باسم الله ومرحبا بالكتكوتة نتاعنا. وشكرا الاخت ام ياسمين.
أهلا بيك سيدي الكريم ^^ وعجبتني كتكوتة ههههه لا يعودو يأمنو صح ويحطوني كتكوتة وأنا شارفة هههه
اعرفك تحبين الكتابة والقصص الخيالية لهذا سانتقل بك الى عالمك الصغير اغمضي عينيك..
جمييل عجبتني هاد الرحلة هههه، بسم الله
مثل لبيبة تعرفي لبيبة ماهرة شاطرة ؟
لبيبة هادي نظن رسوم متحركة بصح ماكنتش نشوفها هههه
انسب الاسئلة هي الاسئلة التي كانت مهمة حينها.
ماكان ادمانك وماكان ولعك حينها؟
كنت مدمنة على اللعب بالدمى كيما قلت للأخت أم ياسمين، وكذلك مشاهدة الرسوم المتحركة،
والرسم كنت مهبولة بالرسم، غير يلحق أول يوم من العطلة الصيفية نجبد الكراس تاعي ونقطع الاوراق الزايدة فيه
يعني لي مالحقتش نكتب فيها ونبدا نرسم ونلون كانت هاديك أعظم متعة عندي، وكذلك كراس الذكريات
المعروف انو كراس الذكريات تهز كراسك وتمد لأصدقاءك يكتبولك حاجة تقعد ذكرى، وانا لأني ماكانوش عندي اصدقاء
كيما قلت سابقا كنت نجمع أكبر عدد من الصور اللاصقة تاع الرسوم المتحركة وتاع الباربي ونلصقهم على الكراس هاداك
وكلما نكبر ندير كراس أكبر يعني بحجم أكبر ونعاود نحي الصور من الكراس السابق ونعاود نلصقهم وللآن مازال عندي
هاداك الكراس، كنت نموت على حاجة اسمها كراس الذكريات لكن بعيدا عن الاصدقاء كان كراس ذكرياتي وحدي
مالذي لم تتحصلي عليه حينها وكان مهم بالنسبة ليك؟
بصراحة في فترة طفولتي تقدر تقول 80 بالمائة من الاشياء لي نتمناها كنت مستحيل نحصل عليها خاطر علابالي ديجا
طرف الخبز قادر ناكلو اليوم وغدوة لالا، يعني أهم الاشياء لي هي الطعام واللباس ووالديا ماش قادرين يوفروه
فمابالك أشياء أخرى، على هادي كان كلشي يبانلي مليح ألعاب الأطفال أدواتهم المدرسية كلشي بصح عمري لا قلت لوالديا
على حاجة، جامي قلت لوالديا ماشريتوليش ولا مادرتوليش خاطر علابالي ماش قادرين يشريولي والو
بصح هكاك وعمرهم لا بخلو علينا منين تجيهم فرصة ينحيو من لحمهم ويشريوهالنا، على هادي مانقدرش نحدد حاجة وحدة
كانو بزاف حوايج يحلاو في عيني بصح عمري لا بقات الحرقة تاعهم في قلبي خاطر كانت محبة والديا وسعيهم لتحقيق ابسط احلامنا
كان يكفيني ^^
مما تتضايقين؟
كنت نتضايق من بزاااف حوايج، خاصة الفرق بين الاطفال وبين الناس سواء داخل المدرسة ولا داخل العائلة
أنك تكون صغير وتسمع وتشوف حوايج تاع كبار، يعني التمييز والكلام لي ماش مليح في الظهر
تخليك تلقائيا تتضايق حتى ولو مازلت صغير وماتعرفش هاد الامور
اذا عدتي طفلة ماذا ستغيري؟
والله رغم كلشي واش صرا مانغير والو، حتى ولو العالم في الوقت هاداك كان موحش
الطفولة لي كانت فيا كانت كغشاء تغطي على كل عيوب العالم
اغمضي عينيك...
هل نعود ام نبقى في عالمك؟
أكيد نبقى تما هههه رغم كلشي تبقى الطفولة أجمل شيء في الدنيا
والحمد لله على كل حال
ياسر عليك الاسئلة وربي يوفقك.
