مشكلتي هل هذا عقاب من الله

[مشكلتي]

السلام عليكم اخوتي سأدخل مباشرة في الموضوع انا فتاة عشرينية الحمد لله حمدا كثيرا على نعمه بفضله تعالى تقدم الكثير لخطبتي لكن المكتوب ماكتبش المهم منذ يومين تحديدا اتصلت بنا قريبة لنا تود خطبتي لشخص تعرفه حسب ماقالت أنه انسان متخلق معتمر يحفظ كتاب الله يعني فيه شروط الزوج الصالح لأكون صريحة انا اعجبت به فلطالما تمنيت زوجا هكذا زوجا يخاف الله فيا مع العلم يا اخوان انو هؤلاء الناس حرفيا عندهم عامين وهم يحاولون خطبتي لكن بحكم الظروف كان في كل مرة تصرا حاجة تعرقل لا علينا تمت الموافقة على اساس انهم يجيو غدا ان شاء الله نديرو رؤيا شرعية ونتفاهمو على الشروط ولكم ان تتصورو ربي شاهد لبارح كااامل وانا نوجد ونحضر وخلي الحروق لي صراتلي في يديا والله ملي نضت الصباح حتى الليل يوصلنا اتصال بالحرف الواحد اسمحولنا مانقدروش نجو السيد عندو شروط لازم تكون متجلببة وقاعدة في الدار للعلم انو انا بقالي عام دراسة ونكمل وأنوي العمل في سلك التعليم بإذنه تعالى ومتحجبة حجاب شرعي واعرف حدودي ومايغضب الله يعني ليس بالضرورة نكون متجلببة باه نكون حافظة للقرآن والا ادرس احكام القرآن والا مصلية والا نخاف ربي الحمد لله الذي هداني الى هذا وساقني الى هذه الطريق وأسأله سبحانه الثبات وتمام الهداية ياربي ولكل المسلمين المهم والله لأكون صريحة انا هذا السيد لم يكن في بالي ولو ذرة لكن الحديث عليه وفي خصاله أعجبت بالأمر إلى حد الاتصال والله حسيت كأنو سطل حمم أفرغ فوقي حرفيا تصدمت على بالي كلشي بالمكتوب لكن سبحان الله مشاعر الناس اذا في الأول عندك شروط ماتقصدش ناس وتخليهم يوجدو ويفرحو من بعد تخسر عليهم إتصال وقص قرمط مربط الفرص أحبتي من ليلة لبارحة وانا خايفة والله خفت اذا نكون درت حاجة غضبت بيها ربي فعاقبني بهذا العقاب والله وهو يعلم شحال راني خايفة يكون هذا السبب يعني ربي شاهد ولا عمري آذيت شخص ولا حتى حيوان ولي يعرفوني يعرفو خصالي لست أزكي نفسي لكن الحمد لله رباوني والديا احسن تربية لا عمري أقمت علاقة ولا تراسلت مع شباب ولا حبيت الشر لإنسان قد يكون شر أبعده الله عني لكن فكرة انو ربي راه يعاقب فيا تنهش حرفيا من روحي
اخوتي في الله ادعولي دعوة من القلب وربي يرضى علينا ويرزقنا أجمعين

 

[السلطانة]

وعليكم السلام ورحمة الله وبركاته

تم اعتماد الموضوع لي عودة بإذن الله

 

[الامين محمد]

شوفي اختي الكريمة
خلي امرك كله على الله لكن لازم ترتاحي و تكون ثقتك بالله عظيمة
الرجل هذا اذا فيه خير راح ربي يجيبه حتى لعندك
و اذا فيه شر راح ربي يبعده عليك

اعرف اخوات في الواقع تزوجوا ناس على أساس أنهم متدينين لكن لقاوهم اكثر من مجرمين فيهم واحد اكتشفت زوجته أنه مشعوذ والله المستعان ، ضربها و بهدلها و عيشها في مكان لا يليق بإنسان
حتى المرحاض مكاش
و اعرف اخوات تزوجوا رجال على قد حالهم عاشوا زي الملوك

اختي صلي الاستمارة قبل الفجر أي وقت السحور و كثري منها و خلي امرك كله على ربي الذي لا ينسى و يسهى و لا ينام و هو القادر على كل شيء بشرط تكون بثقة كاملة بالله

ربي يسعدك و ييسر امرك
بلا ما نوصيك بالرقية و التحصين

 

[إلياس]

لي عودة ان شاء الله

 

[ناصر dz]

اخوانى ابيى اعرف بس كلمة تكون متجلببة بالاول

 

[ناصر dz]

المحبة تجى بالكيف ماشى بالسيف

 

[Malika miko]

السلام عليكم
أختي الكريمة متقوليش غضب من الله لا ابدا
قولي الحمد لله ربما الزوج هذا شخص سيء وربي صرفه عليك لا متعمريش راسك
ادرسي وشوفي المستقبل نتاعك مزالكي صغيرة و مدامك مستورة ومتربية وتخافي الله حمد لله متتقلقيش
الزواج قسمة ونصيب ولي كاتبه ربي يديك
ربي يرزقك الزوج الصالح لي يكون يخاف الله
تحياتي اختي

 

[وۣۗهۣۗہۣۗم]

شوفي ختى الزينة
راكى قلتى انك واثقة من نفسك ومن تربيتك ومن صلتك بالله
ابقاي هكااا برك ياشجرة ماتهزك ريح
مش شرط انك تغيرى قناعاتك باه يقتنع بيك انتى عندك حلم وتقدرى تحققيه اذا ما انك اقتنعت انك هاذ الشرطين تاعووو متقدريش تحققيهملوووا وانك مقتنعة بطريقة بحجابك و انك حابة تواصلي مشوارك المهنى والدراسي مكاش لي يقدر يهز ثقتك بنفسك توكلى على الله وسيرى الى الامام بكل ثبات وديرى في بالك حاجة برك انك مازلتى صغيرة وطريق قدامك طويلة مفتوحة ومزال الفرص ان شاء الله وحتى اذا كان هاذا هو نصيبك راح تديه كونى مهنية اما اذا شفتى انك تقدرى او عندووا فرصة تتراضاوو فيها بيناتكم فهاذا شئ اخر
واولا. وقبل هاذا كامل استخيرى لعدة مرات ودعى ربي من قلبك وان شاء الله ربي راح يفتحلك طريق الخير ​

 

[الامين محمد]

اخوانى ابيى اعرف بس كلمة تكون متجلببة بالاول

تلبس جلباب خوي ناصر

 

[ناصر dz]

اختى الفا ضلة اليك هذة الفتوى والله المستعان

لعرض هذا المحتوى، يتوجب عليك الموافقتك على تعيين ملفات تعريف الإرتباط (الكوكيز) للطرف الثالث. لمزيد من المعلومات، الرجاء زيارة صفحة ملفات تعريف الإرتباط.

قبول ملفات تعريف الإرتباط للطرف الثالث

 

[بسمة القلوب]

ختي علاش مكبرة الموضوع واحد خاطب مجاش صاي غضب الله و راكي خايفة ها ما يجيش مشي نهاية العالم و الراجل لي يكسرلك احلامك و طموحك غير فوتيه نتي مشي هو لانه يجي نهار لي تندمي على قرايتك و على النجاح لي اسمحتي فيه على جال راجل مثله الآلاف

 

[السلطانة]

وعليكم السلام ورحمة الله وبركاته

معناه الراجل من اللخر كي عدتي معولة تخدمي بطل.. مع الشروط الاخرى
يعني مهمها ي
يكون عاقل ومدين وناس ملاح
ويجي يديرلي شروط هك ويبطل مباشرة منحزنش عليه

بالعكس تهنيتي من الاحراج ممكن لو جاو ودارو الخطبة ومباعد يبطل تعود كبيرة شوي مالا ربي مشافش فيه خير
مازلتي صغيرة ...والزواج لازمو تخمام وانسجام بين الطرفين ماش قال مدين وسلفي ومن الداخل ربي يعلم...
ربي يرز الزوج الصالح المناسب

 

[aljentel]

الجواب باين من عنوانه
استخيري الله عنه ويرزقك الله خيرا منه
اللي هذا اوله ينعاف تاليه ..

 

[{مُدَلَّلَتُهُ}]

السلام عليكم

علاه شفتي الأمر من جانب أنو عقاب ليك .. بالاك ربي سبحانو بعدو عليك لأنك ما راحش تتهناي معاه .. بالاك عقلياتكم ما تتوالمش.. ب ! مازلتي صغيرة و جاية للدنيا يا حسرااااه عندك ما تشوفي مشي من أول تجربة طاحلك المورال لازم تكوني قوية .. يا جبل ما يهزك ريح
الزواج راه تجربة أكبر من أنو يشرط اللباس الشرعي ولا عدم العمل .. فيه توافق فكري و نضج عقلي و بزاااف صوالح
ربي يرزقك بزوج صالح يتقي الله فيك و يكون ليك خير السند

 

[أبو عاتكة]

السلام عليكم.
هذا من سوء الظن بالله بوصف ما جرى عقابا والله اعلم وأحكم وأعظم وارحم بنا من انفسنا.
فلا توسوس لك نفسك بما يرجوه الشيطان ويغضب منه المولى الرحمن.

انصح الجميع ان لا يصفو ما يقع لهم في حياتهم بالعقاب فيستعجله لهم ان كانو مستحقيه اويستثنيهم من رحمته وتوبته وعفوه جزاء ما يقع في قلوبهم من سوء الظن وسوء الادب مع الله.
كيف نظن بالله السوء ولا نظنه مع والدينا او من هم اقرب منا.

ان شاء الله ما حدث خير وتمهيد لما هو انفع وأنسب لكِ.
الله اعلم بالبواطن والسرائر.

 

[همس الوُرود]

السلام عليكم ورحمة الله و بركاته

أختي قال اسمحولي اسمحولو و ربي يسهل عليه فحياتو ويسهل عليك فحياتك متكبريش الموضوع ومتعطيهش اكثر من حجمو الطبيعي ..متعلقيش قلبك بشيء مازال مش ملكك ..
عادي جدا ديري في بالك راكي معرضة لأي رفض مادام ماتمش الزواج الرسمي حتى لو جاو وتم القبول يكونو هناك شروط ممكن انتي ترفضي او الطرف الثاني ممكن فأي وقت واحد يقول لا ممكن يتم القبول بينكم لكن المفاهمة ماتكونش لذلك ديما ديريها قاعدة فراسك وتوكلي على الله عز وجل
والجلباب مليح اختي منقولكش البسيه لأجل الزواج بالشخص لكن راني نخبر فيك فقط انو أفضل لباس للمرأة من حيث الستر وكل شي
.

المهم انتي ريحي بالك وراكي مزالكي صغيرة متشوفيهش عقاب من ربي سبحانو لا هذا قدر ومكتوب و الله لا يقدر لك الا الخير سبحانه وتعالى لذلك ارتاحي وثقي في الله فالخير فيما اختاره الله و متنسايش دائما صلاة استخارة عل وعسى يأتيك الله بسيد الرجال ربي يرزقك رزقا طيبا مباركا فيه وبالتوفيق
​

 

[Hakan]

ديري شوي فازلين ليدك لي تحرقت ، وتعلمي حاجة من الموقف هذا ما تزيديش ديري على هدرة النساء ، الراجل لي يحب يجي يدير رؤية شرعية ولا يخطب يعيط لباباك ولا خوك باش ما يكونش فيها موعد في باطل ربي ، ماجاش خطبك موش معناها ربي غاضب عليك هذيك وحدك تعرفيها اذا انت ديري في ذنوب تعرفي ربي غاضب عليك وراهو يعاقب فيك ، حنا عندنا جيل خرج تالمون بسبة هدرة النساء والقهاوي رجع يشوف الزواج حاجة كبيرة وهي مكاين والو تتزوجي وتشبعي زواج اذا كاتبلك ربي واذا مكاش مكاش ما عندهاش علاقة كبيرة بالذنوب ،المهم آخر الكلام روحي لركن الطبخ و حطيلنا الوصفات تاع القاطو لي حرقلك صباع راني سيريو وتعاملي مع الموقف عادي كانو شيء لم يكن واذا عجبنا القاطو ندعولك يجيك خاطب دين و زين ورضاية الوالدين واذا ما عجبناش نأجلولك الخطبة لعام كشما تزيدي وتتعلمي وصفات أيا سلام .

 

[زاد الرحيل]

عسى أن تكرهوا شيئا وهو خير لكم هذا كلام الله و هو صادق.، ربي شاغلك الخير في عدم إتمام الخطبة و المواصفات الموجودة فيه ليست كافية لاتمسك و الحسرة عليه لانو من المفروض يراعي مشاعرك و يحاول يفرض شروطه بطرق أخرى.
تعليمك و شهادتك سلاحك و راس مال لانو لا أحد يعرف واش يخبي المستقبل لكل واحد فينا، مكتوبك راح يجي و مع شخص افضل بإذن الله مع ثقتك فيه
و نهار بصري هذا خبرينا نباركولك

 

[ليليا مرام]

السلام عليكم الأخت
وصفتي نفسك بأحسن الأوصاف متدينة محجبة خلوقة متعلمة اللهم صلي وسلم وبارك على سيد الخق محمد وحماك من كل شر اكنك لم تتصفي بالإيمان بما كتبه الله لك يعني
انت الله يبارك حسب كلامك فيك كل ما يتمناه أي رجل وانيانة متربية وتعرف ربي وهل اللي تعرف ربي يدخلها وسواس انو راجل ما كتبلكش ربي معاه معناها ربي يعاقب فيك مريض عقاب من الله الطفل معاق ربي يعاقب فوالديه اذا قطة طاحت من فوق الحيط عقاب من الله خصنا الايمان نتعلموه واش معناه ما يكفيش نصلو ونصومو الأخت راجل جا شافك بلاك هو من نوع يبغى مرا كاملة والكمال لله بلاك انت ما تعرفيش مواصفات المرا اللي فراسو ممكن هو انسان ايمانو ناقص لقى فيك كلش مي خصت حاجة ما تخطرش على بالك علجالها ما رجعش وهو كلو مكتوب ربي مكتبلو مرا وانت مكتبلك راجل اخر علاه ذا تشاؤوم وعلاه كبرتيها وعلاه راح تفكيرك للعقاب وما خممتيش انه قضاء وقدر وربي بعرف قبلك وقبلي اطوي صفحة واستناي مكتوبك من جهة اخرى وخرجي فكرة عقاب من راسك واسيدي ولو عقاب ربي دارنا توبة نتوبو هذا لو انت تخمامك انو عدم قبولك من هذا راجل عقاب اسمحيلي عاودي تفكيرك وقوي ايمانك

 

[صاحبة الأثر]

يا حبيبة روحي قد أكون قاسية معك بعض الشيء لكن لا تلوميني فهذا من غيرتي على ديني ، أن يتقدم لخطبتك شخص ويأمرك بالجلباب أو المكوث في البيت ليس عيبا فتلك فطرته التي جبل عليها أولم تعلمي أن الله قال « وقرن في بيوتكن ولا تبرجن تبرج الجاهلية الأولى » وأنه أمر نساء النبي ونساء المؤمنين بالجلباب " وليضربن بخمرهن على جيوبهن " فغاليتي هذا أمر الله أولا فلا يصح أن نعترض عليه أما عن الشاب فما أخطأ والله لاأنه أرادك مصونة وصدقيني لم يكن ليفرط بك لأنه يخاف الله وما عليك أن تخافي ممن يخاف الله .
رسولنا صلى الله عليه وسلم قال : إذا جائكم من ترضون دينه وخلقه فزوجوه " ولو عرفت غيرة الصحابة على نسائهم كغيرة سعد الذي ما طلق إمرأة وتجرأ آخر أن يتزوجها بعده قط لحمدت الله
أسأل الله أن يرزقنا أزواجا أكفاء أتقياء من نكسب معهم الدين لا الدنيا