مشكلتي هل اطلق زوجتي ؟

[مشكلتي]

بسم الله الرحمان الرحيم
السلام عليكم و رحمة الله و بركاته

اما بعد

تعرفت على زوجتي من خلال الانترنت ربطتنا بعدها علاقة حب لمدة 6 سنوات وعدها بالزواج و اوفيت بوعدي

في البداية رفض اهلي لانها لم تعجبهم لكني اخبرتهم باني لن اتزوج غيرها مع العلم انها تبعد عن سكني حوالي 600 كم

كانت تقولي سأعيش معك الحلوة و المرة قالت لي " نعيش معاك لكان في قيطون "

و قالت ميش شرط دير العرس ما تكلف روحك المهم نكون معاك...


مر اسبوع على العرس انقلب كل شيء اصبحت تعايرني بلعرس تقولي هدا ميش عرس هدا تبهديلة و انا و الله انفقت لي نقدر عليه

بعد شهر من الزواج بغات تروح لدارهم رفضت باش ترجع و كانت تغلق عليا التلفون و تقولي ميش حابة نرجع هدرت مع باباها قالي ارواح اديها رحت مع يما اساءت معاملتها بشدة حتى يما بكات

دارها وحدها الحمد لله تاكل تشرب تلبس داوي تحوس مي تنكر كل شيء تقلي واش درتلي راك مجوعني و كل خير كاين و الحمد لله انانية تحب كلش لنفسها

رزقنا ربي بطفل ملاك مشاء الله
متحبش يلعبو معاه والديا و متحبش طلعو ليهم حتى يتوحشوه رغم ان الوالد و الوالدة يعاملوها معاملة خاصة لانها بعيدة

تقلي كرهتك و كرهت هدي الدار طلقني خليني نروح تقلقني بلعاني باش نضربها

نوص صباح نروح نخدم نطيب قهوتي وحدي نرجع نسخن غدايا وحدي تقلي انت شبعتني ميزرية طلقني تحب ترقد وحدها مع الطفل انا نفرش في شومبرة وحدة اخرى وحدي
درت كل طرق جبت راقي
ما تلبس ما تمشط ما تتزينلي و كي نحب نخرجها تعطي لعمرها طريحة بلمكياج
هدرت معاها برفق و بلين فهمتها مي لا حياة لمن تنادي
ضرك راهي في دارهم كي العادة متردش عليا كي ترد تقلي خلاص منيش حابة نرجع

كيفاش رح ندير انا و الله تعبت

 

[همس الوُرود]

وعليكم السلام ورحمة الله وبركاته
آسفة على التأخر في الإعتماد
الله يصلح الأحوال ,, إن شاء الله تلقى حل وتلقى الي يساعدوك
والله يهدي زوجتك يا رب وترجعو لبعض

 

[الامين محمد]

لا ما تتعجلت الطلاق حتى تستوفي كل المحاولات
و أول حل لازم انت تثقل و ما تحاولش تحكي معاها
يعني تلعبها و كأنك بديت تفكر باش تبعد عليها
و ممكن بعد مدة رايح تخاف و تحس أنها ممكن تضيعك
بلاك ربي يهديها و ترجع لعقلها

نوصيك ما تتعجلش بالطلاق ياما ناس بعد فراق طويل بسبب الخصام رجعوا لبعض

 

[Soumia hadj mohammed]

لا حول ولا قوة آلا بآلله
رب يصلحهآ ويهديهآ ويؤلف بينكم
لازم تعرف سبب تغيرهآ وبعدهآ رح تعرف كيف تتعآمل مع هد آلمشكل
لا تتعجل بالطلاق
@ابو ليث

 

[طيب الكلام]

سلام اخي . نصيحة لا تتسرع و تطلقها مسكين الطفل راح تضيعوه مسكين و هو ماعندو حتى ذنب
شوف اهلك و اهلها يعني كبار العائلتين لتسوية الخلاف بينكما . بالاك كي تلقى لي ينصحها تتعقل
ربي يصلح اموركم اخي و يهدي زوجتك و ربي يخليلكم ابنكم و ان شاء الله يتربي في عزكم ...

