الحيـاة لي رانا عايشينها ؟ ما محلها من الاعراب ؟؟

[ضآحكة مستبشرة]

السلام عليكم و رحمة الله تعالى و بركـــاته

مبروك علينا و عليكم الحلة الجديدة
وشراكم مع البرد ؟؟؟؟؟؟؟

المهم نفوت ديراكت في الموضوع خاطرش رح نكتبو من صمصوم قلبي
لوكان تعرفو شحال في هاد اللحظة راني متمنية نخرج من هاد العالم المزيف للعالم الحقيقي
العالم المزيف مرانيش نقصد بيه العالم الافتراضي و انما العالم الواقعي نفسه
وليت نحس بالي العالم لي رانا نعيشو فيه و لا الحياة لي رانا نعيشوها ماشي حقيقة ولات مزيفة
غابت الضحكة غابت الحقيقة رانا عايشين في اوهام كبيرة بزاااااااااااااااااااف
وين هي ايام زمان نهار كنا كامل نجتمعو في بيت واحد نحكو و نضحكوا حتى للصباح
وراهي هاذيك القعدات لي فيها ضحك محبة اخوة و فيها قعدة الكبار لي نسموهم بركة الدار

في بالكـــــــــــــــم الحياة راهي عادية ؟؟؟؟؟؟؟

انا منخبيش عليكم قلبي تعمر خلاص كرهت و بشــــــــــــــــــــــــــــــــــدة هاذ المعيشة لي رانا عايشينها
ولات مكاش الرحمة و الشفقة مكاش طفولة مكاش حب مكاش احترام مكاش سلم مكاش امان
ولا غير الكذب و السرقة انتهاك الاعراض الاختطاف السب الشتم القذف ......... غير الاشيءا القبيحة

المجتمع الجزائري تغيــــــــــــــــر بزاف

علبالكم نحمد ربي لشيء واحـــــــــــــــــــــد برك خاطرش انا من منظقة ريفية و منعزلة و بسيطة و الحمد لله

انا كرهت حياتي نهار رحت نقرا في الجزائر العاصمة كرهت حياتي تمنيت نحبس قراية و نريـح في الدار
شفت لعجـب ماشي لاني مرانيش نشوف ولا نسمع بصح مقدرتش نعيش مع مجتمع كيف هكاك
الحريـــــــــة قالولي ههههههههههه فهمتوا واش قالولي الحرية ؟؟؟؟؟؟؟

علاش الحرية مدايرة كيف هكا شفت صوالح جامي شفتهم ايه جامي
خاطرش انا نسكن في منطقة ريفية المرأة متخرجش من الدار الا باش تروح تقرا ولا المرأة العاملة فقط
اغلب الناس ميعرفوش نساء بعضاهم النص الكبير بالعجــــــاز و ماما منهم
مكاش في منطقتي طفلة تروح تشري
لي وصل عمرها 12 اكثر شيء 13 سنة الحجاب و القعدة في الدار تتحجب خلاص مكاش الحرجة غير للقراية
نهار رحت للعاصمة شفت و كرهت 3 شهر كانت كفيلة باش تخليني نكره معيشة هاذيك
توحشت نرجع لاهلي و نعيش معاهم مقدرتش
راني مقيمة تأمنو من لي نوصل من الجامعة من شمبرتي منخرجش والفت القعدة تاع الدار
لبنات الكل سايحين مرجعوش حتى تجي لاسيتي رح تغلق و انا للساحة تاع لاسيتي منخرجش
بصح الحمد لله رباونا والديـــــــــــنا
و حاشا لي ميستهلوش راني نحكي على نفسي فقط

ايه بصح واش لي خلا المجتمع يتغير فجأة
يااااااااااااااااااااااااااااااو التكنولوجيا
التكنولوجيا هاذي راهي مرض فتـــــــــــــــــــــاك

