جيل المافيا

[لؤلؤة قسنطينة]

السلااااام عليكم أهل اللمة الكرام وأسعد الله اوقاتكم
نتمنى تكونو كامل بخير وبصحة وعافية وربي يفرحكم كااامل كيما راكم ويكون مساء اليوم مساء خير عليكم
المهم اليوم كنت رايحة نتكلم على موضوع خفيف وظريف نضحكو فيه كيف كيف ونحيو على بالنا كامل
ساع وفجأة يخبطني واحد الخبر على وجهي شفتو في التلفاز كشردلي الخيوط تاع راسي وتفاجأت صراحة وهادا لي خلاني نبدل الموضوع ونقرر نطرح موضوع سميتو جيل المافيا خاطر ولا جيل مافيا صح الله يسترنا
المهم مؤخرا راهي كوارث تصرا داخل مدارسنا ساعات نسمعو طفل ضربوه بالموس في الليسي قتلوه وساعات واحد خبطوه بحجرة في متوسطة وساعات طفل ضربوه صحابو وهربو وكل يوم نسمعو كوارث راهي تصرا في اهم مكان في المجتمع وهو المدرسة لي لازم يكون مكان للتعليم والتربية والامان في نفس الوقت لكن درك العكس ولا مكان نخافو فيه على ولادنا
والخبر لي شوكاني اليوم وشفتو على التلفاز هو طفلة تقرا في المتوسط ولا الليسي (ماش عارفة بالضبط) تتعرض للاعتداء بالموس من طرف زميلتها، اتخيلو الطفلة وجها كامل مخرب بالموس تقول خريطة وزيد الكراريس تاعها كامل مقطعين تقول شخشوخة وهادا كامل من زميلتها لي تقرا معاها حتى ولات الطفلة هاربة وحبست القراية؟ ماهذا؟
شي كيما هادا يصرا في المدارس ونورمال؟ كنا مع الذكور ولينا للاناث درك؟ طفلة تدخل بالموس للقسم وزيد تشوه وجوه الناس ونورمال؟ كي عادت المدارس هكا مالا الشارع كيفاه؟ والسجون كيفاه؟ بالاك الرحمة فيهم
يعني مايقدروش يديرو نظام صارم في المدارس؟ ياسيدي فتشو التلاميذ كي يدخلو خاطر راهي حاجة خطيرة انو داخل مدرسة يدخلو بالسكاكين تقول جزارين، عسو التلاميذ وقت يكونو في القسم الاستاذ يشوفهم ووقت يكونو في الساحة ديرو مراقبين يتولهو ليهم، خاطر باه تبقى تصرا جرائم هكا وبهاد الطريقة وفي وسط المدارس راهي حاجة خطيرة
خاطر لما تشوف وجه طفلة مرسوم كامل بخرابش من دم وفي وسط مدرسة بلا مايراقبهم حتى عبد تما تعرف بلي مدارسنا ولاو كوري و ولاو مدارس يخرجو منهم لي مافيا ماش تلاميذ متربيين هوما مستقبل لبلاد
وحسب الحالة هادي نعودو نخافو على ولادنا ونحبسوهم في الديار اذا مامنعوش من السرقة ماش رايحين يمنعو من الاعتداءات داخل المدارس نبعتوهم يتعلمو يجيونا مشوهين؟ هاذا ادا ماجاوش في صنادق لا سمح الله
ربي يستر برك من لي جاي ان شاء الله
المهم نخليلكم الخط للتعبير
اتهلاو في رواحكم
سلاااام

​

 

[sanaya]

ظاهرة خطيرة لازم نعالجوها وربي يستر

 

[ريحـان]

