مشكلتي لا اعرف كيفأتعامل مع زوجي

[مشكلتي]

السلام عليكم اخوتي و أخواتي بدأ مشواري في المنتدى و انا صغيرة كبرت هنا و الحمد لله عدت إليه الآن بعد سنوات لأطرح فيه مشكلتي لأني لم أجد من يدلني على الصحيح فداخلي مضطرب جدااااا.
انا متزوجة منذ 5 سنوات الحمد لله رزقني ربي بطفلين و عاملة و زوجي عامل هو ايضا كانت علاقتي معه جميلة جدا و كذلك مع اهله لحد الآن لازلت العروس العاقلة التي تجمع جميع اهله دون قلق او ضغط المفيد محبوبة عائلته و الحمد لله دائما يذكر هذا و يقولي "الحمد لله ك تزوجتك لانك مافي مثلك" لكن بعد مدة لاحظت انواع قلبه ماهو مثل ما يبان و ان الكثير من الطباع تعو فقط تمثيل و انوا داخلوا ماهوش مليح و الي وجعني فيه انو كسووول على الخير و يظهرلوا ك يدير خير واحد يقعد عام و هو يهدر بيه عكسي تمااااااما و لست امدح نفسي والله ماقدرتش نحكي و نعبر على كلش لانوا رغم ذلك راهوا اب اولادي و زوجة ماتفضح أسرار زوجها بما فيهم سلبياتوا و انا والله داخلي تضرر و عييت نرجع معاه كيما كنت و نلاحضوا قاعد يشوف و يحس بلي او غالط في بزاف أمور في حقي و بطبيعتو مايعترف بخطئوا او يطلب مني السماح فقط يحاول يتقرب و يتناسى وش صرا ( و انا ك يغلط هو معايا و يبدا يسبني وووو نسكت فقط ) و جامي غضبت فقط نسكت و نكمل خدمتو و خدمة اولادي و بالصدفة يعرض اهلو في تلك الأيام بعد و نقومهم و كأنوا حاجة ماصرات و امر الأيام لكني انا عييت ننسى و قلبي مزال هاز كل كلمة قالهالي قاستني و عييت نعاود نحبوا كيما كنت و بداتني افكار سلبية بلي منطولش نعيش معاه لانوا مهوش حاب يتعدل او يحسن من سلبياتوا فقط يزيد و يزيد و انا ساكتة و احسن العشرة و هو او قاعد يحاول يرجع أمور و كأنوا ماصرا والو لكن ميعطيكش فرصة انك تهدري و انا خفت نهار نهدر راح نقيييسوا بكلامي لانوا هو كلش عندو و متقوليلوش بلي ندمت الي راني معاك و حبي تلاشى ووووو مافهمتش وش لازم ندير و عييت نعبر و نحكي بزاااف اوجاع تلمت تلمت و ملقيتش حل دائما نبهوا لاخطائوا و هو ولا علبالوا دلووووني ارجوكم
سامحيني افكاري مشتتة تعبيري متفكك ملقيتش الكلمات والله

 

[ام أمينة]

شكرا لطرحك مشكلتك
لي عودة باذن الله

 

[أحلامي]

