السفارة في العمارة

[ليليا مرام]

السلام عليكم
السفارة فالعمارة هذا مش فيلم عادل امام هذا من نقل ليليا مرام

اليوم حبيت نحكيلكم قصة واقعية وتمدولي رايكم
نعرف وحدة عندها البنات بزاف تبارك الله
وحدة تعرفت على واحد فابو ظبي الله يبارك مش راحت هناك عرفاتو هنا وتزوج بها وطارت راهي هناك عايشة
والجارات كلهم بكاو دمعة وخنونة

مش عليها اكيييييييد حسد وغيرة راكم عارفين الخاوة نتاع ابو ظبي شكارة دراهم
جات الثانية اشكم اشكم تركيش حياتم ..... ايه هدرتلكم بالتركية ياو داتو تركي الزين ما نقولكمش يذبح بلا موس

مريومة ابكي اختي بالعقل راني نسمع فيك منا بالشوي عليك

وراحت للترك والثالثة قولو نتوما وين راحت انا خايفة على مشاعركم

راحت للماريكان داها واحد مصري اييييييييه ازيك يا جدع واقيل باسم هو اداها كنت راح نسقسيه

تعرفت بواحد مصري مندوب شركة تزوج بيها وراهي عايشة معاه فالماريكان تبارك الله
بقاولها زوج الاكيد راحت تشوفلهم كاش بلاد زعمى وين للهند

قتلها واحد النهار اسمعي افتحي سفارة بريفي فدارك وتهناي يعني اللهم لا حسد هذا مكتوب اكيد مي نقولكم
وين تمشي البنات الكل يكرهوها

هذي تقول السحور وهذي تقول بناتها وين لقاو الرجال هذو المخيرة راح تموت
مي انا علاه حبيت نحكيلكم

حبيت نعرف موضة زواج بناتنا من رجال فالخارج زعمى انتقام من ليجون نتاوعنا

يموتو على عجايز فرنسا كلمة ونديها قاورية كونترا عليك واحنا ندوهم هنودا زكارة فيكم من ينوض وهو يشطح

يا يمى مون شاوي لو يقرا واش راني نقول يطلقني 7 وزوج محللين ويا ربي كان رجعني هههه
الخلاصة قالك مالك يحوسها المانية

والامين تفرت فيه مي قالك التعدد ولقاولو وحدة فالصومال

امممم يعني تهنى من الكونتور نتاع التريسيتي على العام ظلمة هههه مي دار لافير دونتيست ما يروحش سنانها يبرقو بريق
خونا منير اكيد من جماعة الامين والتعدد

ومان عرف يا زهر وين راح يطيح واش من بلاد

اما حكيم قالك نديها من نيوزليندا خدودها حمر تضرب ذاك الخبز المنتفخ داير قدي فلاطاي صحيحة يا محاينك ما تمرض ما والو

انا حبيت نعرف انو الوحدة تتزوج مع راجل من غير بلدها عادات اخرين وتقاليد اخرين راجل قادرة ما تفهملوش قادرة العقليات ما ينجحوش فالمقابل كاين بزاف نجحو
نروحو للاهل كيما اللي حكيتلكم عليها هذي يعني كل بنت فبلاد انا من عندي نعتبرها مخاطرة لانو ما تعرفش الناس هذو ويروحو بناتها لبلدان اخرين بللاما تعرف واش راح يصير
نتوما واش رايكم مع الزواج هذا والا لالا وعلاش
الخاوة اللي جبدت اسمائهم يقولونا منين حابين يعاودو

معليش نساكم راهم غايبات احكو فرغو قلوبكم

 

[لؤلؤة قسنطينة]

