وعليكم السلام ورحمة الله تعالى وبركاته
العام هذا فات كيما كل عام صراو فيه حوايج ملاح وحوايج مش ملاح ...
لحاجة لولا لي جات في بالي في بداية جانفي 2017 رحت أنا وراجلي للشريعة طلعنا حتى الفوق خلاص ولينا نشوفو في الأرض بعيـــدة و كلش صغير ، كان البرد بزااااف والهوا نقي والكـــالم شبعت طيحات في الثلج ههههههه ، تصورنا ولعبنا بالثلج :Love:وكي كنا مروحين لقيناهم يبيعو في الورد ( مدينة الورود :Love و شرالي بوكي غير ب 5 آلاف بصح ريحتو تهبل ديتها طريق كاملة وأنا نشم فيه وفرحــانة أوي على قولة المصري ههههههههه
إيه وتفكرت ثاني في فيفري رحنا للمسيلة ، رحنا كلينا الشخشوخة المسيلية جامي ضقت بنة تاع الشخشوخة كيما هذيك تهبل تهبل :Love::Love:، رحنا سبيسيال علاجالها ...
يا ربي وش صرا ثانييييي ...!
إيـــه جا رمضان وأول رمضان نعقبو بعيدة على دارنا ، صح عندو نكهة خاصة مع زوجي:Love::Love: بصح توحشت دارنا ولمتهم ، توحشت الفوضى هذيك تاع كل واحد يهدر من جيهة : أذن ولا مزال ! ماما مانكلش هاذي ،، راني درتلك هاذي أسكتي برك ، حبسو الحس خليونا نسمعو الآذان ....إلخ ، توحشت نغسلو الماعن بالدالة ، توحشت السهرة الحلوة والحكايات والضحك حتى ماما تولي تقول : يا بناتي الجيران راهم يسمعو ، نقصوا شوية ...بزاف حوايج
إيه سمعنا بلي كاين كونكور تاع التعليم وزعما غير نوييت نوجدلو روحي عاودت قالت بن غبريط بلي جماعة الإبتدائي مش معنيين بيه ، وليت شاركت في كونكور مستشار التوجيه والإرشاد وحسيت معندوش حتى معنى ! أسئلة بعيدة كل البعد على التخصص ، الأساتذة لي يحرسو مدايرين 3 ج ويجاوبولنا على الأسئلة ، من 7 تاع صباح ل 7 تاع لعشية وحنا بلا ماكلة ،، كانو يامات العيد وكلش مسكر ناس عياو من رمضان ...
المهم بعد الكونكور ب يومين ولا عرفت بلي راني حامل الحمدلله ، نسيت الكونكور ونسيت كلش ، بدات المرحلة الصعيبة وفي نفس الوقت مليحة ، الوحم والمعاناة تاعو والإحساس تاع رايحة تولي أم ينسيك في كلش:Love: ...
فاتو الشهور ولحقني الرونديفو باش نروح للطبيبة ، كنت فرحانة حابة غير نسمع قلبو:Love: ، ياخاه وحد الشعور... وثما كانت الصدمة ، البيبي توقف على النمو ومآمنتش الطبيبة هذيك عاودت رحت لوحدة ووحدة ووحدة وأكل مختصيين وآخرتها التحاليل لي يأكدو كلش ، قد مانحكيلكم ماتتخيلوش الصدمة تاعي ، الحمدلله قدر الله وماشاء فعل بصح لاإراديا تبكي ولا إردايا تضعفي ...صدمة تاع صح
وعشت اكثر من 20 يوم معاناة كبيرة ، بعد ما شهور وأنا نشرب في أدوية تثبت حملي ، وليت نشرب في أدوية تعكس المفعول وماتتخيلوش قداش صعيبة من كلش جسديا ومعنويا ،، آلام قاتلة ...والحمدلله فاتت بفضل الله ورحمته
إيه وماخرجتش في الصيف ،مارحت لحتى بلاصة كنت في الشهور اللولين تاع الحمل وحذرتني الطبيبة من الفواياج بعدها مكتبش ربي يكمل ، ولينا خرجنا في سبتمبر كانت مزالت سخانة رحنا لسكيدة والقالة وعنابة وبعدها رحنا لتونس ، عقبنا يامات هايليين بدلت الجو وخرجت من الأزمة النفسية الحمدلله :Love:
وكي روحنا للدار عيطلي مدير تاع مدرسة كنت حطيت فيها دوسيي تاعي قالي ارواحي تخدمي راه كاين بوست فارغ ، ورحت قريت سنة الثانية إبتدائي ، كانت تجربة هايلة عقبت يامات حلوين معاهم :Love::Love:، صح هبلوني بصح تعلقت بيهم وتعلقو بيا ، وزيد تعلمت حوايج بزاف معاهم ، أول مرة نقري سنة 2 ...