السلام عليكم ورحمة الله وبركاته
سأحاول الإجابة بالمختصر المفيد بما أن الطرح بالعامية سأحدثك بها...
اولا الله يفرج همك ويصلح بيناتكم لأنو بيناتكم ولاد ومانتمنالهمش يكونو ضحايا مشاكلكم..
تكلمتي عن اهل الزوج، نأكدلك اختي الكريمة انو اهلو حبوك ولا كرهوك لا لوم عليهم في مشاكلكم في الحالتين لذلك حطيهم جانبا، الصح فيه هو كي يكون واقف معاك ومساندك ومحترمك و للأسف حسب قولك هذا المشكل الأساسي انو قلل احترامك وجرحك ونتي مقدرتيش تنساي و لكن الحاجة لمليحة راه يحاول يرجع الامور كيما كانت...لهذا السبب (انو يحاول يصلح) غباء منك انك ترجعي للماضي وتتمسكي بيه طبعا الصراع مع النفس صعيب والكبرياء واعر وراكي مجروحة عارفة بصح لازم تبدلي عقليتك باه تحافظي على اسرتك (انك تبدليها باه تنقذي عايلتك ولا تتنازليلو وتقلبي الصفحة ماهوش ضعف ولا تكلاح)
لو ماكانش يحاول يصلح الامور مكنتش نقلك هكذا
اقعدي مع روحك وسقسي روحك ، هل هذا الزوج جامي دار معايا موقف مليح؟ جامي عاملني بلطف؟ شحال من حاجة مليحة فيه مقابل لحوايج لي مش ملاح؟!
الغلطة لي غلط معاك كلنا نغلطو ماكانش لي مافيهش ديفو حتى انا ونتي فينا
نتي وصحبتك تتعاركي ونتي واختك ونتي وخوك وحتى انتي وامك يوقع بينكم خلاف صح ولا لا؟ هاذو حوايج يعاونوك باه تسامحي وتتجاوزي و ديري في بالك الرجال الاغلبية الساحقة فيهم لما يهدرو في لحظة الغضب مايديروش حساب لبعيد هم مخلوقين هكذا تلقايه ميحسش انو جرحك في هذيك اللحظة وحتى ممكن يحس روحو مظلوم والحطة انك مش حاسة بضغوطات يومياتو
كامل ممكن نغلطو في حق بعضانا هذا شي عادي لي ماتتقبليهش هو انك كي ماتلقايهش في مواقف (في مرض مثلا... في حزن... اللامسؤولية...الاهمال ) هذا صخ شي يزعف
واخيرا نقلك نصيحة من ذهب... ممكن نقدرو نسمعولك ونخففو عليك بالكلمة الطيبة او حتى ننصحوك (وكاين لي ينصحك نصيحة عاقل واخر ينصحك نصيحة شخص متهور) لكن المشاكل الزوجية واحد مايقدر يحلهم غيركم انتم زوج حاولو تتحاورو في وقت مايكونوش ولادكم معاكم فرغي قلبك واش ضرك كامل قوليه وهو ثاني نفس الشي بلاك ثاني ضراتو حاجة منك و اتفقو تصلحو من نفسكم يالوكان على جال ولادكم ونشالله تصفى لقلوب يارب
//كوني بخير

 

[ام أمينة]

السلام عليكم اخوتي و أخواتي بدأ مشواري في المنتدى و انا صغيرة كبرت هنا و الحمد لله عدت إليه الآن بعد سنوات لأطرح فيه مشكلتي لأني لم أجد من يدلني على الصحيح فداخلي مضطرب جدااااا.

و عليكم السلام
شكرا لثقتك بالمنتدى و أعضاءه و أتمنى أن تجدي حلا بإذن اللّه لمشكلتك​

انا متزوجة منذ 5 سنوات الحمد لله رزقني ربي بطفلين و عاملة و زوجي عامل هو ايضا

ماشاء اللّه ربي يحفظلك أولادك و يسعدك ​

كانت علاقتي معه جميلة جدا و كذلك مع اهله لحد الآن لازلت العروس العاقلة التي تجمع جميع اهله دون قلق او ضغط المفيد محبوبة عائلته و الحمد لله دائما يذكر هذا و يقولي "الحمد لله ك تزوجتك لانك مافي مثلك"

لحد الآن الحمد للّه
هذا من تربيتك السليمة و الصحيحة
انا لا أفهم لماذا تحدث مناوشات و مشاكل بين العجوز و الكنة و كأنهما في حرب
و شيئ جيد أن زوجك يعترف لك و يبوح لك أنه أحسن إختيار شريكته و هذا من المعروف أنه يزيد من الحب و المودة بينكما​

لكن بعد مدة لاحظت انواع قلبه ماهو مثل ما يبان و ان الكثير من الطباع تعو فقط تمثيل و انوا داخلوا ماهوش مليح

لماذا كل هذا ؟
أتظنين أنه يمثل من أجل كسبك ؟ أم ماذا ؟
و تذكري المواقف المفرحة و الجميلة معه و أيضا تذكري موقفه عند مرضك أو في أضعف حالاتك ....​

و الي وجعني فيه انو كسووول على الخير و يظهرلوا ك يدير خير واحد يقعد عام و هو يهدر بيه عكسي تمااااااما

و أظن في هذه الحالة
الزوجة هي التي تدفع بزوجها إلى ذلك
إلى فعل الخير إلى زيارة الأقارب إلى مساعدة شخص ما .....
كما يقولون أن وراء كل شخص عظيم إمرأة ​