 

[ضآحكة مستبشرة]

السلام عليكم
ربي يكون معاك اخي و يفرج عليك و يجعل بينك و بين زوجتك مودة و رحمة
ربي يهديها و ترجع ليك هي و وليدك و ربي يهنيكم

 

[بشرى ملاك]

هادي خاصها طريحة وسمحلي اخي انت طمعتها، فرعون زمان سقساوه قالوله واش فرعنك قالهم عبيدي، هادي راهي قبضاتك من يدك لي توجعك راهي عارفة ومتاكدة بلي تبغيها وماتقدرش تفرقها علابيها راهي تتقلش عليك انا رايي كيما راي اخي الامين ثقل عليها ماتعيط ماتحوس ولوكان تعيطلك هي ماتردش عليها خليها تحس بلي خلاص كرهت منها حتى تولي وحدها...
والله يهديها وتولو ملاح مع بعضكم والطلاق اخر حل من الاحسن مايكونش....
وربي فيه الخير..

 

[لؤلؤة قسنطينة]

السلام عليكم ورحمة الله وبركاته
لا حول ولا قوة إلا بالله العلي العظيم
بصراحة يا أخي الكريم الله لا يجعلني نتدخل بيناتكم ولا نوصلكم للطلاق
ولكن راك حتى صبرت، يعني معاملة الوالدين بسوء وهادي أهم نقطة لي انتبهتلها صراحة
وزيد المعايرة يعني كيفاه مرأة تعاير راجل طول وعرض دون حشمة وزيد الماكياج والامور هاديك
ترجع ليك نتا يعني امور شخصية ما نتدخلش فيها انا، لكن النقطتين الاساسيتين هي معاملة الوالدين بسوء اضافة
للمعايرة وكي تقفل التيليفون في وجهك يعني امور صراحة راجل ما يتقبلها
والله يا خويا ماعرفت واش نقولك، ماش كامل النساء لما تقولك نصبر وندير وندير معناها صح تدير
سورتو اذا كانت عايشة النعيم في دار باباها خاطر ما تقدرش تتقبل المسؤولية والتعب من بعد
الكثير من النساء تقولك نتزوج برك وتفوت تتزوج وتوصل لمصلحتها خلاص تكره كلشي وهذا لأنو من الاساس الزواج بدا على مصلحة
انا مانعرفش مرتك باه نقولك صح على مصلحة يعني نتكلم على العموم، انا من رايي خويا الحكاية ما بقاتش تاع بين زوجين
روح شوف والديها (مع اني صراحة مشوكية من أب تجي بنتو تغضب وقت ما تحب مايسقسي ما يقول كيفاه)
يعني ما لقيتش حتى منين نبداها، المهم اتكلم مع والديها قولهم بلي بنتكم راهي تعايرني وتعاير والديا وخليهم هوما يشوفو معاها
اذا وقفو مع بنتهم وقالولك طلقها يا خويا واش نقولك ربي يسهل عليها نتا حاول حتى الأخير على وجه ولدك
وعلى وجه ربي، واذا توصلت الامور للطلاق واش نقولك ربي يجيب لي فيه الخير
والله الانسان مالقى ما يقول باه مرأة عطاها ربي زوج وطفل وعايلة راجلها يعاملوها مليح وتطلب الطلاق يعني ربي يهديها ويصلحها
زيد صلي صلاة استخارة وخلي ربي يرشدك للطريق الصحيح
فقط لو تسمحلي نتدخل في حاجة برك احيانا رأي الوالدين يكون فيه حكمة لكن حنا ما ناخدوش رايهم وفي النهاية تكون نتيجة غير مرضية للاسف
واش نقولك ربي يسهلك ان شاء الله ويصلح زوجتك
تحياتي

​

 

[أم أحمــــد يــسّ]

السلام عليكم..
ربي يهدي سركم انشالله
زيد اصبر شوي وحاول تعرف الاسباب
وراجع نفسك انت ثاني...
انشالله تفرج وتلم عايلتك وتتهنى يااارب

 

[ابو ليث]

الاخوة و الاخوات أشاروا بعدة أراء سديدة خلاصتها أن تثقل عليها و أن لا تكون أنت الذي يكلمها حتى تكلمك هي و إن كلمتك فتكلم معها بأنفة و إستغناء ثم ضع لها أجلا للرجوع و شروط صارمة أولها إحترام حدود الله فلا تنتهك من التستر و ترك التبرج و السفور و إحترامك ووالديك خاصة و أهلك و ذويك عامة ثم ا لرضى بما قسم الله لكما من رزق و أداء الوجبات المنوطة بها كزوجة مخلصة ثم المطالبة بالحقوق التي كفلها لها الشرع على أن لا تتجهل ما بذلته و تبذله لأجلها.