رد: السفارة في العمارة

السلام عليكم
ههههههه والله يا ليليا نتي عايشة في واحد الحي كلو امبيونس لدرجة كل مرة تقتابسي منو موضوع مفيد هههه
المهم نوليو للموضوع، عجبتني تاع كل بنت في بلاد انا مني انصحيها تروح لليابان (بيناتنا شحال يعجبني الشعب الياباني)
والتانية تتزوج مممم استناي نخمم قوليلها تخير واحد من اسبانيا وهكا تكمل المجموعة، بصح علابالك في واش راني نخمم ختي
ليليا؟؟ راني نخمم في يماهم كل عام تحوس في بلاد هههه قوليلها تتبناني ومانتزوجش نقعد في الدار المهم نروح نحوس معاها برك هههه
هيا درك نرجعو للصح والله يا ختي هادي ماراهي غير مكاتيب هادي اول نقطة يعني تلقاي وحدة كي يكتبلها ربي شخص
حتى ولو الفرق بيناتهم بحر ومحيطات رايحة تديه ويلحق ليها يعني عادي وخاصة في زمن التكنولوجيا، انا ماما كانت تحكيلي
على وحدة صاحبتها تزوجت من فلسطيني في 89 هكاك تزوجت يعني وين ماكانش تكنولوجيا وتواصل فمابالك بدرك
اما ثاني نقطة هي ماش معناها كي وحدة تزوجت وراحت لبلد اجنبي يسمى راهي عايشة حياة الامراء كاين لي تزوجو بأتراك
واجانب وعاشو لمرار، وانا من وجهة نظري نفضل ولد بلادي على اي شاب اجنبي اول شي تربينا في نفس البيئة ونفهمو ويفهمني
ونكون قريبة من والديا اما واحد مانعرف لا عاداتو لا والو مانحبش صار م نولاية لولاية تختلف العادات والتقاليد وطريقة
التفكير فمابالك بشخص اجنبي، انا الاجانب لي صح يلفتو نظري هوما لي يدخلو جدد للاسلام تلقايه مايعرفش العربية ويجود
القرآن يتبع تعاليم الدين بكل تفاصيلها يعني ماشاء الله هادو صح اما باه نتزوج بأجنبي هكاك برك مانحبش صراحة
وفي الاخير تبقى مكاتيب ربي سبحانو واحد ماعالم واش مكتبلو ربي في المستقبل
شكرا ليليا على الموضوع الزينون كيفك ربي يحفظك ختي
تحياتي
​

 

[Skor m@k]

رد: السفارة في العمارة

السلام عليكم
واش ياختي ليليا عمبالي حكيتينا على فيلم عادل امام خخخخ
صعيبة الواحد يبعث بنتو للمجهول هكذاك برك وبلاك مايعرفوش عليه حتى حاجة
المهم تركي ولا مصري ولا امريكي ولاو المهم عندو الدراهم وهنا تحبس
أصلا ماتقدرش تعرف عايلتو الى ناس ملاح
هي صح مكاتيب بصح زايد فيها الزوخ والفوخ على الناس والجيران
أنا والله معلبالي بوالو لابغا تتزوج باوباما ولا بوتف ...
المهم انا نجيبها ألمانية شعر لصفر يامحاينك هناك مانزيد والو ههههه​

 

[Salah eddin]

رد: السفارة في العمارة

السلام عليكم
ههه
ماينة ليك
........................................
اسمحيلي ..........ما لقيتش وش نكتب
ههه
ماينة ...
​

 

[الأزرق الملكي]

رد: السفارة في العمارة

السلام عليكم
زواج الجزائرية بأجنبي هو مقامرة في الأغلب ينتهي قبل ان يبدأ
وقد رأينا كم واحدة تزوجت من الأتراك ومصريين يعملون هنا داخل الوطن
وبعد انتهاء هؤلاء من أشغالهم عادو إلى أو طانهم مخلفين ورائهم مطلقات
أو ربما حتى لا يطلقها يختفي وفقط .وأحيانا يكون زواج عرفي تجد نفسها في مصيبة
مواقع الزواج جعلت من الفتاة الجزائرية مطلب خصوصا عند الخليجين وذلك من أجل المتعة ثم يرميها لأنه معدد بثلاثة .
هذا هو الطمع الذي أوصلهن الى فقدان الكرامة لكن هذه الأشياء اصبحت سطحيات بالنسبة للإنحطاط الخلقي
الذي يحصل مجانا في بلادنا فزواجها من أجنبي يعد صفقة يا إما نجحت أو لم تنجح المهم تستفيد ماديا
فمن يزوج إبنته من أجبني هو ديوث ومن تتزوج أجنبي هي ليست بنت أصل هذه هي الحقيقة
لأن مغزى من هذا الزواج واضح الا في حالات شادة لايقاس عليها
تسلمي
​

 

[لاريمان]

رد: السفارة في العمارة

كايا الي يقول مغامرة ولا مقامرة بصح كاين الناجح
بنت كاركينا تزوجت بيه مصري على قد حالو بصح معيشها وقايم بيها
ودرك جات السيمانة هادي وراهي عندها طفل وراهي قريب تروح لمصر
يعني الزواج مكتوب واحد مايقدر يضمن نجاحو من عدمه
كاين تزاوج عن حب ولد لبلاد وطلقو وكاين وكاين
دونك لاهو كيما البطيخ الزواج في وقتنا هدا

 

[السلطانة]

رد: السفارة في العمارة

وعليكم السلام
والله ياانتي هههه
خلونا من موضوع التعدد راني نكره نعيمة صالحي في جرة الحكاية هاذي
حابة تحرقينا ياليليا انتي ولاكيفاه
موضوع الاخت نجمة البحر وسوسوني زيدينا انتي درك
نبات نخمم كون يديرها بيا اه زهري ونعرفو ههه
واش من المانية واش من تركية وواش وواش
كاين بزاف تزوجو بجنسيات مختلفة ونجح زواجهم
وكاين لي تكلحو وغير تروح تلقاها لهيه ماشي حياة
كل واحد ومكتوبو في الدنيا هذي والزواج مكتوب وضربة حظ قادر يصيب قادر يخيب .
ايا في لامان

 

[يونس قاسم]

رد: السفارة في العمارة

هههههههه روح يا الشاوي تلعب بعيد اليوم لا دلع ولا رومنسيات
يا ليليا هبالك كل يوم يزيد بصح روعه ههههههههههه
شوفي انا تبانلي نجيبها اوكرانية ياك هوما اجمل نساء العالم خخخخخ
ههههه الصح ضرك هو الدين اولا ولي بعدها كلش ساهل
اذا كان يسكن في الموزمبيق و متدين هو الصح
خير من طلياني خارج الطريق هههههه
ياودي ليليا مواضيعك مميزة والله
المهم اذا لقيتي وحدة متدينة من اوكرانيا راني هنا عههههه
يعطيك الصحة
سلام

 

[آمِيْرَتُه]

رد: السفارة في العمارة

السلام عليك
آهلا مراة الشاوي
الزواج قسمة ونصيب
كاين مكتوبها كاين باغية تتهنى تهرب
كاينة باغية تعيش
المهم مخلطة
كاين زواج لي نجح وكاين لي فسد
وحتى تلقيها داية ولاد البلاد مي ماشي متفاهمين
لي يقولك نديها قاورية ألمانية حط رجليك في ماء بارد ياو تديها غير منا ههههههه

 

[prince of love]

رد: السفارة في العمارة

هههههههههههههههههه


هادي بعثتهم كامل للإحتراف في الخارج .. هادي الحكاية ماشي عادي فيها ( إنَّ) هههههههههه

 

[باتنية و نص]

رد: السفارة في العمارة

سلام عليكم
ربي يهنيهم هذو مزهرات تع الصح هه
خبشتيلنا المشاعر بموضوعك هذا
الحقيقة انو انا عارفة نديه شاوي لا محالة
هات برك يكون فحل كيما لو تيان
لول
تحياتي

 

[الأستاذ مصطفى]

رد: السفارة في العمارة

‘ــــيومك جميلــــ’​

ــــروحي فلسطينــــ​

تحياتي و احترامي و تقديري​

موضوعك في القمة أختي
[FONT=&quot]ليليا مرام[/FONT]
نتمنى أن تواصل
ـــــسلامــــــــــــ​

و اسف على الازعاج و الله​

تقبلـــــــــو ا خالص الحب​

ــــالكناري السعيدــــ​

وراء كل امرأة رجل عظيم و ان لم تكن لكان أعظم​

●|ღقلبيـے بــالوفــا رآقـــــيـےღ|●​

 

[Hakan]

رد: السفارة في العمارة

انا نعرف واحد صاحبي اسمي كامارا
الام نتاعو باتنية والاب نتاعو من مالي
ويحكي الشاوية واسمر هههه فهمتي ضركا
البنات يصيدو الراجل لابغى من الايسكيمو المهم تتزوج
اما الراجل وين يلقى المرا اللي تعجبو
يروح يجيب هاكم تعرفو التعدد
اما انا شخصيا يعني نحب نجيب مرا اللي نقنع بيها
وتقنع بيا لابغى من الحي نتاعي
المهم نقنع بيها الى ذالكم الوقت رانا نستناو ما نعرف
المهم برك انا مانيش من النوعية نتاع الخارج
نفضل الصناعة الجزائرية خخخ مانيش حاب نتعلم لغة اخرى
ونفضلها عربية لا قبايلية لا شاوية لا ترقية لا ميزابية
عربية كحلة العينين ياسر ..
​

 

[GI Joe]

رد: السفارة في العمارة

hh skhatli affaire politique w hia rahi affaire zwedj
ana wahda m ness manahsedch 3la l etranger rabi ykemel l ay 2 yhebou ba3dhaom, mais
contre tmermid hadak ta3 yelesgou f rdjel 3la kelmet mezewdja fi tel pays
​

 

[همس الوُرود]

رد: السفارة في العمارة

السلام عليكم ورحمة الله وبركاته

أهلا بيا عندك أختي مرام راني نشوف فيك كل يوم تديري مواضيع هنا وجامي رحبتي بينا بكاش مقروض ولا يا بن عمي وش هاد البخل ^^

أيا من عندي كش ماتحتاجي راني مانمدش ههههه

إيه وش رايحة نقووول إيه إن شاء الله تكوني مليحة و لاباس عليك

شوفي أختي نرجع لموضوعك أنا صراحة تغيضني روحي لما نشوف جزائري تزوج وحدة من الخارج أووو بعد ملايين هنا ماعباوش العين ما شافو لا تربية لا والو شافو غير مال القاورية هههه

نتي رحتي للهند والترك ونسيتي ناس هنا يديو فالسوريات وزيد حاسبينهم أقمار على سطح الأرض هههههه تقوللهم أجيبلك شاي إبن عمييي ههههه

ولك شو هالخربطة هاااي يا بنتي حنا بنات الجزائر فينا كلش السمراء و البيضاء والشقراء والحمراء والصفراء

الزينة والشينة المسرارة والمطبزة ههههه راني غير نخلط متلوميش

شوفي أختي هي كلش كلش لازم الإنسان يعرف وش يختار. ميشوفش للزين والمال والشي الي مايدومش و يبقى الدين هو كل شيء
الدنيا متاع وخير متاع الدنيا المرأة الصالحة

ليسونسيال الإنسان يشوف المرأة الي تربيلو ولادو وتدعمو و تقويه تع الصح

هذاك هو الصح أما الباقي كلش تفاهات

أيا وتحيا بنت البلاد هههه

يا أختي بيناتنا خليك من التحريض على التعدد سينو يشوف خطيبك كلامك ويهبلك بالموضوع تولي أنتي الي تبكي وتطيحيلنا فالخناين من دوك بعد راني مانعطيكش بابيي موشوار شوفي غير أشري واحد راني فسياسة التقشف ههههه

أيا سلام أختي في رعاية الله

 

[ليليا مرام]

رد: السفارة في العمارة

السلام عليكم

وعليكم السلام مريومة نورتيني واسمحولي طولت الله غالب ظروف

ههههههه والله يا ليليا نتي عايشة في واحد الحي كلو امبيونس لدرجة كل مرة تقتابسي منو موضوع مفيد هههه

ايه وانا كل مرة نجيبلكم حكاية من حومتنا العزيزة ومن دوارنا

المهم نوليو للموضوع، عجبتني تاع كل بنت في بلاد انا مني انصحيها تروح لليابان (بيناتنا شحال يعجبني الشعب الياباني)

نقولك اليابانيين والله نوايا تشوفيهم غير يضحكو تعرفت عليهم فالترك وكان فوج يدرسو التركية ودايرين دورات العربية وهدرو معايا هايلين نوايا وعندهم الزين بلاكي تقولي ما عندهمش مي واحد كاين واحد 700 اخر يشبهلو ياو فوتوكوبي على بعضاهم هههه

