك باش يكون كلش آسورتي بصح تريح فيها شويا تولي تسوفري هههه
مي بيناتنا لو جات صغيرة فلعمر معليش نولي نعشق فالموف الله غالب الوقت يقول هكا هههه
و الناس لازملهم تخطيط باش تخرج آسوغتي يحوسو فالانترنت واش العفسة لي تخرج معا هاذي
مي عدت نشوف تاع بكري لا علاقة بالآسورتي كامل
تلقاه ضارب سروال كحل مع تريكو مخطط تاع بحرية ولا فالديور سابغ الدار خضرة وحاط زوج هيدورات وطابلا قهوية فالوسط
الدنيا وما فيها ني الآسوغتي ني يديك ني يجيبك هههه
الموضوع هذا جاني باش نكتبو على جال وليد خالتي
في عمرو عشرة سنين لبس تريكو خضر تاع وحد الميكي مصور فيه
مع بونتاكول كحل وقاعد يخزر فالمرايا
يدور منا ومنا ويستغل في روحو مليح
وانا مريح نخزر فيه
شاف فيا وقالي واش جاتني اللبسة آسوغتي هههه
قلتلو يرحم والديك واش من آسوغتي ههه
تريكو خضر فيه ميكي مع بونتاكول كحل آسوغتي
واش من آسوغتي لي فيها هههه
المهم فهمونا واش معنتها الآسوغتي هذي انا في بالي مفهمتهاش
اياو ابقاو على خير
سلام
آخر تعديل:
