طفولتك أيها العضو/ة اللماوي تحت عدساتنا(العدد التاسع) رابح66

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

صباح الخير
مساء الخيرات والبركات
وش احولك عم رابح ان شا الله تمام
والله نحمد ربي ونشكره وفرحتي كبيرة خويا نجيب الله يبارك له
مسكين كمال من كتر الغيرة حب يرجع بوبي بلاك يلقى شويا اهتمام ههههه
هههههههههههه شفتي غيرة من نوع خاص
راني زدت جبتلك شوية اسئلة
مرحبا بيك وبما حملت

عطينا الالعاب لي كنت تحب تلعبها برا ؟ وكاينين بزاف علابالي ههه
زيادة على التي ذكرتها قبل هناك لعبة الخبيز نلعبوها بالرجل وتقتصر على العد من يحطم الرقم القياسي في العدد قبل أن تسقط في الأرض
اول نهار صمتو شحال كان فعمرك ؟وداروك زردة ولا والو ؟
الله أعلم تطوعت في 10 سنوات وصمت في 12 سنة ماعندناش حنا الزردة بصح كاين إهتمام من طرف الوالدين والمحبب غليهم من العايلة والمقربين مثل يشريولك حاجة تفطر بيها وممكن يكبرولك سهمك في المائدة والأكثر من هذا الإهتمام والفرحة تحس روحك راك عريس*هههه
حققت بعض من احلام الطفولة ؟
لا كان حلمي في الطفولة نتزوج نادية بنت خال بابا وماكتبتليش *هههههههه* كنا في نفس العمر
وش هي الهدية لي مدوهالك ومزلت متفكرها ؟
ممكن كانو بعض الهدايا العاديين أما الهدية المعتبرة لتبقى في الذاكرة مكانتش ممنوحة في ذاك الوقت
كنت تروح مخيمات صيفية ولا والو ؟
لا أبدا
وش كانت هوايتك من غير صيد الفراشات ههه
كنت من غير الفراشات أنصب الفخ للطيور وأذبحهم وأريشهم وأشويهم أمممم لذة مازلت استطعمها لليوم

نزيد نتفكر ونرجعلك
زعما تتفكري ولا راك كاتبتهم في كناش وتخرج غير بلعقل*ههههه
مرحبا بيك وفي إنتظارك
تشرفت بأسئلتك وحب معرفتك

تقبلوا تحياتي

 

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليكم اخي رابح
وعليكم السلام أختي خديجة
حبو يرجعوك للصغر هههههه حبيت نقلك بارك الله فيك عالمحاجية تعرف اخي من كنت صغيرة يحكوهالنا جداتي ربي يرحمها و الوالدة تاني لكن عمري بالعمر ما كملتها ولا عرفت نهايتها لاني نرقد في وسطها و كي ولاو عندي الولاد حبيت نحكيهالهم بصح ناسيتها بارك الله فيك عذبناك
لالا مكان حتى عذاب أنا نعرف بلي هي حكاية مؤثرة جدا وكنت نتاثر بيها بزاف وكيما حكيتلك كاين محطات نبكي فيهم *على هديك أتذرت للأخت أم ياسمين ونقوم بإضافتها بعد تعديل لأنها قصة طويلة وتحتاج تأمل وتذكر مراحل الحداث وفيك بارك الله ختي تستاهلة لواحد يسهر على جالكم* بصح منعرف ولادك يخرجو زيك يرقدو ليه ليه ولا يخرجوها فيك يبقاو حالين عينيهم حتى تكمل القصة ويشوقوك فالرقاد* ههه
اما عن الاسئلة ايه نعم الاسئلة أمالا هوما بكل يسألو و انا لا ايه دالتي :
1- شيء تربيت عليه في الصغر و مررتو لاولادك عن قناعة
1- قعدت المائدة في وقت واحد
2- استاذ اثر فيك ايجابا و في اي طور
2- المعلم توفيق في السنة الأولى والثانية إلا مزال حي الله يبارك في عمره وإلا مات الله يرحمه ويغفر له* كان زيادة عن الإلتزام بالتعليم وحسن الخلق يجيبنا الحلوة والقوفريط من عندو باش يشجعنا ويخلق بيننا فرحة وتساوي
3- استاذ اثر فيك سلبا و في اي طور
3- في وقتي على مدار سنوات الدراسة لم اقابل من هو سلبيا في مهنته ومعاملته الحمدلله الله يغفر لهم ويرضى عنهم جميعا
4 لو تمنيت شي من طفولتك يبقى ماذا سيكون
4- ممكن أهمها تلك اللمات العائلية التي كانت تقريب يوميا فالدار لكبيرة وتلك الفرحة السعادة التي لا توصف ويشد لها الحنين حقا
5- هل تكلم اولادك عن طفولتك ام لا
5- أحيانا كيفكرو فالكحلة ننصحهم ونضرب لهم مثل
والسلام مسك الختام شكرا ثانية عالحكاية
عفوا أختي الكريمة ماتنسايش برك الليلة دور بيك دراري وطفي الضو باش تحلى لحكاية*هههه
وعليكم السلام ورحمة الله وبركاته

تقبلوا تحياتي

 

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليك
وعليكم السلام ورحمة الله وبركاته
آهلا بعمي رابح هه منور
وبيك اهلا بنيتي أميرته الله ينور قلبك
منيش عارفة كان سقسوك هذي الاسئلة سمحلي على التكرار
حتى ولو لك كل الحرية على طرح كل ما يجوش في خاطرك ولك ماتطلبين
المهم كي كنت صغير

- واش هما الحاجات لي درتهم بين هذو : درت خبز بالطوماطيس خخخ ، درت الخبز بالسكر ، كليت الخبز بالتشينة
- درت خبز بالطوماطيس و درت الخبز بالسكر و كليت الخبز بالتشينة وزيادة على هاذو كليت الخبز بلحلوة وكليت الخبز بالقوفريط *هههه

- من بين هذو شاهي اللعبة لي كنت تبغي : كرة القدم فالحي ، الغميضة
- كنت نحبهم في زوج لأن كرة القدم فالنهار والغميضة فليل

- الرسوم المتحركة المفضل لديك : جومارو ، كابتن ماجد ، زينة و نحول
- زينة ونحول *تعجبني الهدرة تاع نحول * اين أنت يازينة
تشرفت بلقائي بك وسررت لأسئلتك

تقبلوا تحياتي

 

[Malika Tlm]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليكم
مرحبا بيك في هدا الركن نتمني برك ميكونوش تقلوا عليك الاعضاء بالاسئلة بزاف ههههه امزح فقط
عندي اسئلة خفاف بزاف متخافش ههه
نبداو علي بركة الله
احكيلي كيف كانت طفولتك؟
حاجة درتهاش فطوفولتك وراك نادم عليها والعكس ؟
واش كانت ابداعات وانت طفل؟
هل كنت مدلل؟
موقف حزين صرالك في طفولتك؟
اجمل هدية عطاوهالك ؟
كيفاش كانت شخصيتك قويه او العكس؟
نتمني منكونش طولت عليك
تحياتي لك اخي​

 