 

[حلم كبير]

السلام عليكم ورحمة الله تعالى وبركاته
مصدوم الصراحة لم أجد الكلام الذي يمكنني ان أقوله
ربي يفرج همك ويطوعلك زوجتك
ويتربى وليدك في عز والديه
آمين ​

 

[Hakan]

ريح معاها في طاولة مفاوضات وقلها واش تحبي اذا قاتلك الطلاق استخير مولاك وطلق زمان عجب وصلنا ليه بكري نستخيرو للزواج وضركي نستخيرو للطلاق ...اما تقعد تساعف برك ياخويا لاحال يدوم كيما يقولو انت راجل وتزوجت باش تستر روحك اذا مرتك ما تقومش بيك ما عندك ما دير بيها كي شغل عندك سروال وماكش تلبس فيه اذن السىروال روح صدقو ولا ارميه والله اعلم ​

 

[wissam 47]

وعليكم السلام ورحمة الله وبركاته
شوف أخي الكريم الأخوة والأخوات الكرام نصحوك بما فيه الكفاية
وانا ما عليا قوله هو الله يجيب لي فيه خير ليك وليها
وما تنساش بلي ضحايا الطلاق الأطفال
وان أبغض الحلال عند الله الطلاق
والعياذ بالله
ان شاء الله تفرج
سلام​

 

[aljentel]

اخي العزيز لايمكن نحكم على اي قضيه مالم نسمع للطرف الآخر وهذا ليس معناه اننا لانصدقك لكن لتتساوى كفتا الميزان ...
والنساء عموما يشغلك منهن المقبل فكيف بالمدبر ؟!!
وانت لم توضح الاسباب الكامنه وراء هجرها لك بعد تحملها هذا العناء رغم بعد المسافه واقدامها برغبتها بالزواج منك فما الذي حدث كي تهجر بيتها وترفض الرجوع ..
على كل ربما تجد عند الزملاء ما يفيدك ...

 

[أم أحمــــد يــسّ]

ممكن اضافة؟؟؟
للأسف معظم علاقات الحب طويلة المدى.اذا كللت بالزواج يكون مصيرها المشاكل وشبح الطلاق يلوح في سمائها..ويرجع البعض السبب لذاك الملل والروتين وحجة انهما تغيرا بعد الزواج..فالسبب الرئيسي هو انهما تشاركا كل شيء قبله فالمكالمات الطويلة والمحادثات لوقت متأخر...وغيرها لم تِبقِ شيئا ليتم اكتشافه بعد الزواج ..
نجاح العلاقة والحب ذاك هو (الزواج) ورغم بعد المسافات وطول السنين وقع والحمد لله..
فما الاسباب ياترى؟؟؟ ما الذي تغير؟؟
هل مات الحب؟؟ هل وجدتما في بعضكما مالم تتوقعانه؟؟ ناهيك عن اجمل ثمرة توجت بها قصتكما( الطفل البريء) ...المنطق يقول سيزيد شمعة الحب توهجا ويوطد العلاقة اكثر...
لكي لا اكون قاسية في ردي ساختصر على ما يدور في ذهني: في كل مشكلة هنا نعتبرهامشكلتنا (اتكلم عن نفسي) ونتخيلها كاملة ونبحث عن الاسباب الخفية قبل الظاهرة
واحبذ مبدأ (اسمع الراي اللي يبيك وماتسمعش الراي اللي يضحكك) لانني وقت المشكلة لا احتاج طبطبة ولا شفقة بل احتاج لحل..
ستجد الحل ( لوحدك) لانك الأعلم بكل جوانب الموضوع الخفية عنا ( ماذا عنها؟ ماذا تقول فيما قلت؟؟ كيف تعيش معك؟؟ ماذا تحتاج( بعيدا عن الاكل والشرب واللباس) ماذا عن ذاك الحب اين اختفى؟؟ كيف تغير كل شيء في ظرف اسبوع؟؟؟
هل يمكن ان تكره المرأة رجلا عشقته وما اسبابها؟؟
بما أن الطرف الآخر غائب سنمشي وراء اسبابك انت سيدي الفاضل..
امرأة تسبني وتلعنني وتكرهني ومن اول ايام زواجي ولا تحترم عائلتي وتكره طريقة عيشي وتتكبر علي وتتبرج لغيري؟؟؟؟
الطلاق حلها اليس كذلك؟؟
ماذا عن الطفل؟؟ ام هوفقط من يقيدك؟؟ماذا عن حبك انت هل مات؟؟ ام مزال ينبض وستبقى حبيبة قلبك الاولى والاخيرة؟؟ وهل الحب يعني التنازل دوما؟؟
هل فتحتما طاولة حوار؟؟ هل طرحتما كل مشاكلكما وتكلمتما كلٌ بما يختلج صدره؟؟
آسفة لطرح أسئلتي لسنا بصدد تحقيق لكن اريد ان يكون ولو سؤال او اثنين منها في عقلك وتسأله لنفسك...اكيد انك تملك كل الاجابات...
اظن انكما تحتاجان للابتعاد فترة من الزمن لمراجعة الحسابات وتجربة البعد وبدون مكالمات من طرفك لفترة محددة ثم تتكلمان عن كل شئ وتحاولان التغيير من روتين الحياة وتبعثان التجديد في علاقتكما وان تتغير انت وهي كلاكما فلا تنتظر منها تغييرا وانت كما انت...
ان شاء الله مجرد سحابة وتفوت هذه هي الحياة المشاكل ملحها ليس إلا...
سأدعو لك بأن يجتمع شملكما ويبارك لكما الله في زواجكما..
تحياتي

