أهلا ناس اللمة واش راكم هذي غيبة ليا فلكتيبة هنا خخخخ
هذا الموضوع سبيسيال للأخت @سكون الفجر والأخ @aljentel
كيما يقولو ومنعرف شكونهم لي قالو بلي حنا ليزالجيريا هدرتنا هي الصعيبة فاللهجات العربية كامل
مي كومام بلاك تقريبا مايفهموناش العرب مي حنا نفهمولهم كامل هاهاهاه
التوانسة ولمراركة هام تقريبا كيما حنا والليبيين شويا تانيت يشبهونا هوما والصحراء الغربية وموريطانيا
تقريبا لهجة المغرب العربي تشبه لبعضها لبعض
مي حنا نخرجو من الحدود تاع ليبيا حتى نسمعو تعواج الهدرة
حبابنا المصريين عايز كدا وكدا ومرورا بشلونك وحتى شانgولك على الخليجيين
نولو لبلادنا قبل ماتتلفنا الهدرة لي رانا حاصلين بيها بيناتنا
كاين كلمات فاللهجة تاعنا قليل لي يعرفها وهي من أغرب الكلمات اهاهاههاهاه
في خاطر ختي مريم لي ماتعرفش بزاف كلمات ليوم نعلموها شويا
خرجناها من تحت الأنقاض ونسفناها من غبار أجدادنا هاهاهاها
نبداو مع عدوتنا اللدودة ولي هي الأنثى نياهاهاهاههاه
أغرب إسم أنثى معانا لي هي قرمية يا عباد الله منين لقاو هذا الاسم مزيا ماسماوكش يا ليليا هذا هههه
نروحو للأكلات الجزائرية لي متنوعة بزاف وكاين أغرب إسم بيناتهم
هو سكران طايح فالدروج ههههه هذي سور لي إخترعاتو راجلها كان سكران وضربها هههه
من الأكلات ننطلقو للحيوانات الطائرة
حيوانا هو تشوتشو مالح هههه باللغة الفصحى هو النورس مي ياجدي منين جبت هذا الاسم ياجدك هههه
من الحيوانات ولا الحشرات هههه معلباليش تصنيفو
نلقاو بزيزة الاسم هذا كي تسمعو ماتتخايل حتى حاجة هههه وهو فالحقيقة جرادة
حنا عندنا وحد الكلمة كي يخيقك كاش واحد تقولهالو وهي نبات بحري
التشكوبي ههههه ماتقولوليش راك تسب فينا خاطرش نبات بحري هذا ههههه
وحنا الجزائرين معروفين بالتخنتيش والتخلاط واصلاح كل شيء مالا خيرتلكم
أغرب شيء ولي هو التشلومبو ... كي تذوب لبلاستيك لي يسيل منو هذاك هو التشلومبو ههههه
تانيت كاين من أغرب الأشياء كي تسمعو تحيروهو ليماعرفاتوش ختي مريم
الطزدام ... لايمت بصلة الى اللغة العربية هههه لي يحطو فيه لعجايز الدراهم هههه
أما أغرب اسم ولا صفة في الدارجة الجزائرية هي
مشمخ ... لو تحوس كل قواميس العالم ماتلقاهاش هههه
نروحو لأغرب اسم مدينة في الجزائر
تمرنكيطة في منطقة في ولاية البويرة ... وين تسكن خوو .. نسكن في تمرنكبيطة ... صعبة الحفظ هههه ياك مكاش لي يسكن هناك هههه
الأمراض هنا عندنا كل يوم يخرج مرض جديد ممبعد يحصلو واش يسموه إمالا كاين مرض إسمو
بوشحيط ... هو مرض الإلتهاب في الأمعاء ... جا في بالي زعما بوش دخل في حيط ههههه
كل الجزائريين لي يغلط فالهدرة يخلص ... يخرجولو معايرا وأغرب معايرا على وجه الأرض هي
بوقوقو ... واش معنتها مانعرف ههههه
جداتنا وما أحلاهم أدعية الشر كامل جبدوهم فينا هههه وأغرب دعاء هو
يسود حلايسك .... ولحلايس يقولو بلي هو أطراف الثياب ... واش دخل السواد فيهم هههههه
حتى الأمثلة عندهم ما خرجو تانيت وأغرب مثل تسمعو هنا فالجزائر هو
الكلوفي فوق لجمل عضوو كلب ... هذي والله غير عندهم الحق هههههه
وضرك نخليكم مع أغرب غرباء الغربان أسموات من عالم آخر
تقاشر
سبردينة
نشاف
كنابي
أيا نخليكم تزيدو تجبدونا من الأرشيف تاعكم كاش كلة غير مفهومة
شكرا على المتابعة والإصغاء
دمتم
آخر تعديل:
