سلسلة / فقر مونطال / " العدد 5 "

[Salah eddin]

السلام عليكم و رحمة الله تعالى و بركاته
ناس اللمة ان شاء الله أموركم بخير و على خير
الحمد لله اسيدي ... المهم بلا ما نطولو عليكم مرحبا بيكم في السلسلة كي العادة ... سلسلة


السلسلة هذي الي نشوفو فيها الأمور المدرحة و نسلطو عليه الضو
و موضوع هذا العدد الي يعيي كغيره من المواضيع الاخرى الي شفناها هنا هو

" كرة القدم الجزائرية !!! "

كيما تعرفو ...انو يا جماعة الخير ... معروف بلي في الجزاير كرة القدم عندها جمهور عريض و كبير جدا ... و الشعب الجزائري يحب كرة القدم ... و عندنا فرق كرة قدم

عندا كيما المولودية و الياسما و سطيف والموب و مولودية وهران وعندا الحراش و الشبيبة و شبيبة الساورة و يا حسراه ...

بصح في حقيقة الحال ... الفرق هذو ... جامي تشوف ماتش زين ... كي تتفرج في البطولة المحلية الجزائرية ... تقول راك تشوف في كاش سوق

نبداو بالتشكيلة

المشكل في التشكيلة تاع الفريق ... تلقى مثلا التشكيلة كيما هاك : 4-4-2 ... بصح في حقيقة الميدان تلقى التشكيلة كيما هاك : 0-0-10

قاع يلعبو آطاك .... و قاع يجرو وراء البالون ... يا محمد سيدي ياك راكم دي بروفيسينوال ... ها العبو زين اسيدي ...

ماكاش الي يحكم بلاصتو ... في لوروب ... تلقى كل واحد حاكم بلاصتو ... المدافع مدافع ... و المهاجم مهاجم ... بصح حنا عندنا كيما يقولك gول واطاك

و الشي الي يدوخك اكثر ... الاوروبيين من جمالية الاستعراض ... تقول راك في مسرح كي تولي تشوف في الماتش ... يعلبو و كل واحد حاكم بلاصتو

يجرو ق مين ذاك .. و يلعبو الطاكطيك و الكرة الجميلة ...

اما هنا ... يلعبو و خلاص ... يعطيك يجري ورا البالون ... يجري برك يجري برك درق درق درق ههه كيما قال طيب الذكر سي علي بن شيخ الي نقدمولو تحية كبيرة بالمناسبة

هذي بالنسبة للاعبين و التشكيلة ...

و نشوفو ثاني : الملاعب .. يا بن عمي .. تشوف ماتش في البيرانبيو ولا في البارك دي برانس ... ولا في الكامب نو ... الملعب هذاك متحوف ...

العشب الطبيعي و المدرجات بالكراسي مش ق هاك ... و العين تاع الما هذيك مين ذاك تطلع ترش العشب الطبيعي و الاضاء و يا خيرك يا ربي

و تشوف الملاعب تاعنا .. تقول راك داخل لكاش زريبة يا بن عمي ... حاشا الزريبة الزريبة قاع و هذاك شكلها الطبيعي ...

بن عمي تشوف المعلب في دزاير ... العشب مش طبيعي ... ق طاراطو بصح تلقاه تقول فالية فيه القلم ( القلم = الغنم ) ... و المدرجات هذوك

يا صاحبي المدرجات لا كرسي لا والو ... ريّح على السيما ديراكت ... و كابابل اطيح بيك كيما في معلب 5 جويلية ذاك العام و الله يرحم موتى الحادث على كل حال

و نلحقو لنقطة حساسة ... الجمهور

الجمهور حكايتو حكاية ... في لوروب وين كرة القدم الحقيقية .... الجمهور كي يولي داخل للصداد تقول داخل للسينيما ولا المسرح ...

المقامة... و الحطة ... و تلقاه جايب معاه وليداتو ... و داخل للصداد ... و الدخلة ق شوية قبل الماتش مش ياسر ... و التيفوات هذوك كفاه

و التشجيع كفاه .. ياودي حطة وش بيكم

و تجي تشوف المشجع الجزائري ... يدخل للسطاد ع ال8 تاع الصباح ... و الماتش ع ال10 تاع الليل

و يجي داخل بالموس و النصلة تاع الحديد ... و يدخل معاه الفيميجان و السينيال ... و يزيد في الملعب حاشاكم السبان و طياح القدر

طبعا مش كاين لي سيبورتور هاك كاين الملاح ... بصح نهدرو على الي مش ملاح ... و الفوضى و الحاجة المدرحة ياسر ... العنف في الملاعب

كي يولي رايح للملعب ... تقول رايح للباطاي ... هيكتور و اكيليس ما ينفعوش هنا .... لازم تولي مشجع جزائري باه تسلك من الملاعب الجزائرية

و نرجع و نذكر اللاعبين ... نذكر نقطة مهمة ...

اللاعبين المحليين ... اغلبهم مش قاع ... ضعاف جدا جدا تقنيا و بدنيا ... و الاحتمال الكبير انهم ما يتدربوش مع الفريق

يجو ديراكت يلعبو ... لا خطة ... لا لعب زين ... لا فرجة ... يعرفو حاجة وحدة ... يجرو برك ... يعرفو ق يجرو

و تلقاه يعرف ق يجري ... و عندو السالار تاع 300 مليون للشهر .... و الله ق تحير ...

كن جاو يلعبو زين و يمتعو الجمهور ... و الله ق السماح ... الله يزيدهم ... بصح ما يعرفوش يلعبو ... و يخلصو 300 مليون شهريا ...

وهنا نستنتجو حالة ... ان اغلب اللاعبين في الدوري الجزائري ... و المسيرين تاع الكرة الجزائرية ... و عينة كبيرة من الانصار الفوضويين

عندهم ... فقر مونطال



و السلام عليكم و رحمة الله و بركاته












​

 

[لؤلؤة قسنطينة]

السلام عليكم
والله ضحكتني الله يعطيك الربح هههه
وعندك الحق في واش قلت
راني راجعة بحول الله للرد على الموضوع
مع أنك ماخليتلنا واش نزيدو هههه
درك نولي ان شاء الله
​

 

[Salah eddin]

السلام عليكم
والله ضحكتني الله يعطيك الربح هههه
وعندك الحق في واش قلت
راني راجعة بحول الله للرد على الموضوع
مع أنك ماخليتلنا واش نزيدو هههه
درك نولي ان شاء الله
​

و عليكم السلام و رحمة الله
اهلا بالاخت مريم
ههه مش موالف نكتب مواضيع طوال
بصح الكرة الجزائرية حتمت عليا هذا الشي
ههه و مليح كي ضحكتي اسي و الله على الاقل يضحك الواحد على الفوتيبال الجيريان
شكرا

​

 

[Salah eddin]

دعوة عامة للأعضاء
انشاطو شوية اوو

@حروف تائهة
@acher.dz
@dahman kz
@فيتامين سي
@حمزةusma
@عمر عبد السلام
@ربي اغفرلي
@{هِشام}
@scorpion16
@باتنية و نص
@الحلم الوردي
@إنسانة ما
@زهور الشوق
@Skor m@k
@زهرة اللمة
@يونس قاسم
@صدام بكل فخر
@madridista
@chirine zina
@بنت سطيف
@ميلينا
@بشرى ملاك
@aYyÖub aDaM
@جيهان جوجو
@لؤلؤة قسنطينة
@امين احمد
@جلال عبدالمنعم
@صمت المشاعر
@theking
@saddek06000
@Ma$Ter
@bassem1618
@BTCMADANI
@hakim story
@Hossam 01
@sanaya
@ليليا مرام
@ماجدة لربها ساجدة
@Soumia hadj mohammed
@Asseli Queen
@نعمات
@أم ياسمينdz
@عآشقة الجنـة
@omaridj27
@NOOR EL Huda
@مكان وزمان
@طموحة
@رضا الرحمان غايتي
@الصراحة راحة
@محمد التبسي
@الامين محمد
@حلم كبير
@الصحافية الساخرة
@Twinkle Stars
@طيب الكلام
@فتحي عاشق الجنه
@عاشقة الإحسان
@صفاءdz
@أم منيــــــر
@Princesse Diyor
@Princess nour
@Queen Fati
@نجلاء
@yaso ياسمين
@الورد الأحمر
@جميلة أنا ​

 

[HAMZA USMA]

انا متفق مع طرحك
فقر مونطال الكرة الجزائرية
إن الحياة مليئة بالمطبات والعقبات التى تحول بيننا وبين نجاحاتنا وأهدافنا
الجمهور والملاعب واللاعبين
هي العناصر المشكلة لfaf
لا اله لا انت كنت من الظالمين
المنتخب نحو الهاوية

مع تحياتي القلبية وميعادنا يتجدد في فرصة قادمة
روراوة هاجسهم حتى و هو غائب​

 

[جميلة أنا]

كلام واقع يا اخ صلاح و للأسف مؤسف جدااااا مانراه خاااصة اننا شعب نعشق الكرة يظهرلي مكنش ام مبكاتش و بنت مزغردتش كي تأهلنا في أم درمان هذا يدل على اننا شعب يفرح تع صح و ينسى هموموا مع البالون.....اما على واقع الكرة للأسف كيما قلت ماشي غير في الهابط هذا هو الي يزيد يدوخك الناس تمشي و تطلع و احنا نمشيو و نوليو للوراء تحير .....اما على المحليين انا كنت نشوف ماتش تعهم والله غير ينعسوا نقول ندور لنادال نتفرج عليه في كرة تنس و منتفرجش عليهم... كارثة والله اما على دوري الاوروبي والله نتفرج سعات ماتش تع بارصا ولا ريال ولا تشيلسي و ليفربول ولا منشيستار والله منفيقش حتى كيفاه يفوت ماتش...... باختصار نقولوا بلي جزائر معنداش حاجة اسمها بالون ولا فريق تع كرة قدم الله غالب هذا هو الواقع و يأسنا منهم..... هذا رأيي في الامر تقبل مروري

 

[الحلم الوردي]

يسعد مساك
والله نتاع الصح فقر مونطال
مكاش خلاص ني مستوى ني والو
يحصرا على العوام الي فاتو
مي ضحكتيني نتاع الصح
يعطيك الصحة خويا

 

[صانعة الإبتسامة]

والله صح كلامك
هم يضحك وهم يبكي للأسف هذا حال كرة القدم في الجزائر من (اللاعبين لي البيبليك قاع خيرات ربي ) ربي يجيب لي فيه الخير نشالله

 

[Naz iha]

السلام عليكم

يعطيك الصحة كلشي قولته
واش نزيدو أنا خاطيني البالو
من عام أم درمان تخاطيت أنا وياهم
لوكان الدراهم ألي راهم يخسروهم عليهم
يخسروهم على الفلاحة
لوكان رانا في عالم أخر ​

 

[حلم كبير]

السلام عليكم ورحمه الله وبركاته

راك دورتها فقر مونطال ههههههههههه
يعطيك الربح موضوع هايل
عجبتني 0.0.10 ههه
انا منيش بزاف بالو بصح على حساب واش فهمت كاين فقر مونطال نتاع الصح في هاذ المجال
أنا نقترح يريحو كامل فالاحتياط ويتفرجو هههه
الله يعدل الاحوال برك
ملي جاها ماجر باللقطة نتاع ألو بورتو زاد خلاها تشحت في الشوارع
ربي يجيب الخير
بارك الله فيك
واصل خويي مواضيعك رائعة
في المتابعة
إحترامي وتقديري​

 

[Oussama.GF]

سلام عليكم اخي صلاح
داين تجينا بمواضيعك زينة ولي تعجبني وتخليني نحكي
حالة كرة جزائرية وش راح نقولك عليها
نتمنى انهم ينحو رابطة جزائرية
نبداو بالجماهير
ماشفنا منها والو هذا عام
غير تسمع في اخبار هذا مات هذا تجرح هذا طاح من لاتربيل
تشوف فيلاموجان يطاشيو في سطاد بين جماهير ويدابزو بيناتهم تقول راهم في حرب عالمية
وام يبقا قلبها محروق على وليديها لي مات في ملعب
ونلاحظو في كل مبارة لازم تنوض دبزة وفوضة
انا تفرجت مبارة في ولاية ورقلة بين مولودية رويسات وشبيبة قبائل ياجدك صطاد كل معبي مكانش وين تريح وتشوف الأفرقة وحدخين من ورقلة تاع بني ثور ومخادمة وتقرت جاين يتفرجو مشكل ماشي هنا تلقاهم عندهم عداوة بين جماهير ويجي يفسد ماتش على فريق منافس وميخليهش يلعب وتسمع كلام فاحش وتطياح هدرة وصراع بحجر ماجيت خرجت من ملعب حتان جات في رأسي حجرة تجرحت وخرج دم تقول راك خارج من جحيم مهم وكي تخرج مزال مفراتش تلقا ناس تاع فوضى موجدين روض باش يحرقوهم ويسكرو طريق ولي عندو طاكسي راحت فيه ولي عندو عائلة ربي يرحمهم وحنا في ورقلة مشكل هذا محبسش اصبح كل جمعة وسبت وحتى اذ لم تجرى مبارات يسكرو طريق ويديرو وش يدييرو من تخريب قصة طويلة منقدرش نكملها ارواح لورقلة وعيش وتشوف كان مرحلتش في نهارك مانيش اسامة
نروحو لجيهة ملعب
وش نحكي وش نخلي ارضية محفرة ومهردة وجامي بدلو ذاك تابي من 15 سنة وياربي وملاعب تلقاهم دارولهم كراسة مي شعب ربي يخلف لازم يفسد يقلع ويطيش تقول راه في دارهم
ومن جيهة لاعبين
خخخ كيما قلت صلاح غير يجرو وراء بالون تقول ذيابة حابين يصادو دجاجة
لا فن لا لعب غير ادخل احرث وخلاص
كامل حابين يبانو في ملعب كي شغل انا ماركيت هذا وش في راسهم
انا نطالب بقفل رابطة والله مانصلحو للكورة
دمتم في راعية الله ​

 

[زاد الرحيل]

نتحسر و نتسأل على 300مليون الي يتحصل عليها اللاعب في اللعب فقط موقعها في شرع الله ما هو و يوم يقف امام رب العالمين و يسأل عن عمره أين انفقه و مصدر ماله منين جابه فيجيبه اللاعب انفقته في اللعب و مالي من اللعب تصوروا الامر كفاه و الغفلة واش الدير بالناس يعني هم اكبر من كل شيئ
يعطيك الصحة فالجلفة خنقونا رحبت بك حذفوها مقص رقابة عنيف

 

[زاد الرحيل]

نتحسر و نتسأل على 300مليون الي يتحصل عليها اللاعب في اللعب فقط موقعها في شرع الله ما هو و يوم يقف امام رب العالمين و يسأل عن عمره أين افناه و مصدر ماله منين جابه فيجيبه اللاعب افنيته في اللعب و مالي من اللعب تصوروا الامر كفاه و الغفلة واش الدير بالناس يعني هم اكبر من كل شيئ
يعطيك الصحة فالجلفة خنقونا رحبت بك حذفوها مقص رقابة يعني

 

[فتى من الغد]

موضوع رائع
عندنا في الجزائر الشيخ يدي 3 ملاين ونص والمدرب يدي بالملايير
عن اي فرق تتحدثون؟؟؟؟

 

[Salah eddin]

السلام عليكم و رحمة الله

شكرا للجميع على المشاركة القيمة و الاضافة المميزة

و اسمحولنا على الرد المتأخر و بارك الله فيكم


​