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليكم
وعليكم السلام ورحمة الله وبركاته
مرحبا بيك في هدا الركن نتمني برك ميكونوش تقلوا عليك الاعضاء بالاسئلة بزاف ههههه امزح فقط
ختي مليكة ترحب بيك الجنة أسرح وأمرح وقول ما يريح خاطرك
عندي اسئلة خفاف بزاف متخافش ههه
حاولي مرة أخرى كتجيبي حاجة خفيفة ماتقابليهاش لريح لطير*ههههه
نبداو علي بركة الله
أزرع ينبت يا لالة *ههه*
احكيلي كيف كانت طفولتك؟
كنت بشوش مسرار ممازح محبوب عند العامة وخاصة العنصر النسوي وخاصة لعجايز شبعت بيض وزبدة ولبن من عندهم*هههه*
حاجة درتهاش فطوفولتك وراك نادم عليها والعكس ؟
في وقت الطفولة كانت عندي القدرة على التفوق في الدراسة بصح كنت لاهي بالعب والضحك والفكاهة وو*راني نادم تاع صح*
واش كانت ابداعات وانت طفل؟
كنت نعبر عن الشعور بكل صدق وكنت أتفنن في كتب الرسائل للطرف الآخر
هل كنت مدلل؟
بزاف بزاف بصح كليت طرايح بزاف بزاف *ههههه*
موقف حزين صرالك في طفولتك؟
إضافة لوفات بومدين راني دكرته من قبل وفات عمي صالح جارنا المفاجئ الله يرحمهم كشفتهم خارجين بيه لجبانة تأثرت بزاف وشهقت بالبكاء*
اجمل هدية عطاوهالك ؟
تدكرت لعله تيربولة دومي كاري خدمهالي عمي وفرحت بيها بزاف*هههه *كنت نصيد زواوش*ههههه*
كيفاش كانت شخصيتك قويه او العكس؟
تقدر تقول كانت قوية بسبب فرض وحودي بين منهم بحاجة لكلماتي ومن أنا محبوب عندهم*
نتمني منكونش طولت عليك
تعبتيني ختي مليكة المشكل كان عندنا شوية ريح خفت يبعثرهم*ههههههههه*
تحياتي لك اخي
أجمل التحايا وأسمى الأمنيات مني لك أختي وزيادة إحترام وتقدير​

تقبلوا تحياتي

 

[AmiR@RoRo]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليكم
راني رجعتلك عم رابح ان شا الله برك ما تكونش كرهت مني هههه

الشخصية الكرتونية لي كنت تفضلها عليهم كامل؟
كنت غيور فصغرك من الغير اخوتك ولا صحابك ولا ؟؟
بصراحة كنت تتخبى ورا امك كي يحلف فيك ابوك ؟ههه
هربت من المدرسة شي مرة ولا جامي ؟
والهروب الجماعي تع المتوسطات والثانويات جربتو ولا جامي ههه؟
شي كنت متعلق فيه فصغرك وما كنتش تخليه ابدا وش هو ؟(لعبة ولا حاجه هكا )

راني كترت عليك
بالتوفيق ^^

 

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

السلام عليكم
وعليكم السلام ورحمة الله وبركاته
راني رجعتلك عم رابح ان شا الله برك ما تكونش كرهت مني هههه
مرحبا بيك بنتي الغالية
صراحة كرهت من غيبتك المطولة *هههههه

الشخصية الكرتونية لي كنت تفضلها عليهم كامل؟
توم وهاك
كنت غيور فصغرك من الغير اخوتك ولا صحابك ولا ؟؟
غير هذي لمكسبتاهاش في حياتي كنت نفرح للمدولو ونسمح للي يديلي
بصراحة كنت تتخبى ورا امك كي يحلف فيك ابوك ؟ههه
هههههههه غير تمنع هي برك المسكينة كنت نهرب عند جدة وجدي الله يرحمهم
هربت من المدرسة شي مرة ولا جامي ؟
هههههه قوليلي كانش نهار ماهربتش * هذا الهروب والغيابات هي العنصر الساسي في إهمالي للدراسة
والهروب الجماعي تع المتوسطات والثانويات جربتو ولا جامي ههه؟
أنا الثانوية مالحقتهاش مي درناه مرة وحدة في المتوسط سنة الثالثة على ما أظن
شي كنت متعلق فيه فصغرك وما كنتش تخليه ابدا وش هو ؟(لعبة ولا حاجه هكا )
من جيهة اللعاب ماكانش عندي المهم لكن من جيهة البشر كنت متعلق بمن لا أطيق مغادرة ظلهم

راني كترت عليك
لاعليك بنيتي الغالية كان ظلك خفيف
بالتوفيق
الله يوفقك ويحفظك ويبارك فيك
شكرا لك على روحك المرحة ومزاحك المؤنس ^^

تقبلوا تحياتي

 

[الامين محمد]

