ها بلادنا و شعبها كي داير .. ودز معاهم

[الصحافية الساخرة]

السلام عليكم و رحمة الله و بركاته

وي راحت الصيف كي كان حتى الخبز و تتسابق عليه مع الغاشي الي جاي

و جاي و مخلاصش و عمك اللي يبيع فالحانوت اللي قدامكم اييبه

كامل كيقيمكش كي الأول فشتاء التقشف و السكان مكانش غير اللي
ياكل العدس و الخبز و يشرب الما هههخخهه واش حابه يقيمك كي يجيو

الله الله اللي موجدين الشكارة ياااس الشكارة يشروا غير الغالي و كل شي

و الجرية لعندهم برك أنت تاع الحومة موالف تجري على روحك و تستنى
هههخخه أصبر حتى يفرق على السيادة و تجي دالتك الحليب خلاص

الخبز ماكانش شوف فالريسطورون لتحت ولا فالبلاد و دز معاهم ..
الكرواسون مكانش بقا تاع يومين لكان تديه غير بنص السومة

نحن قوم بائس منسي فالصيف واااع واااع ...
إييه بصح :p يجي اليوم اللي تكتب الحياة فيه نقطة وعودة إلى الفقر

و البقر .. و يولي اللي كان يخبي عليه الحليب و يبيعلك الكرواسون

تاع البارح يديرلك وجه و شكاير باش تشري عليه و يحفظ أسمك
ومنين و يعس عليك لكان تشري من خانوت خلاف اييه و تولي
كي تقولوا جيبلي هذي الحاجة نوصيك تم تم تلقاها عندك يجي عندك للدار نورمال ههخخهه بصح أنت تنتقم و تشري من عنده غير الخبز

و الله ما تشوف فرانك يا وجوه الميزيرية و دز معاهم

أنا درت موضوع على الأزمة الصيفية باختصار خاطر لوكان تحكي
متخلصش في هذو الصوالح ..
و دزو معاهم المهم المشاركة ^^ و ييينك المير المستقبلي الكرنطيطي ههه

 

[همس الوُرود]

وعليكم السلام ورحمة الله وبركاته
أهلا أختي الصحافية إن شاء الله تكوني مليحة
تم اعتماد الموضوع
صراحة مافهمتش ويلا أنا راسي حبس وليت منفهمش ولا كاينة حلقة مفقودة فالقضية هادي
حنا نشرو حليب و خبز نورمال غير الخير عندكم متقدروش تشرو؟
متضحكيش عليا بصح مفهمتش مليح موضوعك خخخ
بالتوفيق حبيبتي​

 

[طموحة]

السلام عليكم ورحمة الله و بركاته
ربي يهنيك فاطمة ان شاء الله تكوني مليحة
يا ودي عندي صحبتي جيجلية حكاتلي على الفوروقات ما بين الصيف والشتا في جيجل
ربي معاكم كيما قاتلي عليهم يتخلعو في الشتا ميخدموش كامل و في الصيف يخلصوها للناس طول و عرض
ري راهو يشوف
أما حنا هنا في العاصمة الأزمة صيف شتاء
قليل وتكون الحالة نورمال تالحليب
دايمن لازم العبد قبل ما يصلي الفجر العبد يروح للحانوت
والهايلة كي مول الحانوت يخبيه علاجال الناس لس يشرو منعدو بزاف
سما يديرلك كاميرا كي تكون تشري عليه بزاف يبيعلك الحليب كيما تكونش ما يبعلكش
ربي يهديهم
وشكرا ع الموضوع في أمان الله ​

 

[الصحافية الساخرة]

وعليكم السلام ورحمة الله وبركاته
أهلا أختي الصحافية إن شاء الله تكوني مليحة
تم اعتماد الموضوع
صراحة مافهمتش ويلا أنا راسي حبس وليت منفهمش ولا كاينة حلقة مفقودة فالقضية هادي
حنا نشرو حليب و خبز نورمال غير الخير عندكم متقدروش تشرو؟
متضحكيش عليا بصح مفهمتش مليح موضوعك خخخ
بالتوفيق حبيبتي​

ههههههههههه راني لباس ختيتو بصح ضحكتيني كي تلفتلك فالموضوع هذا ، بن عمييييييي ياو دوك نفهمك شوفي المناطق اللي يتمشاو فالصيف برك كيما حنا فجيجل يجيو ليها السياح بزااف فالصيف صافي يخدموا و يتحركو غير على حالهم و ما يقمش ولد بلادو يتفشش عليه ووو بصح فالشتا يوليو حابسين و الخدمة ما كان ما كان و يولي هو يحوس عليك تشري عليه و تركب معاه فالبيس يستناك ساعة نورمال عكس الصيف
دوك فهمتي يعني اكيد ماشي فكل الولايات كاين قصة هذي بصح فبعض الولايات توجد مثل هذي الحكايات
و مرسي لاعتمادك موضوعي ^^

 

[الصحافية الساخرة]

السلام عليكم ورحمة الله و بركاته
ربي يهنيك فاطمة ان شاء الله تكوني مليحة
يا ودي عندي صحبتي جيجلية حكاتلي على الفوروقات ما بين الصيف والشتا في جيجل
ربي معاكم كيما قاتلي عليهم يتخلعو في الشتا ميخدموش كامل و في الصيف يخلصوها للناس طول و عرض
ري راهو يشوف
أما حنا هنا في العاصمة الأزمة صيف شتاء
قليل وتكون الحالة نورمال تالحليب
دايمن لازم العبد قبل ما يصلي الفجر العبد يروح للحانوت
والهايلة كي مول الحانوت يخبيه علاجال الناس لس يشرو منعدو بزاف
سما يديرلك كاميرا كي تكون تشري عليه بزاف يبيعلك الحليب كيما تكونش ما يبعلكش
ربي يهديهم
وشكرا ع الموضوع في أمان الله ​

و عليكم السلام و رحمة الله
مرسي ختيتو ربي يحفظك ^^ راني مليحة الحمد لله ان شاء الله تكوني أنتي مليحة تان ..