و لست امدح نفسي والله ماقدرتش نحكي و نعبر على كلش لانوا رغم ذلك راهوا اب اولادي و زوجة ماتفضح أسرار زوجها بما فيهم سلبياتوا و انا والله داخلي تضرر و عييت نرجع معاه كيما كنت و نلاحضوا قاعد يشوف و يحس بلي او غالط في بزاف أمور في حقي و بطبيعتو مايعترف بخطئوا او يطلب مني السماح

هذا هو حال معظم الأزواج
يرتكب أخطاء في حق زوجته و لا يبالي
و لا يعتذر و هذا لأن لا يوجد بينهم لغة حوار و لا لغة نقاش لان بالحوار و النقاش تكون علاقتهما جيدة و بعيدة نوعا ما على الضغط و القلق ..... و يوجد من يجد أن الإعتذار شيئ عيب أو أنه يقلل من قيمته أمام زوجته للأسف....​

فقط يحاول يتقرب و يتناسى وش صرا ( و انا ك يغلط هو معايا و يبدا يسبني وووو نسكت فقط ) و جامي غضبت فقط نسكت و نكمل خدمتو و خدمة اولادي

لأنه لا يرى أخطاءه و أنت عند خطئك و لو خطأ بسيط يراك مذنبة و كل الأمور السلبية منبعها أنت ...
أختي خدمتك لأولادك و زوجك و طاعته مؤجورة باذن الله عند رب العالمين
فقط اصبري و احتسبي ....​

و بالصدفة يعرض اهلو في تلك الأيام بعد و نقومهم

اختي اهل زوجك هم اهلك ايضا فهذه العزومات تقوي العلاقة بينك و بينهم ​

و كأنوا حاجة ماصرات و امر الأيام لكني انا عييت ننسى و قلبي مزال هاز كل كلمة قالهالي قاستني و عييت نعاود نحبوا كيما كنت و بداتني افكار سلبية بلي منطولش نعيش معاه لانوا مهوش حاب يتعدل او يحسن من سلبياتوا فقط يزيد و يزيد و انا ساكتة و احسن العشرة و هو او قاعد يحاول يرجع أمور و كأنوا ماصرا والو لكن ميعطيكش فرصة انك تهدري و انا خفت نهار نهدر راح نقيييسوا بكلامي لانوا هو كلش عندو و متقوليلوش بلي ندمت الي راني معاك و حبي تلاشى ووووو مافهمتش وش لازم ندير و عييت نعبر و نحكي بزاااف اوجاع تلمت تلمت و ملقيتش حل دائما نبهوا لاخطائوا و هو ولا علبالوا دلووووني ارجوكم
سامحيني افكاري مشتتة تعبيري متفكك ملقيتش الكلمات والله

للأسف هذا كله من قلة الحوار و قلة النقاش
لأنه لو كل مشكلة تقع بينكما تناقشاها و الكل يعطي رأيه فيما أسعده و فيما أزعجه
لقلت المشاكل و الحساسية بينكما
صحيح أن بعض التصرفات و بعض الكلام يجرح و يزعج
و لاكن هي الحياة الزوجية فيها صبر و تضحيات من كلا الطرفين لاستمرار هذه العلاقة

أسئل الله لكي ان تجدي حلا لهذه المشكلة و أن تسود السعادة و المودة علاقتكما
و إن تعسر عليك الأمر استعيني بأفراد من عائلته أو عائلتك
و الله المستعان ​

 

[إلياس]

ربي يسر ليك امورك و ترجع الثقة بينك و بين زوجتك إن شاء الله فيها خير

 

[فادي محمد]

الزواج أمر صعب جدا خاصة في وقتنا هذا لكن اصعب شيء اختي هو الطلاق وحرمان الاولاد من الأبوة .....
انصحك باستعمال الرقية الشرعية علها تنفع وتنقذ زواجكم ....
اختي العيش بدون زوج أمر صعب جدا ولا تحسين به الآن ففكري جيدا وحاولي تحمله وعالميه وكأنك زوجة جديدة من الناحية العاطفية والرومانسية وسترين النتيجة

 

[العَنْقَاءُ]

انا نشوف أنو مزالت علاقتك معه جيدة .

تفاءلي خير ...

علاه النرجسية أختي هكذا .
الكلّ يخطأ !

