وآش هي الشروط لي تطلبوها كي تروح تخطب / كي يجيک خطآب

[ضآحكة مستبشرة]

السلام عليكم و رحمه الله تعالى وبركاته
كيف حالكم اخوتي ؟

اليوم جيت بموضوع حساس بزاف و لي لبنات يتحسو منو جدااااا اكثر من الشباب مع انو ليجآن مؤخرا ثاني ولاو يهتمو بيه بزااف

موضوع اليوم هو الشروط لي يطلبها الرجل لاختيار شريكة حياته و الشروط لي الفتاة تطلبها من الخاطب كي يتقدم لها

ولينا نشوفو و نسمعوا بلي ليجآن يتشرطوا ويطلبوا طلبات غير معقولة واحد يقول طويلة و بيضاء و لوخر سمرا و رقيقة و واحد خدامة و لوخر قاعدة في الدار هي الشروط لازم بصح انا في رأي الشروط لي لازم يحوس عليها الخاطب في مخطوبته هي أن تكون حسناء في اخلاقها جميلة في كلامها أنيقة في تعاملها تصلي محجبة و تخاف ربي يحوس على زوجة لي تقدر تربي اولادها على طاعة الله و الرسول

و بالنسبة للفتيات اخطيكم من الدار و الطوموبيل و الايبيزا و ليون ياو حوسي على لي يصلي و يخاف ربي تكوني معاه في الدنيا و الآخرة يخاف ربي فيك و يربي اولادك تربية دينية


المهم كل شخص و عندو شروط في شريك/ة حياتو/حياتها

اخي / اختي العضو/ة وآش هي الشروط لي تطلبوها من شريک/ة حيآتكم ؟؟؟

و واش رايكم في شباب/فتيات اليوم ؟؟
و هل يقدروا يكونوا زوجات/ازواج صالحين/صالحات


بالتوفيق للجميع
في امان الله
السلام عليكم​

 

[Skor m@k]

السلام عليكم
لي عودة في المساء ​

 

[zohor kfz]

السلام عليكم
ممممممم الموضوع شوية حساس كيما قلتي ههههه
بالنسبة ليا شروطي
يكون ولد عائلة محترمة لانه الزواج بالنسبة ليا هو علاقة تجمع بين عائلتين مشي غير بين شخصين
عامل في ظيفة تابتة مشي نهار يخدم و 10 يقولي الله غالب مكانش ...
يكون متوسط الحل ... يعني مكفيين من الضروريات و ادا كان اقل انا مستعدة نخدم و نعاونو مكانش مشكل و ما نحبش ابدا واحد مرفه لانه يجي منو تكسار الراس كتر من الهناء
عمرو اقل من 36 سنة
و مثقف ... منيش نقول هداك لي كل ما ننطق يقلي قال العالم الفلاني كدا وكدا هههههه
بالنسبة للسيارة و الدار المهم انهم يكونو من خططاتو انه يديرهم مشي يكون في عمري 60 سنة و نكون عاد في دار العيال هادي منقدرلهاش
هادو شروطي المادية
اما الروحانية فلا نقاش فيها ... ما نقبلش بواحد ما يصليش ولا واحد ما يصومش هدي مفروغ منها و اصلا ما يوصل للدار وحد كيما هادا لانه لي ميخافش من ربي اكيد انه لا حياة معاه

 

[Hakan]

الشروط يعني ما نكذب على روحي
مانيش نخمم في الزواج حتى تكون فيا بعض الشروط المليحة باش كي نطلب الطفلة اللي راني نحوس عليها
نطلب وكلي ثقة بواش عندي لا من الناحية المالية لا من ناحية الرفاهية لا من الناحية نتاع جسم مليح وكل شيء
اما شروطي في الطفلة واش نقول لاختي
انا نحب الطفلة جميلة الشكل خاصة الطفلة صاحبة الشعر الجميل والاسنان الجميلة
الزين لازم يكون مي حاجة معقولة باسكو خوك تعرفوه وتعرفو شكلو ماهو قبيح ما هو زين مي الزين في الطفلة
ولازم تكون من عائلة محترمة وخاوتها يكون درقازة يعني رجالة والوالد نتاعها كذالك
تكون صاحبة مستوى دراسي رفيع يعني خريجة جامعة مي الخدمة مكانش
حاجة اخرى ماذابيها تكون شوي اومبيونص لانو نكره الطفلة النكدة يعني تضفي جو مليح في حياتي
السن نتاعها عندي جد مهم يعني اقل من 24 سنة ولو كنت انا نبلغ الثلاثين اذا حب ربي
والفارق بيناتنا لازم يكون فوق 5 سنوات هذي اللي راني متأكد منها حاليا غيرها مكانش وربي يهنينا
ان شااء الله ​

 

[فيتامين سي]