في العام هذا إكتشفت بلي صحباتي كانو مزيفات ، وعرفت بلي الناس علاجال مصلحتها دير المستحيل باش تتقرب منك ، عرفت بلي كي طيح بيك تلقا غير والديك وأهلك المقربين ..
الحمدلله على ما مضى والحمدلله على ما هو آت
يعطيك الصحة خويا حكيم على الموضوع لي خلانا نسترجعوا ذكريات عام كامل ..
تحيــــاتي
السلام عليكم
ايه 2017 يا 2017
كان فيها الحلو و المر مالقري المر اكثر من الحلو بصح الحمدلله
نهاية 2016 و بداية 2017 الحاجة الوحيدة لي نموت الف مرة كي نجبد عليها....سوء التفاهم لي صرا بيني و بين اعز انسان في حياتي خويا لعزيز
(18ديسمبر 2016 ) صعيبة الواحد يعيش مع انسان بصح كانو عايش مع واحد غريب بصح الحمد الله مع انو مابقاش علاقتنا كيما كانت بصح يكفيني لي رجع يحكي معايا و فهمني
بعدها بفترة مش كبيرة ظهرت حكاية تعبي المستمر و ازمات قلبي المتكررة ماكنتش حابة نروح نشوف الطبيب كنت خايفة من النتائج و روحت درت الفحوصات و الحمدلله كان مجرد تعب و قلق نتيجة واش صرا
جا رمضان و هذا العام كان غير كانت فيه حاجة مختلفة
و بعدها العيد لي ماكان عندو حتى بنة
سامط بلا جداتي ربي يرحمها بزاف امور تبدلت في حياتنا من نهار راحت هي لي كانت جامعتنا راحت هي راح كلش
بعدها الشهر لي عقبتو في الجلفة كانت اجمل الايام عند عمي ربي يحفظو
بعدها خبر تقاعد تاع بابا فرحنالو ريح من التعب و المسؤولية
فاتو يمات تفاجات عمتي خطبتني لولدها كان بالنسبة ليا كابوس على عكس الجميع
الحمدلله ماما قدرت تنسي الحكاية هذيك بحجة عندي الباك و مازلت صغيرة
سمانة قبل مانرجع نقرا بابا جات في بالو حكاية الرحلة و بعدها بدل رايو ماكانش لي فرح قيسي دايما انا عكسهم في كلش خخخ
بعد سمانة ملي دخلنا نقراو طحت على يدي نهار لول بانتلي طيحة عادية و الوجع هذاك عادي بصح كان كل يوم يزيد و كنت نلقى صعوبة باه نكتب
روحت شفت طبيب و وين قالي لازمني عملية و لضرك راني هاك يمات و نرجع نشوف واش كاين
و ماعندهاش بزاف عرفت بوحد الامور كان لازم نعرفهم من قبل حاسة روحي كنت عايشة في وهم و كنت مخدوعة ... تعبتني بزااف هذيك الحكاية بسبتها تهاونت في قرايتي و كرهت كلش و رجعت نخمم فيها في كل وقت
المهم هذو الامور لي قدرت نتفكرهم الحمدلله على لي فاتت و الحمدلله على كل الاحوال و ان شاء الله 2018 تكون سنة خير على الجميع
السلام عليكم
عام 2017 فيه المليح ومش مليح
2017 كان في البداية جميل جدا كان كل شيء
على مايرام ..حسيت بالتعب صح في هاذ العام
قريت وقريت وتعبت ..