 

[la lune rose]

بغض النظر على واش تحسي انت ام والامومة تفرض عليك تنازلات ادا قدرتي تتجاهلي وتتصرفي بلا مبالاة كل رجل عندو جانب مظلم يليق تغمضي عينيك عليه مدامك عاقلة ورزينة تقدرتي تتعاملي بمرونة مع الوضع

 

[الامين محمد]

اختي الخطأ كان من البداية لأنه كان لازم من البداية لما يكون خطا او خلل
يعالج و لا يترك لسنوات حتى يصبح عادة او امر عادي
لأن زوجك اصبح يرى طريقته معاك امر واقع و تعود على سكوتك
بل ربما يظن انه على حق

الحل هو التدرج في الحل لأنه مازال الوقت و يمكن حل الخطأ هذا و تصليحه
و تغيير طريقة تعامله معاك
اول الحل هو كي يغلط معاك بلفظ غير لايق تعملي ردة فعل ما
كإظهار ان كلمته جرحتك او اسلوبه ازعجك و يكون رد فعل بسيط
ككلمة مناسبة و معبرة مثلا لما يغلط معاك تقولي كلامك هذا راه يقيسني
و عيب هاذ الكلام و بعده تختاري وقت مناسب و تكملي فكرتك
و تتكلمي كلام مثلا كلامك في حقي و اني زوجتك و ام اولادك
بها الشكل غير لايق و انك تستحقي قدر و قيمة
مع الوقت تعلمي تعملي ردود فعل و اظهار عدم الرضا على اسلوبه
و لو بكلمة عيب هاذ الكلام و عيب هاذ الاسلوب
أنا متأكد راح يرجع يفكر فيك و في قيمتك و في تحسين اسلوبه معاك

ربي يصلح حالكم و حال زوجك الكريم

 

[طموحة]

السلام عليكم و رحمة الله و بركاته
ماشاء الله حفظ الله لك أطفالك و اقر أعينك بصلاح اسرتك و استقرارها على الخير
كما اقالت أخت قبلي أنساي جانب أهل زوج علاقتك معهم خليها كما هي هي سياق وعلاقتك مع زوجك سياق إساءة الزوج ليست مبرر للتغير ..و إن كان فهمتك يعني هو لم يقدر مجهوداتك في التودد لهم و هذا كله في سياق التودد إليه ..
أولا زوجك هو راهو يطلب الإعتار لكن بطريقته الرجل غالبا لا يعتذر بطريقة المرأة و يعترف بالذنب و يفضفض على المشكل العكس يغلقه و يحاول يرجع كل شيء كما كان قبل المشكل بالنسبة ليه هكذا ارضاك هذا من ناحية تفهميه وهذا طبعا التفهم يكون مع المشكل العادي و الإساءة التي تكون في إطار الإحترام
أما إن كان الإساءة سب و تجاوز شديد هنا الخطأ من الجانبين ربمن جانب زوجك كونه ربما سريع الغضب و من جانبك أنت التي لم ترسمي حدود لهذا الشيء من الأول و هذا خطأ جسييييييم الحدود لا تعني إعادة السب و لا التنكيد و لا الغضب في بيت الأهل لكن تجاوز الإشكال عندك كان ظاهري ولما راكمتيه خمس اسنوات أكيد الآن تفكري تاخذي موقف و هذا الموقف شدته راح ديريها بكول هاته المدة و من شدة التراكم
بخلاف لو كنت في كل مرة من المرات تتخذي موقف صحي عند كل مرة يتجاوز فيها كل الخطوط الشتم أو الإهانة أو أو
و في الحياة مكانش حاجة فات عليها الوقت الآن حاولي كما قالت الأخت تجددي نيتك اتجاه زوجك هكذا تنحي هاته التراكمات اتجاهه باش ميبقاش غضب في قلبك قادر على أن يجعل ردات فعلك غير محسوبة أكثري من الدعاء و تذكري إيجابياته فقط
وحاولي تخلقي مواقف إيجابية و ذكريلت جديدة راح تزيد من رصيده عندك
بعدها في كل مرة يتجاوز حده انطفئي من جهته يعني مراحش تنايفيه كلية و تقلبي وجهك إلى وجه غاضب جدا لكن قيس قيس دوري على أحوالك و أحواله بقدر الواجب فقط لا ضحك و لا انبساط و لا تودد ومحال ترجعي كما كنت ولو طال المدة لي يراجع فيها نفسه
تبانلك الامر عادي لكن لو تكون الفترة التي سبقت الإشكال جو المنزلي متزن مستحيل يصبر الإنسان على الجفاء
و الدعاء الدعاء وأياض شوفي التغير لي راح تعملي عليه ليس تام من شخص سريع الغضب و انفعالي إلى شخص هادئ تماما و يحسب الكلام بدرجة دقيقة و إنما تخفيف الإنفعال تدريجيا او يتعلم يتصرف هو مع غضبه بأن يصمت و يخرج و لا يعود حتى يهدأ وهكذا​