كل حاجة ماشي مليحة فيها استخدمها الجزائري مشفاش الايجابيات شاف غير السلبيات
علاش علاش ؟؟؟؟؟؟؟؟؟
راني نتساءل علاش يشوفوا غير الشيء لي ماشي مليح
اكثر حاجة تحرق في قلبي هوما الاطفال
نبكي بالدمعة صدقوني وليت نحس الاطفال ماهمش عايشين طفولتهم
انا لوكان دوكا يقولولي روحي تلعبي نفرح نخرج نجـــــــــري
خاصة البالون توحشتها بزاف
خاوتي كعينة نظل نجري موراهم روحو تلعبو رح تندموا على هاذ اليامات

الطفل مع يزيد يلقا اهلو شراولو تيليفون ولا طابلات باش يلعب المهم يسكت ميبكيش
وراهو حرص الاباء و الاخوة الكبار على اولادهم و خاوتهم ايـــــــــــــــــن ؟؟

علاش الاطفال ولاو ميلعبوش مع بعض غير بالهاتف و لا الكومبيوتر علاش
و كي يلعبو مع بعض تصيبهم يتقاتلو و يضاربوا كامل تأثير الالعاب لي يلعبوها يطبقوها
النعف بكل الطرق ولينا نشوفوه عند الاطفال
بسبب التكونولوجيا تفشات الظواهر الاجتماعية النعف الزنا القتل السرقة الخيانة
ااااااااااه و شحال تقتل كلمة الخيانة مرانيش نحكي على صاحب و صاحبو و لا صاحبتو
راني نحكي على خيانة الازواج لبعضاهم خاصة الزووووووووج
تقتل هاذي الكلمة ولا في عمرو 50 سنة ولا فوق تصيب لي زامي في الفيسبوك ديالو كلهم بنات
و مخلي زوجتو و بناتو في الدار و داير راياتو

في اي زمــــــــن اصبحنا




قد منحكي مرح نكمل المهم انا اريد حياة بسيطة ان شاء الله
خاصة حياة بكري دار تاع تراب و قش تاع بكري نعمر بيه الدار في الريف
نطيب عالنار و نعمر الماء من البير و ندير جنينة صغيرة نغرس فيها من كل حاجة شوية
هذا ما نحوس

لا قصر لا طوموبيل { هههههههههههه طوموبيل نستحقها } لا تكنولوجيا
و قولوا للي اختارعها الله لا تربحك جبتنلنا البلا يبلي راسك


و اسمحولي كثرت فيها

اترك لكم الفرصة باش تحكو على التكنولوجيا
و كيفاش كانت حياتكم بكري و حاليــــــــــــــــا

راني نستنى في ردودكم

سلام ​

 

[فيتامين سي]

الحياة لي راني عايشينها فعل ماضي مبني على الفتحة
عندك الصح في كلشي قلتيه و جيت غير باش نشد بلاصة و نرجع
لي عودة باذن الله

 

[ام راس يابس]

لي عودة
راني مغمومة كيفك من الجامعه

 

[الورد الأحمر]

السلام عليكم ورحمة الله

لي عودة ان شاء الله .

 

[Malika Tlm]

السلام عليكم حبيبتي
اه يا اختي موضوعك شباااب وبزاف
تعرفي يا اختي انا تاني والله صدقيني نتمني نعيش في البادية نربي بقر دجاج وووووونوض الصباح الباكر جو البادية الهايل والهواء النقي ونطيب علي النارونقعد فالطبيعة نتامل في خلق الله والخلوة مع الله تجي رائعة كل الامور هدي نتمناها تعرفي علاه لانني كرهت من جو المدينة الحرام الكدب الخيانة وبزاف امور
تعرفي كنت نروح للجامعة والله نبقي مخلوعة وكاننا عايشين فاوروبا
الحياء راح الاحترام مات الحب فقدناه وووووووووووووووو
فالبادية صح مزال كاين الحشمة والحياء الحب الجو العائلي الاحترام
ربي يهدي امتوا يارب
تحياتي حبيبتي
موضوعك عجبني بزاااااف

 

[cosette]

