شني هذا * الفنطاين * ؟

[Salah eddin]

السلام عليكم
ماكلاه تبداو ...اصبرو شوي
راني عارف بلي هذا الموضوع مكرر و ياسر لي هدرو فيه
هاصبروا شوي وش بيكم
ههه
يا المشرف هاه..استنا ما تغلقش الموضوع خلينا نقسرو شويا
المهم ...
حبيت نهدر على موضوع عيد الخرطي هذا بطريق هزلية باه نضحكو شوي و انحو على رواحنا
المهم
بسم الله
اولتها ...الجماعة هذو وش راه يقلهم راسهم ...اه ؟؟

ضروك نتا العام كااامل ما تفكرتش فيه لي كادو ...كي لحق نهار الغرب راك نضت و صرفت قريب مليون و لا زوج على الهدايا و لي كادو
و راك جاي و مصحح وجهك ...
شني هذا
و اصلا علاه تمدو الكادو
شكون هذي لي راك رايح تمدلها الكادو
هذي يماك ؟؟ لا
هذي اختك ؟ لا ثاني
امالا حاجة اخرى ...اي والله
ضروك رانا لحقنا للمحضور
و نتي يا طفلة
ما تحشميش على عرضك
النهار الgهار و نتي خارجة و لابسة الاحمر
وش هذا
بصح يا جماعة كاين حاجة دوختني
و علاه يلبسو الاحمر ...و الاصفر
زعما لون الحب ولا كيفاه .. ؟؟
و الجماعة لي يشرو لي كادو ..تلقاه في دارهم يضرب ق البصل و الطمطيش و دراهم الكادو هذاك يجمل فيها بالدورو
ياسيدي وش حاتمك ؟؟؟ ها شفت ...هاك نتا تغرق في روحك في الديون و كذا و كذا
...
يا جماعة خافو ربي خليكم من الخرطي
و الله ..لراكم بهدلتو بالامة كيما هاك
تلقاه تراس فيه اثنين و لابس سروال احمر ..يا صاحبي وش هذا ها راك كبير
...
و الله يا جماعة ق يحير الواحد
المهم
ايا نتوما كاشما تقولوا
ايا بالعافية و تبقاو على خير
شبعونا خرطي
​

 

[Skor m@k]

السلام عليكم
آه يا خويا صالح جبنا فيها وحد الجاجات مع صحابي وكليناهم شحال ملاح هههه
يرحم والديك يا خويا الجاجة مشوية دير 35 ألف للوحدة كول يا gليل
شبعت فيها كرشي بيان بيان ممبعد تقابل البياسجي مع البارسا
ني تحوس على عيدهم ني معلباليش واش
وزدت خليتلها ليما شويا مشوي هذاك هو البليزير
صح الواحد بلاك يحب مانقولوش قلبو حجر
مي باش تشري ببون حمر ووردة وتروح لعندها وتمدهالها أواه هذي ماندورش بيها خخخخخ
أنا لو نشوف صاحبي دا وردة حمرة خلاص مانزيدش نهدر معاه
تبهديلة يا محاينك
شكرا لك خيي​

 

[لؤلؤة قسنطينة]