 

[سحائب الشوق]

أختي شوفي ننصحك كإمرأة و أم في نفس الوقت..
الشيء لي راكي تعاني منو أغلب البيوت فيها هذوا المشاكل.. بصح أنت كيف تسيري الأمور و تروضيها.. زوجك من الأول كان لازم أنك تعوديه ولا تفهميه باي السب ممنوع و العياط ممنوع ليكم في زوج مشكل هاهو يتحل بطريقة ما.
و لا ع الاعتذار نشوفها الرجل الجزائري في الغالب ماعندوش تاع يقولك سامحني غلطت.. لكن كاين تصرفات منه تبينلك صح أنه نادم على وش دار (بالنسبة ليا هذا كافي اكيد بالخصوص لما مايعاودش نفس الخطأ).
أنت 5سنين زواج كيما نقولو مازال غير وين بديتي الحياة الزوجية تاع الصح مع كبر المسؤولية مع الأولاد.. يعني لازمكم بالهداوة تعاودو تتفاهمو على حياتكم و تحطو القواعد الجديدة لي تمشيو بيها.
كلنا ساعات توصل بينا لحظات الضعف في بعض المشاكل نفكروا حتى في شيء كبير لكن لكل منا ساعات مشاكله.. لازمنا نعذروا بعض و نفوتوا الأمور هذي.. ساعات حتى مش من أجلنا نحن بل لأجل أولادنا.
راكي صغيرة أختي حاولي رجعي التجديد لحياتك الزوجية و ان شاء الله تتحسن الامور بينكم.

 

[أبو عاتكة]

كقاعدة عامة لا يجب ان يكون أو يتحول الإنسان مكبا لمخلفات الآخرين سواء كان ذلك اصلا فيه بحسن نوايا او تطبعا مجبرا أومرهبا.

الشيطان عدو المومن والمومن طيب وخلوق لن يجعله هذا العدو سعيدا او مرتاحا خاصة مع من يحب فاحذروه واحذروا طرقه وحيله وشباكه ولو كانت كلمة عابرة دون قصد يهدم بها أسرة.
شخصية الزوجة المتفهمة والمسالمة تجعلها تحس بدقائق المساوئ والسلبيات ولا تتحملها في الخفاء فتتضرر داخليا لكن بعض السلبيات وجب وضع حد لها جذريا حتى لا نتفاقم وتصبح شجرة يصعب قطعها.
الإنسان ينمي الإيجابيات ويستذكرها ويشجعها ويركز عليها ويعيش بها ولا يجعل المساوئ هما كبيرا وطويل الأمد فيموت قهرا وهو حي يرزق.

 

[فاتن سيلين]

وعليكم السلام ورحمة الله وبركاته
فرج الله همك اختي .
كل المشكل سببه عدم الحوار والنقاش وكبت كل الالم الذي تحسيه بسبب تصرفات زوجك وعدم إخراجها .مشكلك يحتاج للمواجهة فلا تظني أن تحملك للألم النفسي سيجعلك في عينيه زوجة صالحة وخارقة للعادة سيتمادى فقط وانت الخاسرة تخسري صحتك النفسية والعضوية انا لا اخببك على زوجك لكن هكذا نظرتي للحياة الزوجية عليك باخراح ما في قلبك هذا من حقك .كل ما كتبه لنا اخبري به زوجك ببساطة أخبريه أنه يسبب لك كذا وكذا واجهيه وتناقشوا فاي مشكل ليس بين الزوجين فقط بل بين الإخوة بين الوالدين بين الأصدقاء يحتاج للمواجهة وكلما كتم أي طرف ألمه واسره في نفسه بسبب الطرف الآخر سيخسر هو فقط ويمرض بقلبه.اصرخي إن لزم الأمر اخرجي كل ما في قلبك .اذا زوجك تقبل الحوار وسمع لك وخرجتم بنتيجة فالحمد لله وإذا زوجك ليس من أهل الحوار ولن يسمع لك ولن يهتم بوجعك ففي كل الحالات اصرخي واخرجي الكبت الذي بقلبك واجهي اي الم منه أخبريه ولو حتى تجاهلك المهم اخرجي المك لأن الكتم سيسبب لك مستقبلا أمراض عضوية السكري القلب الضغط عافانا الله وإياكم.لا اقصد بالصراخ العراك بل أقصد أن تخرجي كل مكبوتات الوجع
وربي يصلح احوالكم عليك بالدعاء في قيام الليل

