اهلا وسهلا بالعم رابح
وبيك أهلا وسهلا يا أم الغالية ياسمين
هيا كي كنت صغير قولنا واش كنت ندير هههههههه تصيد العصافير ولاتجمع النمل وتعبيه في قرعة ولاتصايد القطط هههههههه ؟
فالحقيقة كنت نصيد الفراشات وأتففن في إختيار الألوان
كاش نهار عملت طوايش وديت عليها الطرايح ؟
قوليلي كاش نهاركمل و منعت ماديتش طريحة ههههه
فالحقيقة كاين بزاف طوايش ولخلاص كان على حساب النوعية ههههه
كاشما تتفكر قصة من تاع الجدات كانو يحكيوهالك بكري قولهالنا ؟
مايكون غير خاطرك*
إييييييه الله يرحمك يا جدة لحبيبة ويجمعك بجدي لحبيب الله يرحمه فالجنة ويشفعكم في بعض
كانت لحبيبة تحكينا بزاف تقريب يوميا وخاصة أيامات الشتاء والحكاية لكنت نحب نسمعها بزاف تاع بقرة ليتامى
*** بقرة ليتامى يالحبايب هي كان وحد الراجل ماتت مرتو و خلتلو طفل وطفلة مطولش وعاود تزوج بوحدة أخرى عاشت معاهم يمات حلوين حتى جابتلو طفلة وطفل وتبدلت العقلية مع زوج لولين ولاة تحقرهم وتجوعهم كل سمينة وبنينة لولادها و ليتامة الشر والبرد ولعرى ولهانة هذاك الرجل كانت عندو بقرة وهديك ليماتت كانت تقوم بيها مليه وشفات البقرة على الخير و فهذ الجوع والشر كانو هدوك الزوج يروحو يسرحو بالبقرة ويرضعو منها لحليب يرجعة لعشية شبعانين مبطبطين وهذيك لمرا ركبها جن كيفات مانعطيهم والو وراهم مرتاحين خير من ولادي دارت حيلة وبعتت معاهم ولادها يسرحو كشافوهم يرضعو من البقرة ليتامى يوصلو عند البقرة تركحلهم حتى يشبعو كيقربو ولاد الحلوفة هديك تمشي البقرة وتلوح بدفارها حتى ضربت الطفلة بدفارها عماتلها عينها وراحت تبكي لدار وهديك عشية كحلة فاتت على ليتامى وممبعد قررت لازم تتباع البقرة ولا تنذبح وكانت غالبة رجلها في القرار حتمت عليه باش يديها لسوق ويعيط يالي يشري بقرة ليتامى ينطق من بعيد واحد بصوت عالي بقرة ليتامى ماتنباع ماتنشرى كل مايروح الراجل يبيع البقرة يرجع بيها ويقولها ماحبوش يشروها حتى عرفت منو سبب وحد نهار هو مشى من وهي مشات عكس طريقو ودخلت السوق هوقال يالي يشري بقرة ليتامى وهي قالت بقرة ليتامى تنباع وتنشرى وفيها الربح الصافي ويطيحو عليه الموالة باعها ورجع لدار حزين مهموم على ولادو واش ياكلو قالك ربي حنين كريم نبتت نخلة فوق قبر أمهم ولاو ياكلو منها ورجعو رتاحو وسمنوك كيما قبل حارت لحلوفة ليهودية فيهم منين راهم يقتاتو وبعتت معاهم ولادها يشوفو واش كاين تبعوهم وهذوك زوج ليتامى جاعو ومحبوش يروحو ياكلو باش مايشوفهمش خوتهم من باباهم خافو منهم بهدرو لمهم قرب يطيح ليل وهما ضايعين بالشر من الجوع وممبعد لاف طفل لختو خلي ياكلو معانا معليش أيا راحو عند قبر مهم وشافو هذوك زوج لخرين النخلة كلاحو يديهم ينحيو تمر كيلوحو ليتامى يديهم تقرب النخلة وياكلو وكيلوحو يديهم ولاد مرت بيهم تطوال النخلة ومايلحقوش وممبعد مرة زوج عاود الطفل ترجى ختو قالها نعطوهم معانا عطاوهم *يخي يقول لمثل ولاد الكلبة كلهم جراو* خارجين لمهم في التيهوديت كلاو حبيبات وخباو حبيبات داوهم لمهم كشافت هي تلك النوعية قاتلو درك تروح تحش النخلة قالها يامرا يامرا يامرا ماحبتش تسمعلو قتلك حشها يعني حشها كان كل نهار يروح يحشها غدوة تنبت من جديد ويروحو ياكلو وهي تقولوا زيد روح حشها حتى قاتلو نحيها من لعروق منتم مازدتش نبتت النخلة* جاعو ليتامى لحبايب و تعراو ولحقتهم الهانة كتر من قبل حتى فكرت تبعدهم على باباهم نهائيا وقاتلو درك تديهم لوسط العابة هديك لبعيدة وتخليهم يهملو داهم المغلوب على أمرو طحان للغابة زعما يروحو رنحيو لعواد*لحطب*وممبعد قالهم اقعدو هنا نعدي نحش هداك العرف فالشجرة هديك ونجي راح ليهودي كي مرتو علق المنشار في جيهة الريح وخلاه يقربع ويحسس باش يقولو راه هنا بابا وهما هكاك حتى طاح الليل عليهم وخاو حبيباتي مساكن وظلامت عليهم الظلمة وذيابة تعوق و و و حوسو على باباهم من كل جيهة مالقاوهش تم عرفو بلي باباهم تخلى عليهم وسمح فيهم ومشاو لمساكن هنا هنا حتى طلع عليهم نهار وعطشو قال طفل لختو نروح نشرب من