السلام عليكي
اهلا اسومة كيفك
واللله ياختي عندك حق في كل حرف ونقطة
وابصم عليهاا
الله يعين جيل راح فيها
ميرسي

 

[الورد الأحمر]

السلام عليكم ...
والله يا أختي النقاط هذو لي حكيتي عليهم كامل يغزلوني في راسي خاصة حكاية لولاد لي تلقاهم صغار بصغرهم يدصرو على التابلت والتيليفون ويولو هذو هوما اللعب المفضلة عندهم ولي يحيرني أنو الوالدين ياخذولهم رايهم ويشرولهم الأجهزة هذي ويساعدوهم على الضياع في عالم مازالو صغار عليه وهذي النقطة حاكمتها في راسي وبربي ان شاء الله لي يقول من ولادي أعطيني تيليفون نلعب بيه نعطيه كف مسونطري مليح في الخد نخليه يرغي على ساعتين .

موضوع التكنولوجيا في فرقتنا صح كاينة منها والبارح برك مع بنت خالتي نحكي وتفكرنا زمان المسلسلات كي كنا نتلمو كامل ونتفرجو وبدينا نشوفو في اليوتيوب على لي جينيريك تاع المسلسلات لقدم ومنهم تفكرنا مسلسل بمسلسل باقتراحات اليوتيوب وتحسرنا على دوك ليام وكل جينيريك نشوفوه نتفكرو القعدة كيفاه كانت ونتفكرو حتى لحكايات لي حكينا ومواقف صراو .

مع الأسف بزاف أمور تبدلت وضيعناها فقط لأنو احنا شعب ياخذ السلبي ويخلي الإيجابي ويضر نفسو بنفسو .

مغسي أختي ع الموضوع فكرتيني في بزاف أمور بيه .

 

[لؤلؤة قسنطينة]

السلام عليكم
والله يا أسومة الدمعة طيحتيهالي راكي دخلتي لداخل لداخل لداخل الجرح
الكلام هادا راهو يحرق في قلبي وبالاك لو نحب نعبر عليه مانقدرش ونتي راكي قمتي بالواجب ماشاء الله
وربي يرحم يامات بكري كان شوي تراب يفرحنا وعشر حجرات يسليونا .. نطيحو .. نتجرحو بصح الضحكة دايما على وجهنا
دركا تفتح عينيك تلقى تيليفون قدامك بالملاين بضغطة زر العالم بين يديك، تغلقو تلقى الميكرو مقابلك نفس الشي
ناكلو واش نحبو ونلبسو واش نحبو بصح الضحكة راحت، ولا كلشي موفر في حياتنا بصح اهم شي راح ولي هو النية
راحت الدنيا خلاص ولا كلشي مر ولو حتى تزور العالم كامل تبقى المرارة هاديك في قلبك على عكس بكري
التمرميد والحلاوة، الله غالب كل وقت ووقتو وكيما قلتيها والله معيشة في الريف خير من الدنيا ومافيها على الاقل تقابلي المناظر
الطبيعية وتسبحي لربي، ربي يفرج ان شاء الله
شكرا اسومتي على الموضوع ماقدرتش نضيف بزاف خاطر راكي حكيتي على كلشي الله يبارك
بالتوفيق غاليتي
​

 

[آمِيْرَتُه]

السلام عليك
منقدروش نغطو الشمس بالغربال
هدرتك قاستني
و متزعفيش مني كون نحلو الشخصيات لي شفتيهم تلقيهم جاو من و من النزوح الريفي من الأسباب
في وقتنا هذا كي المدينة كي الريف كل شي تبدل لأن كون متبدل كون أنت مراكيش فالعاصمة تقري
أنا نسكن فالمدينة وبغيت نروح نقرا لسيدي بلعباس و دارنا مبغاوش و أنت تسكني فالريف وخلاوك تروحي للمدينة شفتي الفرق وين راه
الناس لي شفتيهم تما مهمش ولاد العاصمة تلقيهم جاين من هاك وهاك لاعبينها عايشين الحرية لأن مهمش في ولايتهم وناس متعرفهمش ممكن أنت الواحدة فالمئة لي جيتي من الريف للعاصمة ومازال حاكمة في شرفك و أخلاقك كاين لي باعو جلباب كي دخلو للمدينة وتركو كل شي الأخلاق و تبنو الحرية و الفسق
و عن التكنولوجيا حنا ديما نستعملوها في حوايج ماشي ملاح كيما مؤخرا ظهر منشور نتاع ايماجيني تديها وهرانية تنوض فليل تقولك اوبي حليبي و كون تديها تلمسانية تنوض في ليل تقولك السلعة نتاع المروك بنينة يعني حاشاكم الزطلة ووووووو مستوى منحط يشوهو في صورة البنت الجزائرية عيب تلقيه 12 سنة فايس بوك والشعر و السروال هابط و الوالدين على بالهم ولدهم شاقاعد يدير
متزعفيش مني على الهدرة الأولى لأن ممكن معرفتيش توصلي الفكرة مليح و ممكن أنا فهمت غالط
....
كلنا اخوة

 

[الأزرق الملكي]

السلام عليكم
قديما كان هناك فرق بين الريف والمدينة الآن الوضع اختلف الناس نزحت وأصبحت تسافر و التكنولوجيا منتشرة في كل مكان
يعني لا يوجد اختلاف كبير بين أهل الريف والمدينة كليهما فيهم الفاسد والطيب هناك اختلاف فقط في الأجواء الأولى وسط الطبيعة
والثانية وسط البنايات اماالجامعات الموجودة في المدن الكبرى أكثرية الطلاب هم من الريف يذهبون إلى المدن ويدخل عليهم التحضر
من حيث لا يدرون لهذا لن نزايد منطقة على أخرى لأن كلها تصب في نهر واحد.
بالنسبة للتكنولوجيا أصبحت ضرورية لهذا آخذت جزء من حياتنا الواقعية و أيضا الواقع أصبح مرير لهذا الناس تلجأ
إلى هذه النافذة كي تروح على نفسها وتنسى هموم الدنيا وتنتقل الى عالم اخر .
للأسف الشديد رغما هذا التطور فقدنا أشياء جميلة وهي الحياة البسيطة التي تجعل من الإنسان يعيش راحة البال
و أكثرنا يضيعون أوقاتهم في أشياء لا تفيد ، يجب علينا أن نوازن بين حياتنا الواقعية و الافتراضية كي نعيش
حياتنا بشكل طبيعي ومن جهة نستمتع بالتكنولوجيا .
لمحتي الى فترة مهمة في حياة الإنسان وهي الطفولة فلو نقارن بين جيل الغميضة وجيل الفيسبوك نجد أن الأول
استمتع بحياته ولديه ذكريات جميلة مع أهله وأصدقائه أما الثاني فهو بالكاد لايرى اهله وخصوصا الاقارب
لان المواقع الإجتماعية جعلت الناس غير اجتماعية حتى في صين هناك شركات الكترونية تمنع بيع موادها الى الأطفال
الأقل من تسع سنوات كي لايفقدو حنان ودفء العائلة في مرحلة مبكرة.
شخصيا أخطط في المستقبل ان ابتعد عن هذا العالم أو على الأقل أقلل من استعمال التكنولوجيا
تسلمي​

 

[lg_dz]

موضوع جميل
اسمحي لي بالعكس
اليس العلم طور الانسان في كل شيء؟
ربما يكون من الافضل للاطفال استعمال التكنولوجيا وتعويض لعب بكري بالرياضة
حياة المدينة بكل صخبها في الوقت الحاضر هي الاسلم للعيش لولا تلوث الهواء فقط

​

 

[Oussama.GF]

ما ق هم ت من بن نبدا من بن نخلي
والله ههادي تكنولوجيا هلكتنا حياتنا
ر ان ا عايشين في مجتمع فاسد لدرجة ان و و لادن ا ولا و يقاتلو في بعضاعهم لا عشرة لا صحة لا والو
راحت ي ما ت طفولة حيث لم تكن لا انترنت لا هواتف كانت ايامنا رائعة جدا
ياريت ترجع
ربي يهدي المجتمعنا

 

[فيتامين سي]

جيييييييييت
بالنسبة للعباد لي راكي تحكي عليهم ماين في كل بلاصة
و الحرية اي شفتيها عند العباد واش نقول عير الحمد لله الذي عفانا مما ابتلاهم
راني شايفتهم و ماشي مشكل مدينا او قرية او دوار مشكلة اخلاق باختصار وقيلة اواوبا كاش مراهي تصدرلنا خنزير معلب باش راحت الغيرة عند الرجال وين خلاو نسا يديرو دوك الطبايع او حتى يسمحو لولادهم لي صاار يعيشو هكداك ...
مون نحكيييلك هههههههه
حكاية صغيرة برك على التحضر المهم انا وبن نقرا في جمعية معايا بنات اول يوم كي جيت طالعة بحكم مزال معرفتش طريق ساهلة و كانو بزاف رايحين من طريق طويييلة قلنا نروحو كامل مع بعض ..يا اختي موقف الله لا يطيح فيه اي بنت وحدة واش قالت تخيلي كي وصلنا ااري تاع البوس ناضت تبين في روحها و تقول ايا روحو للدار بركاونا من الزنق انا تنخلعت هذي مع من راهي لي يشوف يقول كنا ندورو و حنا يا ربي مشي تاع 5 دقايق من نتم قلت ادا هي تروح سرق انا غرب و ادا غرب انا شرق و منمشيش معاها نص ثانية منعرفها متعرفني قلة ادب
و حاجة ثانية حبيبة ديري في بالك بلي لي يديرو هكداك ماشي بنات ديك الولاية كاين صح مي مكانش لي تربح العيب في ولايتها تلقيهم جاييين من ولابات تانيين و راني هنا في وهران نشوف تلقيها تلعب روحها بطاطة كبيرة كي تحوسي متسكنش هنا ....كاين لي يحسبو ربي غير وين يسكنو كي يخرجو شوية بح لا اخلاق لا تربية
......اوه خروج عن الموضوع
المهم نرجع قلتي من نوصل نقعد في السمبرا و هذا منطقي وين تخرجي مثلا اكيد حبيبة راكي وحدك دجا ملازمش تخرجي والديك رسلوك لبلاصة قعدي فيها ..
حاجة تانية مكانش طفلة تروح تشري واش نقولك كل انسان و بلاصة لي عاش فيها كنى قبل وين كنا نسكنو عادي نحتاج حاجة نروح حانوت كبير يعرف بابا و اهلنا كامل نشرو واش خصنا و نرجعو جامي تلقي جارك تحكي معاه و هدرة عندي طريق نروح منشوفش يمين او يسار و نرجع لا نحكي لا والو بصح نتخيل انه احتاجيت حاجة منشريش بابا ناشي في دار اخي يخدم و تاني يقرا تطلبي على جيران اكيد لا
درك كي رحلنا من رمضان خرجت مرة نشري برك يعني ماشي قرايا خارجة نشري و نرجع لقيت طبعهم ماشي كيفنا مبن بلاصة كما نقولو صغيرة مافيهاش خدمة يعني برا تلقي رجال في قهوة و لا قاعدين معندهم اوبسيو تاع غض البصر تحسي كي تمشي و يشوفو فيك كانه جاية من كوكب اخر ..تحسي العينين عليك اصلا وين تدوري هههههههه حتى الشري و ندير لاليست لماما طويييلة و نروحو نشرو وين كنا ساكنين بكري
.........مكانش الخرجة السبب مكانش وين تخرجي ..منحكيش على عباد ثانيين نحكي على روحي ....انا و اختي نديرو في قاعة الرياضة يعني كي نروحو ماشي متربيين ؟؟؟ ..نروح طريق نركب و مروح و نعاود نرجع ميهمنيش الناس ..و خرجات قبل منرحلو و ناكد عليها لانه هنا كوكب وحداخر مفيش ويت تروحي ههههه
المهم مرات ندايقو نروحو للماناج انا خواتاتي و صحاباتنا و ندورو و نرجعو ولا كاين بلايص فيهم حوانت نقلعو ضيقة نتمشو و نرجعو خير مننفجرو ..و الاهم كي نتمشى برا نتمشى لاخلاقي و بلي ربي راه يشوفني ماشي العبد

.......اطفال و النت المشكل فينا حنا لازم نبعدوووهم على هذا العااالم
......انا لحد الان نلعب هههههه الطفولة متكماش مهما نكبرو كاين طفل داخلنا دايما يحتاج يلعب و يضحك و نجمو نخلقو حنا هذاك الجو
و الاطفال ميلعبوش مع بعضاهم باختصار مكانش مع من يلعب ماشي كيفنا كنا نخرجو للزنقا و نلهبو حاويزة و عميضة و جري عند الجيران و لعب بالتراب ...درك كاش ام تطلق ولدها برا بصح في نفس الجهة تقوله شد بورطابل زعما تخاف عليه من برا و معلابالهاش راها تهلك فيك اكثر و اكثر بهذاك السم
ايا راني رايحة نلعب ههههههههههه

 

[ضآحكة مستبشرة]

الحياة لي راني عايشينها فعل ماضي مبني على الفتحة
عندك الصح في كلشي قلتيه و جيت غير باش نشد بلاصة و نرجع
لي عودة باذن الله

دومــــــــــــاج حبيبتي معدنا ما نديرو هذا هو الواقع
شكرا في انتظار عودتكـ ​

 

[ضآحكة مستبشرة]

لي عودة
راني مغمومة كيفك من الجامعه

في انتظار العودة غاليتي
ههههه متفكرينيش بالجامعة مرضتني نكرهـا​

 

[ضآحكة مستبشرة]

السلام عليكم حبيبتي
اه يا اختي موضوعك شباااب وبزاف
تعرفي يا اختي انا تاني والله صدقيني نتمني نعيش في البادية نربي بقر دجاج وووووونوض الصباح الباكر جو البادية الهايل والهواء النقي ونطيب علي النارونقعد فالطبيعة نتامل في خلق الله والخلوة مع الله تجي رائعة كل الامور هدي نتمناها تعرفي علاه لانني كرهت من جو المدينة الحرام الكدب الخيانة وبزاف امور
تعرفي كنت نروح للجامعة والله نبقي مخلوعة وكاننا عايشين فاوروبا
الحياء راح الاحترام مات الحب فقدناه وووووووووووووووو
فالبادية صح مزال كاين الحشمة والحياء الحب الجو العائلي الاحترام
ربي يهدي امتوا يارب
تحياتي حبيبتي
موضوعك عجبني بزاااااف

و عليكم السلام و رحمة الله ختي ميمي
تعيشي حنونتي ربي يحفظك
حيـــــــاة البادية و الريف اجمل حياة مالـــgـــري مزالني عايشة شوية منها حاليا لكن افتقد ما كنت اعيش عليه قبل 6 سنوات على الاقل
كنا نعمرو الماء من البير و نشعلو النار نشوف جدي يحرث و يحصد و بزاف حوايج تتعلق بالريف
بصح حاليا راهي بدات تنقرض شيئا فشيئا
انا ساكنة في المدينة منذ 17 سنة بصح دار جدي في الريف عايشة اغلب عمري لثم
ان شاء الله يا ختي ميمي تعيشي حياة البادية لي راكي متمنيتها
خاطرش فخونشمووووووون بزاف هـايلة
نورتي حبيبتي ​

 

[ضآحكة مستبشرة]

السلام عليكي
اهلا اسومة كيفك
واللله ياختي عندك حق في كل حرف ونقطة
وابصم عليهاا
الله يعين جيل راح فيها
ميرسي

و عليكم السلام نينا
الحمد لله بخير و انت ؟؟
ان شاء الله ربي يكـــــون معاهم مستقبل صعيب في انتظارنا
العفو حنونة
ربي يحفظك
نورتــــــي​