إييه اختيتو أزمتنا أزمة ههههه و كما قلتي يديرولك كاميرا تان باش يبيعولك ولا لا ههه و الله حكاياتنا حكاية ماناش عايشين نورمال ديفوا نبانوا صح متخلفين ..

و الشكر لك على المشاركة بالموضوع .. نورتينا ^^

 

[SOFIANE020]

هدا شيئ عادي كي يكتر الطلب على السلع و الخدمات تصرا لاكريز
زيد نقص في الهيكلة تاع المناطق السياحية مع شعب همجي وارواح سلكها
قبل ثلاثة سنوات فوت الصيف عندكم في العوانة مي مالقيت حتى مشكل

 

[الصحافية الساخرة]

هدا شيئ عادي كي يكتر الطلب على السلع و الخدمات تصرا لاكريز
زيد نقص في الهيكلة تاع المناطق السياحية مع شعب همجي وارواح سلكها
قبل ثلاثة سنوات فوت الصيف عندكم في العوانة مي مالقيت حتى مشكل

اهلا أخي سفيان ^^
نوافقك فقولك نقص الهيكلة هذي صح كيفاه تحبها تكون الحالة منظمة هههه
و نظنك ما فهمتش موضوعي مليح المشكل ماشي السياح اللي يلقاوه حنا اللي عايشين تم ههههه ام يهمشونا خبزيا و حليبيا و فكلشي هههه
مرسي

 

[SOFIANE020]

بصراحة عاودت قريت الموضوع مي مافهمتش مليح عقلي ماركا ايرار هههه
قصدك انت في الصيف مهمشين بسبب السياح وتجار يفضلو الخدمة مع السياح على حسابكم
ولا راكي على ازمة تاع الحليب

 

[الصحافية الساخرة]

بصراحة عاودت قريت الموضوع مي مافهمتش مليح عقلي ماركا ايرار هههه
قصدك انت في الصيف مهمشين بسبب السياح وتجار يفضلو الخدمة مع السياح على حسابكم
ولا راكي على ازمة تاع الحليب

ههههههههه راك فهمت و خربتها مع الاخر ماشي ازمة الخليب قضية يخدموا مع السياح و يهمشوا تاع الدار هههه يعني مثلا لكان فالشتاء كان يخليلك الخبز و الحليب و يخبيهلك خاطر تقضي عليه فالصيف أحلم يعاملك كما الأول يولي ماش مقيمك و كيفك كي اللي جاو فالصيف تتسابق ههههه
فهمت أخي "سفيان" ^^

 

[الصراحة راحة]

السلام عليكم
اهلا الصحافية ههههههههههه انت راكي فاهمة وش كتبتي ولا كيفاش
انا ما فهمت واللللللللللوا

 

[الصحافية الساخرة]

السلام عليكم
اهلا الصحافية ههههههههههه انت راكي فاهمة وش كتبتي ولا كيفاش
انا ما فهمت واللللللللللوا

و عليكم السلام ورحمة الله
لا أنا فاهمة واش كتبت بلاك معرفتش كيفاه نوصلك المقصود .. آسفة لأول مرة تصرى هكا و نخلطها على الغاشي .. راح نحاول نعاود نبدل الصياغة و نوصلكم الفكرة مليح ..

بصح لومان تقرى مليح تفهم .. القصد واضح : هذي تصرى غير بعض الولايات كما جيجل فالصيف يتوافدو عليها السياح و يجو من كل ولاية ، و الجواجلة يولو مهمشين هههه يعني اللي كان يلقى الحليب الصباح و لا الخبز يولي ما يلقاهش خاطر يولوا يبيعوه للسياح و أنت بقى تسابق ماشي كما فالشتاء و بعد الصيف تولي الحياة الينا متخافش ما تلقاش الخبز اييه العكس يولي مول الخانوت يعيطلك من الدار تحي تديه
هذا باختصار واش كتبته نتمنى تكون دوك فهمتني ..
سلام .. و متزيدش تضحك في وجهي هههه

 

[SOFIANE020]

هههه ضركا فهمت
تجار نكارين الخير الله يجبهالهم غير تاع صوالحهم

 

[Salah eddin]

السلام عليكم
كن ما درتيش الكلمة السحرية " دز معاهم " ما نشاركش هنا
ههه
بصح كي درتيها راني جيت ندعمك شوي بما انك معايا في الحملة ههه
وش نقولك ... التقشف هذا هرد البلاد و مول الياغورت كلاه قلبو على الخزينة ههه
و معول يزيد يطحن منها شوي
و الزوالي لعبت عليه و مول الشكارة تنفست عليه
و اخدم ارضك يا فلاح
ههه
شكرا فطومة​