الُسِلُامٌ ْعلُيَكِمٌ وَ رَحُمٌةِ الُلُُه وَ بّرَكِاتُْه
اختي تقريبا ولينا نسمعو في هذ اليآمات بزاف حوادث كيما هذو و من القتل و الضرب عند الذكورة راح نشوفو دك المافيا عند البنات
زمان كنا نخافو من المعلم و منقدروش نشوفه في حتى في الطريق و ندوبو في بلايصنا بلاك مش من الخوف قدما يكون بسبب الاحترام و المكانة لي نعطوهاله
اليوم ولينا نخافو من التلاميذ ههه مش من المعلم ولات المدرسة و محيطها ساحة للصراع برك مش نتعلمو منها و لو كان جينا نربطو القراية بحياتنا مئة بالمئة ميصرى ضرب ولا عنف ولا حتى قتل لخاطر وينها الدروس لي تعلمناها في التربية الاسلامية نرحمو بعضانا و نسامحو بعضانا و حتى الإعتداء على الغير حرام لابغى في الجسد ولا بالكلام
بصح هذا راجع لكونو مكانش وعي كامل عند التلاميد بلي المدرسة هي مجال للمعرفة والتعلم مش شجار و وعنف .. وحتى بعض المرات تصرى كيما هاك حوادث بسب انو يحب التلميد يجيب روحو قدام التلاميذ لخرين ويبين في روحو واعر
وفي الاخير كل هذا العايلة عندها سبب فيه بالتربية و الاستقرار الاجتماعي
وش نقلك اختي لؤلؤة موضوعك في صميم مانعيشه اليوم مع المافيا
بلاكـ حتى انا رح نولي مافيا ونولي نرد شوية في منتدى وش راك تهدر ههه
تقبلي مروري​

 

[Mustapha Bita]

منظنش القضية راهي في التفتاش ابدا
التربية هي لتعلمهم عدم فعل اوارتكاب اشياء غير اخلاقية او مخالفة
المدارس ليس فيها تعليم ابدا(نتكلم عن تعليم التربية) المدرسة هي الاساس .لان الوالدين لايبقون مع اولادهم مثل مايبقون اولادهم في المدارس
القطاعات كلها تقريبا بدون اي استتناء يعملون كشهارين فقط.لا لاداء مهام واحترام دالك المهام او العمل او لاادري كيف يسمونه
ادا كيف سينشا جيل محترم.متخلق.مثقف...وهو لم يتعلم من الاساس

 

[حكاية قمر]

السلام عليكم
والله يا اختي رانا في لكوارث وصاي
مانقدروش نلومو الاستاذ باسكو مع جيل كما هذا غادي يولي بوليسي عليهم والهدف تاعو هو يقريهم اما يربيهم اسمحيلي ختي لوالدين ماراهمش يقبولها من الاستاذة يقوله ولدي مربي وماخصه والو ويااما سمعت كما هكا
نجو لهاذ لعقلية مشكل في الوالدين لي طالقين وولادهم هكا لا عسة لا والو نرومالمو شيرة مها تعسها وتفتشها بلاك هذا مكياج بلاك كاش كادو من هاك ولا هاك
اللوم كلو للاباء بالدرجة الأولى ضروك ما نطيقوش نقولو للاستاذ عسه ااذ ضرب صاحبه بخدمي ولا فتشه اذا معاه مخدرات وكاش صوالح
نحكيلك من عائلتي لي كلها في التعليم والله ماشي لانهم اهلي نشكر فيهم مي بشهادة الناس أساتذة في المستوى خالي يهدر مع تلاميده وعاسهم في الساحة ويا ويل لي يشوفه مع طفلة ولا واحد يضرب واحد عندو مبدأ يمشي عليه راني نربي في أجيال ونفس الشي بالنسبة للوالد والبقية مي تعرفي شا ولاو لبات تاع تلاميذ يقولو ماكان ما دخلكم في ولادنا ويزعفو
عمتي تخبر فيا قاتلي حكمت تلميذة دير في المكياج في ساعتها فتشتها وصابت غي لمكياج وجماعته ايا زعفت عليها ودارت لها استدعاء للوالد باها جا وبهدل عمتي بنتي وماكاش لي سالها وتزعفيش عليها برغم انو القانون المدرسي يمنع هاذ لعفايس ولحق لعمتي مي تمرد بدعم من أولياء وكتبر لحالة يوقولك رانا غي عرش واحد ويبداو يحلو كتلحق للفصل
يايا قوليلي يرحم والديك لحق على استاذ ولا على اهله لي روح تقر وهاابلاك يحقرك لمعلم
لازم يكون دعم من الوالدين للاساتذة باه يربو هاذ لجيل سينو رانا رايحين ونضيعو

