/
لاليست كتالي
علاه راكي حابة تولي مثقفة قاع فليدومان ! ونتي قادرة تختاري دومان واحد تنثري في قع طاقاتك وممكن تخرجي فيه لعجي العجاب وهكذا تختصري المسافة قصدي بيها الزمن وتعب ؟
علاه تشوفي روحك متميزة ؟ غرور ام ثقة بنفس ؟
علاه شعب الجزائري ماهوش متميز في قاع الميادين ؟
علاه حنا كشعب نلومو الدولة والدولة هيا من صنع الشعب ؟
علاه الفئة العمري تاع شبا يحرقو ودايرين في بالهم بلي مكاش خدمة " !
علاه الاجهزة الالكتروني القديمة صنعا تحكم وتشد والحديثة صنعا تخسر ليه ليه ؟
علاه ميدان التجارة الالكترونية ناقص في دزاير وغير معترف به حاليا ؟
كاين بزاف علاهات منقدرش نقولهملك قع هههه حبيت نحكيلك بشكل عام مش بشكل خاص هاذو تع زربة برك ..
اهيه شكرا على لي كستيون
كاين لي يخصوني ورح نجاوبك عليهم وكاين لي رح نضمهم للقائمة مبعد نديرلهم موضوع خاص
علاه راكي حابة تولي مثقفة قاع فليدومان ! ونتي قادرة تختاري دومان واحد تنثري في قع طاقاتك وممكن تخرجي فيه لعجي العجاب وهكذا تختصري المسافة قصدي بيها الزمن وتعب ؟
ليك انا قتلك باه الانسان يكتشف ذاتو ويوصل لشغفو والحاجة لي صح يحبها لازمو يجرب كلش .... انا دخلت لمجال التنمية البشرية المجال النفسي وسيكولوجيات الانسان لغة الجسد الاشارة الكتابة الرسم التصوير الخط العربي البحث تعلمت الالمانية سييت نكون مؤثرة ومحفزة اممم كنت بادية فالبرمجة و راني نسيي نتعلم الجرافيك دزاين وتطبيقاته كيما الفوتوشوب وعندي اهتمام بالتسويق والفريلانسنج والتدوين { هذو جزء من واش جربت ومن اهتماماتي }
شايف هذوا كامل راح نسيي نوصل للاحتراف فيهم كامل نحب نكسر الروتين شغل كل اصبع بحرفة هكذا نعرف انا لواش انخلقت بالذات شيماء وش قادرة دير
اسكو نصلح مصورة ولا محفزة ولاكاتبة ولافريلانسر ولامدونة فاهمني هذوا كامل كهوايات
اما شغفي الحقيقي هو الطب { جراحة القلب } راني نقرا فنفس الوقت نكتشف ذاتي
مش حاجة مليحة الانسان يكون ملم بكل الجوانب ؟ كل ماتدخل مجال تسلك روحك
الثقافة فقاع لي دومان لازمة اما كي نحس روحي حبيت شي مجال فعليا رح ننثر فيه طاقتي كيما قلت اما مننساش نطور روحي فحجات اخرى منحبش نكون انسانة تعرف فجانب واحد برك وكي يسقسوها على حاجة تبهت !
استراتيجيتي الخاصة هي {شوي من كلش } اما الفرق كي نتعلم ذيك الشوي زعم كيف موضوعي لي فات الاتحاد الاوربي عرفت وشنو هو وزدت فهمت علاه اختارو 12 نجمة وخلفية زرقاء في علمهم وعرفت بلي تاسس بموجب اتفاقية ماستريخت وعرفت بلي ماستريخت مقاطعة هولندية الفكرة انو في خضم اكتشافك لذيك الشوية رح تتعرف على بزاف حجات هنا الشوية هي الاتحاد الاوربي مي في جرته عرفت حاجات اخرى ✌
سييت نوصل الفكرة منعرف اذا وصلت ولا نو ؟ ومنعرف اذا كامل الناس تخمم هكذا وتسيي تتعلم ولا نو ؟
علاه تشوفي روحك متميزة ؟ غرور ام ثقة بنفس ؟
ليك مسالة التميز ...
{ رح نفهمك حاجة انا طفلة عادية في عمرها 16 طبيعية صريحة وعفوية تحب تكون ناجحة وحاجة فالمستقبل وتخلي بصمتها فالعالم مش حابة نكون مجرد وجه جميل او رقم في عداد السكان معنتها نسعى للتميز وفي نفس الوقت انا مش مثالية ولاكاملة بالعكس عندي عيوب كيف كامل الناس اما نسعى نستف حياتي ونرسم اهداف صغيرة هي لي فالنهاية تراكماتها رح تكون نتيجتها تحقيق حاجة كبيرة }
انا كغيري من الناس مريت بتجارب وحجات ربما اكبر من سني وقعت وقمت وتعلمت ونضجت
الغرور حاجة بزاف نكرهها ونسيي الماكسيموم نبعد عليها انا كي حكيتلك الفوق على وش جربت مش معنتها غرور وتكبر وقاعدة نوري فروحي نو استعملتهم كحجة باه نوصلك الفكرة
منحبش انا نحكي على انجازاتي ولا حاجات عملتها نحب نخليهم هوما يحكوا ويعبروا علي { استثناء لفوق كي حكيت وش درت لايصال الفكرة لااكثر ومش قصدي التباهي ! } صح انا طول نحكي على النجاح مي نسيي نمشي في طريقوا واؤؤمن كل الايمان اني شي يوم رح ننجح
اذا هي مسالة ثقة بالنفس واكتفاء بالذات مسالة اني اقتنعت انو لازم نحب نفسي ونقدملها الافضل انو شيماء تستاهل الافضل والاهم انو نكون انا على طبيعتي وبعفويتي ونتقبل نفسي
بين الغرور والثقة بالنفس حسب مفهومي
الثقة بالنفس انك تحس روحك مرتاح ومتقبل ذاتك وحابها رغم كل العيوب وعندك رؤية واضحة لواش حاب ووين حاب توصل
اما الغرور كيف الواحد يحس روحو كامل ويحب نفسوا بطريقة غير طبيعية وميخليش موقف ميسيييش يبين روحو فيه كي شغل فوق راسو ريشة وهو طبعا متوهم شغل شعور بالعظمة وتوهم الكمال
الثقة بالنفس حاجة طبيعية وفطرية الانسان يكتسبها وينميها كي يعرف ذاتو ويحبها اما الغرور حاجة مصطنعة
الثقة بالنفس يبنيها الإنسان ويصل إليها بالتدريج وتحصل مع تطوير النفس والقيام بالعديد من الإنجازات والنجاحات في مختلف جوانب الحياة، أمّا الغرور فيكون فجأة بأن يقرر الإنسان بممارسة هذا الدور على الآخرين
كي تكون واثق من نفسك معنتها مكتفي ولاحاجة باه تقارن روحك بالناس بويسك عارف شكون انت وظروفك بعكس المغرور لي طول يقارن ويتباهى
أي أن الفرق بين الثقة بالنفس وبين الغرور هو أن الأولى تقدير للإمكانيات المتوفرة، أما الغرور ففقدان أو إساءة لهذا التقدير.
ونزيدلك حاجة كي تكون واثق من نفسك تؤمن انك تقدر لذيك الحاجة وفنفس الوقت متنفيش قدرة فيرك عليها يعني تتقبل نجاحات الاخرين بويسك عارف انو لكل واحد لمستو والغرور كي تقول غيري ميقدرلهاش مالغري هي حاجة فالمتناول
التميز يااخي ....
مش بالساهل الانسان يسممي روحو مميز وهو ماعمل شي في حياتو انا منحبش نقلل من قيمة نفسي ولا انجازاتي حتى نحافظ على احترم وحب الذات لي عندي مي كيف قتلك راني نسيي نعمل اهداف هي توصلني لاحلامي شغل مزالني في بدايتي ولي راك شايفها حاليا مش افضل نسخة مني
نتمنى تكون فهمت الفرق بين الغرور والثقة وانت حسب معرفتك القصيرة بي قولي ياترى شايفني مغرورة ولا واثقة
اممم ونتمنى نعرف هه السبب لي خلاك تسال هذوم السؤالين ؟ { مجرد فضول علاه هذين السؤالين بالذات ! }
خاصة فارواح الناس