 

[ضآحكة مستبشرة]

السلام عليكم ...
والله يا أختي النقاط هذو لي حكيتي عليهم كامل يغزلوني في راسي خاصة حكاية لولاد لي تلقاهم صغار بصغرهم يدصرو على التابلت والتيليفون ويولو هذو هوما اللعب المفضلة عندهم ولي يحيرني أنو الوالدين ياخذولهم رايهم ويشرولهم الأجهزة هذي ويساعدوهم على الضياع في عالم مازالو صغار عليه وهذي النقطة حاكمتها في راسي وبربي ان شاء الله لي يقول من ولادي أعطيني تيليفون نلعب بيه نعطيه كف مسونطري مليح في الخد نخليه يرغي على ساعتين .

موضوع التكنولوجيا في فرقتنا صح كاينة منها والبارح برك مع بنت خالتي نحكي وتفكرنا زمان المسلسلات كي كنا نتلمو كامل ونتفرجو وبدينا نشوفو في اليوتيوب على لي جينيريك تاع المسلسلات لقدم ومنهم تفكرنا مسلسل بمسلسل باقتراحات اليوتيوب وتحسرنا على دوك ليام وكل جينيريك نشوفوه نتفكرو القعدة كيفاه كانت ونتفكرو حتى لحكايات لي حكينا ومواقف صراو .

مع الأسف بزاف أمور تبدلت وضيعناها فقط لأنو احنا شعب ياخذ السلبي ويخلي الإيجابي ويضر نفسو بنفسو .

مغسي أختي ع الموضوع فكرتيني في بزاف أمور بيه .

و عليــــــكم السلام و رحمة الله
انا حاجة متقلقنيش قد الاولاد الصغار نحس انو طفولتهم ضاعـــــــــت بسبب تفاهات
نتمنى انهم يعيشو حياة حلوة يلعبو كيفنا نتمنى انو الاطفال تاع ضرك يعيشو طفولة كيما لي عشتها لعبت جريت حوست الحمد لله طفولة رائعة جدا
اما الانترنت فهي ضياع خاصة الطفل الصـغير ميجي يكبر يصيب روحو ضائع ميفهم والو في العالم الواقعي لانو فكرو ينشأ على اشياء افتراضية لما يبدا يكبر و يحاول يندمج مع المجتمع ميقدرش

ايـــــــــــــه مسلسلات زمان مام انا البارح بعد مكتبت الموضوع رحت ليوتيوب بقيت نتفرج لحوايج كنت نحبهم كي كنت صغيرة و لا كانو يحكولي عليها دارنا
للاسف تبدلت كل حـاجة و مزال تزيد تتغير لوكان احنا منغيروهاش

ربي يكون معانا
شكرا اختي نور على المرور
نورتي غاليتي​

 

[Skor m@k]

السلام عليكم
واش راكي اسوم ان شاء الله بخير تحسنت حالتك شويا
هاذي ضرك ولات تقريبا من عادات الجزائريين في اللباس الغير محتشم
وانت أحمد ربي راكي تقراي شريعة وتقريبا كامل مستورين وغير القلة القليلة لي مايحشموش
تشوفي جامعات اخرى والله غير المشيا تتلفلك معاهم سورتو كي تكوني بالحيجاب معاهم دوري
هذي تانيت ماولاتش غير فالعاصمة تقريبا كامل ولايات الوطن وخاصة الشمالية
كيوالفتي في بلاصة مايخرجوش عليها تكهي كي تروحي للجامعة وللاقامة
حنا فالمدينة تاعي مزال شويا حشمة مي بلاك عام عاميت يولي كلش مفضوح
ان شاء الله ربي يهدينا​

 

[ام راس يابس]

