المعريفة و كسر الخواطر!

[{مُدَلَّلَتُهُ}]

السلام عليكم ناس اللمة لعزاز ..

توحشت نخربش فاللمة و نشوف الردود و وجهات النظر المختلفة لي دايما تخلينا نتعلمو من بعضانا ..

موضوعنا اليوم على المعريفة يعني تستخدم ناس تعرفهم ولا نفوذك باش تقضي خاجة و طبعا تكون على حساب ناس أخرين ..

من قبل كنت مالناس لي نقول البلادراهي ماشية هاكا لي عندو عرف يقضيلو .. جامي لا خممت في الطرف الآخر يعني فالشخص لي تقضي انت صوالحك على حسابو ..

حتى للسنة الماضية نتفاجئ من اتصال صحبتي " ألو ما تروحيش عند أسماء؟ رشيدة توفات" ربي يرحمها و يوسع عليها ما عندناش بزاف كنا فرحانين بولادتها الثانية كي رحت نصيب أنو سبب الوفاة "أزمة قلبية" راحت تشوف في القائمة تع الناس المعنيين بالإدماج الخاصة بعقود ما قبل التشغيل ما لقاتش اسمها مع أنها خادمة مدة لاباس بيها يعني عندها أولوية و لقات صحاب المعريفة و الرشاوي.. ماتت مكسورة الخاطر و ذنبها على من؟ على هاذاك لي سمح لنفسو أنو ينحي إسم و يدير إسم آخر خاطر الدنيا راهي بالمعارف و الأقربون أولى !

هاذ ليام كيف كيف تتصل بيا حماتي صباح بكري حالتها حالة "ما خرجتش فالقائمة تع السكنات الإجتماعية" و كي تروح تشوف للقائمة تصيب ولد فلان و ولد فلان و لي صح محتاج ماكانش مبعد يروحو يكروهم ولا يبيعوهم و لي محتاج برا يتلاوح .. حتى هي قاتلي راني في كل صلاة ندعي على لي حرمني من حقي في كل سجدة نبكي و نوكل ربي ... تخيل شحال كاين ناس مظلومين يدعو على لي ظلمهم! تخيل شحال من واحد خاطرو مكسور و مرض بسبة ناس أنانيين عندهم المعريفة؟

و المواقف بزاااف بالاك كاين ناس منكم لي مضرارين من هاذ الموضوع و صراولهم مواقف كيما هاكا ولا كثر ... احكولنا و فرغو قلوبكم و قولولنا في رايكم باش نحبسو هاذ الظاهرة ولا نقصو منها شا لازم نديرو ؟

كونو بخير تهلاو في رواحكم و الناس لي عزاز عليكم

سلام ​

 

[أبو عاتكة]

السلام عليكم.
المعريفة كارثة وآفة والسبب الاول في انو الناس تقنط وتكره القراية و الخدمة تكره المشاركة في مسابقات التوظيف و مناصب العمل تكره تخدم ملفات سكن بالقنطار وتدفعها وعارف بلي مول الشكارة ومول الصحبة يفوت تكره تروح للسبيطار العمومي وامور كثيرة تكون عارف بلي الاولوية للمعارف والاحباب واصحاب الرشاوي.
المعريفة تعجبنا كي نصيبوها بصح لما منصيبوهاش نكرهو حياتنا لانو تمشي الامور الا بيها للاسف. ولكن شكون خلا هذا المنطق يسود ويصبح قاعدة ثابتة وحتى متوقعة في كل شيء حتى العمليات الجراحية اللي فيها موت وحياة تتدخل هذه القاعدة بقوة ليس من الجراح ولكن من الموظفين وحتى من ابسط عامل قادر يقدم مريض ويأجل مريض.
الحكاية طويلة راح نرجع للموضوع ان شاء الله وتبعوه.

 

[Hakan]

السلام عليكم :
المحسوبية و المعروفة بالمعريفة عندنا ،هلكت المجتمع لازم ننظرولها بميزان الشرع لانو كاين نوعين :
معريفة لي رغبها الشرع وحث عليها ولي هي أن يكون الأخ في حاجة أخيه مثلا انا نخدم في توزيع السكنات ونعرف انسان زوالي ولا أرملة بالأيتام نتاعها تستاهل نستخدم النفوذ نتاعي باش نقضيلها حاجتها .
اما معريفة ضركي ماهيش معريفة أصلا واغلب الناس لي يقضيو صوالحهم بالرشاوي اللي هي آفة اجتماعية .
عندي صديقي يخدم في لابوسط كي تلحق منحة البطالة و دفع رواتب الموظفين يسكر تلفونوا بسبب أنو جيرانو و اصدقاؤو يجيو ليه باش يخلصلهم وهو ما يحبش هاذ الشي دير لاشان مع خاوتك و ربي يسهل عليك .
وين نخدم و لله الفضل والمنة ساعات يعيطولي اقاربي باش ندخلهم يخدمو نعتذر ليهم ونقلهم راني موظف كيفي كيف اي خدام هنا .
والله شيء يدعوا للأسف ولي تغيضك أنو مبنية على حاجات ناس يستاهلوا وهذا الشيء لي جعل من الادارات الجزائرية عامة بؤرة فساد .
سبحان الله نحير في انسان بديبلوموا و يروح يمد رشوة باش يخدم ياخويا شهريتك راهي باطلة وفاسدتك خاف على نفسك وناس لي رايحين ياكلوا منها .
الله يلطف بينا و يجعلنا في حاجات اخواننا ولكن بما يرضي الله .
صحيتي أستاذة .

 

[وۣۗهۣۗہۣۗم]

اه ياربي كون نبداا نحكى دووك
والله صفحات وصفحات ميكفونى
الله غالب تروحى للسبيطار لازم تعرفي ناس تم باه تجوزى تم تم تروحى لابوسط لازم تعرفي تاع الڨيشي تروحى للمدارس لازم تعرفي كاش زوج ولا ثلاث اساتذة ههه حقيقة والله متقضيش صلاح بغير هاك منحكووش على البلدية والله متقوليلهم فلانة بنت فلان بنت علان لا تروحى وتولى واحد الشهر باه تقضي صلاحك تم
منحكوش على بكتافي ندى بلاصتى بكتافي ندى البوست اللى اغلى من البوست ديالى الله غالب والفنا المعريفة ووالفنا هذا يعفس على هذا باه يدى وش يحب
خلى وقت خلاف نرجع باذن الله
منورة خيتوو
​

 

[صاحبة الأثر]

{ ولا تحسبن الله غافلا عما يعمل الظالمون}
هذه هي حال الدنيا ماهي لنا ولم نكن يوما لها ، المعرفة ، النفوذ ، السلطة كل ذلك لن يهم إن كان صبرك هو المقابل " ألا فصبر جميل " من خبرتي القليلة تعلمت أن لا شيء للبسطاء حتى الإبتسامات تمنح لمن لهم قوة .. في كل المواقف لابد أن ترى تلك النظرة من أعلى لتحت في عيون الجميع ، أصبحت موضة العصر حتى بين الصغار .
ما يطمئن أن الله سيقتص لكل دمعة سقطت ظلما وجورا في ظلمات الدجى
" مهطعين مقنعي رؤوسهم " هكذا وصفهم الله و كذا سيكونون يوم لا ظل إلا ظله ، فمن سيفوز !

 

[وۣۗهۣۗہۣۗم]

راحلى الرد بلا منكمل
ولازمنا نتذكرووو شئ واحد انوو يد الله فوق كل يد وقدرته فاقت كل. العباد والرزق منه واليه
والحمد لله​

 

[{مُدَلَّلَتُهُ}]

السلام عليكم.
المعريفة كارثة وآفة والسبب الاول في انو الناس تقنط وتكره القراية و الخدمة تكره المشاركة في مسابقات التوظيف و مناصب العمل تكره تخدم ملفات سكن بالقنطار وتدفعها وعارف بلي مول الشكارة ومول الصحبة يفوت تكره تروح للسبيطار العمومي وامور كثيرة تكون عارف بلي الاولوية للمعارف والاحباب واصحاب الرشاوي.
المعريفة تعجبنا كي نصيبوها بصح لما منصيبوهاش نكرهو حياتنا لانو تمشي الامور الا بيها للاسف. ولكن شكون خلا هذا المنطق يسود ويصبح قاعدة ثابتة وحتى متوقعة في كل شيء حتى العمليات الجراحية اللي فيها موت وحياة تتدخل هذه القاعدة بقوة ليس من الجراح ولكن من الموظفين وحتى من ابسط عامل قادر يقدم مريض ويأجل مريض.
الحكاية طويلة راح نرجع للموضوع ان شاء الله وتبعوه.

و عليكم السلام و رحمة الله

بالفعل أخي الناس ولات تهرب من كلش عمومي على جال المعارف لي طغاو .. مرات تروح وحدة أثناء مخاضها للسبيطار يردوها و يخترعولها سبة كاين بزاف نسا لي ضاعو هاكاك .. كاين لي على عملية جراحية بسيطة تع مصران زيادة يولي في أمور أخرى ما صابش العرف ما دخلوهش للبلوك كحالة استعجالية .. و هي رايحة

ربي يجيب الخير .. صح ما نبغيش نمجد الغرب بصح هوما نشوف أنو قليل عندهم هاذ الشي مقارنة بينا حنا العرب عموما .

 

[{مُدَلَّلَتُهُ}]

السلام عليكم :
المحسوبية و المعروفة بالمعريفة عندنا ،هلكت المجتمع لازم ننظرولها بميزان الشرع لانو كاين نوعين :
معريفة لي رغبها الشرع وحث عليها ولي هي أن يكون الأخ في حاجة أخيه مثلا انا نخدم في توزيع السكنات ونعرف انسان زوالي ولا أرملة بالأيتام نتاعها تستاهل نستخدم النفوذ نتاعي باش نقضيلها حاجتها .
اما معريفة ضركي ماهيش معريفة أصلا واغلب الناس لي يقضيو صوالحهم بالرشاوي اللي هي آفة اجتماعية .
عندي صديقي يخدم في لابوسط كي تلحق منحة البطالة و دفع رواتب الموظفين يسكر تلفونوا بسبب أنو جيرانو و اصدقاؤو يجيو ليه باش يخلصلهم وهو ما يحبش هاذ الشي دير لاشان مع خاوتك و ربي يسهل عليك .
وين نخدم و لله الفضل والمنة ساعات يعيطولي اقاربي باش ندخلهم يخدمو نعتذر ليهم ونقلهم راني موظف كيفي كيف اي خدام هنا .
والله شيء يدعوا للأسف ولي تغيضك أنو مبنية على حاجات ناس يستاهلوا وهذا الشيء لي جعل من الادارات الجزائرية عامة بؤرة فساد .
سبحان الله نحير في انسان بديبلوموا و يروح يمد رشوة باش يخدم ياخويا شهريتك راهي باطلة وفاسدتك خاف على نفسك وناس لي رايحين ياكلوا منها .
الله يلطف بينا و يجعلنا في حاجات اخواننا ولكن بما يرضي الله .
صحيتي أستاذة .

و عليكم السلام اهلين بيك

جبدتلي على لابوست فكرتني السمانة لي فاتت احتاجيت دراهم urgent خرجت للابوست تخيل مالثمنية و انا في لاشان مين وصلت للسيد قالي ماكانش الدراهم قتلو بصح دراهمي و راني محتاجتهم عندي حالة مستعجلة ما داهاش فيا .. قدمت شوية للطفلة لي حذاه قتلها راه خاصني نجبد دراهم و راني محتاجتهم ماكانش كيفاش خرجتلي عادي .. معناتها السيد هاذاك لمن كان مخبيهم؟ ما نعرف .. و الحكايات طواااال من هاذ القبيل .

و صح أنو كاين ناس ما يخمموش بلي هاذ الخدمة لي جبتها بالرشوة راح ياكلو منها والديك و ولادك و تبني بيها دار .. تخيل بديتها بالحرام كيفاش ربي يباركلك فيها؟

الله يجيب الخير

صحيت على مرورك الزين ربي يعطيك ما تتمنى

 

[{مُدَلَّلَتُهُ}]

اه ياربي كون نبداا نحكى دووك
والله صفحات وصفحات ميكفونى
الله غالب تروحى للسبيطار لازم تعرفي ناس تم باه تجوزى تم تم تروحى لابوسط لازم تعرفي تاع الڨيشي تروحى للمدارس لازم تعرفي كاش زوج ولا ثلاث اساتذة ههه حقيقة والله متقضيش صلاح بغير هاك منحكووش على البلدية والله متقوليلهم فلانة بنت فلان بنت علان لا تروحى وتولى واحد الشهر باه تقضي صلاحك تم
منحكوش على بكتافي ندى بلاصتى بكتافي ندى البوست اللى اغلى من البوست ديالى الله غالب والفنا المعريفة ووالفنا هذا يعفس على هذا باه يدى وش يحب
خلى وقت خلاف نرجع باذن الله
منورة خيتوو
​

راه قلبك مدود ههه انا هاذ المواقف كاملين طحت فيهم كاين لي راني حاكيتهم الفوق ..