السلام عليكم
بارك الله فيك خويا صلاح على الموضوع والله كنت ناوية نحط موضوع حتى انا فيما يخص هاد الجهل والجهال هههه بصح علابالي
الشعب كامل يدير عليه مواضيع هيا قلت معليش نسمعو لخاوتنا شوي، المهم عيد الهم هادا ولا عيد الجرب هو مرض مجهري
وخطير جدا خاطر كي يضربك تحكمك واحد الهبلة هكا تولي تشوف غير الاحمر تولي ثور يا محاينك ههههه تولي تشوف غير
القلوب والورد قدامك وعايش في الاحلام بصح غير يلحق 15 فيفري تتفكر بلي راك تضرب في اللوبيا والبصل ههههه
مالا علاه عليك تحلم بزاف، المهم هادي كي نتكلمو بسخرية ونضحكو مع بعض لكن لو نوليو للواقع مانلقاوش واش نهدرو
راجل يدير زوج ميترات كيما قلت يطلب المصروف من يماه ويزيد يسبها كي ماتمدلوش باه يشري عرف قارو ويروح يرخس بروحو
باه يشري دبدوب الطفل الصغير يعافو هههه ويمدو للالة تسمع فيه آي لوف يو كل يوم يخي جياحة يخي
اما تاع راجل يلبس الاحمر هاديك راهي كارثة عظمى مع يزيد يشبح روحو ويهبط شعرو يبان ربطة معدنوس حمرا ههههه
ولا يبان كيفو كيف الطفلة يا لطيف، اصلا لي رايح تعدي يوم تتمسخر فيه وحدة اضرب وجهك بماء بارد تفطن مليح وروح اخدم وازدم
كاين امور اهم في حياتك من هاد الخرطي واذا صح صح تهتم بالحب خرج يماك تحوس وغديها وعشيها برا واشريلها كادو خاطر
هي لي تستحق الحب صح، واش نقولو ربي يهديهم برك كن غير جا في نهار اليوم يطلقو ثور في نص المدينة خلي يقلبهم كامل ههههه
ونتهناو منهم
شكرا خويا على الموضوع ربي يهنيك
تحياتي
​

 

[ضآحكة مستبشرة]

السلام عليكم خويا صلاح
لك كل الشكر والتقدير على هذا الموضوع القيييممم

ههههه و الله غير كيما عرفت بلي كاين عيد في فيفري نسيتووو كاامل حتى فكرتني فيه مرت عمي مزالها عاد عروس جديدة تسنا في الكادو هههههه

الحمد لله مام اليوم عيد الكره ديالهم و يكون فيه بزااف عفايس عيانين مي مصادفتش كاش قنبلة موقوتة شفت غير العاديين و زيد في جامعتي غير الاخوان و الاخوات اهل السلف الصالح صافي حاجة قليلة
بصح من و من يحكوو بلي يدوو الببونات و البالونات و الشيكولات و الجماااعة هادوك
و الحمد لله يا رب خاطينا و راس خيي خاطيني هذا عيد الزنى ( حاشا قدركم )
ماشي عيد الحب الانسان قبل ما يحتفل بحاجة يحوس على الاصل فيها باش كانت ماشي غير نحتفل و برك

شعب تااافه و تحية كبيرة للناس لي ميديها حتى ريح

شكرا عالميضوع خيي​

 

[حروف تائهة]

السلام عليكم
هههههههه واش صلاح راك زادم في الخرطي بدماغ
و قيلا نساوك في الشيكولا مالا راك تنتقم هههه
ياوليدي و الله تحير كيفاه يخمو
تلقا واحد هوا و صاحبته في زوج لابسين لحمر
و ياكلو في الشيكولا و حاكمين دبدوب احمر
ما تفرقش شكون فيهم الراجل و شكون لمرا
شعب مريض في كوكب مريض غير يقلد و خلاص
انا راني هجيت للمريخ من لعوج تاع البشر .
ناس مش لاقية لبسة دفيها في البرد و ناس صارفة لملاين على جال تحتفل بيوم ماهمش عارفين واش أصله .
ربي يهدي و يصلح الحال
أصلا هاد الشعب حتى يعرف يحب باش يحتفل بالحب .
يعطيك الصحة خويا الحبشي
ايا بالعافية

 

[Smile Queen]

عجبتني لهجتكم خيي ههههههههه للاسف هذا هو مجتمعنا .. المشكل تلقا الغاشي زعما كامل رومنسيين غير في 14 فيفري
عيد التبهدايل الله يبهدل ايامهم
شكرا عالموضوع

 

[حلم كبير]

السلام عليكم و رحمه الله تعالى وبركاته

الاخ صلاح كالعادة تخير من الهدرة القليلة والرزينة .

نقولولو هاو فات عيد الهم ،روح ليها مع الصباح اعطيها كف ولا زوج على الديون اللي ركبتهم على راسك

ياخي حالة ياخي
واللي ما ممدش كادو نقولو
هاو قريب عيد الشجرة
عند الفلاحة يقولولو مقرس
واهديها شجرة كرطوس:Love:

الاخ صلاح بردتنا قلوبنا الله يعطيك ما تتمنى.
تقبل مني فائق الاحترام والتقدير
حلم كبير
​

 

[زاد الرحيل]

و الله غير حشمت و انا نقرا في الموضوع ،تقول راني مشاركة فالتبهليل انتاعهم ولابسة الاحمر واللضحكني اكثر الراجل اللي فيه اثنبن و لابس الاحمر تقول رانا في زمن العندليب الاسمر كما يسموه
اليوم يعطيها وردة و غدوا ابقاي على.لى خير

 

[Hakan]

ياودي اللي يحب خلوه يحب اللي يعطي لصحبتو كادو ربي يسهل عليه
المهم برك ما يناساوش خاوتهم في مزمبيق العزاب هههه
عيد الحب هذا خرطي يعني صراحة قبل لا نطلع للجامعة
بالاك شحال من مرة يجيني كادو من عند بعض المعجبات بالاك 3 مرات هكاك
مي كي كبرنا وعرفنا صوالحنا تفكرنا انو هذي الاشياء مجرد خرطي
مكانش حاجة اسمها عيد حب كاين حاجة اسمها ميلكا شكولا الجميع هههه
وكيما كنت نقول انو في هذا اليوم تنتشر الزنى بشكل مفضوح
باسكو الشاب ما يمدش كادو باش يرجع وديه فارغين لازم يوسخ روحو مع صحبتو
كذالك بالنسبة للطفلة ربي يهدي الجميع صراحة انا من النوعية اللي قادر نمد كادو في هذا اليوم
لكن لن يكون الا لميمتي او اختي او زوجتي اذا حب ربي
اما وحدة وصحبتي هذيك جام في لاباج نتاعها خسارة فيها سلام ..​

 

[Salah eddin]

السلام عليكم
صحيتو يا جماعة
راني شوي مشغول ضروك
اصبرو عليا من باعد ان شاء الله
و نرد عليكم واحد واحد بربي ان شاء الله
ايا بارك الله فيكم​

 

[Tama Aliche]

وعليكم السلام ورحمة الله
الحمد لله ما خرجتش ف 14 فيفري هذا مي لوكان خرجت خير خاطش الركبة باطل من عند الروسوفورات وزيد ميلكا قد تاتي من حيث نحن لا نحتسب ههههه
واش نقولك الانسان يكبر فالعمر والعقل يصغر , عليها موليناش نحسوا ببنة عيد الاضحى وعيد الفطر بسبب اعياد هكذا تاع حب وعيد المراة والام والشجرة وعيد انوش مافيا عن قريب ههههه
ياو خطونا من الخرطي والصماطة هذي شبعتونا عيووود وراكم تزيدو فالذنوب , الى مخكم فارغ ومتخمموش ارواحوا هزو علينا شوية تخمام رانا تخنقنا حنا من التخمام هذي قراية هذي خدمة رانا نخططوا وملحقناش اوووو بقالكم غير عيد هذا ؟ ومن بعد كي يتزوجوا الضحكة مع بعض مكنش بالعام باش يضحكلها وتضحكلوا والله حتى الكحل ما يجيبوا لمرته ولا هي تفقدوا فكاش عفسة شابة
غير افطر اتغدى اتعشى واطير ايييه واش هذي حضارة؟ حضارة الرخس البخص والخماج روح شوف الناس على اليوتيوب واش راهم يحكوا على هذا الحب يا عجابة شيييخ يحتفل بيه
عييب بهدلتونا ياخي تحب مرتك كل ما تتوحشها و لا تتزااعفوا مع بعض اشريلها كادو
زعما الرومانسية بالخماج لا ؟ راكم بعااد على الرسول صلى الله عليه وسلم ياا حسرااا كان يتسابق مع الزوجة تاعوا احنا يشد صحبته من يدها ويتمشاو وكي تولي مرته حرمة عليها الزنقة عييب شغل يخرج مرتوا صحابوا يشوفوه ونهار كان يشد على يدها مشافوهش بففف يعيووووو
ربي يهدي من خلق الله غالب راني نعيا وانا نكتب بصح لوكان هكا بالهدرة منخلصش منخلصششش
مشكور على الموضوع

 

[sanaya]

شبتونا خرطي
علاه زعما بقات حاجة تتسمى حب
الحب راح مع عبلة وعنترة وقيس ولبنى
مي حنا بقا الخرطيوالمصالح
يرحم باباك واش من حب يحتفلوا بيه
الحب اللي يخليه يصرف على وحدة تلاتين مليون ومبعد تهليه
ولا الحب اللي يهليه يعرف وحدة نهار واحد ومبعد يقولها نحبك ونموت عليك
هههه
قالك الشعب الحزائري هو الشعب الذي يحب بسرعة ويكره بسرعة
نورمالمو يقولولو عيد صباح لخير ولا مسلخيرههه
لأنو كلمة نحبك ولات تقال في كل بلاصة كشغل ولات عندنا تحية
أوليو الواحد يقول لصاحبتو صباحو يقولها نحبك
خطونا من الخرطي متلعبوش بينا
وراجل لابس سروال احمر
صح جامي شفت هاك مي تخيلتوا وضحكت
مي الله غالب
شباب لايهمه اللب
وتهمه القشور
هاواش نديروا
خلينا نتفرجوا
كتر خيرهم لأنو الغفلة تاعهم ضحكني بزاف
وشر البلية مايضحك
سلااااام

 

[Malika Tlm]

مساء الفل
كنت رايحه نرقد كي شفت الموضوع نتاعك عجبني وقلت املا لازمني نرد عليك اخي
واش نقولك تعرف خرجت نشري حوايج ايا اجي تشوف البنات لابسين الرووووج ههههههه وكل وحدة قابطة واحد ورايحين وين منيش عارفه
والكادويات والورد الاحمر ينباع
والله عيب كبير وحرام هدا واش من عيد حب عادوا يقلدوا الغرب في كلش الله يهديهم
حنا اعيادنا باينييييين عيد الاضحي ةالفطر ومحرم وووووو املا نحتافلوا باعيادنا بزاااف علينا
اخطيونا من الخرطي
ميرسي عليك اخي
عيني راهم يتغمضوا ههههه تصبح بخير
تحياتي لك

 

[aljentel]

السلام عليكم
هههههههه واش صلاح راك زادم في الخرطي بدماغ
و قيلا نساوك في الشيكولا مالا راك تنتقم هههه
ياوليدي و الله تحير كيفاه يخمو
تلقا واحد هوا و صاحبته في زوج لابسين لحمر
و ياكلو في الشيكولا و حاكمين دبدوب احمر
ما تفرقش شكون فيهم الراجل و شكون لمرا
شعب مريض في كوكب مريض غير يقلد و خلاص
انا راني هجيت للمريخ من لعوج تاع البشر .
ناس مش لاقية لبسة دفيها في البرد و ناس صارفة لملاين على جال تحتفل بيوم ماهمش عارفين واش أصله .
ربي يهدي و يصلح الحال
أصلا هاد الشعب حتى يعرف يحب باش يحتفل بالحب .
يعطيك الصحة خويا الحبشي
ايا بالعافية

هابي فلنتاين ..

 

[aljentel]

يجب ان يسود الحب وينتشر فهو من أسس جمال الحياة
الحب ليس مقصور على الحبيب او العشيق
الحب لكل من تحس وتشعر معهم بالامان والفرح والسعاده

 

[Salah eddin]

السلام عليكم
آه يا خويا صالح جبنا فيها وحد الجاجات مع صحابي وكليناهم شحال ملاح هههه
يرحم والديك يا خويا الجاجة مشوية دير 35 ألف للوحدة كول يا gليل
شبعت فيها كرشي بيان بيان ممبعد تقابل البياسجي مع البارسا
ني تحوس على عيدهم ني معلباليش واش
وزدت خليتلها ليما شويا مشوي هذاك هو البليزير
صح الواحد بلاك يحب مانقولوش قلبو حجر
مي باش تشري ببون حمر ووردة وتروح لعندها وتمدهالها أواه هذي ماندورش بيها خخخخخ
أنا لو نشوف صاحبي دا وردة حمرة خلاص مانزيدش نهدر معاه
تبهديلة يا محاينك
شكرا لك خيي​