ورغم ذلك كانت أيام رائعة خاصة مع صديقاتي لن أنساها أبدا
يعني كان كل شيء جميل حتى وصل ماي
فيه مرضت جداتي (الله يرحمها) وكانت بالنسبة ليا
صدمة كبيرة جدا جدا وماتتخيلوش شحال كنت نحبها ونعزها وهي أكثر
وبعدها توفات كان أسوء وأحزن وأتعس يوم هذا الخبر نزل علي كالصاعقة
صحيح الأعمار بيد الله وهذا قضاء وقدر والحمد لله على كل شيء..لكن ماتوقعتش بلي هذا آخر عام معها
ماتقبلتش هذا الخبر خلاص عقلي محبش يستوعب
هذاك الوقت بقاو 20يوم على الباك
هنا استسلمت قلت راحت جداتي راح كلش
بعدها بديت نتفكر كانت دائما تدعيلي وتقولي رايحة تنجحي ان شاء الله كانت دائما واقفة معايا
هنا قلت لازم ننجح على جالها
وفعلا نجحت ..وكان أسعد وأجمل يوم ...فرحت بزااف لكن بقات الفرحة ناقصة طبعا
رمضان والعيد فاتو بلا ذوق سامطين لامطين
ما حسيت بوالو
رحت عند خوالي وقضيت أجمل الأيام بالرغم من أني كنت عايشة على أعصابي بسبب النتيجة
الا أنني استمتعت كثيرا
تعرفت على أناس حبيتهم وعزيتهم والله العليم
بدات الدراسة ..كل شيء يتبدل
تعرفت على وحدة تقرا معايا ..طفلة ما شاء الله
تقول نعرفها سنين
تعلمت حوايج بزاااف ....
القراية في الجامعة متعبة تاع الصح مكنتش نتخيل فيها هكا وربي قدرنا ان شاء الله
واللي يجي من عند ربي يامحلاه
2017أوشك على الإنتهاء بحلوه ومره
ان شاء الله يكون 2018احسن وأجمل
ويكون عام خير وفرح على الجميع بإذن الله
السلام عليكم
2017 فات عام مليح و الحمد لله تعلمت فيه حوايج بزاااف
اول حاجة دخلت في عالم الحياة الجامعية عرفت كتر و كتر واش هيا الجامعة و الاخص الاقامة الجامعية لي في الاول ما قدرتش نتاقلم بصح مع الوقت والفت نرمال و قدرت نبني شخصيتي المستقلة و التوكل على النفس في كلشي
ثاني حاجة تعرفت على بنات عادو كيما خواتاتي ربي يحفظهم من كل سوء :Love: و يدوم محبتنا
ثالث حاجة فقدت صديقتي ابوها هذا ما احزنني كثيرا رحمه الله و ادخله فسيح الجنان برحمته
هذا اهم الاحداث في هذا العام
شكرا على الموضوع
السلام عليكم ورحمة الله وبركاته
اعزائي افضال وفضليات اللمة الجزائرية
ان شااء الله احوالكم بخير وانتم بالف صحة وعافية
في الحقيقة احببت ان نضفي جوا جميلا نستمتع فيه بقصص البعض نجاحات واخفاقات البعض الآخر
الاول نهنئه والثاني نحفزه على المزيد من المحاولات للنجاح في الاخير
كل منكم عاش 2017 بكل ايامها ونعلم جميعا انه لم يتبقى لهذا العام سوى القليل
لذا احببت من الجميع مشاركتنا بقصصهم وحكاياتهم مع 2017 وللجميع الحرية في النشر في هذا الموضوع
شكرا مسبقا للجميع تمنياتي لكم بالتوفيق مشاهدة المرفق 73720
سلام
الحاجةليصراتلي وفرحتني بزااااااااااف هي فسخ خطوبتي والله تفكيت إنسان عديم الشخصيه ويظلم بزاف ...2017أحسن عام بالنسبه ليا الحمد لله...مام فيها أحزان وأفراح ...رانا نمشو مع الوقت...وأحسن حاجة سجلت في المنتدى اللمة وتعرفت على ناس كيما أنتوما...أمممممم. .أسأل الله العظيم أن تأتي سنة 2018 بالخير والبركة وتنسينا ما مضى ...آه نسيت الحاجة لفرحتني أختي ولدت طفلة وسمتها رودينة ربي يحفظهالي تهبل في الزين طالعه لخالتها صفاء..هههه ....
عام 2017 فات عليا ساامط رهج
اول حاجة بدات معاه الاضرابات نتاعناا فوتنا نصف الفصل الاول حتى لفيفري ومن بعد اضراب اضراب حتى جوان
من بعد اجلت الامتحانات الى سبتمبر
الصيف فوتو حريث ودمير
توفات جداتي اللي هي جدة الوالدة نتاعي ماشي ام الوالدة نتاعي كيما ضن البعض يعني جدة والدتي قعدت عايشة ووصلنالها حنا الحمد لله نعمة
وربي يغفرلها نشالله
خطوبة اختي ثاني في 2017
عرس نتاع اختي من الرضاعة كذلك في 2017
عرس وليد عمي خخخخ
لحنة نتاع وليد عمي آخر خخخخخ
يعني الحمد لله
فاتت بخير ولله الحمد وان شااء الله 2018 تشهد تغيرات كثيرة بحول الله
السلام عليكم ورحمة الله ..