جرحتيلي المشاعر :X3::X3:
نمد رايي بلا كدب و تبلعيط و المثالية هذيك تاع الفاسبوك و المنتديات
انا شرط بعد الدين و الاخلاق لي شرط اساسي ^^ شرطت الدار ماشي فيلا ب 10 طوابق :p و شرطت ميكميش
في الدين الدار من حقك خلينا من نسكن مع والديه عادي
نهار الانسان يطيح في الصح تفهميني ...جا شخص عندنا هو ساكن مع اهله صح مليح مي يسكن مع اهله و عنده خاوته ولاد يعني 24 ساعة بالحجاب يعني اي حياة هذي تبقي تجري مور خمارك و تعسي روحك ها هدرتي نضتي ضحكتي خلينا واقعيين كاين تنجم تعيش هكدا لي والفت دار العيال و انا فيتامين سي منجمش مكبرتش هكدا عشت غير مع والديا لا عمومي لا جداتي والفت ندير لي نبغي
منطقيا لي معندهش خاوته عادي تسكني معاهم و لي عنده انا ضد لابغا يكري لا يهم ...المهم كل انسان حر في قراراته اكيييد
تاني يكون عاقل احم احم يكون خدام اكيد يعني حجات الضرورية في حياة الانسان ....
ربي يرزق كل وحدة بالزوج الصالح

 

[لؤلؤة قسنطينة]

السلاااام عليكم
وعدنا إلى الساحة من جديد ههههه
اسومتي واش احوالك؟؟ زعما كلي مانحكيوش خلاص وحنا عندنا اتصالات في العالم الآخر ههه
المهم قريت موضوع زواج دخلت نجري تعرفيني نحب نتوقب على هاد المواضيع هههه ولي عجبني كتر تسألي فينا ووضعتيلنا الاجابة في آخر الموضوع يخي مهبولة ويخي اسومة :Love:
المهم يديا راهم يشطحو وحدهم توحشو الكتابة والردود:p
المهم فيما يخص الزواج نفضل الرجل الطويل بطول مايكل جوردن والرجل الوسيم بوسامة خليني نخمم مهند مايعجبنيش المهم وسيم وخلاص ههه
وعندو الدراهم كي تاع الخليج المهم بلا خرطي وبلا افلام هندية وجمال وطول نتكلمو صح وعلى الامر الواقع
والله العظيم والله والله والله ثلاث مرات اول حاجة ولا اول شرط مانقدرش نتخلى عليه هو الصلاة وطاعة الوالدين صدقيني يكون واش يكون سواءا خدام ولا واصل ولا نيفو
ولا حتى حاكم بلاصة بوتفليقة خاطر رانا عايشين في ارض الواقع ورانا نشوفو في الزواج بعين الواقع، مابقاتش احلام المراهقة يجي شاب شباب وعندو الدراهم ويديرلك عرس
على سفينة في وسط البحر والكمان يعزف من هيه والناس ترقص كلاسيكي خلاص لازم نفطنو ولازم نعرفو لب الحياة هادي كيفاه ولازم كل واحد وكل وحدة رايح يتزوج
قبل مايخمم في الشروط يقابل المراية ويسأل نفسو علاه رايح /رايحة نتزوج؟ بالنسبة للرجل مانتكلمش لأني ماعنديش تفكير الرجال ولكن كإمرأة هل رايحة نتزوج باه نتخلص
من شبح العنوسة؟؟ هل باه نغير بنت عم جدات خالتي ونبينلها بلي كي تزوجت قبلها راني شابة عليها؟ هلن تزوج باه ندير عرس وشطيح ورديح ونلبس فستان غالي ونتصور
صور كي تاع المشاهير؟؟ هلن تزوج باه نهرب من مشاكل البيت؟ هل نتزوج باه نعيش شهر من الرفاهية والرومانسية ؟ هل نتزوج باه نعيش السعادة االبدية؟؟
ربما تبان هاد الاسئلة ولا هاد العملية تافهة ولكن صدقيني هي الاساس لأنو نص لا ماش كل الشعب لي راهو يتزوج يخمم لعند خشمو وبرك يخمم لشهر او شهرين بعد الزواج وسطوب
يحبس الفيلم يعديو شهرين ولا عام على الاكثر يكرهو الزوجين خاطر ماخططوش لأبعد من هاد المدة، ولما تشوفي طفل صغير حافظ ستين حزب تفهمي الاب والام الهدف لي تزوجو عليه
ماش عشاء تاع 200 مليار ومن بعد شهر يطلقو، المهم باه نتكلم على السؤال الرئيسي للموضوع نقولك بما انو عندي اهداف بعد الزواج وماش الزواج بحد ذاتو هدف عندي
فإني نخير او نشرط في الرجل انو يكون مصلي ويخاف ربي .. مطيع لوالديه .. مثقف (وماش بالضبط عندو شهادات) كاين لي عندهم شهادات وكي تتكلمي معاه تحسي الحيط يفهم احسن
يكون خدام (وماش لأني ماتيرياليست) وانا مانتمناش يكون وزير، المهم عندو شهرية تشري طرف خبز وتعشينا وتغدينا، التربية والاخلاق واللسان النظيف نكره كره شديد الرجل
لي يسب كلام فاحش ويسب لي خلقو بكل بساطة كلي ماكاين والو نكرهو كره شديد، وعلى التربية يكون تعاملو مليح مع كامل الناس يعني نهار تجي تسقسي عليه تسمع عليه غير كلمة ماشاء الله
وكي نلحقو للشكل المهم وجهو منور كاين ناس ملامحهم ماش جميلة ولا فاتنة بصح مجرد الطيبة تاعهم تحس وجهم عليه النور وترتاحلو نفسيا (هاداك لي نحوس عليه ههه اذا لقيتوه اربطوه )
المهم على العموم يكون انسان مسؤول وعندو اهداف حتى هو بعد الزواج وهو اخراج جيل متربي وخلوق ويرفع راية الاسلام، واهم واسمى هدف انو يشوفني زوجتو في الجنة ان شاء الله
واذا كتب ربي لأنو هادا اسمى هدف وباه نلحق لهاد الهدف لازم نختار الزوج لي عندو استعداد لتحقيق هاد الهدف ان شاء الله، وربي يعطينا على حساب نيتنا ان شاء الله
المهم راني فرغت قلبي هههه وعلابالي خلطت الزواج بالطلاق هههه المهم نتمنى تفهمي شروطي المعقدة، شكرا اسومتي على الموضوع نتمنى تكو ناجابتي واضحة ومفيدة ربما
تحيـــــــــــــــــاتـــــــــــــــــــــــــــــــــــــــــــي :Love:

​

 

[Salah eddin]

السلام عليكم
انا ما نكثرش عليكم...لي لازم يكون في الزوجة المستقبلية
انا شروطي ساهلة ...و قليلة
اولا..الحجاب الشرعي...و الاخلاق
ثانيا..تقعد في الدار...وو السلام ....هه​

 

[الامين محمد]

الحمد لله كلش تمنيته و شرطته لقيته
و لو الدنيا رجعت للورا ما راح اتزوج غيرها
حبيبتي ربي خليها لي و يعطيها على قد نيتها
و يفرحها بزوجها و اولادها و يسعدها في الدارين
راضي عليها يا ربي اشهد عليا

 

[aljentel]

السلام عليكم
ممممممم الموضوع شوية حساس كيما قلتي ههههه
بالنسبة ليا شروطي
يكون ولد عائلة محترمة لانه الزواج بالنسبة ليا هو علاقة تجمع بين عائلتين مشي غير بين شخصين
عامل في ظيفة تابتة مشي نهار يخدم و 10 يقولي الله غالب مكانش ...
يكون متوسط الحل ... يعني مكفيين من الضروريات و ادا كان اقل انا مستعدة نخدم و نعاونو مكانش مشكل و ما نحبش ابدا واحد مرفه لانه يجي منو تكسار الراس كتر من الهناء
عمرو اقل من 36 سنة
و مثقف ... منيش نقول هداك لي كل ما ننطق يقلي قال العالم الفلاني كدا وكدا هههههه
بالنسبة للسيارة و الدار المهم انهم يكونو من خططاتو انه يديرهم مشي يكون في عمري 60 سنة و نكون عاد في دار العيال هادي منقدرلهاش
هادو شروطي المادية
اما الروحانية فلا نقاش فيها ... ما نقبلش بواحد ما يصليش ولا واحد ما يصومش هدي مفروغ منها و اصلا ما يوصل للدار وحد كيما هادا لانه لي ميخافش من ربي اكيد انه لا حياة معاه

نسيتي شيء مهم جدا ....
وهو البيت المستقل .. فهو اهم من كل ما تطرقتي له ...

 

[aljentel]

اما شروطي في الطفلة واش نقول لاختي
انا نحب الطفلة جميلة الشكل خاصة الطفلة صاحبة الشعر الجميل والاسنان الجميلة
​

هههههههههههههههههههههه
اهم شيء الشعر والابتسامه ....

 

[aljentel]

السلاااام عليكم

وعندو الدراهم كي تاع الخليج (شحال نكرهم ) :Love:

​

علاش تكرهيهم هل تعرفيهم كلهم حتى تكرهيهم !!!
تبحثين عن زوج ذو لسان سليم لايعرف الفحش ويحب الجميع وانتي تكرهي 50 مليون نسمه بلا سبب !!!
شلون تركب !!!

 

[aljentel]

الزواج قسمه ونصيب ومن يصيبه النصيب هو من سيصيب ...
وكل شروطكم تذهب ادراج الرياح حينما يكتب الله ويقسم ..

