لحظة صدق بلا مزيتك ( للكبار فقط )

[الامين محمد]

السلام عليكم أحبتي ناس اللمة
الأكارم

وقع معايا امر ربما غريب و ظريف في العموم
لكن بصدق امر خلاني نحس بأمر واعر بزاااف بزاااف

ملاحظة اللي عنده مشاعر حساسة ننصح ما يقراش الموضوع

المهم
تعشيت و صليت العشا
كانت ريح باردة و بدات الثلوج تتهاطل
حسيت روحي تعبان
طفيت التلفاز

خممت باش نرقد
و كيما العادة شوية حسابات مع النفس و على العباد

استفغرت و سامحت كل واحد غلط معايا
و نمت

مت نعم نعم مت و أنا نايم مت
جاو الاهل ينوضوا في لقاوني ميت
و انا نشوف في الحال
بكى و عزاء و تغسيل و تكفين كلش راني نشوف فيه
و نشوف في زوجتي و ولدي اسلام
ماهوش حاط النظارات
و انا نقول يا ليته يبعدوه علي و ما يخلوهش يشوفني ميت

حملوني في المحمل و لأن المقبرة قريبة لينا
قروا ياخذوني مشي

فعلا حملوني و صلاو علي صلاة الجنازة
و بعدها وضعوني في القبر
غلقوا علي
و بداو يوضعوا في التراب
و وليدي جالس على طريقته الخاصة و هو يبكي
و انا نقول بعدوه علي و نبكي عليه لأنه أصبح يتيم

و انا خايف و قاعد نقول الامين ما تخافش راك صليت و قريت القرآن
و عملت الخير و عمرك ما ظلمت واحد و سامحت كل الناس
و انت انسان طيب و كيفك ما يخاف

المهم فتحت عينيا على اساس تجي الملائكة باش تسالني
شفت كلش ظلمة

و انا نراجع و نقول لا اله الا الله
و محمد عبدالله و رسوله
عمري كانت في الخير
و الدراهم ما عنديش اللي نتسال عليها

بعد مدة شكيت قلت الامر نتاع الاسئلة ما يطولش
و انا ما جا عندي حتى واحد

بديت نتحرك
بعدها شكيت اواااه وقيلا ما نيش ميت
واقيلا هذا كابوس و خلاص

تذكرت اني وضعت الريمونت نتاع تلفاز عند وين نحط يدي
قلت نمد يدي اذا لقيتها راه منام
و اذا ما لقيتهاش و لقيت التراب راني في الآخرة

فعلا مديت يدي تلمست الريمونت و تلمست الفراش
اووووووووووووووف راه كابوس
و اللي زاد دوخني ان الكهربا و انا نايم راحت
لذالك ما شفتش ضو التلفاز او الديمو

الحمد لله هي فرصة لي باش نعمل لمثل هاذ اليوم

كن صادق مع روحك و توب قبل يوم الممات
سامح و طلب السماح و ما تكابرش
ياااااو ظلمة القبر ما هيش ساهلة
ربي اسألك حسن الختام
مسامح كل واحد غلط معايا

الامين محمد

 

[ضآحكة مستبشرة]

السلام عليكم اخي الأمين
الحمد لله لي كان حلم هكذا باش تزيد تصحح أخطائك و تراجع نفسك اكثر
و هذا بمثابة درس أن شاء الله تستفيد منه
بالتوفيق

 

[سكون الفجر]

وعليكم السلام ورحمة الله
من أين أبدأ يا أخي والله شعرت بأني مت فعلاً، يا إلهي كم نحن مقصرون
أسأل الله أن يثبتنا عند السؤال وأن يغفر لنا ما تقدم من ذنبنا آمين

الحمد لله انه كان كابوساً، حفظكم الله أخي الأمين
في أمان الله
جزاك الله خيراً على التذكير والتنبيه​

 

[عاشقة الإحسان]

السلام عليكم
خيي و سيدي @الامين محمد
و الله لما قريت أنو الموضوع ممنوع على أصحاب القلوب الضعيفة قلت منكملش قرايتو الليلة نخليه غدوا نكملو بلاك يروح لي النعاس ههه ،لكن فضولي مخلانيش وكملتو .
يا أخي الأمين صرالك كيما هذيك الأنشودة " ليس الغريب " مات و حضر جنازتو
المهم في الموضوع أنك مررت بتنبيه و مرّرته لنا أيضا كي ننتبه نحن كذلك و نشكرك على الذكرى ،فالدنيا جرفتنا و أنستنا أنه هناك يوم سيتوقف فيه عداد أعمارنا و أعمالنا ،فل نغتنم قبل وصوله .
شكرا لك على مشاركتنا حلمك ، و ربي يبعد عليك الكوابيس .

 

[العَنْقَاءُ]

سيناريو موت حقيقي
ويلاه من حادثة القبر
لم تصلها بعد
كانت هناك أشرطة في الألفية السابقة
تباع في الأكشاك
لها نفس هذه الظاهرة
أحدثة ثورة بين الشباب
من لا يصلي أصبح يصلي
من كان عاق أصبح بار
الله يحسن خاتمتنا


​

 

[Oussama.GF]

سلام خويا
امين
انا تاني صراتلي كيما هكا وليت نبكي ونعيط
ق عد ت نقول يما وبابا مسمعونيش
هو ما يبكو عليا
وكي جاوي يقبروني انا كنت حاب نهرب لكن ملائكة قاتلي ارواح هدي هي حياتك ثانية
لازمك تشوفها وانا نقولهم والو حبيت نروح ليما
وزدت شوية فقت من نوم وقلت الحمد الله مزيا راه حلم
رحت طلبت من ناس سامحوني لي غلط معاه
ربي يغفر لينا ذنوبنا

 

[حلم كبير]

السلام عليكم
اخي الكريم سكرات الموت صعيبة وحلم مخيف خاصة لمن لم يتجهز لاخرته جيدا مخيف حقا.
اعمل لدنياك كأنك تعيش ابدا واعمل لاخرتك كأنك تموت غدا.
الخير وفعل الخير والخير والخير هو كلش في دنيتنا هاذي اللي قدر يغرس شجرة يغرس واللي قدر يعاون عجوز ولا شيخ يعاون
والوالدين يا خاوتي وخواتاتي ولا تنساوهم هوما الورقة الرابحة لرضا الخالق سبحانه.
اخي امين بارك الله فيك
وثبتنا الله واياكم على ديننا وفعل الخير وتوجيه الشباب وتذكير الغافل.
تقبل مني فائق الاحترام والتقدير.
حلم كبير

 

[زاد الرحيل]

و عليكم و السلام
حقا اجمل موضوع قرأته
بارك الله فيك
هاذي رسالة لينا تقول هاذي محطتكم الاخيرة و داركم الجديدة و كيفاه رح تروحوا ليها و كل واحد واش ادا معاه ، اما اللي عندهم مشاعر حساسة فهذاك النهار ماكانش مشاعر حساسة كاين عملك فقط .
شفت في اليوتوب افعال تنتظر صاحبها في القبر و لما وضعوا التابوت في القبر و فتحوه دخلاته الافعى و مبعد غطاو القبر عليهم ، من هذاك اليوم و انا نرتعش و نقول واش دار هذاك المخلوق و نخاف تعود تجيني ، ربي يستر علينا .
اما انت يا اخي انا نشوف انك طائع لربي سبحانه فواصل و تزود بزاد التقوى
ربي يجازيك خيرا

 

[Tama Aliche]

السلام عليكم
شكرا على التذكير والتنبيه اخي
ربي يقنا عذاب القبر يااا رب

 

[Tama Aliche]

سيناريو موت حقيقي
ويلاه من حادثة القبر
لم تصلها بعد
كانت هناك أشرطة في الألفية السابقة
تباع في الأكشاك
لها نفس هذه الظاهرة
أحدثة ثورة بين الشباب
من لا يصلي أصبح يصلي
من كان عاق أصبح بار
الله يحسن خاتمتنا


​

السلام عليكم
ممكن تقولي اين اجدها ارجوك اخي

 

[حكاية قمر]

الموت كل يوم تقارع لينا مي حنا غافلين
ربي يهدينا
شكرا لك

 

[الامين محمد]

نسيت الرد على مروركم
لي عودة في الغد للرد عليكم أحبتي

 

[Hakan]

والله شيء يجب الوقوف عنده وقفة خوف ورهبة
ربي يغفرلنا برك بارك الله فيك اخ محمد وربي يرزقك الجنة ​

 

[sanaya]

صاحت لي الدمعة كحكيت على ولدك
ربي ميحرموش من والديه
صح موقف واعر يخلي القلب يخشع
ممكن مجرد منام مي في ألف عبرة
ربي يجازيك على تذكيرنا بالآخرة
سلام