جبتلكم مرايا👁️👁️👁️

[ليليا مرام]

السلام عليكم ورحمة الله وبركاته

أيها اللماويون أيتها اللماويات مرحبا بيكم عندي ومرحبا بيا عندكم ..لا ظاعي للتصفيق شكرا

كما تعرفو انا رجعت وما رجعتش بيديا فارغين قلت يا ليليا يليق تجيبي هدايا لأحبابك فاللمة خممت خممت قلت سايي نجيبلهم

مرايا.....

​

نعم جبتلكم لكل واحد مرايا ...تبعوني شا راح نديرو
انا نمدلك مرايا وشوف فيها واهدر مع روحك وانت طفل أو وانتي طفلة
وانت طفل أو طفلة راح يطرح عليك سؤال
ليليا الطفلة مثبا تسقسي ليليا المرأة

ليليا واش راهي الحياة عند الكبار ....
اهدري معايا ..يعني اهدر مع روحك وانت طفل وخبرو علي صار ويصير واش عجبك فالدنيا اليوم واش لي تبدل فالناس راح نمدلكم مثال عني وكملو انتم

ليليا الطفلة مع ليليا المرأة
لما نشوف فالمرآة نقولها ليليا علاه كنتي تستناي تكبري ؟ علاه كنتي فرحانة وتلبسي قش يماك وتماكيي وتستناي تولي مرا . علاه كنتي تحبي جوارينك وكل يوم انت فدار تاخلي عند هذي وترقدي فحجر هذي ..علاه كنتي تجري فرمضان باه انت تتباداي الاكل مع جوارين ...علاه كنت تستناي جارة لما تجي من سبيجار رافدة بيبي وتفرحي بيه بزاف ...علاه كنت تحكمي فجارك عمرو 18 و 20 بلاما تخافي منو ..علاه كبرتيني ونسيتيني
انعمم راكي تسقسي واش راني نهدر
؟

كبرت وندمت يا ليليا يا ريتك تجي بلاصتي وانا نجي بلاصتك

كل عضو وعضوة يكلم الطفل بداخله وهو يشوف فالمرآة لي جبتهالكم يا ترى. واش راح تهدرو مع بعضكم

متعة الحديث مع بعضكم اتمناها ان تشريكونا اياها

دمتم اوفياء لهذا الصرح

​

 

[♡كارينا♡]

اخ ...واش نقول واش نخلي ....
لي عودة ان شاء الله ..موضوع جميل جدا ...يمس القلب

 

[سـارة]

- مرايتي يا مراتي مين اجمل فتاة في الكون؟
سارة
أه يا سارة يا عمري كبرتي وتغيرت الدنيا
لا الحياة حياة ولا لمة أخواني واخواتي بدون وجود أمي حياة
الحمد لله على كل حال
ولكن ما زلت يا سارة تلك الطفلة المدللة لأخواتك واخوانك مازلت تلك الباكية لأتفه الأسباب
مازلت تلك العنيدة صعبة الارضاء
كبرت جسدا ولكن روحك هي نفسها الروح الصغيرة المحبة للمرح والحياة
***

موضوع جميل جدا

 

[الامين محمد]

حجز مكان لي عودة اختي الغالية ليلوش

 

[إلياس]

لي عودة إن شاء الله اختي ليليا

 

[ابيبا]

سوال واحد للطفلة علاه ما جربتيش الحياة حتى تدي كل انواع المضادات ضد اكبر عدد من أنواع الناس ... علاه اكتفيتي باللقاحات الطبية في صغرك اللي تقيكي من الامراض كي تكبري... علاه خليتي روحك منزوية ومنعزلة ولما تفرضت عليك مخالطة الناس ما قدرتيش تستوعبي ان الناس مش كما انت ...يا ليتك وانت طفلة خضتي معارك الحياة
الحمد لله على كل حال

 

[ليليا مرام]

اخ ...واش نقول واش نخلي ....
لي عودة ان شاء الله ..موضوع جميل جدا ...يمس القلب

السلام عليكم اهلا وسهلا نورتي موضوعي
والله احكي لي فقلبك انا جبتلك المرايا وانت اهدري مع نفسك الطفلة نستنى ردك

 

[ليليا مرام]

- مرايتي يا مراتي مين اجمل فتاة في الكون؟
سارة
أه يا سارة يا عمري كبرتي وتغيرت الدنيا
لا الحياة حياة ولا لمة أخواني واخواتي بدون وجود أمي حياة
الحمد لله على كل حال
ولكن ما زلت يا سارة تلك الطفلة المدللة لأخواتك واخوانك مازلت تلك الباكية لأتفه الأسباب
مازلت تلك العنيدة صعبة الارضاء
كبرت جسدا ولكن روحك هي نفسها الروح الصغيرة المحبة للمرح والحياة
***

موضوع جميل جدا

السلام عليكم اختي سارة مدللة عائلة ومدللة المنتدى حتى احنا ندللوك ونقلشوك
ربي يرحم امك والحمد لله رباتكم عاللمة مع بعض والحنانة بيناتكم ربي يدومها ويجعل امك من سكان الجنة
الاخوة نعمة حافظي عليها
نورتي المكان شكرا لك

 

[ليليا مرام]

حجز مكان لي عودة اختي الغالية ليلوش

السلام عليكم
هايا هايا ظا نبغيش عربون خلص كاش انت كتبت رد كملو علاه تحجز مكان سينيما هذي يا الله حط ردك تشوف

 

[ليليا مرام]

لي عودة إن شاء الله اختي ليليا

السلام عليكماشتاذ لياس ولي عودة علبالك شحال من عودة راني نسالهالك هههه ياو أرواح حط ردك ههه

 

[إلياس]

السلام عليكماشتاذ لياس ولي عودة علبالك شحال من عودة راني نسالهالك هههه ياو أرواح حط ردك ههه

رجعت نقولك شيء واحد مواضعيك في القمة و الروعة سلمت و دمت مبدعة في فضاء المنتدى

 

[أحلامي]

يامخلوقة انا كل يوم راني هكذا وكرهت من هاذ الحالة هههههه نزيد نجي هنا تقوليلي كلمي الطفلة لي في داخلك ههههه اصلا دخلت للمنتدى باه منبقاش نهدر مع روحي!

 

[ليليا مرام]

رجعت نقولك شيء واحد مواضعيك في القمة و الروعة سلمت و دمت مبدعة في فضاء المنتدى

السلام عليكم استاذ وانا لي رجعت ولقيت كلافي خلطلي كامل الرد والجميل انك فهمتو
شهادتك أعتز بها والله شكرا لك

 

[ليليا مرام]

يامخلوقة انا كل يوم راني هكذا وكرهت من هاذ الحالة هههههه نزيد نجي هنا تقوليلي كلمي الطفلة لي في داخلك ههههه اصلا دخلت للمنتدى باه منبقاش نهدر مع روحي!

السلام عليكم
ومن اجبرك حبيبتي دخلتي للمنتدى تلهاي وتثقفي وتتعرفي على افكار ناس منها لي تعجبك وتستفادي منها ومنها لي ما تعجبكش ما تهدريش مع روحك انت والفتي كاين لي يلقى راحته كاين لي صح دنيا داتو وين وجهو ما يشوفوش فالمرايا انت ادخلي موضوع اذا لقيتي راحتك حطي رايك ما عجبكش يكفي مديتنا من وقتك وقريتيه ورغم هذا ملتيش طالڤاتك قوليلي واش موالفة تهدري مع روحك
مرحبا بيك فأي وقت