 

[أبو عاتكة]

السلام عليكم .
حسب روايتك فكل ما تتمناه المراة موفر لها في حالتك بيت منفرد الرزق والولد والمعاملة الطيبة وماذا تريد اكثر من هذه النعم .
لكن سبب نفور الزوجة الملح لها غير واضح ولم تصرح به فكل شيء موفر فقط تريد الطلاق والعودة لمنزل ابيها . ربما هي الانانية اكثر من اللزوم وتستعمل التهديد بالطلاق حتى تكسب اكثر واكثر . الانانية تجعل الانسان لا يفكر في غيره ويهمله ولا يقنع باي شيء ويبقى يطلب المزيد والمزيد .... وينكر الخير والعشير واعطيتنا امثلة في قصتك وبدايتها كان العرس الذي لم يقنعها . اعذرني ان تجاوزت او اخفقت لكن يظهرلي الانانية وعدم القناعة في الزوجة في كل ركن من اركان قصتك .
ماكش معيشني راك مهملني كرهت الدار لا تقولهاالا زوجة تعيش ذلك حقا او مسحورة من شياطين الانس او تتطلع الى ماهو اكبر من قدرة زوجها ولم ترضى بما قسمه الله لها .
لهذا نصيحة للجميع معرفة خصال الزوجة الحقيقية في مرحلة الخطوبة مهم وليس الكلام المعسول الذي يغطي على الواقع فلا تعدك ولا تعدها حتى لا تصل الامور الى طريق مسدود والانسان حينها يختار الانسان هل يستطيع العيش مع امراة فيها عيب في خصالهاو في طبعها وكذلك الحال مع الرجل نعرف ان الانسان غير كامل يوجد طباع نستطيع تجاوزها او تغييرها مع الوقت لكن يوجد خصال صعبة التغيير يلزمها المسايرة والتعايش معها . العشير فيه مفاجئات وتغييرات ليس كل ماهو ظاهر حقيقي . والزواج ليس رحلة استجمام .