 

[آمِيْرَتُه]

السلام عليك
اللوم على الأولياء
نحكيلك قصة صرات تلميذة تعدات على زميلتها جات المعلمة وبختها وقاتلها احضري ولي أمرك جات ولي الأمر وهي الأم ' نسميها الراعي الرسمي لأخلاق الأبناء ' قالت للمعلمة أنا راني موصيتها تضرب المعلمة قاتلها ملي أنت الي راكي تعلميها العنف مليحة هذي قاتلها واه تضرب على روحها
وتاني زميلتي تسمع في وحدة تقول لولدها ضرباتك اليوم المعلمة هدرت معاك زقات عليك باه نوريلها ههه
كون تشوفو الضغط لي عايشينه في المؤسسات عجب والله يقعد غير لي باله طويل
ماشي الأستاذ لي يعس التلميذ حتى هو راه مهدد بالخطر إما من التلاميذ أو الأولياء لي يعس التلاميذ المراقبين يحطو الأمن فالمدراس و خاصة الثانويات و المتوسطات
الأستاذ جاي يقري و يوصل رسالة مجايش يعس في فلان و فلانة أنت تمديله نصائح و تعلميه المبادئ هو يروح لدارهم كأنك مهدرتيش قاع عندي تلمية تقول كلام السوء كي قتلها ها حرام و نهنا عليه الله سبحانه وتعالى قاتلي خويا يقوله لماما ايا هي مراة حمبوك و تاني يقرا عندي واحد يظل مع الكبار يدير تصرفات نتاع واحد عمره 30 و هو صغير كي ستدعيت ولي الأمر قاتلي سبابه بوه يديه يقعده مع صحابه كامل كلام الكبار في راسه يعرف السايسة و الغايسة كيما نقولو أن نقول الأولياء هما سبب انحراف الأبناء نرجعو خطوات لوقتنا كان كي يزقي علينا معلم والدينا يزيدونا ضرب درك عادت الام تجي تهز روحها و تسب و تشتم وتقوله كون تهدر معاك طرطق عينيك فيها المسؤول الأول و الأخير الأهل هذي لي هزت موس مشافوهاش دارهم تصرفاته باينة نتاع ذكر وين الأهل لي يغيرو من تصرفاتنا هي راهي راجل مش أنثى خلاص وزيد مصاحبة طفل هو عاونها باه ضربوا البنت
الله يجيب الخير برك

 

[Smile Queen]

حبوبتي مريم وعليكم السلام
صح لبارح شفتها تشوكيت كارثة وزادو قطعولهم كرارسهم هي وصاحبتها يشفو مساكن ، والطفلة وجهها نصلو مخربش بالموس في الاول حسبتها خبشتها بظفارتيها قاتلي اختي لاااالاا راه موس
يا لطيف الوقت لي لحقنا ليه الله يسترنا ، وكيما قالو الاخوات في الردود لي قبلي اللوم كلو عالاهل
يعني ماليها ماشافوهاش هذي لي مسترجلة ومتنمرة كيما هك ، المشكل كون الاستاذ يعيط لولي الامر قادر يقتلو نورمال -اذا كان رب البيت بالدف ضاربا ..فسيمة اهل البيت كلهم الرقص-
شكرا على موضوعك حنونة
واشهد الله اني احبك في الله غاليتي :kiss: