صَرِيْحٌ / صَرِيْحَـةٌ جِـــــــدَاً عَلى اللمةِ الجَزائِريَة { العدد الآولْ }

[ضآحكة مستبشرة]

السلام عليكم و رحمة الله تعالـــــى و بركاته

وآش راكـم لباس ؟؟

اليوم جئت لكم بموضوع جديد باش تنشطوا شوية و يكون تفاعل ان شاء الله فالقسم هذا خاصة و الاقسام الاخرى عـآمة فقدت حيويتها

موضوعــــــي هذا هو : صريح { صريحـة } جـــداً و هي فكرة مستوحاة من برنامج صريح جدا على قناة النهار
و هو برنامج يسألوا فيه الناس في الشارع حول موضوع معين

حبيت نقبس الفكرة و نعتمدها هنا في المنتدى قصـد التفاعل و التعرف على اراء و وجهات نظر الاعضــاء حول مواضيع مختلفة

فكرة الموضوع :

و في كل يوميــــن رح نحط سؤال واحد موجه للشباب و الآخر للبنـــات
و على كل عضوة و عضوة الاجابة على الاسئلة كل واحد كيفاش يحب بطابع فكاهي و لا سيريو هههه ولآ نقاشي ديروا روسـكم
و التعرف على رأي الشاب و الشآبة باش نعرفوا العقليات ههههههه

و أول عدد رح تـكون فيه الأسئـلة الـآتيــــــــة :

سؤآل موجه للشبــــــاب :

هل يفضل الشاب الجزائري الزواج بجزائرية ام اجنبية و لماذا؟

سـؤآل موجه للبنـــــــآت :

المرأة الجزائرية هل تقبل أن تكون الزوجة الثانية ؟




الموضوع رح ندير فيه بزاف مواضيع نشوف رايكم فيها و علبالي رح يكون فيه قصف تام من كلا الطرفين ههههههههههههه
ياو غير بشوية متقطعوش في بعضاكم بزاف ندي ذنوبكـــــــــم هههههههه
في أمـــــــــــــــان الله
اتمنى ان ينال الموضوع اعجابكم

​

 

[Skor m@k]

السلام عليكم
أهلا بك أسوم واش راكي هذي غيبة
بلاكي برك يشوف الموضوع هذا حكيم خاطرش يجري موراك ومورايا خاطرش اعتمدتو ههههه
المشكلة في سؤالك هو ماشي نفضلو نتزوجو بجزائرية او أجنبية هههه
المشكلة هو الجزائرية تشرط بزاف يامحاينك ماشي كامل مي كثرتهم
كيما قالك التلمساني لي عندو 5 بنات لوكان يزوجهم يقدر يشري بابور ههههه
نجيبو مليكة تقرى هذا لكلام هههه @Malika Tlm
خاطرش يشرطو بزاف على بناتهم وماشي غير التلمسانيين تقريبا ولاو كامل ولايات الوطن
وراكي تعرفي شبابنا لي يحلم بالزواج من أجنبية تلقايه قيس الحال
عليها يقول نديها أجنبية باش مكاش شروط الزواج وتقدر العرس هي لي تخلصو ههه
بصح هذي قليل لي تصرى هنا
مي على حساب الزين ديجا راهي منشرت فينا وفيكم ليليا بلا مانزيدو نحكو عليه خخخخ
وعلى هذا نديوها ألمانية هاهاهاههاه
ماعنداك كلش بالمكتوب مي جزايرية خير نديها باش ندابز معاها هههههه
عندي ملاحظة برك ليك وبلاكي تزيدي تعاوديها هههه
أكتبي بالدارجة ياو مرة أخرى مانعتامدش موضوعك خخخخ
خلطي شويا دارجا شويا فرونسي كاسي هههه
شكرا ​

 

[هواري بومدين.]

سلام عليكم و رحمة الله
فكرة رائعة جداا
هل يفضل الشاب الجزائري الزواج بجزائرية ام اجنبية و لماذا؟
الجزائرية لأن جزائرية تطيبلي لي يبغي قلبي ...​

 

[زاد الرحيل]

هذا اسميوه استطلاع اما الموضوع الذي اخترته يا غاليتي فانا ارفضه لانه تخريب للعائلة الاولى و تيتيم للاولاد و تحطيم للزوجة الاولى و الرجل سوف يصاب بغسيل المخ و يشعر انه شاب صغير يتزوج لاول مرة فيصاب بالخرف و ينسى عائلته الاولى بل يتمادى و يقول مللت منكم و انفقوا على انفسكم
ببساطة انضري الى كل الماسي التي حدثت للعائلات التي فيها تعدد الزوجات

 

[ليليا مرام]

السلام عليكم
ايه زعمى انتي صحفية لقيتيني فالشارع وقلتيلي اذا تحبي تكون الثانية شوفي نقولك هي انو حلال ربي هي حلال مي لما نشوف انو نجرح مرا ما عندها حتى ذنب ونشتت اسرة ما نقدرش عليها انا بطبعي غيورة معناها الراجل راح يميل ليا اكثر خاطر غرونتي نديهولها وهذا ظلم ما خصونيش دعاوي الشر. وحتى لو انا نقبل يمى راجل متزوج تحاوزو. من الباب عليها انا ما نقبلش الا نهار يخلاصو العزاب خبو رجالكم هههه هناك لازم. نديه قديم ههه متزوج. ونظن ما نديرهاش
مالك جاتو. على قلبو الشروط والغلى وهو من الاول معول عليها مي وين راهي القاورية اللي تشوف فيهم غاضوني

 

[sanaya]

سلام عليكم
راح نجاوبك ديراكت
أول شيء أنا كنت منفصلة وقبل شهر تم الصلح بيني وبين زوجي والحمد لله
على كل حال شوفي
أنا عندي عقلية متهورة
مي الله غالب هذا هو تخمامي
الراجل لوكان نبغيه ونموت عليه مراح نقبلو يتزوج
ولوكان منحبوش لاهي سهل عليه يتزوج ثلاثة ولا ربعة ميهمنيش
عندي عقلية يانعيش مزوجة مقلشة يا ماكاش
ماشي تقلاش من جهة دراهم
أنا عندي زواج هو مشاركة
هو زواج و صداقة و إمضاء أكثر الأوقات معا
والرجل كيتزوج زوج وهو مثلا يسافر بزاف
شحال يصحلي نريح معاه
زعما تقريبا كل شهرين يصحلي 15 يوم
لالالا منقبلش
مي فنفس الوقت نكون زوجة في القمة
مي هاديك اللي تقول منحبش الضرة وهي هاملة راجلها منيش موافقة معاها
ولو كنت عزباء لا أقبل أن أكون زوجة ثانية
فأنا لن أقبل نكون سبب جرح انسانة أو تخريب بيت
فعمتي تزوج عليها راجلها ووعدها بالعدل وفالأخير أصبحت مطلقة و تعمل لتؤمن لقمة العيش لأبنائها
هذا رايي
سلام

 

[زاد الرحيل]

هذي رقم واحد عمتك و ما زال الضحايا بالالاف

 

[Hakan]

يعني اذا كان موضوع سيريو
انا نقلك انو نحبها جزائرية بيسك حياتي كامل وانا نترجم في البوليات في الجامعة نزيد نترجم الهدرة نتاع مرتي
الاجنبية بكل صراحة ماكانش فيهم الشريفة طوول كامل حاشاك مارسو الزنى من صغرهم
وهذا شيء يعيفني كمسلم
لذا اختار الجزائرية ممكن منين ذاك نهبلو بالاجنبية لكن ديما ديما بنت البلاد هي الاولى
لكن رايح نتشرط بزاف في بنت البلاد
هاو تحبي نخسر دراهم كحلة على وحدة عينيها ماهومش زرق ولا شعرها ليس ولا سنانها بيض هههه
ربي يهنيكم
​

 

[زاد الرحيل]

يا اخي الكريم دائما تضحك على الفتاة اللمهيش زينة على هذا راني خايفة تكون زوجتك واحدة منهم و صدقني الشيى المكتوب من عند ربي حاجة ما تنحيه ،على هذا وجد روحك كل ما نقرا ضحكك و شروطك نضحك و نقول ذرك يدي واحدة منهم

 

[Salah eddin]

السلام عليكم
صراحة و دون تررد نفضل نتزوج ببنت بلادي و نفضل تكون من المنطقة تاعي
و السبب ..ساهل
..كي كتون الطفلة من نفس المنطقة تاعي تكون عاداتنا نفسها و محيطنا نفسو و التفاهم بيننا يكون اسهل بكثير من اني نتفاهم مع وحدة برانية
ههه
المهم ...
و لازم تكون نايلية كيما انا نايلي
ههه
​

 

[السلطانة]

وعليكم السلام ورحمة الله وبركاته

الزواج بثانية ههههه
عقلية نعيمة صالحي هاذي منحبهاش

على جثتي

يعطيك الصحة على الفكرة هايلة

 

[باتنية و نص]

سلام عليكم

هذي اديها من عندي 99,9999% من الجزائريات ميقبلوش يروحو كزوجة ثانية
مشي مراعاة لمشاعر المرا الاخرى او لجانب إنساني
مي مدام داها كثانية..قادر يجيب عليها الثالثة و الرابعة
ومشي مستبعد يطلقها ويرومبلاسيها بخامسة ^^

Au suivant..
تحياتي

 

[Hakan]

يا اخي الكريم دائما تضحك على الفتاة اللمهيش زينة على هذا راني خايفة تكون زوجتك واحدة منهم و صدقني الشيى المكتوب من عند ربي حاجة ما تنحيه ،على هذا وجد روحك كل ما نقرا ضحكك و شروطك نضحك و نقول ذرك يدي واحدة منهم

اذا كان ردك على الرد نتاعي يااختي
راني نضحك برك ومكانش اللي يعرفني قد روحي
مانيش انسان نتشرط بزااف مي نحب نضحك برك في المواضيع هذا مكان
ومادام الواحد مومن ويعرف ربي اكيد كل شيء مكتوب
امالا يااختي ما تغلطيش وتسيء الظن بيا
مانيش نتاع الجميلات والحمد لله نحشمو كي نشوفو البنت المتربية وهذا الاصل ..​

 

[الامين محمد]

هل يفضل الشاب الجزائري الزواج بجزائرية ام اجنبية و لماذا؟

قالك سألوا الذيب قالوا ليه واش رايك نخدموك راعي للغنم
بقى يبكي
سألوه ليش راك تبكي يا الذيب
قال ليهم خايف ما تحقليش هاذ الخدمة
هههههههههههههههه ممكن كاين اللي يقول ما نحبش نتزوج بالأجنبية لأنه امر مستحيل
هههههههههههههه
المهم بصدق قبل ما نتزوج تعرف على وحدة من اصول اسبانية عايشة في الجزاير
تحكي العربية مليح المهم قدمت ليها خدمة و بعد مدة طلبت مني اتزوجها فكرت في الامر من عدة جوانب
لقيت الامر مستحيل بنت بلادي تصبر معايا و علي و نعرف اصلها و فصلها و تعرف عاداتنا و تقاليدنا
تاكل معايا التاي و الكسرة و الكسكس و المطلوع و تحشم من الوالد و من اخي و من ابن عمي
اما الجمال ماهوش وحده اللي يعمر العين لما ننجب اولاد نحبهم يترباو على طريقتنا و ديننا بلا ما نخاف من اي امر آخر
و الدنيا دوارة ما نظمنش حالها
الحمد لله تزجت بنت بلادي حبيبتي و نعشق فيها حتى نموت جابتلي ابني اسلام و رانا نحفظوا فيه سورة النصر
و يقوم يصلي معايا و يلعب بتراب نتاع الجزاير و ياكل منه هههههههههههههه

 

[زاد الرحيل]

اذا كان ردك على الرد نتاعي يااختي
راني نضحك برك ومكانش اللي يعرفني قد روحي
مانيش انسان نتشرط بزااف مي نحب نضحك برك في المواضيع هذا مكان
ومادام الواحد مومن ويعرف ربي اكيد كل شيء مكتوب
امالا يااختي ما تغلطيش وتسيء الظن بيا
مانيش نتاع الجميلات والحمد لله نحشمو كي نشوفو البنت المتربية وهذا الاصل ..​

حاشى لله ان اسيئ الظن بك اخي الكريم اعلم انك تمزح
اردت ان ارعبك فقط
دمت لنا اخا كريما

 

[زهرة اللمة]

السلام عليك
موضوع متميز ربي يحفظك
.
.
المرأة الجزائرية هل تقبل أن تكون الزوجة الثانية ؟
انا بالنسبة ليا ما نقبلش بهذي الفكرة
نرفضها جملة و تفصيلا
نقولك علاه : اذا انا ما نقبلش يتزوج عليا و مش قابلة التعدد
كيفاه يعني نقبل نكون الدوزيام يعني قادرة نكون حطمت
عايلة و نشتتها
بمتابعتك ....​

 

[الامين محمد]

السلام عليك
موضوع متميز ربي يحفظك
.
.
المرأة الجزائرية هل تقبل أن تكون الزوجة الثانية ؟
انا بالنسبة ليا ما نقبلش بهذي الفكرة
نرفضها جملة و تفصيلا
نقولك علاه : اذا انا ما نقبلش يتزوج عليا و مش قابلة التعدد
كيفاه يعني نقبل نكون الدوزيام يعني قادرة نكون حطمت
عايلة و نشتتها
بمتابعتك ....​

طيب اذا لقيتي ان الزوجة الاولى هي من تريدك لها ضرة مثلا
هل تقبلين طبعا مع الشرح في الرد

 

[زهرة اللمة]

طيب اذا لقيتي ان الزوجة الاولى هي من تريدك لها ضرة مثلا
هل تقبلين طبعا مع الشرح في الرد

لا لا ما نقبلش
اولا على العموم ما تلقاش مراة جزائرية تقبل راجلها يتزوج عليها
انا بالنسبة ليا نحس روحي ناقصة
الا في حالة تكون مريضة هي لي تطلب من راجلها
المهم انا ما نقبلش منعرف هذا رايي لاني في كل الاحوال نبقى زوجة ثانية

 

[آمِيْرَتُه]

وعليكم السلام ورحمة الله تعالى و بركاته

مشكورة على الفكرة
نتاع يتزوج مرة آخرى غير ينساها ممعناش التعدد هههه
و إذا بغا يعاود ملا يروح يخطيني @عا مـــــــــــر ههههههه

 

[دعاء الجنات]

.~~والله ياأختي وحدة لي يفوتها الترا تولي تقبل بيه مزوج ،مطلق ،عندو 3نسا مايهمهاش ،أما صغيرة مانظنش بلي تقبل،أما أنا الحمد لله خاطيني،شكراا