مشكلتي طلب مشورة

[مشكلتي]

السلام عليكم
مشكلتي ربما مختلفة قليلا عن المشكلات المتواجدة هنا
حبيت نستشيركم وندي رايكم في امر
انا شابة متعلمة وعندي موهبة التصميم بالفوتوشوب ونعرف تصميمات مونتاج فيديو ايضا
مالقيتش خدمة وحاليا راني نكمل في دراستي لكن نظرا لظروفنا المادية لازمني نحوس على عمل
حوست لكن مالقيتش وكي نلقا ما يتوافقش مع توقيت دراستي في الجامعة
سجلت في النت في موقع ونوعية العمل هي تسويق شبكي
سلفت في الاول مليون ومديتها لانها من شروط العمل معهم (المليون فارسمون على سلعة عندهم وهي من شروط التسجيل ) وبعدها نجيب 2 وكل واحد فيهم يزيد يجيب زوج وهكذا ويخلصوني 3 ملاين اذا كملت العدد 8 في فريقي
بعد ما جبت 2 عرفت بلي حرام حبست الخدمة كعاد( من ترك شيئا لله عوضه بخير منه ) وزدت قلت للبنات لي جبتهم لانهم صديقاتي يعني راحتلي مليون الي سلفتها وزدات 2 ملاين دين للبنات لي سجلتهم وهوما ثاني مدو مليون وبما اني انا لي اقترحت عليهم العمل وقلتلهم يحبسو باش ما يتكتبش ذنبهم عليا لازمني نردلهم دراهمهم
بعدها وليت نجيب جبب للدار معند الخياطات باش نركبلهم العقاش والسمسم
بصح تعبتني هذي الخدمة ومافيهاش حتى مصروف يومي
بعدها خممت قلت علاه ما نشوفش خدمة بالنت سقسيت وبحثت لقيت موقع اسمو مستقل فيه التصميم وثاني المونتاج فيديو وبمقابل مادي على حسب خدمتي
مي خايفة ليكون حرام ثاني
ربي يخليكم لي عندو علم بهذا الموقع واذا نورمال ولا لالا ؟
واذا حرام نتمنى تقترحو عليا وش نعمل لاني فعلا محتاجة دراهم من اجل دراستي ومن اجل الاقامة وعايلتي مش قد المصاريف
نتمنى تفيدوني وشكرا مقدما
اختكم في الله

 

[همس الوُرود]

رد: طلب مشورة

السلام عليكم

ربي يعينك أختي على تحمل الصعاب ويرزقك رزقا حلالا طيبا

بالنسبة لمشكلتك إن شآء الله مبعد نسقسيلك على هذا الموقع إذا قدرت

أما حاليا ماعنديش معلومات عليه

​

 

[فيتامين سي]

رد: طلب مشورة

ربي يعينك اختي ..كاين مكاتب للتصميم شوفيهم و شوفي لي يخدمك بالساعات

 

[Hakan]

رد: طلب مشورة

السلام عليكم
انا على حسب علمي المتواضع
انو اللي يعرف صح صح للفتوتوشب راهو دار لافار
مي بيناتنا لازم تعرفي شويا للنت وعالم التسوق في النت
باسكو تحتاج ماستر كارد وامور اخرى وحسابات في النت
ومام تون تحتاج الوقت اذا عندك هذا الاشياء يااختي
الحلال بين والحرام بين مام قسة التسويق الشبكي هذي فيها
هدرة كبيرة يعني مش اي كان يجي يحرم ويحلل ويبني التسويق على امور الربا
والغرر وما الى ذالكوهي اصلا ماهيش باينة فقط بما انومجتمعنا روطار
ب 100 سنة مازال يحكي على الاعمال الشاقة وعلى الخدمة الليلازم تجرح فيها يدك
وما يامنوش انو رانا في عصر التكنلوجيا يعني بميكروك قادر دخل الملاين في شهور
لكن كل هذي الاعمال تتعلق باللي بعدها وهي لمن رايحة تخدمي في النت
قادر مثلا تجيك طلبية فوتوشوب مثلا لموقع نتاع اغاني هنا هذي حرام
لكن طلبيات فوتوشوب اذا كانت لناس موثوقين يعني نقلك بالتوفيق ليك
الحاجة اللي نقدر نساعدك بيها هي انو نسقسيلك احد اصدقائي يعني يعرف لهذا المجال
وان شااء الله يساعدك ​

 

[محمد إبن الصحراء]

رد: طلب مشورة

أكثري الإستغفار
وصلي الإستخارة
وإستشيري أهل الإختصاص​

 

[همس الوُرود]

رد: طلب مشورة

السلام عليكم أختي

بعد ما سألت على الموقع عرفت فقط أنو موقع فيه التعامل مع الرجال بزاف

يعني نظن أنو مايصلحش للفتاة

ربي يوفقك بش تختاري عمل أحسن منو بإذن الله أختي و في ما يرضي الله عز وجل

وربي يعينك على تحمل الصعاب

أفضل شيء هو الدعاء أختي ربي يعينك

 

[ليليا مرام]

رد: طلب مشورة

السلام عليكم اختي
اولا نحييك لانو تحوسي تخدمي وتجيبي مصروفك بالحلال الله يعنيك والله يا اختي حاولت مثلك بكل الطرق وما عنديش فكرة على موقع هذا ممكن الاخوة يفيدوك لكن الشركة هذيك نتاع تجيبي الناس واغيرو انا ما قنعتينيش قاتلي عليها الطفلة ورحت لللمقر وشفت هعوما يضمنو دراهمهم والتعب عليك وتديها وما تتباعش الفايدة ليهم وكل شي خرطي هوما يربحو والناس تخسر معليش ربي يعوض عليك كاين اخ معانا سفيان يعرف للامور هذي راح نقولو يقرا مشكلتك وهو يفهمك
موفقة

 

[ام أمينة]

رد: طلب مشورة

ما عندي خبرة فالمجال
ان شاء الله تلقاي لي يعاونك
​

 

[Mustapha Bita]

رد: طلب مشورة

علاه حرام.
انا كنت نتعامل مع واحد اسرائيلي في حدف الايكلاود للاجزة المغلوقة باقل الاسعار
ايا انطقت الهدرة بلي انا نتعامل مع اسرائيلي في العمل . وقالولي بلي حرام
علاه حرام..قالك هداك كافر وخاصة انه مشي من اهل الكتاب..
على اساس الاجهزة الالكترونية والملابس وغير وغير من صنع ايديهم
الامام او العالم لغدي تستاشريه(عنده نفس العقل لي عندك)
slm

 

[sanaya]

رد: طلب مشورة

أختي أولا تذكري قوله تعالى
( ولو أن أهل القرى آمنوا و اتقوا لفتحنا عليهم بركات من السماء و الأرض ) ووعد الله حق يا أختي فلذلك رزقي و رزقك هو مضمون و الله أعلم بحالك فتوجهي أولا لله سبحانه و تعالى فقد تكون هذه الضائقة سببا لتتقربي أكثر من الله
و هنالك بعض الأعمال البسيطة التي تنجزينها كل يوم مقابل أجر لا بأس به فإن كنت مثلا تتقنين نوعا من الحلويات يمكنك يوميا بيعه لإحدى المتاجر و يكون ذلك بالإستيقاظ باكرا و استغلال الوقت و إن كنت تحسنين الكتابة باللغة الإنجليزية مثلا فهنالك مواقع في الأنترنت يمكنك بيع كتاباتك لها حسب علمي
و مهما كان الأجر بسيطا هو أفضل من لا شيء
و أخيرا أختي
عليك بالصدقة مهما كانت بسيطة و لو كنت تطعمين قطة في حيك كل يوم تلك صدقة و قد يفتح الله لأجلها أبوابا لا متناهية للخير و كذلك الإستغفار
و أكثري من قول ( ومن يتق الله يجعل له مخرجا و يرزقه من حيث لا يحتسب)
و كذلك دعاء الدين :
اللهم أنني بفضلك عمن سواك والسلام