الوغ ماي سطوري فالدوميل ديسات ..باه نبدا !
*ايه تلاقيت بأسما "عاشقة الجنة" وجها لوجه و ريحنا فطرنا مع بعض و عرفتها خارج اللمة نهار هايل و الله ^^
*امم ..ايه الخلعة لي ديتها جراء تصرفي المتهور و مزاجيتي التي لا تحتمل خخخ قاتلنا استاذة انتقدوني فورقة "قصدها الموديل" بلا متكتبو اسماءكم و انا بيا ناشعتني من قبل شديت ورقة و بديتها هي شخصيا خخخخ مهم قالولي موراها راها ادور بالقروب و تعرش خخخ جبتها شهر و انا خايفة تجبدني قلت راح العام الرسمي ..مهم حمدلله فاتت سالامات
*اول رمضان في لاسيتي فاتت هايل مع لبنات رغم الامتحانات و الافيشاج الروطار ووو بصح لمة زينة الفطور مع بعض نروحو نطلعو حلقة تاع عاشور العاشر دايما روطار بحلقة خخخ نصلو التراويح كيفكيف السحور و كلش و طلع العام حمدلله
*هذا العام بدات تنوضلي ضرسة العقل خخخخ كبرت و كبرت معي آالامها اللعينة :p+ الشقيقة دارت فيا رايها و سمطت عليا حياتي -_-
*بديت نحفظ قرآن بعد ما حفزوني عدد من اليوتوبرز بصح مكملتش مع الاسف حفظت شوية برك
* اسوء عيد اضحى مستحيل ننسى يوم عرفة كفاه فات عليا...
*حفلة اللي دارهالي بابا في يوم ميلادي ال 21 بعد ما حبسو الاحتفال به عندهم وقت
*و ضركا كملناه بالاضرابات و تحطيم معنويات الطلبة و الاغلبية راهي تالفتلهم :/
*اخيرا و ليس آخرا العام هذا تاكدت باللي فوقت الصح قاع بح ..
نأمل خيرا في العام المقبل
السلام عليكم
كانت أصعب سنة حتى شهر جويلية بدات تتعدل
كان كاين موضوع صعيب بزاف كان مكرهلي حياتي تهنيت منه وربي فرج عليا
لبست النقاب و كان أجمل قرار اتخذته في حياتي
و نتمنو ديما الخير للجميع والحمد لله على كل حال
السلام عليكم و رحمة الله
ايييه يا 2017 علمتني بزاف صوالح
فيه تعلمت بلي حاجة ما تدوم في هاد الدنيا ، كل شي يزول
تعلمت بلي على جال المستقبل نتاعك ، قادر تتحمل الاهانة ،
عادي جدا كرامتك تنهان و انت تضحك ،
تعلمت نصبر و نتحكم في اعصابي و كلامي باش غدوة ما نندمش
تعلمت نكون مظلومة و ما نكونش ظالمة ، بالمقابل تعلمت ما نسامحش ، واه ما نسامحش
كل واحد تعمد يذلني ، كل واحد تعمد يهيني و كي يشوفني يعجبو حالي و يولي يضحك ، و الله ما نسمحلكم كامل
الحمد لله الشدة فاتت و اليوم انا مرتاحة شوفو انتوما واش ربحتو ، غي الدعاوي نتاعنا احنا
بالمقابل كانت كاينة ايام جميلة قضيتها ، خاصة في مارس ، اول مرة نخرج من حدود الجزائر ، ما توقعتش اني رايحة نتوحشها لكني بالفعل توحشتها
تعلمت بلي بلادك تبقى بلادك ، فيها زدنا و فيها عشنا و فيها نموتو ان شاء الله
بلادنا زينة مي عبادنا خسروها و لي يتحكمو فيها خسروها ،
بلادنا يخصها القانون و العدل هذا لي اكتشفتو
اعظم نعمة احنا فيها ، انو كلنا خاوة ، كل واحد يعاون خوه ، كل واحد يسقسي على خوه ،
و هاذ الايام الاخيرة نتاع هاذ الفصل تاكدت من هاذ الشيء
المستقبل لي كنت راسماتو في بالي انهار و السبة ؟ خلوها في الستر و ادعوا ربي يفرجها يا خاوتي
وعليكم السلام ورحمة الله وبركاته
موضوع قمــة الاخ
2017 عام النجاحات بالنسبة لي وخاصة في مجال الاعمال والحمد لله نشكر الله وفي 2017 عرفنا باالزاااف ناس ونسينا ناس وان شاء الله انو نسيناهم نائيا ...مين نتفكر نرجع
السلام عليكم
جمعة مباركة للجميع
اللهم صل و سلم و بارك على سيدنا محمد و على آله و صحبه
اول شي نتمناو يشهد فينا بالخير عند الله عز و جل
و يدخل علينا العام لجديد بالصحة و العافية و التقوى و الايمان و الكثير من الخير ان شاء الله تبارك و تعالى
انا كانت اهم حكاية عندي في 2017 الباك نتع بنتي لاني عشت معاها ايامات التوتر و القلق والخوف من لي جاي
و كنت دايمن واقفة عليها و متابعتها في اصعب الاوقات و في المراجعة و في كل شي
المهم كان من اولية الاولويات
حتى شهر رمضان و الله ما عرفت كفاش فات تالمو كنت مشغولة بهاد الامر المهم جدا بالنسبة لي و لباباها و ليها قبل كل واحد
المهم فات الامتحان و ريحنا منو و بدا القلق نتع النتائج و راكم تعرفو كامل كفاش تاخرو فيهم حتى ركبولنا السكر
الحمد لله بعد كامل هاد الشي ربي سبحانو خلف تعبنا و شقانا بالفرحة و السعادة
و ربحت بنتي و فرحت و فرحنا كامل و العايلة في كل بلاصة فرحت لفرحنا
هادا كان اهم ما ميز 2017 بالنسبة ليا
و العام كان ما شاء الله حافل بالاعراس نتع فاميلتي من دزاير حتى لتلمسان
اما الباقي كل شي عادي و لله الحمد على كل شي
كل عام و الجميع الى الله اقرب
صحيت حكيم
من جهة؛ لحضات سعيدة جدا عشتها لأوّل مرة في حياتي ،ولن أنساها ما حييت.
ومن جهة أخرى، لحضات حزينة جدّا لولا حفظ الله لي وإلهامه لي الصّبر الجميل لأدّت بي الى حالة من الإكتئاب !
تلك هي 2017 بالنسبة لي بكل اختصار.
على كلّ،ها نحن ذا الآن نعيش سنةً جديدة(2018) سـنُبحِر فيها و لعلّ وعسى أن تكون موجات بحرها هادئة تجعل حياتنا أجمل عن ذي قبل !!
اتمنى أن تكون سنة خير،هناء ،سعادة، ونجاح لـي ولكـم وكل أمّـة سيدنا محمد عليه الصلاة والسّلام .
2017 عام جميل بنسبة ليا اول حاجة انظميت للمة وها انا بعد عام دخلتلها من جديد لاني ما كنتش فاهمة المنتديات المهم كي دخلت للمة كنت نفوت في لباك للمرة 3 على هاك سميت روحي همسة نجاح باه نحفز روحي وثاني في 2017 تعمعت في موقع تويتر وعشت تجارب ومواقف لي بنات شخصيتي وكان عندي اصدقاء رائعيين وعقبة لباك ويوم نتائج كان مع الاصدقاء من تويتر وكنت وحدي في عمل انتظر نتايجة واهل على الهاتف واصدقاء في تويت الكل يسئل وخرجت النتائج ولله الحمد نجحت وهمسة نجاح باتت صيحة نجاح ومبعد نتائج روحنا نصيفو لاول مرة وثاني روحت في طيارة وركبتها لاول مرة صيفنا ورجعنا ولله الحمد كان عام جميل طبعا لا يخلو من بعض عراقيل ففي 2017 صدمت بثلاث اعترفات للحب وطبعا لم اكترث لاي منهم الا ان احدها اتعبني جدا ولله الحمد تخلصت منهم جميعا وها انا الان في جامعة ولله الحمد 2017 اذقني الله فرحة لن اعيش مثلها الا بفرحة الجنة وهي فرحة نجاحي في الباك والله اجمل فرحة اتمنى نجاح لكل طلبة هذه السنة
..اسفة على الاطالة انها سنة وليس يوم ههههه شكرا لكل من قرء عامي واتمنى له 2018 سعيد يارب
