السلام عليكم
وصح فطوركم
__________
كاميرا كاشي في القنوات الجزائرية..... مافهمت نظحك ما فهمت نبكي على سعدي وعلى الشهداء لي فداو وضحاو بأرواحهوم على جال هاذ الوطن...-الله يرحم الشهداء تاعنا-بصح هاذ العباد تاع هاذ الجيل ماصانوش الأمانة .....
_____________
أول نقطة نحكي فيها هي كل القنوات تاع alg تلقاهوم دارو 7 كاميرات كاشي...-علاخاطر اصلا حياتهوم رجعوها كاميرا كاشي- ما خلاو الطريق مخلاو البلدية... ماخلاو استوديوهات... -ماخاصش يديروها في الجامع -أستغفر الله.....
فهموني... واش هاذ الإنحطاط؟؟؟؟؟
صحفي يستضيف إنسان مثلا في حصة... ويبدا يسب ويسب فيه ويخرجلو كامل عيوبو.... حتى يكريزيه...
و après...بكل برودة...
"راك في كاميرا كاشي"
ياو المصيبة...هذاك الضيف... ترجعلو التبسيمة والظحك بعدما سبو وشبع فيه سبان ومسح كرامتو تحت رجليه
بففففففففف يااااااا أمة ضحكت لجهلها الأمم ....
ماعليش تظحكوووو mais ماشي لهاذي الدرجة؟؟ باه توليو تظحكو في الناس على حساب كرامتكم
____________
أولا الكذب حرام.... وعمرو ماكان حلال في كاميرا كاشي ... قال تعالى (قال الله تعالى: {ولا تقف ما ليس لك به علم}[الإسراء (36) ] .
----------------
أي: لا تقل: رأيت ولم تر، وسمعت ولم تسمع،{
السمع والبصر والفؤاد كل أولئك كان عنه مسؤولا}[الإسراء (36) ] ......
___________
ثانيا... بردت القلوب وتمادت.... يعني تدير كاميرا كاشي لإنسان وتقتلو بالخلعة وانت تتفرج نورمال قتل المشاعر والأحاسيس باسم الكاميرا كاشي..في الوقت لي طالبنا الإسلام باه نوفرو الأمن والأمان لبعضانا... العكس نخلعو الناس ونقتلوهم بالخلعة باه نحصدو أكبر عدد من المتفرجين وأكبر متابعين...كرامة الإنسان أصبحت تحت الأقدام- أنت مخلوع وتعيط.. وبالمقابل راهوم يتفرجو ويضحكو ويستمتعو -مهازل- .....نعطيلكم نماذج عن هذه المهازل لي داروهم هاذ العام...
-يديرو واحد ميت وواحد يدخل عندو.. ومن بعد يسكرو الباب عليه... وهذاك لي دار روحو ميت يدير روحو ناض -يتبهلل الشيب والعيب-... والرجل لي معاه يموت بالخلعة ويعيط ويعيط ومايفتحوش الباب حتى تخلاص المدة المطلوبة...
*مهزلة أخرى طفلة في السيارة تطلب من راجل يعاونها... ومن بعد يدخل يعاونها -يزدمو زاعما خاوتها طول و عرض -أجسام البغال وعقول عصافير- يحكمو ذاك السيد المسكين لي حاب يعاون ويقولو لازم تتزوج بالطفلة ويقراو الفاتحة -استهزاء بالدين وبسنة الحبيب محمد صلى الله عليه وسلم- وهو مسكين مخلوع مافهم فيها والو حتى يعرب -وأكيد غدوا تحصل طفلة آن بوسيبل يعاونها- مهازل في السلالم في الشوارع....
وحاجة لي تغيضك يخيرو "أعظم الشهور" شهر التوبة والرحمة والغفران.... ويستغلوه لا في العبادة...بل في مصالحهم الدنيوية وبطونهم التي لا تشبع.....
-يعني شحال رايحا نحكي باه نعبر على التقزز تاعي والحالة لي وصلنا ليها-إلا من رحم الله -العالم تتنافس على العلم والمعرفة وعلى الدين والشعب تاعنا يتنافس شكون لي يدير اقوى كاميرا كاشي ولي تخلع بزاااف وتخاف في 2030 كل كاميرا كاشي لازم يقتلو فيها الضحية.. باه يشبعو ضحك على ارواحهوم ويحصدو ملايين المهازل سنويا....هذا هو بلد الإسلام... ...راحت عليه والسلام...
وفي الأخير اسمحولي في الطريقة لي حكيت بيها ولكن على الأقل نفرغ قلبي شويا...
وتحية ليكوم وصح صحوركوم.