الواد ونجيبلك أقعدي هنا فوق هاد الشجرة حتى نجي كراح طفل شرب من وحد البركة تاع ماء ولا تحول لغزال ورجع عند ختو هو يقرب منها وهي تهرب خايفة حسباتو متوحش راح يكلها معرفتوش بلي خوها وهو يقرب عندها ويفرح ويهدر معاها وهي تهرب وممبعد تأكدت بلي راهو خوها وقربت عندو وتحضنتو وبكاو حتى طاحو فلرض وأنا هنا كنت نبكي كلما وصل هذا الفصل من لحكاية * وممبعد مشات بيه ومالقات واش ديرلو غير أنها تتهلا فيه وحد نهار هو يلعب ويمرح في المروج وهي فوق شجر حتى فات حداهم سلطان هديك لبلاد كان في رحلت صيد ولما رأى الغزال تتبعه ليصيده فلما رأته يقصده عيطت عليه ماتصيدوش راو خويا حتى أنتبه سلطان لصيد أغلى من الغزال وهو تلك الفتاة الفائقة في الجمال وقصدها بالكلام حتى سمع منها وسمعت منه وأتفق معها على الزواج فقالت بشرط توعدني ماتذبحش خويا لغزال وتتهلا فيه طول حياتك * راحت الطفلة وخوها للقصر تزوجت بالسلطان وتحسنت حوالهم مليح مليح .حتى لوحد نهار شافت وحد الطلاب*متسول*فايت عند لقصر شبهاتو قالت للخدام روحو جيبوه كيوصل عرفتو بلي باباها وهو ماعرفهاش دارت عليه ليام وعلى لحلوفة تاع مرتو وكلاهم لفقر لمهم معرفتوش بروحها وجدتلو خبزة كسرة ودارت في وسطها حبات تاع لويز وقاتلو ماتنفتحش شلامة حتى توضل بين ولاجد ومرتك دار كيما قاتلو وكيوصل فتحوها لقاو لكسرة والمال قاتلو ليهودية هذيك ماتكون غير بنتك فلانة قالها يامرا وين هي وين لمدتنا هذ الخير قاتلو قتلك هي بنتك لازم درك نروحو عندها , هذا مبعد ماحسبتلها مليح وعولت عليها بالشر وهزو رواحهم وراحو عند لقصر ودخلو عليها وتسامحو وهما زعما يبكيو بلخدع ومبعد ماحكتلها كلش زادت نار لغيرو في قلبها كترمن قبل وقالتلها عندي شحال مامشطلكش شعرك أرواح جنب البير هذا شميسة راهي مليحة ونفكلك شعرك وهذيك لمكلحة بنيتها حطت راسها عليها وبدات تفليلها حتى داها النوم وطيحتها فالبير . وتفاهمت مع بنتها على حوايج ديرهم كيرجع سلطان من الصيد * مشات هي و رجلها وبنها و رجعو لدارهم وبقات العورة تتبختر فالقصر رجع سلطان لعشية لقى لمرا متبذلة خلاص قالها وشبيك كحالتي قاتلو من شمس بلادكم وقالها وشبيك عوارتي قاتلو من كحل بلادكم صدقها وكمل حياتو. هديك المخدوعة لمسكينة كطاحت فالبير زيدت يعني ولدت جابت طفل وكان فالبير حنش عندو سبع رؤوس لمزية ماكلاهاش شبعام من جراين ويشرب الما من البير وهذاك لغزيل لمسكين كل ليلة يجي عن البير وينعس علابالو بلي ختو راهي تم * وهديك ليهودية بنت ليهودية شافت لغزال يقرب عند ختو فالبير خافت يتولهو منو ويفتحو لبير وتنكشف قالت لسلطان لازم نذبحو لغزال قالها يخي قلتي خويا قاتلو كنت نعزو بزاف برك كدبت عليك بصح درك نذبحوه قالها مايكون غير خاطرك مادام نتي لقلتي وسمع هداك لغزال الهدرة وعرف روحو بلي راح ينذبح زلا يروح عند ختو ويقوللها * السكاكن راهم يمضاو والطناجر راهم يغلاو ولغزيل ولد أمك راح يذبحوه , تقولو هي ولد السلطان على ركبة ولحنش بو سبع رواس على ركبة واش نديرلك يا ولد ما*علابالكم هنا كنت نبكي حتى نعود نشهق ودرك نكتب وراني على وشك البكاء* وهما هكاك حتى توله واحد من الخدامة تاع السلطان وقرب وسمع وعرف بلي كاين مرا فالبير وراح خبر السلطان وفتح البير وعرف كلش وخرج مرتو من البير وقام لفراح سبع ليالي فرح بيها وبولدو وممبعد قالها هاي واش كانت ناوية دير بخوك واش رايك فيها قاتلو نذبحوها ونبعتوها لمها فبلاصت خويا وهكاك كان الحال دبحوها وبعتوها في تليس لدار باباها وكيشافت الحمل فوق الحصان قالتلهم شوفو واش بعتتلي بني هاو الخير بدا يبان ولما فتحت التليس لقات راس بنتها ولحم بنتها مقطعة بكات وندبت حتى خلات عليها مليح وماتت ومات معاها شرها* وهذاك لغزال حوسلو سلطان على حكيم حتى لقالو دواه ورجع بنادم كيما كان وزوجو وفرح بيه وعاشو في خير وسلام * وعلاش يا أم الغالية ياسمين تعبتيني هكا*هههه* تستاهلو نتمنى يكون الأسلوب مفهوم برك*
نتمنى لك إقامة طيبة.
الله يطيب مقامك ويعلي شانك ويقوي إيمانك