والتانية تتزوج مممم استناي نخمم قوليلها تخير واحد من اسبانيا وهكا تكمل المجموعة، بصح علابالك في واش راني نخمم ختي
ليليا؟؟ راني نخمم في يماهم كل عام تحوس في بلاد هههه قوليلها تتبناني ومانتزوجش نقعد في الدار المهم نروح نحوس معاها برك هههه

ايه وانا واش دارلي العلة ياو يماهم مرة فأبو ظبي ومرة فالترك يا ويلي يانا هذو زهرهم سرقوهم والا نتاعهم

هيا درك نرجعو للصح والله يا ختي هادي ماراهي غير مكاتيب هادي اول نقطة يعني تلقاي وحدة كي يكتبلها ربي شخص
حتى ولو الفرق بيناتهم بحر ومحيطات رايحة تديه ويلحق ليها يعني عادي وخاصة في زمن التكنولوجيا، انا ماما كانت تحكيلي
على وحدة صاحبتها تزوجت من فلسطيني في 89 هكاك تزوجت يعني وين ماكانش تكنولوجيا وتواصل فمابالك بدرك
اما ثاني نقطة هي ماش معناها كي وحدة تزوجت وراحت لبلد اجنبي يسمى راهي عايشة حياة الامراء كاين لي تزوجو بأتراك
واجانب وعاشو لمرار، وانا من وجهة نظري نفضل ولد بلادي على اي شاب اجنبي اول شي تربينا في نفس البيئة ونفهمو ويفهمني
ونكون قريبة من والديا اما واحد مانعرف لا عاداتو لا والو مانحبش صار م نولاية لولاية تختلف العادات والتقاليد وطريقة
التفكير فمابالك بشخص اجنبي، انا الاجانب لي صح يلفتو نظري هوما لي يدخلو جدد للاسلام تلقايه مايعرفش العربية ويجود
القرآن يتبع تعاليم الدين بكل تفاصيلها يعني ماشاء الله هادو صح اما باه نتزوج بأجنبي هكاك برك مانحبش صراحة
وفي الاخير تبقى مكاتيب ربي سبحانو واحد ماعالم واش مكتبلو ربي في المستقبل
شكرا ليليا على الموضوع الزينون كيفك ربي يحفظك ختي
تحياتي
​

هي اختي مريم اكيد مكتوب وربي مكتب مي فيها مخاطر اكيد وانا هنا نقول لانو الزمن تبدل والناس فالعالم تغيرت يعني تخيلي تتزوجي وتروحي لبلاد الناس عادات اخرين وناس اخرين وما تعرفي والو مغامرة انا في بالي مهما نديرو ندو غير مكتوبنا مي انا كيما انت نفضل وليد بلادي يعرفني نعرفو الواحد راه من ولاية لولاية اخرى وراه يحسب ال حساب مش حتى من بلاد لبلاد
مشكورة مريومة نورتيني

 

[ليليا مرام]

رد: السفارة في العمارة

السلام عليكم
واش ياختي ليليا عمبالي حكيتينا على فيلم عادل امام خخخخ
صعيبة الواحد يبعث بنتو للمجهول هكذاك برك وبلاك مايعرفوش عليه حتى حاجة
المهم تركي ولا مصري ولا امريكي ولاو المهم عندو الدراهم وهنا تحبس
أصلا ماتقدرش تعرف عايلتو الى ناس ملاح
هي صح مكاتيب بصح زايد فيها الزوخ والفوخ على الناس والجيران
أنا والله معلبالي بوالو لابغا تتزوج باوباما ولا بوتف ...
المهم انا نجيبها ألمانية شعر لصفر يامحاينك هناك مانزيد والو ههههه​

السلام عليكم
اييه راك باين غرت حتى راح تكلاطي اييه فاقو
قالو ما علابالكش شوف نتوما كي تعرفونا نتزوجو فالخارج ما تحبوهاش وتظلو تعايرو فينا بعجايز الخارج روح جيبها من المانيا قالو شعرها صفر واشبيها لوريات تصبغ مليح انا نصبغ شعري بيها:p
الغيور اسمع نقولك حنا نحبو ولاد بلادنا ونتوما خونة نتاع العجايز روحو جبيهم واشبعو انا مون شاوي محال نفرط فيه لو برونالدو ما نبدلوش محال
نورتني السكر المحروق

 

[ليليا مرام]

رد: السفارة في العمارة

السلام عليكم
ههه
ماينة ليك
........................................
اسمحيلي ..........ما لقيتش وش نكتب
ههه
ماينة ...
​

السلام عليكم
اهلا وسهلا نورتني صلاح الدين
ايييه وعلاه ماينة ليا امممممم ما لقيتش واش تكتب والا غرت كيما مالك ما تخافش انا نبغي وليد بلادي فإشهدو فإشهدو فإشهدو ههه
عاود ارجع وحطلي رد وقولي واش رايك فرضا جا خطاب لاختك من ترك او من دبي واش رايك بكل صراحة
سلام

 

[ليليا مرام]

رد: السفارة في العمارة

السلام عليكم
زواج الجزائرية بأجنبي هو مقامرة في الأغلب ينتهي قبل ان يبدأ
وقد رأينا كم واحدة تزوجت من الأتراك ومصريين يعملون هنا داخل الوطن
وبعد انتهاء هؤلاء من أشغالهم عادو إلى أو طانهم مخلفين ورائهم مطلقات
أو ربما حتى لا يطلقها يختفي وفقط .وأحيانا يكون زواج عرفي تجد نفسها في مصيبة
مواقع الزواج جعلت من الفتاة الجزائرية مطلب خصوصا عند الخليجين وذلك من أجل المتعة ثم يرميها لأنه معدد بثلاثة .
هذا هو الطمع الذي أوصلهن الى فقدان الكرامة لكن هذه الأشياء اصبحت سطحيات بالنسبة للإنحطاط الخلقي
الذي يحصل مجانا في بلادنا فزواجها من أجنبي يعد صفقة يا إما نجحت أو لم تنجح المهم تستفيد ماديا
فمن يزوج إبنته من أجبني هو ديوث ومن تتزوج أجنبي هي ليست بنت أصل هذه هي الحقيقة
لأن مغزى من هذا الزواج واضح الا في حالات شادة لايقاس عليها
تسلمي
​

السلام عليكم خويا الملك
وهذا اللي انا حبيت نعرفو منكم انو الزواج هذا فيه مغامرة كبيرة وكيما فلت انت شعال تزوجو بيهم هنا غير يكمل خدمتو يروح ويخليها وحتى اللي خلاها بالحمل وهذا كلو لانو اهلها طماعين يحسابو التركي والا غيرو عندهم شكارة دراهم ولما تتفر يولو يندمو علاه كي فات الوقت
هذي مسؤولية كبيرة الواحد راه هنا فنفس البلد وخدعو وكذبو فما بالك برا من البلاد ولو هو زواج وحلال مي اكيد الوحدة ما ترميش روحها فالنار
نورتيني بارك الله فيك

 

[ليليا مرام]

رد: السفارة في العمارة

كايا الي يقول مغامرة ولا مقامرة بصح كاين الناجح
بنت كاركينا تزوجت بيه مصري على قد حالو بصح معيشها وقايم بيها
ودرك جات السيمانة هادي وراهي عندها طفل وراهي قريب تروح لمصر
يعني الزواج مكتوب واحد مايقدر يضمن نجاحو من عدمه
كاين تزاوج عن حب ولد لبلاد وطلقو وكاين وكاين
دونك لاهو كيما البطيخ الزواج في وقتنا هدا

السلام عليكم اختي اهلا وسهلا نورتيني واش راكي واش راه اهلك
ايه ينجح كاين بزاف ناجحين هذي بنتها اللي متزوجة فأبو ظبي متفاهمة مع راجلها واهلو ويماها تروح عندهم ومرة هوما جاو هنا يعني ناجحين مي كاين حالة شفتها فالتليفيزيو وين راح وخلاها تركي وهي بالحمل وهذي تستاهل انا من عندي لانو اهلها رضاو بيه جاهم وحدو وشافوه مقاول والدراهم زوجوه ببنتهم وراح وخلاهم فالاخير البطاقة مزورة ومش نتاعو شغت الناس كيفاه تلعب ببناتها على جال الدراهم هذي هي المخاطرة
نورتيني اخت لاريمان