 

[خديجة ph]

السلام عليكم
سامحيني على التأخير ان شاء الله تقراي ردي
الله يبارك نصائح الاخوة من ذهب بدون ما نكرر واش قالوا لكن حبيت نظيف
هذي مشكلة الانسان العاقل الناس كامل تعتقد بما انه رجع يبتسم و سامح فهذا معناه انه نسى هذا خطأ الظالم اكيد ينسى مادام سامحتيه اما المظلوم فيخزن مشاعره في كاسة الصبر نهار تتعمر راح تفيضي و هذاك اليوم ههههه يا ويله
انا حقيقة لا ارى عندك مشاكل لكن هذي حال 99.99 بالمئة من النساء الجزائريات خلقنا من الصبر الامور ستزيد تعقيدا و انت من سيصبر
اما فيضانك الوشيك فسيحدث مرة على مرة ههههه و سيتعلم زوجك من نظرتك فقط بلي راه خرب الدنيا و سيتوقف واذا ما لاحظش جاه ما جاه
ننصحك نهار تقرري تنفجري
اولا مش قدام اهله
ثانيا مش قدام الاولاد
ثالثا ما تسمعيش داركم لانهم راح يكرهوه
خامسا اذا حاشمتيه ففي بيت الزوجية
سادسا انت تعرفي كفاش تخليه يعتذر البسي مليح ولا تقتربي منه انت تعرفي زوجك راح يجيك يجيك
ههههه بالوقت لازم مثل ما تعلمتي تحبيه تتعلمي تكرهيه شوية باه تتصالحو ما احلاها المحبة بعد عداوة ههههه
الزوج مش ملاك يغلط و بنت الناس الفحلة تصبر و تربي النقص تاعو بالشوي
اهم حاجة اعرف انه صعب لكن عندما تنفجري خلي فمك نظيف الكلمات الواعرين اللي تمس النيف الجزائري تاع الراجل صفيهم و ارميهم اذكري انت واش صرالك قارني نفسك مع اخته المتزوجة مراة سلفك مثلا و فقط ولا تجيبي سيرة اهله ابدا معركة خاسرة محال يقولك هما ناس مش ملاح
ربي يسعدكم دنيا وآخرة
سلام

 

[aljentel]

ماني شايف بموضوعك خلاف جوهري الامور سهالات هونيها وتهون …

 

[ليليا مرام]

السلام عليكم
شوفي الاخت ولو مانيش متزوجة باه نفيدك لكن نحاول ننصحك اول شي طبع لي فزوجك ماراهش طبع فريد من نوعو يعني توسوسي لنفسك انو زوجك برك لي داير هاكا لالا. وهذي عشرة بيناتكم تخليك مش تفهميه من نظرة وانكا حافظاتو. اذن المشكل نتاعك انك تحبي تناقشي مشكل وتهدري وتعبري علي وجعك وهو يفوت وينسى ويكمل وانت هذا شي دارلك ضغط اوكي حد هنا فاهماتك مي الحل مش انو تبردي علاقتكم وتحطمي زواجك واش ذنب اولادك. يعني هذا زوج ما قال خاينك ما قال مقصر معاك ما قال هاملك كإمرأة فيها سلبيات بدلي روتين تجي من خدمة جيبي وتنقي وتقومي بدورك كربة بيت وتدابزو انت تهزي فقلبك وهو يفوت الالا بدلي روتين ديري نهار خلي اولاد عند عجوزتك او امك دي زوجك سافرو ويكاند غيرو جو واحكيلو كلش علاه تناقشي بزعاف والحل البديل كاين ديريها مبادرة وانت اعرضيه عادي جدا زوجك حلالك رجعي ايامكم الاولى بادري انتي. وهذي يدير خير ويهدر عليه خليه بينه وبين ربي مهم انت لالا خليه هو ظن رأيي حاولي تسلكي زواجك مش تخمي تنهيه وربي يهديكم