و عليكم السلام خويا حكيم
اضرب الدجاج على القش
ههه
راك تشوف
صيل التبهديل ...المزية لي ماهمش الكل كيما هاك
الله يعافي و خلاص
شكرا خويا ​

 

[sanaya]

يجب ان يسود الحب وينتشر فهو من أسس جمال الحياة
الحب ليس مقصور على الحبيب او العشيق
الحب لكل من تحس وتشعر معهم بالامان والفرح والسعاده

ههه مصح هوما ميفهموش هاكا

 

[حروف تائهة]

يجب ان يسود الحب وينتشر فهو من أسس جمال الحياة
الحب ليس مقصور على الحبيب او العشيق
الحب لكل من تحس وتشعر معهم بالامان والفرح والسعاده

الله يسلمك خويا
اكيد الحب لا يقتصر على تلك الفئة
الحب إحساس سامي و طاهر
و لكن للأسف أشكال الحب التي نراها هذي الايام غطت على جمال الحب الحقيقي
غير فئة قليلة مازالت تعرف المحبة و المودة
ربي يجيب الخير

 

[أم أُنٌَيسة]

السلام عليكم و رحمة الله تعالى و بركاته
لم انتبه لامور كهده
رحت نقرا و بقيت مع صحباتي و حكينا على الانيم و الدراسة و جيت مروحة وكاني منومة مغناطيسيا هههههههههههه
ربي يهدينا و يهدي كل المؤمنين يارب
تحياتي احترامي و تقديري​

 

[Salah eddin]

السلام عليكم
بارك الله فيك خويا صلاح على الموضوع والله كنت ناوية نحط موضوع حتى انا فيما يخص هاد الجهل والجهال هههه بصح علابالي
الشعب كامل يدير عليه مواضيع هيا قلت معليش نسمعو لخاوتنا شوي، المهم عيد الهم هادا ولا عيد الجرب هو مرض مجهري
وخطير جدا خاطر كي يضربك تحكمك واحد الهبلة هكا تولي تشوف غير الاحمر تولي ثور يا محاينك ههههه تولي تشوف غير
القلوب والورد قدامك وعايش في الاحلام بصح غير يلحق 15 فيفري تتفكر بلي راك تضرب في اللوبيا والبصل ههههه
مالا علاه عليك تحلم بزاف، المهم هادي كي نتكلمو بسخرية ونضحكو مع بعض لكن لو نوليو للواقع مانلقاوش واش نهدرو
راجل يدير زوج ميترات كيما قلت يطلب المصروف من يماه ويزيد يسبها كي ماتمدلوش باه يشري عرف قارو ويروح يرخس بروحو
باه يشري دبدوب الطفل الصغير يعافو هههه ويمدو للالة تسمع فيه آي لوف يو كل يوم يخي جياحة يخي
اما تاع راجل يلبس الاحمر هاديك راهي كارثة عظمى مع يزيد يشبح روحو ويهبط شعرو يبان ربطة معدنوس حمرا ههههه
ولا يبان كيفو كيف الطفلة يا لطيف، اصلا لي رايح تعدي يوم تتمسخر فيه وحدة اضرب وجهك بماء بارد تفطن مليح وروح اخدم وازدم
كاين امور اهم في حياتك من هاد الخرطي واذا صح صح تهتم بالحب خرج يماك تحوس وغديها وعشيها برا واشريلها كادو خاطر
هي لي تستحق الحب صح، واش نقولو ربي يهديهم برك كن غير جا في نهار اليوم يطلقو ثور في نص المدينة خلي يقلبهم كامل ههههه
ونتهناو منهم
شكرا خويا على الموضوع ربي يهنيك
تحياتي
​

اهلا بالاخت لؤلؤة ​

الله غالب ​

هذا حال جيل التكنلوجيا و التريسيتي
الله غالب
وش نقولو
الله يجيب الخير و خلاص
شكرا ​

​