السلام عليكم ورحمة الله وبركاته
كاين ناس تاع هاد الجيل مايعجبهمش لما لي أكبر منهم يقولو حنا بكري وحنا بكري، وبلي بكري كان عالم آمن وجميل ماش كيما اليوم، واليوم أنا نقولها ونعاودها، حنا بكري كنا مانكلفوش اهالينا فوق طاقتهم، كي يدخل عام جديد نهزو محافظنا القديمة الممزقة نعاودو نخيطوها للمرة الألف ونفرحو بيها عادي، مع أنو نشوفو محافظ البنات غيرنا واش من الوان وردي وازرق سماوي ورسومات جميلة، وحنا محافظنا كانت سوداء وبشكل بسيط لكن نتقبلوها عادي، الأغلفة الملونة نخبيوها عام بعد عام والاقلام والسيالات وكل ماهو لا يزال صالح للاستعمال، حتى المآزر والملابس، كنا نحمدو ربي على كلشي ونفرحو بكل شي ونقنعو بكل شي، خاطر أولا علابالنا كي نقراو ماش لوالدينا وانما لأنفسنا، والكراريس الفاخرة والادوات الجميلة ماش هي لي تمنع الرسوب، كانو اهلنا أهل وعرفو كيفاه يعلمونا القناعة، وحنا كنا أطفال قد المسؤولية نتحملو عبء الدنيا معاهم، كان كل شخص حاكم مسؤوليتو ويقوم بعملو على أكمل وجه ويحترم نفسو وغيرو.
أما الآن ماعدنا نعرفو الإبن من الأب والبنت من الأم، الأبناء يأمرو والأهل يلبيو، بدل لباس جديد واحد للدخول المدرسي ولاو 2 و 3 وبدل المئزر الواحد يشريو 3 جدد، وبدل قلم رصاص يدير ب 20 دج لا يشريلو قلم رصاص تاع 50 دج وبدل علبة ألوان تاع 60 دج ولاو يشريو تاع 200 دج، أصبح الدخول المدرسي كأنه قمار، محافظ ب 600 ألف وأدوات تفوت 500 الف وتلحق للمليون، هادا طفل يقرا بمزيتو؟ ولا يقرا على جالي؟
نقولو بالاك الاطفال يسخفو ويحبو يشريو حاجة جميلة خاصة بعد التسويق التجاري للأدوات والاشكال المغرية لي في السوق، لكن نشريلو حاجة مليحة وجميلة ونفرحو بيها ولا زوج ماش 10، وتلقى الأب كي تسألو على هاد التبذير يقولك خلي مساكن باه مايعيشوش واش عشنا وإلا يقولك راهو يقلب عليا الدار، شكون ساع لي يحكم؟ ومن وكتاه نربيو ولادنا على الانانية بحيث يديو واش يحبو على حساب افلاس والديهم، مانقولوش صغار ومايفهموش بالعكس من هنا تبدا التربية وتعلم ولدك على لي ليه ولي خاطيه، وزيد واش بيها عيشتك حتى ولدك مايخرجش كيفك، يخي ماحارمو من لبسة ماحارمو من ادوات مدرسية، علاه الدلال لي يفسد؟ وياريت ابناء اليوم يخرجو كيما تاع زمان يقرا حافي القدمين ويخرج دكتور ومحترم ويقدر والديه ويعرف حقوقو وواجباتو، أما اليوم لباس وتحواس والماكلة المخيرة ويخرج عاصي الوالدين، خاطر اللبسة الفاخرة ماتجيبش التربية ولا الاحترام والادوات الغالية ماتجيبش الفهامة والنجاح، لو جرينا على اخلاق ولادنا وتطوير باطنهم مثلما نجريو على ظاهرهم لما وصلنا لهاد الحال، ربي يهدينا اجمعين ان شاء الله ويوفق ابناءنا وبناتنا في دراستهم
بارك الله فيك على الموضوع
تحياتي
