نشوف لفوق و لا لتحت ؟

["viola"]

سلام الله عليكم جميعا خاوتي
والله صدقا اشتقت للكتابة و النقاش في هذا القسم ..
بون والله حبيت نحكي على وحد السوجي بصح معرفتش وشمن جانب نحكي فيه لأنو صح حاجة تدمي القلب و من بين الحاجات لي صح تخليك تحس بتع العين بصيرة و اليد قصيرة
نظن الكثير منا يشوف برنامج قلبي اطمأن مع غيث هاذو مواسم و هو يبدا و دايما نشوفو حالات تنسيك فاللي قبلها . بصح كاين وحد الحالة خاوتي انا حرفيا تفرجتها نشهق بالبكا و التخمام لي جاني مورا ما شفت الحلقة هو لي خلاني نكتب الموضوع
الحلقة اللي راح فيها لمخيمات اللاجئين وين لقى الطفل اليتيم "عواد" يتيم الأب و الأم ،معاناتو و صدمتو لي تبان في عينيه في كوم و الحياة لي عايشها يعني ماديا في كوم
طفل في عمر 10 سنوات قالو اذا عندكم سرير فالدار قالو وشنو سرير ؟ مهم قدما نحكي والله مانقدر نوصل وش حسيت ووش رافد هذاك الطفل ..
اللي حابة نحكي عليه في هذا الموضوع عواد الطفل اليتيم هذا كاين منو ملاييين وفي بلادنا برك كل واحد فينا في كرطيه يكون واحد عالاقل عايش نفس الظروف و حنا معلابالناش يعني تلفتلي حنا ك شعب ولا حنا ك ناس عاديين كفاه نعاونو ولا نديرو عفسة لهاذي الفئة هاذي خممت فيها مورا الحلقة ديركت
و مورا ما شفت وش تهدر على هذا السوجي في وسائل التواصل الاجتماعي ثاني تلفتلي ضك يجي واحد يقولك شوف لي تحتك و ناس كيما هاذو باه تقنع .. مبعد يجيك وحداخر يقولك انو مالفشل انك تقارن روحك بناس أقل منك و بزاف.
كي تشوف ناس هاك مش معنتها متحلمش و متخدمش كل واحد ربي وش قسملو رزقو ووش كتبلو !
قولولي نتوما كفاه تشوفو الموضوع هذا ووش هي نظرتكم لأنو صراحة تلفتلي نقول نكرس حياتي لي بقات قاع لخدمة ناس هاك مبعد نعرف باللي منقدرش و عندي حياة نعيشها و كل واحد و همو هه
ربي يفرج على كل مؤمن و ربي يسخرنا باش نعاونو أي محتاج يارب
الفيولا ~

​

 

[إلياس]

لي رجعة الموضوع ان شاء الله

 

[Hakan]

سبحان الله خرجتلي وقت السحور هذي الحلقة ،وصراحة تعجبت من كمية الصدمة اللي جات للطفل والديه وخاوتو كامل يموتو ويقعد غير هو حي يرزق ، أشياء صراحة تخلي عقل اللبيب يتلف فمابالك طفل صغير ، الضعفاء والمساكين في كل حدب في كل شبر في الارض كاين أيتام ابتلاهم الله وابتلى بهم المسلمين ، يعني مسلم لاباس عليه في صحتوا ومالوا لازم عليه يشوف معاهم خاصة إذا يعرفهم و خاااصة الذي كانو اقرباء ليه ، أما فيما يخص تكريس حياتك نورمالمون يا أستاذة راكي تقراي سورة الكهف كل جمعة ، وتفوتي على قصة الغلامين لي عندهم كنز تحت الجدار ، ساعات نجي ندبر نقول سبحان الله يتيمين ربي سبحانه يسخرلهم رسول موسى عليه السلام و الاخر سيدنا الخضر لي كان معلم موسى رسول الله باش يبنيو ليهم الجدار حتان يكبرو وما يضيعلهمش حقهم ، تمشي وتسالي نفسك على واه هذا الشي كامل تلقاي الإجابة في ( وكان أبوهما صالحا )
يعني الايتام هذو رزقهم عند ربي سبحانه وبقدر ما يمنع الانسان من خير الدنيا بقدر ما يفتح عليه ربي في الاخرة ،اما مسألة ودورنا نحن كمسلمين هو أنو الواحد يسلك روحو يسقسي على الفقراء ويتحرى مليح ، ويحاول يعاونهم ،تقدري تعيشي حياتك و تعاوني الناس لانو هذي حاجة في طريقك المهم الانسان ما تديهش الدنيا و ينسى خاوتوا ،وربي يكون في عون الضعفاء والأيتام والمساكين .

 

[Hakan]

وباش نجاوبوا على تساؤلك في العنوان اللي اخترتيه ، لازم تشوفي الفوق باش ترفعي معاك لي تحتك ، مش معنى انك تشوفي الفوق تنساي لي تحت وتمشي بعقلية خراطي التنمية البشرية لي اهدافهم كلها دنيا في دنيا ، لالا المؤمن القوي خير واحب الى الله ،في العبادة و العمل و كلش ،ولكن أعظم الناس اعمالا أنفعهم للناس ، و حديث ( من كان في حاجة أخيه كان الله في حاجته ) تخيلي برك وانت تقراي في هذا الحديث ربي يعظمته و سلطانه يمشي في الشيء لي راكي محتاجاته ، الواحد برك كي يقولو راهو المير راح يفريهالك يطير من الفرحة ، وربي يحي القلوب تاعنا الى حب الخير والاحسان و حب الايتام والمساكين وربي يرفع عن كل مغبون يا رب .

 

["viola"]

لي رجعة الموضوع ان شاء الله

مرحبا بك

 

["viola"]

سبحان الله خرجتلي وقت السحور هذي الحلقة ،وصراحة تعجبت من كمية الصدمة اللي جات للطفل والديه وخاوتو كامل يموتو ويقعد غير هو حي يرزق ، أشياء صراحة تخلي عقل اللبيب يتلف فمابالك طفل صغير ، الضعفاء والمساكين في كل حدب في كل شبر في الارض كاين أيتام ابتلاهم الله وابتلى بهم المسلمين ، يعني مسلم لاباس عليه في صحتوا ومالوا لازم عليه يشوف معاهم خاصة إذا يعرفهم و خاااصة الذي كانو اقرباء ليه ، أما فيما يخص تكريس حياتك نورمالمون يا أستاذة راكي تقراي سورة الكهف كل جمعة ، وتفوتي على قصة الغلامين لي عندهم كنز تحت الجدار ، ساعات نجي ندبر نقول سبحان الله يتيمين ربي سبحانه يسخرلهم رسول موسى عليه السلام و الاخر سيدنا الخضر لي كان معلم موسى رسول الله باش يبنيو ليهم الجدار حتان يكبرو وما يضيعلهمش حقهم ، تمشي وتسالي نفسك على واه هذا الشي كامل تلقاي الإجابة في ( وكان أبوهما صالحا )
يعني الايتام هذو رزقهم عند ربي سبحانه وبقدر ما يمنع الانسان من خير الدنيا بقدر ما يفتح عليه ربي في الاخرة ،اما مسألة ودورنا نحن كمسلمين هو أنو الواحد يسلك روحو يسقسي على الفقراء ويتحرى مليح ، ويحاول يعاونهم ،تقدري تعيشي حياتك و تعاوني الناس لانو هذي حاجة في طريقك المهم الانسان ما تديهش الدنيا و ينسى خاوتوا ،وربي يكون في عون الضعفاء والأيتام والمساكين .

ايه انا قصدت انو كي نكرس حياتي تجيك حاجة مستحيلة انك تتكفل بقع العالم هذا عالاقل تكون منظمات او جمعيات مهم والله لقيت نخمم فيها سيريو بصح صعيبة
كيما قلت كل واحد يشوف لي في محيطو ممكن ينقص و ينفع الناس ربي يقدرنا وخلاص

 

["viola"]

وباش نجاوبوا على تساؤلك في العنوان اللي اخترتيه ، لازم تشوفي الفوق باش ترفعي معاك لي تحتك ، مش معنى انك تشوفي الفوق تنساي لي تحت وتمشي بعقلية خراطي التنمية البشرية لي اهدافهم كلها دنيا في دنيا ، لالا المؤمن القوي خير واحب الى الله ،في العبادة و العمل و كلش ،ولكن أعظم الناس اعمالا أنفعهم للناس ، و حديث ( من كان في حاجة أخيه كان الله في حاجته ) تخيلي برك وانت تقراي في هذا الحديث ربي يعظمته و سلطانه يمشي في الشيء لي راكي محتاجاته ، الواحد برك كي يقولو راهو المير راح يفريهالك يطير من الفرحة ، وربي يحي القلوب تاعنا الى حب الخير والاحسان و حب الايتام والمساكين وربي يرفع عن كل مغبون يا رب .

والله شفت تعليقات تخلع تحسو قالك بطريقة غير مباشرة هو عايش فالميزيرة انا ثان لازم نعيش معاه ! مفهمتش لا هوما معرفوش يعبرو على رايهم ولا لي طرح الفكرة معرفش يطرحها لي أنو ساعات صراحة واحد كي يجي يقولك شوف لي تحتك و اقنع يطلعلك السكر كيما نشوف لفوق , نطلع و نطلع المحتاج معايا علاه لالا ..
اللهم امين ربي يسخرنا والله راه شيء عظيم ربي يقدرنا ليه
بارك الله فيك حكيم

 

[أم أُنٌَيسة]

وعليكم السلام ورحمة الله وبركاته
توحشنا مواضيعك
لي عودة باذن الله

 

[aljentel]

انها الحياة الدنيا وياما حنشوف
والله عندما ارى مثل هذه الامور يتقطع قلبي عليهم .. الله يعين

 

[وۣۗهۣۗہۣۗم]

ايه ياختى دنياا
قساة على البعض وضحكت للاخرين وضحكت على اخرين
حكاية وحكايات
تشوف ناس صغار عقولهم كبيرة ايمانهم
كبير وتشوف ناس كبيرة عقولهم صغيرة
همهم فيلا همهم كل عام سيارة احسن ملى تباعت
تقوليلي ارزاق نقولك مكتوب ربي سبحانووو
ولله في خلقه شؤون بصح الواحد فينا يحنن قلبووو يطيح مع فيديوو كيف ذا يتفكر طفل صغير شافووو على رصيف يتفكر شيخ كبير معندوش تمرة يفطر عليها
الله المستعان وربي يكون فالعون​

 

["viola"]

وعليكم السلام ورحمة الله وبركاته
توحشنا مواضيعك
لي عودة باذن الله

ربي يحفظك حبيبتي
اهلا و سهلا

 

["viola"]

انها الحياة الدنيا وياما حنشوف
والله عندما ارى مثل هذه الامور يتقطع قلبي عليهم .. الله يعين

تع الصح ربي يكون في عون واحد

 

["viola"]

ايه ياختى دنياا
قساة على البعض وضحكت للاخرين وضحكت على اخرين
حكاية وحكايات
تشوف ناس صغار عقولهم كبيرة ايمانهم
كبير وتشوف ناس كبيرة عقولهم صغيرة
همهم فيلا همهم كل عام سيارة احسن ملى تباعت
تقوليلي ارزاق نقولك مكتوب ربي سبحانووو
ولله في خلقه شؤون بصح الواحد فينا يحنن قلبووو يطيح مع فيديوو كيف ذا يتفكر طفل صغير شافووو على رصيف يتفكر شيخ كبير معندوش تمرة يفطر عليها
الله المستعان وربي يكون فالعون​

صح والله الانسان ملازمش ينسى باللي كاين ناس تحت خط الفقر تتقاسم معاه المعيشة هاذي
اللهم امين

 

[سكون الفجر]

والله يا أختي شفت الحلقة وطبعاً الشخص اللي مر بهيك معاناة بيفهم كتير وبحس بكل كلمة عم يحكيها الولد هاد
الله يرحمنا برحمتو ويفتح عليهم ويرزقهم ويحسن حالهم يارب

وبخصوص سؤالك حبيبتي فيولا
اطلعي لفوق بس لا تنسي اللي تحت بنوب
الله يرزقك ويرزقنا ولا يترك فقير يارب

 

[جليلوس]

موضوع يستحق ختم التميز
يعطيك الصحة فيولا
لي عودة للمناقشة

احجز مكانا لي

 

[همس الوُرود]

السلام عليكم
رمضان غالبني اليوم .. بعد الفطور نرجعلك ان شاء الله ​

 

[الرومانسي الجاد]

فريمو حاجة توجع لقلب صح.. بصح كاين ربي معليش..
ناس كيما هك نتلاقاها كل يوم.. محقورة و واحد ما يتلفت لها.. ديما نسيي كيفاش نعاونهم سوا نوريلهم يخدمو وثائق بش يستفادو من اي حاجة من دولة.. منحة بطالة ولا تشغيل شباب او نديريجيهم لجمعيات او او او..
ديري في بالك ناس لي هكا "جاهلة" ل الاسف.. الله غالب سيي كيفاش تحلي طريق ليهم و لو بكلمة

 

[همس الوُرود]

السلام عليكم
هاني جيت ديرو الفرانات شدو بلايصكم
بون بون اختي الكريمة ايمان يعطيك الصحة على موضوعك الزين ..انا ماشفتش هادي الحصة ومانعرفها بصح أكيد كاين اشخاص كيما هكذا وبزاف.. نشفى آخر حالة شفتها من فترة كان واحد مجهول النسب رماتو امو البيولوجية فساشي تع لابوبال قدام وحد دار تع امراة ورباتو هاديك المرأة الله يرحمها و كبر في فقر مدقع .. فاللخر قامو بيه ناس الخير و شرولو دار باسمو و عاونوه الحمد لله
..
هادي الحالات بزاف يندى لها الجبين و توجع فالقلب .. بصح رانا نشوفو فيهم فالطريق الناس يلي بلا مأوى ويحشمو حتى يمدو يدهم للناس .. هنا اذا قدرتي تعاوني عاوني اختي مدابيك لأنو هذا هو التطور بحد ذاتو انك تحسي باخوك المسلم وتقدميلو وش تقدري عليه .. ولا ينقص مال من صدقة .. والصدقة مش فقط من تقديم المال ولا كيما قالولك يلي قبلي يالوكان كلمة طيبة تشجيع اي شئ نقدرو عليه نعملو بيه.. واكيد لازم نشوفو لحالات الناس يلي أقل مننا و نقنعو بواش عطانا ربي من صحة و اهل ومسكن و وو الحمد لله ونشكرو ربي على نعمه ومنقنطوش من رحمة ربي
واكيد مهما كانت حالتك لازم تشوف للنعم يلي رزقك بيها الخالق سبحانه ..
لكن هذا لا يعني انك متثابريش فحياتك أكيد لازم تتعلمي و تطوري من نفسك دايما القناعة والعمل والتعلم .. مع معرفة الحلال واتباعه ومعرفة الحرام واجتنابه أكيد مش رح نتقدمو دنيويا ونتوخرو دينيا اذا حاجة عارضت الدين منعملوهاش .. وهنا كاين بزاف مواضيع لازم تطرح فهادي المشكلة ايضا.. باسكو كاين ناس في بالها راهي تتطور بصح كي تقولها هادي حرام يديرو روحهم ماسمعوكش..
و نختم قولي بهاد المقولة.. إعمل لدنياك كأنك تعيش أبدا .. واعمل لآخرتك كأنك تموت غدا​

 

["viola"]

والله يا أختي شفت الحلقة وطبعاً الشخص اللي مر بهيك معاناة بيفهم كتير وبحس بكل كلمة عم يحكيها الولد هاد
الله يرحمنا برحمتو ويفتح عليهم ويرزقهم ويحسن حالهم يارب

وبخصوص سؤالك حبيبتي فيولا
اطلعي لفوق بس لا تنسي اللي تحت بنوب
الله يرزقك ويرزقنا ولا يترك فقير يارب

اللهم امين ربي يقدرنا اختي بارك الله فيك⁦⁩

 

["viola"]

موضوع يستحق ختم التميز
يعطيك الصحة فيولا
لي عودة للمناقشة

احجز مكانا لي

شكرا
اهلا وسهلا