 

[Salah eddin]

خونا @aljentel راك جايبها ورا الجماعة لي تشرط
ههه

 

[aljentel]

خونا @aljentel راك جايبها ورا الجماعة لي تشرط
ههه

كيفك اخي ياعساك بخير ...
والله ياخي نريد ونريد والله يفعل ما يريد ...

 

[لؤلؤة قسنطينة]

علاش تكرهيهم هل تعرفيهم كلهم حتى تكرهيهم !!!
تبحثين عن زوج ذو لسان سليم لايعرف الفحش ويحب الجميع وانتي تكرهي 50 مليون نسمه بلا سبب !!!
شلون تركب !!!

عفواً أخي الكريم ولكن أنا كي قلت نكرهم لم اقل كلام فاحش ولم اسب الله عز وجل استغفر الله العظيم وأتوب إليه
أنا قلت مجرد كلام ومانقصدوش بأتم معنى الكلمة لأني مستحيل نكره انسان مانعرفوش
ولكن كثرة المال تفسد الانسان وهذا مانلاحظوه على بعض الخليجيين وأكيد ماش سبب باه نكرهم لأنو كانت كلمة عابرة فقط
انا ناس آذاوني وماكرهتهمش خلي يا نكره ناس مانعرفهمش
يعني بعبارة أوضح نكره الطباع ماش الناس
على كل حال شكرا للنصيحة وراني حذفت الجزء هاداك خاطر غلطت ونعترف بالخطأ
تحياتي​

 

[aljentel]

عفواً أخي الكريم ولكن أنا كي قلت نكرهم لم اقل كلام فاحش ولم اسب الله عز وجل استغفر الله العظيم وأتوب إليه
أنا قلت مجرد كلام ومانقصدوش بأتم معنى الكلمة لأني مستحيل نكره انسان مانعرفوش
ولكن كثرة المال تفسد الانسان وهذا مانلاحظوه على بعض الخليجيين وأكيد ماش سبب باه نكرهم لأنو كانت كلمة عابرة فقط
انا ناس آذاوني وماكرهتهمش خلي يا نكره ناس مانعرفهمش
يعني بعبارة أوضح نكره الطباع ماش الناس
على كل حال شكرا للنصيحة وراني حذفت الجزء هاداك خاطر غلطت ونعترف بالخطأ
تحياتي​

بارك الله فيك كم اثلج صدري ردك ....
انا لاادافع عن اهل الخليج ففيهم الصالح والطالح لكنني ارفض التعميم في كل شيء
والله يهدي ما خلق ...

 

[فيتامين سي]

@ام راس يابس

 

[لاريمان]

السلام عليكم
لم اجد رد مثل هذي العبارة للاخ الجنتل
والله ياخي نريد ونريد والله يفعل ما يريد ...
هي في الاخير
مكتوب رب العالمين

 

[ام راس يابس]

@ام راس يابس

هدرتي في بلاصتي

 

[فيتامين سي]

الشروط يعني ما نكذب على روحي
مانيش نخمم في الزواج حتى تكون فيا بعض الشروط المليحة باش كي نطلب الطفلة اللي راني نحوس عليها
نطلب وكلي ثقة بواش عندي لا من الناحية المالية لا من ناحية الرفاهية لا من الناحية نتاع جسم مليح وكل شيء
اما شروطي في الطفلة واش نقول لاختي
انا نحب الطفلة جميلة الشكل خاصة الطفلة صاحبة الشعر الجميل والاسنان الجميلة
الزين لازم يكون مي حاجة معقولة باسكو خوك تعرفوه وتعرفو شكلو ماهو قبيح ما هو زين مي الزين في الطفلة
ولازم تكون من عائلة محترمة وخاوتها يكون درقازة يعني رجالة والوالد نتاعها كذالك
تكون صاحبة مستوى دراسي رفيع يعني خريجة جامعة مي الخدمة مكانش
حاجة اخرى ماذابيها تكون شوي اومبيونص لانو نكره الطفلة النكدة يعني تضفي جو مليح في حياتي
السن نتاعها عندي جد مهم يعني اقل من 24 سنة ولو كنت انا نبلغ الثلاثين اذا حب ربي
والفارق بيناتنا لازم يكون فوق 5 سنوات هذي اللي راني متأكد منها حاليا غيرها مكانش وربي يهنينا
ان شااء الله ​

لا يا اخ مفهمتش حاجة صغيرة علاش جاامعية و متخدمش ..حاجة مغريييبة بزاف
اغرب كائن على وجه الارض هههههه صحا زعما بيناتنا تتوقع روحك شحال نسبة الجمال تاعك حتى تشرط وحدة كما ماري هههههه والله غير ضحكتني ربي يفرحك كما ضحكتني و انا مغمومة