امر محير في حالتك اخي الصراحة . مهما تكلمنا لا نستطيع مساعدتك فكل ما نقوله اكيد تعرفه وكل ما نقترحه فعلته . الامر فاجئك كثيرا نرجوامن الله ان يعينك وتحل مشكلتك .
الغالب في هذه المواقف انو اهل الزوجة هم من يقومون بفك الخلافات وتوضيح الامور والحزم مع ابنتهم خاصة اذا كانت ابنتهم هي الغالطة لكن الظاهر والله اعلم لا حياة لمن تنادي او محاولاتهم فشلت ربما ابنتهم صعبة المراس لا نعرف كل التفاصيل وحتى وان عرفناها لا نستطيع استيعاب ما تحسون به .
يبقى عليك الاجتماع مع والدها ان كان عاقلا او واحد من اهلها اعقل وتوضيح الامور بشكل نهائي حتى تظهر الاسباب الخفية للنفور وتحدد قرارك لا تغادر بيتهم حتى تتحقق من السبب .
اما تستمر وتعالج سبب نفور الزوجة عندما تعرفه ان كان فيك او فيها السبب .
اما تحدد طريق اخر اصعب وفيه متاعب اكثر واكثر ماكش راح ترتاح . لانو راح يكون الولد دائما واقف في الطريق الاخرى وهو ايضا له حقوق .

لاحظ اخي انو توجد من تريد الطلاق بدون سبب واضح ولا تعطي السبب المقنع :
اما انها تختلق الاسباب حتى لا نعرف اي طريق للحل فتنال مرادها كيما نقولو تذهبلك الجرة فلا تجتمع على سبب او على حل . المهم تريد الطلاق وان كانت اسبابها واهية .

او هي غير عاقلة وغير واعية يجب التحقق من تصرفاتها ووعيها . ربما غير ناضجة تتصرف بصبيانية ربما بها سحر او تاثير ....

لا تخف من الحزم بسبب انك لا تريد الطلاق ولا تريد ان تفقد اسرتك من بين يديك ولا تخف من الزوجة لانها تريد الطلاق وتهدد به . يمكن ان تحل الامور اذا وضعنا الاصبع على الجرح الحقيقي فنعالجه بحزم وبتحكيم العقل وليس العاطفة .
والله اعلم ان شاء الله نسمع وتسمع اخبار طيبة .

 

[ابو ليث]

هذين الشريطين قد ينفعك في نفسك و في نصيحة زوجتك، ربما ترسل لها هذين الرابطين ينفعها الله بهما، و هي لكل الاخوة و الأخوات كنصيحة قبل الزواج و بعد الزواج.
أبجديات الحياة الزوجية.
و ليسعك بيتك.

 

[Soumia hadj mohammed]

هذين الشريطين قد ينفعك في نفسك و في نصيحة زوجتك، ربما ترسل لها هذين الرابطين ينفعها الله بهما، و هي لكل الاخوة و الأخوات كنصيحة قبل الزواج و بعد الزواج.
أبجديات الحياة الزوجية.
و ليسعك بيتك.

اسعد الله اوقاتكم عمي ابو ليث
الروابط لا تعمل !

 

[سلام نفسي]

اخي انت حاولت والاحسن ان تعمل بما قالو تحطهاامام الامر متعيطلهاش ولازمك تهملها لان لمره اذا تحلت تكبرت وتجبرت وهذي باين عايها عايشهفدلال علابيها مخملتش السيطره والاسره والقله نصيحه قبل اي تفكير شوف لولدك قبل ماتشوفو لنفوسكم لانو يضيع بين رجلين

 

[ضيوف وسـنغادر]