ارواحي ثان نحكيلك على البوست تاعي و مبعد كاش رد آخر نحكيلك على الأساتذة و البلدية هههه عندي الروايات

مالا هاذي يا ستي نهار فوت الكونكور تع الأساتذة لي فات برغبة من الوالدة تاعي انا كيما قالو الخاوة الفوق كنت قاطعة لياس .. المهم ربحت الكتابي و انتقلت للشفهي خرجت الأولى فالإحتياط .. كي ولاو يعيطو لأساتذة الإحتياط عيطو لكامل الناس لي مورايا و انا لا .. رحت بالزهر برك صبت الدنيا داو لي بوست المسقمين و انا قاسوني في منطقة نائية خاطر ماكان لا عرف لا والو و قالولي عادي لا تدفعي دراهم نقدموك عند الدار .. فوت هاذوك العامين كي كان الحال و مبعد تحولت و لي كانت مورايا حطوها في السيام لي قدام دارنا .. شا تهدري ..

مرحبا بيك في كل وقت تنوريني يا عسل

 

[{مُدَلَّلَتُهُ}]

{ ولا تحسبن الله غافلا عما يعمل الظالمون}
هذه هي حال الدنيا ماهي لنا ولم نكن يوما لها ، المعرفة ، النفوذ ، السلطة كل ذلك لن يهم إن كان صبرك هو المقابل " ألا فصبر جميل " من خبرتي القليلة تعلمت أن لا شيء للبسطاء حتى الإبتسامات تمنح لمن لهم قوة .. في كل المواقف لابد أن ترى تلك النظرة من أعلى لتحت في عيون الجميع ، أصبحت موضة العصر حتى بين الصغار .
ما يطمئن أن الله سيقتص لكل دمعة سقطت ظلما وجورا في ظلمات الدجى
" مهطعين مقنعي رؤوسهم " هكذا وصفهم الله و كذا سيكونون يوم لا ظل إلا ظله ، فمن سيفوز !

ما شاء الله ردك يثلج الصدر .. ربي يرزقنا الجنة بغير حساب ولا سابق عذاب .. الحمد الله أنها دنيا فانية .. لوكان راهم عارفين شا راه يستنى فيهم مع ربي ما يطغاوش هاكا ربي يهدينا و يفتح علينا أبواب رحمته

نورتيني يا غالية ربي يبارك فيك و في والديك

 

[{مُدَلَّلَتُهُ}]

راحلى الرد بلا منكمل
ولازمنا نتذكرووو شئ واحد انوو يد الله فوق كل يد وقدرته فاقت كل. العباد والرزق منه واليه
والحمد لله​

الحمد الله الرزق من عنده و مقسم .. لوكان كاملين يجو ضدك و ربي يكون كاتبلك هاذيك الحاجة ماكانش لي يديهالك .. ربي يرزقنا رزقا حلالا طيبا مباركا فيه

 

[rafid2]

هذا العقلية سكنت فينا
المشكلة مشكلة ضمير واخلاق خاصة هذاك الي تسمحله روحك باش يدي حق خاطيه
والله لو كل واحد وضح حد للطمع انتاعه لصارت الحالة بخير
ربي يجيب الخير

 

[صاحبة الأثر]

ما شاء الله ردك يثلج الصدر .. ربي يرزقنا الجنة بغير حساب ولا سابق عذاب .. الحمد الله أنها دنيا فانية .. لوكان راهم عارفين شا راه يستنى فيهم مع ربي ما يطغاوش هاكا ربي يهدينا و يفتح علينا أبواب رحمته

نورتيني يا غالية ربي يبارك فيك و في والديك

آمين غاليتي ولك بالمثل

 

[ناصر dz]

عندما تغيب المبادئ والقيم الأخلاقية، يصبح الممنوع مسموحا ً و المحظور مباحاً. وتصبح العلاقات الإنسانية تحكمها المصلحة وسيطرة القوي التي تساعد الكثيرين في مواجهة مواقفهم الحياتية، إلا أنها في المقابل تهدد سلامة المجتمع وتطوره.
والواسطة والمحسوبية تعرف على أنها شكل من أشكال الفساد الإداري فهي تفضيل الأقارب والأصدقاء الشخصيين بسبب قرابتهم وليس كفاءتهم. فعبارة "أنا من طرف فلان". كأنها الكلمات السرية لفتح المغارة المؤصدةـ فهذه العبارة تفتح لك الأبواب وتسهل لك الصعوبات.


وقد أصبح الشخص غير المناسب في المكان غير المناسب؛ إذ يسند العمل الوظيفي لشخص لا يستحقه ولا يتناسب مع إمكانياته وخبراته. فتظهر عندنا نتائج تأثيرها سلبي على المؤسسة منها: (إهمال في العمل، إخطاء متكررة، علاقات مكهربة بين الموظفين، ضعف الإنتاج).