رد: طفولتك أيها العضو/ة اللماوي تحت عدساتنا(العدد التاسع) رابح66

أهلا سيدي راببح
أختي أميرة اللمة ما خلات لينا حتى سؤال
هههههههههههههههه سقسات على كلش ههههههههههه
أولا و الله عشت و قريت كل الاسئلة
و استمتعت بالردود نتاوعك
خصوصا بقرة ليتامى كيما قالت أختي خديجة كنت نرقد قبل النهاية
و كنت أتمنى نعرف النهاية باش نحكيها للأهل
اليوم جمعتهم زوجتي مع أطفال الجيران
بديت نحكي ليهم في الأخير كلنا بكينا حتى أنا معاهم و الزوجة
واحد الطفلة كانت تشهق و ما حبتش تسكت هههههههههههههه

المهم رايح نسالك
أول مرّة دخلت المسجد واش حسيت
هل قريت في الجامع
هل تعرف اللوحة و الدواية و الصمصال

شكرا سيدي رابح
و اعتذر لأني جيت متأخر
​

 

[رابح66]

رد: طفولتك أيها العضو/ة اللماوي تحت عدساتنا(العدد التاسع) رابح66

أهلا سيدي راببح
وبك أهلا وسهلا حبيبي الأمين
أختي أميرة اللمة ما خلات لينا حتى سؤال
راك تشوف ياخويا فارغات شغل ها لازم يقلبوها على الهدرة ههههه
هههههههههههههههه سقسات على كلش ههههههههههه
وتعجبك فيها حاجة بكل تواضع وحشمة نتمنى مانكونش ثقلت عليك*ههههه
ربي يبارك فيها تدلل وتزيد على عمها وتاخذ راحتها
أولا و الله عشت و قريت كل الاسئلة
تشرفنا بزيارتك ونتمنى انها كانت رحلة ممتعة عبر الزمن الجميل
و استمتعت بالردود نتاوعك
سعيد أنا بإستمتاعك لما كتبت وأعترفت به في طفولتي
خصوصا بقرة ليتامى كيما قالت أختي خديجة كنت نرقد قبل النهاية
هاو دار زمان وسهرتك عند كبرك هههههه
و كنت أتمنى نعرف النهاية باش نحكيها للأهل
والحمدلله جالنهار وتحققت أمنيتك حبيبي
اليوم جمعتهم زوجتي مع أطفال الجيران
هذه خطوة منكما جمعتما فيها الشمل في جلسة مشتركة للأطفال حتى يعتادوا عليها في أمور أخرى
بديت نحكي ليهم في الأخير كلنا بكينا حتى أنا معاهم و الزوجة
حقا إن قصة بقرة ليتامى عندها طابع خاص وإنتباه غير ممل وفيها اسلوب تشويقي وخاصة إذا تفنن فيه القصاص أو الراوي
واحد الطفلة كانت تشهق و ما حبتش تسكت هههههههههههههه
بكاء البراء عندو حلاوة خاصة عندما تحس بلي تاثرت بمشهد أو موقف الأحرى بالكبير أن يتأثر به ربي يبارك فيها ويخلي قلبها حنين مادامت حية

المهم رايح نسالك
تفضل حبيبي وتشرط إلا حبيت هههه
أول مرّة دخلت المسجد واش حسيت
حسيت روحي راجل وعرفت بلي عالم آخر غير الخارجي علم الهدوء والسكينة لأنني دخلت المسجد بعد بلوغي
هل قريت في الجامع
ماتشرفتش بهذه النعمة ماكانش عندنا حفظ القرآن في وقت طفولتي
هل تعرف اللوحة و الدواية و الصمصال
نعم نعرفهم ولكن ماستعملتهمش كما ذكرت لك لعدم توفر دورالحفظ

شكرا سيدي رابح
بل كل الشكر لك على تواجدك وتنويرك بمشاركتك العطرة
و اعتذر لأني جيت متأخر
معذور خويا لحبيب الله يقضي حوائجك وييسر أمرك ويبارك لك
كل الإحترام والتقدير لشخصكم الكريم
​

تقبلوا تحياتي