السلام عليكم
صدقني جاتني الدمعة
انا من الاول قلت لوكان مايطلقهاش ضيع عمرو مي قلت عندكم طفل ربي يحفظو
هنا يجب التريث
علاه مسكين واش دار هو حتى امو تدير هذا الشيء
لذا حذاري لا تتعجل في الطلاق
//يجوز للزوج أن يطلّق زوجته ما دام هناك سبب شرعي يدعو إلى ذلك من سوء دين أو سوء خلق أو نقص عفة أو إهمال خدمة ونحو ذلك وأما إذا كانت مؤمنة صالحة فليمسكها ولو كره منها بعض الخصال كما قال النبي صلى الله عليه وسلم : عَنْ أَبِي هُرَيْرَةَ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ لا يَفْرَكْ مُؤْمِنٌ مُؤْمِنَةً إِنْ كَرِهَ مِنْهَا خُلُقًا رَضِيَ مِنْهَا آخَر رواه مسلم عن أبي هريرة 1469
َولما أراد النبي صلى الله عليه وسلم أن يطلّق حفصة أُوحِيَ إِليه : رَاجِعْ حَفْصَة فَإِنَّهَا صَوَّامَة قَوَّامَة وَهِيَ زَوْجَتك فِي الْجَنَّة .//
حاول تصلحها وتدعي ربي يصلحها لك
//الله عزّ وجلّ يصلح الزوجة المعوجّة إذا أراد كما قال عن عبده زكريا : ( وأصلحنا له زوجه ) ، قال بعض المفسّرين كان في لسانها طول ، أي تتطاول على زوجها بالكلام ، فأصلحها الله .//
والانسان لازم يتحمل مرارة الزوجة علاجال الذراري بش مايتفرقوش وتتشتت الاسرة اذا شفت بلي الضرر في بقائها اكثر من ضرر رحيلها لا حرج في الطلاق
****************************
لذلك شوف ماتقعدش في الهم هذا استخير ربي وتوكل عليه احكي مع والديها وافهم عليهم اذا راهم معاك وفاهمينك بلي انت قد حالك وبنتهم راهي انانية وماحمداش في ربي ماتطلقش خلي تقعد نتم حتى تكره وقولها
والله ماني مطلقك مادام الطفل كآين وربي حلل أربعة تGدي روحك ولا....
واذا كانوا والديها معاها في صفها معاها في انانيتها وتصرفها الخبيث وانت راك دعيت ربي وحاولت تصلح وماصلحتش ني هي ني هوما يا اخي تفكر قلتها بفمك اول مرة والديك الطيبين ماعجبتهمش يعني بش تشوف حكمة ربي كي يقولوك والديك حاجة خوذ رايهم
وزيد احكي مع والديك وتشاور معاهم وقولهم دبروا علي وتوكل على ربي وعلى وش تشوف فيه صائب
وزيد من الان فصاعدا ماتقعدش ذاك الزوج الطيب لازمها تزيار من عفسة الماكياج وجيب
ماتوريهاش حتى ضحكتك ولا صوتك الطيب الحنون حتى تgد روحها تماما ويقعد الاحتياط ديما واجاب لو كان جات في راجل مزير صح ودايرلها الشدة بصفة معتدلة اكيد والله ماهيدارت هذا الشي كامل

وزيد يا اخي الزواج يقوم على الهناء والمعاشرة الطيبة والتفاهم انسالي تلك الايام تع الخطوبة وين كان الكلام المعسل و"لمهم نتزوج"راك شفت الحقيقة بعينيك
انت كيما قلت راك موفر اللي تقدر عليه وحتى ولو كنت ماعندكش ولا اي واحد ماعندوش... المال لا يجلب الهناء للناس اللي تخدم بعقلها صح
الناس راهي سعيدة هانية تحت سقف قصديري وكانت تقول كلمة وتبدلت 180 درجة ماهذا يا هذا؟

//المرأة الانانية تفكر فقط في نفسها. ووماتحسش بالانزعاج اللي تدير فيه وماتهتمش بشؤون أسرتها ومسؤولية الأمومة مي الزواج مايعتمدش على الأهواء والرغبات كيما راهي تدير.لازم تعرف، بلي كي راهي تزوجت درك المسالة ولات عفسة تع اخد وعطاء بش يكون زواج ناجح، لازم الانسان يحب ويقدر ويحترم مشاعر الشخص الآخر اذا هي متفهمش هادي الامور وراهي كذلك
حط خط فاصل إذا فشل الحوار بينكم لازم الخيار يكون آمن.ماتسمحلهاش تتعدى على حقوقك وحقوق اسرتك
أعطيها إنذار وجيب اللي يحكم واحد من اسرتك واحد من اسرتها لقول تعالى: "وَإِنْ خِفْتُمْ شِقَاقَ بَيْنِهِمَا فَابْعَثُواْ حَكَمًا مِّنْ أَهْلِهِ وَحَكَمًا مِّنْ أَهْلِهَا"، ويشوفوا المصلحة ويني
لققوله الله تعالى: {إِن يُرِيدَا إِصْلاَحًا يُوَفِّقِ اللّهُ بَيْنَهُمَا إِنَّ اللّهَ كَانَ عَلِيمًا خَبِيرًا}.

الله يفرج عليك ان شاء الله
​