شفتو المستوى نتع ولادنا ؟!!!!

[أم منيــــــر]

السلام عليكم

مبروك علينا الستايل جديد
هادي مدة ما جيتش هنا مع اني عندي افكار بزاف و مواضيع قد شعر راسي بصح مشكل الوقت
المهم
ولادنا دارولهم برامج متعددة و جربو فيهم كل التجارب و خلطولهم الاوراق و الحسابات في راسهم وما حركوش ساكن
البارح يديرو مسيرات و فوضى واضرابات على خاطر العطلة و زيد بطرق عدوانية ماشي حضارية خلاص
علاش كامل هاد الشي راك تقول حقك
وين كنت من اول السنة ما طالبتش بهاد الحق و من المؤسف كاين لي يقولك عندوالحق يقرر مصيرو
فاش مصيرو فالعطلة؟
واحد قاصر ما يعرفش واش يدير تقول عندو الحق و هكدا راك تشجعو على العنف
يروح يكسر و يدير فوضى و تقول عندو الحق!!!!
حسبي الله نعم الوكيل
المهم واش كاين من بعد العطلة؟؟؟
العطلة تكمل سواء 10 او 15 يوم و من بعد
فكرت فقرايتك ول النتائج نتاعك ول فكرت فالعطلة برك
انا متاكدة انو كامل لي دارو الفوضى لقاوها سبة و ما عندهم حب للدراسة
على بالي كاين ناس يزعفومني
بصح هادي هي الحقيقة
العالم يدير فوضى على خاطر حوايج كبار
احنا يديروها على خاطر عطلة
سامحوني بصح ما زلنا متخلفين بزاف على العالم المتحضر
تحياتي للجميع​

 

[Skor m@k]

السلام عليكم
مرحبا بك ميمتي هنا عندنا هههه توحشناك
والله نتأسفو كي نشوفو دراري في عمر 15 سنة يخرج يدير اضراب ويعيط ويكسر
على جال عطلة راحة نقسولو منها سمانة واش من تربية لي عندو
واش الهدف لي راهم يقراو على جالو هنا نشوفو بلي راهم يفكرو المهم يقراو
وانا لي غاضتني بزاف كي زدت شفت بنات خارجين معاهم ويمشو فالطرقان ويعيطو ويغنو
كامل علبانا بلي المنضومة التربوية فاسدة وطبع في لبريكولاج برك وعام يطبع في عام
مي حتى الأساتذة ماولاش عندهم دور في تربية الطفل ونقولهالك صراحة
الأستاذ ولا تهمو شهريتو برك وهوما لي دخلو فكرة الاضراب للتلميذ
وانا نحملهم كامل المسؤولية الأساتذة وان شاء الله يتحاسبو عند ربي على واش علمو التلميذ
الأستاذ هو القدوة في المدرسة وخارجها كيفاه يولي التلميذ يشوف الاستاذ
أستاذ وما أدراك ما أستاذ وعلى جال زيادة تاعي 2000دج يدير اضراب ومايهموش الى قراو ولالا
ممبعد التلميذ يقول حتى أنا ندير اضراب وندافع على حقي
على كل حال ماعندوش الحق التلميذ في الاضراب ومانيش مأيدو بصح لو أنا في بلاصتو تغيضني عمري
وتانيت الأولياء تانيت مسؤولين على واش راهو يصرا
فرحان بوليدو ولا بنتو كي دارت اضراب لو صح جاو يحبو ولادهم يقراو وينجحو
كل واحد يحبس نهار من الخدمة ويحكم يد وليدو ويديه للمسيد يقرى بسيف عليه هاذي هي التربية
ماشي تفرح باش ماتقراش بنتها باش جي تغسللها لماعن ولا لحوايج
ربي يجيب الخير على كل حال مانلوموش الطفل ولا التلميذ وحدو أبدايها من الوزيرة هي المسؤولة على كلش واش صرا
شكرا لك ميمتي​

 

[miss victoria]

شفتو وين وصلت الحالة
كيما المؤسسة نتاعنا
راهم الاولاد دايرين اضراب وحدهم
داو العطلة 15يوم ممن عندهم
شكراااااااااااااااااا

 

[ام راس يابس]

سلام خالتي ام منير
ان شاء الله تكوني مليحه
عندي مدة مطليتش على المنتدى
احم احم
كتبت رد طويل عريض و من بعد محيتو
لقيت افكاري مش مرتبه
خلاصة القول انا من المستفيدين من الاضرابات هاذ السنه
لاسباب خاصة
مننكروش بلي هذا تصرف غير حضاري
بصح التصرف الحضاري مينفعش في وسط مجتمع الريسان الكبار فيه معندهمش علاقة مع التحضر
نفضل نكون عنصر حياد فهاذ الموضوع
راني نتابع فالتعليقات ✌✌

 

[الورد الأحمر]

السلام عليكم ورحمة الله وبركاته

هذو هوما التلاميذ تاع الزمان هذا من غير الجماعة لي نقولو عليهم إلا من رحم ربي. في كل فرصة يلقاو سبب ويعملو إضراب على أمور تافهة. زعمة 15 يوم ولا شهر آخرتها تكمل ويرجعو يقراو. المهم أنا كون ليا تخليلهم ال 15 يوم تاعهم وانحيلهم تمسخيرة ال3 أيام تاع لخريف ويومها يزيدو يخرجو يطالبو بحق تقرير المصير ! ربي يهدينا ويهديهم ويهدي أولياء الأمور لي رجعو ما يحشموش وما يحطوش حدود لأولادهم. مشكورة ع الموضوع.

 

[Hakan]

السلام عليكم خالتي :
مشكلة الاضراب ومشكلة المظاهرات بصفة خاصة فيها من المفاسد ما الله به عليم
خااصة بالنسبة للاطفال المراهقين سواء في الثانويات او المتوسطات لكن لا اضن انه له علاقة بالتربية
او الاخلاق نتاع التلميذ لكن عندو علاقة كبيرة بالوعي نتاع التلاميذ لانو صراحة التلميذ في وقتنا الحالي يعاني كثيرا من ازمة ثقافية يعني تلاميذنا فارغين ما يخممو مليح ما يدرسو العواقب مليح اضافة الى ذالك نعرفو انو هذي الاضرابات راهي مخدومة من عند الاساتذة والمسؤولين الفوق صراحة ضركا في وقتنا كي يتقابضو الاسياد في واش تطفر غير في الشعبي المسكين يجيو يعمرولو راسو ومن بعد يروح ضحية هذه المؤامرات ماش حتى تلاميذ قادرة حتى تصرى لكبار لكن العامل المشترك بين هؤلاء كامل هو الجهل
يدير اضراب على جال عطلة وواحد يدير اضراب على جال عتبة يعني وين رانا رايحين بهذا المستوى لكن نحمله كاملا للظلم اللي يتعرض ليه ابناء الشعب من قبل هؤلاء المنافقين الذين يتراسون كل المنوظومات سواء الادارية او التربوية او التعليمية بلنسبة للجامعة او حتى وزارات الدفاع والصحة وغيرهم وغيرهم هذو كاامل حاطين عينيهم على المواطن الضعيف وحابين يضربو ابناء الشعب في بعضاهم فقط لانو علابالهم بلي راهم لحقو للشب لوحد المرحلة ما يقدرش يفرق فيها بين الصح والغالط والسلام

 

[السلطانة]

وعليكم السلام والنهار
تعلن قبل قليل ان الوزيرة تمنح العطلة للتلاميذ
انا مخي حبس

من اللول علاه الوزيرة تنحيلهم في العطلة ! هي تاني غالطة المشرع لي حط العطلة ماش غالط
والتلاميذ تاع الجيل هذا مامش ساهلين ومامش الجيل تاع بكري لي يسكت ويقبل
هاذو احتجوا على رزنامة الباك تم تم رجعوهالهم واحتجوا درك على العطلة رجعوهالهم !

تاني وزارتنا تمشي بالقوة
+راهم مدولهم درك العطلة والاضرابات لي عطلتهم في الدروس
بالنسبة لتلاميذ البكالوريا هوما الخاسر الاكبر
راح يعوضولهم ويزيدولهم الحجم الساعي
غير كان عادو دارو احتجاج خلاف تاع عتبة الدروس كيما السنوات لي فاتت !
يعني الاستاذ معندو مخسر والمدير والمفتش ووو معندهم ماخسرو الضحية ديما التلميذ لي ماش عارف صلاحو

تقبلي مروري خالة .

 

["viola"]

سلام طاطا ^^ نشالله راكي مليحة

انا و الله من عندي غزاولها بن غبريط خخخ خاطر مرقتها ابن عمي كيما تنفحلها دير قانون تنحيه تزيد فالعطلة تنقص ..
كي شغل الوزارة ورثتها الزعيمة -__- ..
صح راني معااك فأنو الاضراب لي داروه مش حضاري أبداا فيه تكسار و عنف ..اصلا وش تستناي من ولاد الدوميل يخرجو للشارع -__-
اصلا ضايقة روحهم الشعب ديجا شفتو يغني زيدولنا سمانة نولو لباس هههه كي شغل سطاد ..بصح جابو حقهم زادتلهم سمانة ههه
و من جيهة اخرى الوزيرة ثان علاه تدنّا لعطل التلاميذ ..الاساتذة دارو اضرابات يتحملو مسؤوليتهم ..من حق التلميذ يدي 15 يوم ..
و كيما قالو راه كلش مخدوم من فوق حنا رانا نتفرجو في مسرحية برك
صحيتي ^_^​

 

[Oussama.GF]

ربي يهدينا
مهم انا من ناس درت مفاوضات بصح مدرناش فوضى كما لا كي تقولي
وديجا هي غير 5 ايام تقول هادي ايام راح يدرسوا فيها باينة نننننن غير يتسبوووا
وزيد والله هادوا لكبار ربي يهديهم بش يدير خير لا يدير شر يزيد يقولك عندك حق
ربي يهدينا و يصلحنا
ارتقي ايها الشعب

 

[أم منيــــــر]

@Skor m@k

السلام عليكم
اهلا بيك مالك
حقا حاجة تغيظ كي نلحقو لهاد الانحطاط
بصح انا ما نوافقكش الراي كي تقول المعلم يتحمل المسؤولية لانوما عادش يربي
المعلم يا مالك يعلم ما يربيش و لي ما يربوهش والديه جامي المعلم يقدر يربيه
نعرف معلمين و معلمات راهم يعانيو مع سوء التربية نتع التلاميذ
ما عندوش الحق حتى يزعف عليه ول يعاقبو واذا غلط و حاسبو المعلم يجيب باباه ويجي يشكي و يصبح في مشاكل مع المدير
هنا كفاش حبيت المعلم يقري و يربي في نفس الوقت
الغلط يبدا من البيت و يكمل في الشارع
يعطيك الصحة مالك

 

[أم منيــــــر]

صاحبة القبعة الحمراء عندك الحق تلاميد ناقصين وعي بزاف وهمهمالعطلة و ما همهمش الدراسة لي راهم موخدين فيها
شكرا لك على المرور

 

[أم منيــــــر]

يا حكيم تلاميدنا عندهم ازمة اخلاق و تربية ووعي و بزاف صوالح الا من رحم ربي

 

[Skor m@k]

السلام عليكم
هاذي لي قالك أضربو يعرف مضربو
خلاص الوزيرة هذي دخلت للتلاميذ فكرة كل حاجة جي بالقوة
عليها من ضرك لبلاد مراحش تكون بخير فالمستقبل
أنا ضد الوزيرة كي عاودت عدلت القرار وعطاتلهم العطلة
هنا تعرف بلي الوزارة راهي تسير مهمل كل واحد يبدل قرار من راسو
ضرك يوليو الحاجة لي ماتعجبهمش يديرو عليها اضراب ويكسرو كلش ممبعد يلبولهم مطالبهم
وتولي لبلاد خراب في خراب
يا وزيرة احشمي واخرجي راسك مرفوع بهدلتو بالتربية
كي ولاو التلاميذ هوما لي يقررو شحال يدو العطلة ربحت الدزاير​

 

[أم منيــــــر]

يا فيولا قلتيها الوزيرة تاخد قرار صباح و تبدلو لعشية
هاهي تتراجع و تعطيهم عطلة طويلة و تزيدهم غدوا و غير غدوا بونيس
كاين لي ما زال ما ردولهمش النقاط كفاش راح يديرو
بلاد العجائب

 

[أم منيــــــر]

شفت يا مالك كفاش
كما قلت درك يفرحو بالوزيرة ويقولك راها تخافنا و يبقاتو في كل مرة كي تنفحلهم يديرو اضراب
عيش تشوف
علاش بداتها من اليوم؟ هادي لي ما فهمتهاش

 

[أم منيــــــر]

و الله يا ام ياسمين فعلا الخاسر الاكبر هو التلميد
تاخد قرارات كما تحب هي بلا ما تحسب حسابات من الاول تخليلهم العطلة كما زمان
ول درك زعما علاش ما خلاتش حتى للخميس و تمدلهم العطلة
فهمنا زادت لهم اسبوع بصح اليومين هادو علاش؟
بصح العتبة جامي تقبلها
العام لي فات خرجو و نددو و طالبو بالعتبة وعياو وما قبلتش
سعيدة بمرورك

 

[آمِيْرَتُه]

السلام عليكم
أنا مني فاهمة والو لدرك معرفاش ديت عطلة و لا مازال
بصح حاجة بانت في بلادنا القرارات يصنعها الأطفال
يعطيك الصحة على الموضوع

 

[أم منيــــــر]

و الله حتى انا ما عرفتش اذا نبعث ولادي غدوا للمدرسة ول لالا
شفتي على آخر زمان ولاو دراري يقررو
ايه قتلك بلاد العجب

 

[الامين محمد]

علموهم يطالبوا فقط
و ما عموهمش الواجبات
راك تطالب بحقك لكن بالمقابل واش عملت لبلادك
لا زين و لا قرايا و لادين و لا شطارة كلش خسارة
في هاذ الجيل
راهم عاملينهم دروع بشرية باش يضربوا الوزيرة
وكيلنا ربي فيهم كامل

 

[koko DZ]

مليح زادولهم في العطله يعطيهم الصحة لولاد قدرو يغيرو من قرار العطله


كان غير يزيدولنا حتى حنا في لعطله عهه