 

[{مُدَلَّلَتُهُ}]

هذا العقلية سكنت فينا
المشكلة مشكلة ضمير واخلاق خاصة هذاك الي تسمحله روحك باش يدي حق خاطيه
والله لو كل واحد وضح حد للطمع انتاعه لصارت الحالة بخير
ربي يجيب الخير

بصح لازم نلقاولها حل على الأقل للأجيال الجاية حنا طفرت فينا ربي يجيب لي فيها خير للعباد و البلاد

 

[{مُدَلَّلَتُهُ}]

عندما تغيب المبادئ والقيم الأخلاقية، يصبح الممنوع مسموحا ً و المحظور مباحاً. وتصبح العلاقات الإنسانية تحكمها المصلحة وسيطرة القوي التي تساعد الكثيرين في مواجهة مواقفهم الحياتية، إلا أنها في المقابل تهدد سلامة المجتمع وتطوره.
والواسطة والمحسوبية تعرف على أنها شكل من أشكال الفساد الإداري فهي تفضيل الأقارب والأصدقاء الشخصيين بسبب قرابتهم وليس كفاءتهم. فعبارة "أنا من طرف فلان". كأنها الكلمات السرية لفتح المغارة المؤصدةـ فهذه العبارة تفتح لك الأبواب وتسهل لك الصعوبات.


وقد أصبح الشخص غير المناسب في المكان غير المناسب؛ إذ يسند العمل الوظيفي لشخص لا يستحقه ولا يتناسب مع إمكانياته وخبراته. فتظهر عندنا نتائج تأثيرها سلبي على المؤسسة منها: (إهمال في العمل، إخطاء متكررة، علاقات مكهربة بين الموظفين، ضعف الإنتاج).

صح بارك الله فيك تبدأ المعاملة بأنا من طرف فلان و تنتهي بأشخاص منعدمي الكفاءة في مناصب مرموقة و ذوي الكفاءة ينتظرون على هامش الطرقات الفرص

بارك الله فيك على المرور الطيب

 

[rafid2]

بصح لازم نلقاولها حل على الأقل للأجيال الجاية حنا طفرت فينا ربي يجيب لي فيها خير للعباد و البلاد

الحل موجود لما يعرف كل واحد أين ينتهي حقه وتبدا حقوق عيره

 

[{مُدَلَّلَتُهُ}]

الحل موجود لما يعرف كل واحد أين ينتهي حقه وتبدا حقوق عيره

ربي يهدينا و يرزق ما فيه الخير لهاذ البلاد و العباد

 

[أبو عاتكة]

العرف وبني عميس والرشوة طبعا ديما مرتبطة بهما خطرهما أكبر وواسع وغير محصور في امور حياتية فقط .
تخيلوا عدد هائل من مسؤولين واصحاب مناصب ومديرين وغيرهم كلهم تقلدوا مناصب بهذه الطريقة ولم يكونو كفئا لها او حتى ليس لهم علاقة بها كيفاش بلاد تمشي بيهم او تتطور وتتحسن معيشة الناس وتتسوى مشاغلهم وخدايمهم.
اصلا تجد احيانا او غالبا اللي يختار من يحق له السكن والاستشفاء والتوضيف ...الخ هو داخل بنفس الطريقة كيفاش الشوك ينبت ورد مستحيل.

 

[{مُدَلَّلَتُهُ}]

العرف وبني عميس والرشوة طبعا ديما مرتبطة بهما خطرهما أكبر وواسع وغير محصور في امور حياتية فقط . تخيلوا عدد هائل من مسؤولين واصحاب مناصب ومديرين وغيرهم كلهم تقلدوا مناصب بهذه الطريقة ولم يكونو كفئا لها او حتى ليس لهم علاقة بها كيفاش بلاد تمشي بيهم او تتطور وتتحسن معيشة الناس وتتسوى مشاغلهم وخدايمهم. اصلا تجد احيانا او غالبا اللي يختار من يحق له السكن والاستشفاء والتوضيف ...الخ هو داخل بنفس الطريقة كيفاش الشوك ينبت ورد مستحيل.

على بيها راحت البلاد في كيل الزيت و الله تغيضني بلادي معمرة خيرات طبيعية و باطنية و بشرية عندنا وحد الشباب ما شاء الله تشوف قدراتهم توحد ربي سبحانو و تصيبهم يطايشو في الكوانات كاين لي مسكين هبل و كاين لي انذل و كاين لي حرق و كاين لي تبع الطريق العوجة علاه ؟ خاطر ما صابوش فرصة ..

البلاصة لي تروحلها تصيبها امبراطورية بني فلان غي هوما في هوما و الناس لخرين يشوفو بعينيهم .. الله المستعان