ايييه الجامعه و مادارت فينا
انا عايشة في وهران
عاصمة الغرب
و هاذ المناظر الي حكيتي عليها تقدري تقولي والفناها
من الصغر و احنا نشوفوها مهيش حاجه جديدة
بصح
مشكيتش بلي الموضوع عنده علاقة بالريف و لا المدينه
اختلاف فوسائل الانحراف لا اكثر
كنا ساكنين فالمدينة
فحي معروف
تحضر و منيش عارف واش
فالطريق تشوفي العجب
فالمتوسطه تشوفي العجب
فالليسي شفت العجب المعجب
و مكانش رقيب
خاصة انه كنا نقرو مع طلاب ساكنين فالحي العسكري
و الحي العسكري تعرفي فيه _ 47 ولاية ما عدا وهران
و خلي البير بغطاه
علابالي الناس مين تسمع كلمه وهران تقول بلي الوهرانيين ####
المشكل انه كامل الوهرانين الي نعرفهم خاطيهم...و الي دايين بيهم الشيعه و السمعه هوما الي جاو من هنا و هنا و قالو مهيش بلادنا ارواحو نتحرو شويا
صح ناس وهران همجيين فالتعامل ...بصح السمعه نتاعهم ضيعوها الي من و من كيما قاع الولايات (و انا ماشي وهرانية)
رحلنا للريف كيما سميتيه في رمضان و الله الجبل راه مورايا اذا تحبي نصورولك
و لقيت بلي نفس الحاجه
برك هنا تحسي بلي راكي في عالم اخر
اذا خرجتي تحسي العينين عليك
جارنا و ما ادراك ما جارنا خلي البير بغطاه
و زيد كاين حدانا ثكنه عسكرية
فيها من و من و من
مين تركبي فالمواصلات تكتاشفي بلي المثالية الي يلبسوها ناس بعض المناطق فالجزائر فيها شوية تاع نفاق
طلعت للجامعه (راني هندسة مدنية مكنتش باغيتها بصح المكتوب ..... و لا خلينا نقولو انا بهلولة ً..عندي 147 اختيار نروح ندير مدنية!!! ..و زيد اساتذة رهج متنجميش تناقشيهم اذا ناقشتي لعبتي بمستقبلك .. يقولك انت حمار و تبلع فمك و الله حالة.. و يقولك انا منغلطش.. علاه شكون نتا؟؟!واحد يعاير فالصحابة و يستهزا بالرسول .. خليني ساكته)
و عرفت بلي يا اما مكنتش عايشة
يا اما كنت طفله
بزاااااااف
واش هذا اذا طلعو الجامعه حسو بالحرية
انا الي لازم نعس روحي و نحفظ روحي و نخاف على روحي ماشي نخاف من والديا يشوفوني ندير فالغلطه!!
و اذا كنت بعيدة نسرح و نمرح ...
و مين راني فالريف معناها لازم نروح لمدينه باش نقرا
اذا بالمواصلات ندير ساعتين
يعني نخرج على 6.30 و ندخل للدار على 6
و خطرة دخلت على ال7.15
بنت المدينه ياك انا ....بصح شكون راه يعسني؟؟!
عندي الوقت نقدر نلعب فيه كيما نحب و على اساس كنت نقرا....كثر من 12 ساعه برا الدار ...
بصح انا شايفه و عايفة .....ماما تقول البنت النقية هي الي تدخل وسط الوسخ و تخرج نقية
.... ..
الي راهم معانا من #####
عايشين فالسكن
منيش حابه نحكي واش صرا
كاين بزاف قصص
نختاصروهم في مثل "بقرة شافت رومي"
و الاطفال دايرين ظل و الحسد داير ظل و الفسق داير ظل
.... .. ...........
يمكن التكنولوجيا و يمكن لا
منقدروش نقولو بلي هي...
على حساب الطفل وين عايش و واش يتعلم و واش يشوف
على سبيل المثل
جارنا مشكيتش بفهم كلمه تكنولوجيا من الاساس ....بصح صايع ضايع داشر فاسق فاجر و سكايري و يبيع السم للي ضيع الشباب
و ولد اخته قد ذراعي بصح لازمه تربية من اول و جديد
.... . .....
لا يغير الراي في الود قضية
بصح انا هذا واش شفت