ضيفة العدد السادس لمعان الأحداق

[لمعانُ الأحداق]

السلام عليكم
عدت بأسئلتي :

و عليكم السلام و رحمة الله
أهلا بعودتك أختي " أم أمينة "
سرّني رجوعـــــك​

من هو سندك في الحياة ؟

الــــــــوالدين حفظهما الله و أرضاهما​

من هو قدوتك في الحياة ؟

في الحقيقة ، ديما نحب نطور من نفسي و نكون أفضل من " أنا " تاع الماضي
[ بغض النظر عن سيرة خير خلق الله صلى الله عليه و سلم و الصحابيات فبهم نهتدي و نقتدي
عائشة و خديجة نحسهم أفضل من تقتدي بهم الفتاة في حياتها
من ناحية العلم ، الدين ، التعامل و كل شيء
كيف لا و هن أمهات المؤمنين و زوجات رسول الله صلى الله عليه و سلم
يعني كي قتلك أفضل من نفسي تاع الماضي يعني نطور روحي من هذا الجانب ]
لكن باه الواحد يولي نسخة مايقدرش​

هل أنت راضية على مشوارك الدراسي ؟

نعم و الحمد لله ، على الأقل درت فيه وش نقدر / منا السعي و من الله السعة و التوفيق​

طبقك المفضل في شهر رمضان ؟​

غـــــراتـــــــان ​

عادات في منطقتكم خاصة بالشهر الفضيل ؟​

كاين عادة غريبة مي بدات بالاندثار نحكيلكم عليها
الطفل كي يصوم لأول مرة يدوه يفطر فوق السطح
و يدورو كامل بيه
و مام كاين لي يمدولو دراهم
تشجيعا ليه كي قدر يصبر و يصوم أول يوم
و يكون افطار خاص و مميز هذاك اليوم
بصح مازال مافهمتش علاش فوق السطح بالضبط
حتى هي مابقاتش بزاف يديروها

و كاين ليلة 27 تتلم العائلة و يديرو إفطار جماعي في لمة

أما قبل رمضان كاين الوزيعة
مش عارفة إذا تعرفيها مي يديروها أكثر شيء في القرى و المداشر
يجمعو بيناتهم يشرو عجل و لا مجموعة كباش
يتم التضحية بيهم و يوزعو اللحم على الفقراء و المحتاجين
مي حتى هذي مابقاتش يديروها بزاف كيما بكري
و نقصت
لكن مازال الخير و مازال ناس تساعد بعضها و تصدق
خاصة للمساجد ، تتصدق بالماء و التمر باه يفطرو المصلين في صلاة المغرب
​

تفضلين الاكل الحلو أو المالح ؟​

بين زوج​

رأيك في المنتدى ؟ و في أعضاءه ؟​

اللمة وش تقولي فيها قليل
ربي يبارك
الأعضاء ماشاء الله عندهم مستوى ثقافي و علمي
و على قدر من الأخلاق
يخلوك ترفع المستوى بلا ماتحب
الأمر لي يخلي المنتدى يسوده الاحترام
و جو من المودة و الأخوة بين الأعضاء
لي نسميهم أفراد مش أعضاء
- أفراد العائلة -
صح الوضع الآن شوي ناقص
و النشاط مش كيما كان لكن الروابط مازالها قوية
و مازال كالبنيان و الجسد الواحد
ربي يحفظ اللمة و اللماويين​

أكتفي بهذا القدر
في امان الله​

شكرا أم أمينة
على تواجدك و ترك بصمتك في الخيمة

تحية طيبة ​

 

[♡كارينا♡]

جيت جمعت شوية اسئلة منا وملهيه وجبتهم خخخخ
ما هي ذكرياتك المفضلة من الطفولة؟
ما هي أهم درس تعلمته من والديك؟
ما هي أشياءك المفضلة في العائلة؟
ما هي تجربتك الأكثر تأثيرًا في الحياة؟
ما هي أهدافك الرئيسية في الحياة؟
ما هي أفلامك المفضلة ؟
ما هي رياضتك المفضلة ؟
ما هي أهم قرار اتخذته في الحياة؟
ما هي تحدياتك الرئيسية في الحياة؟
ما هي أشياءك المفضلة في الحياة؟
ما هي أهدافك القصيرة والطويلة الأجل؟
ما هي خططك للمستقبل؟
ما هي شخصيتك المفضلة في التاريخ؟
ما هي شخصيتك المفضلة في الأدب؟
ما هي شخصيتك المفضلة في السينما؟
ما هي شخصيتك المفضلة في الرياضة؟
ما هي تقاليدك المفضلة؟
ما هي عاداتك المفضلة؟
. ما هي لغاتك المفضلة؟
ما هي أطباقك المفضلة؟
لي عودة بإذن الله موووفقة .

 

[لمعانُ الأحداق]

جيت جمعت شوية اسئلة منا وملهيه وجبتهم خخخخ

أهلا بك من جديد
لالا صافا ، جمعتي خيرات ربي
شكرا لتواجدك من جديد غاليتي​

ما هي ذكرياتك المفضلة من الطفولة؟

هي كاين بزاف ذكريات
نقولك على المرحة منها

لعبة لامــاري ( مش عارفة كيفاه تسموها عندكم ) لكن كانت المفضلة عندي
بلا مانحكي الفرحة كي تكمليها انتي الأولى للأخير ( رقم 8 ) و بعدها تولي تلعبي عكسهم



و كي تروح - التريسيتي - خاصة في ليالي الشتاء
نبداو نديرو الأشكال هذوك بضوء الشمعة و كل مرة نخترع حاجة و نقولهم شوفو كذا خخ
يامات شابين الحق، بقاو ذكريات برك



و ثاني كي كنت نبني داري في دارنا
و لي يقرب و لا يفسدلي نزعف عليه ، دايرة عالمي الخاص غير بالماطلات و الغطا و المخايد



كاين ثاني لعبة مالقيتش صورة ليها
لي هي الـGــطِّيوَة
مانعرفش اسمها في مناطق أخرى
لكن بزاف ممتعة
زوج يتبادلو الكرة و جماعة في الوسط ، لي يقيسوه يخرج خخ​

ما هي أهم درس تعلمته من والديك؟

SOMETIMES YOU HAVE TO BE YOUR OWN HERO​

ما هي أشياءك المفضلة في العائلة؟

مافهمتش السؤال ​

ما هي تجربتك الأكثر تأثيرًا في الحياة؟

التربص في المستشفى
علمني بزاف أمور و شفت عالم آخر مختلف تماما
الصبر ، الحب ، الوفاء ، القوة ، الإيمان ، العزيمة ..​

ما هي أهدافك الرئيسية في الحياة؟

نكون فخر لوالِديَّ​

ما هي أفلامك المفضلة ؟

سلسلة هاري بــوتر​

ما هي رياضتك المفضلة ؟

مانيش رياضية لكن نحب نشوف كرة السلة​

ما هي أهم قرار اتخذته في الحياة؟

نقرا الطب​

ما هي تحدياتك الرئيسية في الحياة؟

أنو نصنع أفضل نسخة من نفسي و لي نكون فخورة بها
و نحس أني وصلت وين لازم نكون​

ما هي أشياءك المفضلة في الحياة؟

مافهمتش كيفاه اشياء مفضلة​

ما هي أهدافك القصيرة والطويلة الأجل؟

القصيرة / نكمل دراستي على خير
الطويلة / نكون في المكان الذي يليق بي​

ما هي خططك للمستقبل؟
ما هي شخصيتك المفضلة في التاريخ؟

الإدريسي | عالم جغرافيا​

ما هي شخصيتك المفضلة في الأدب؟

رضوى عاشور / مريد البرغوثي
ابنهما : تميم ​

ما هي شخصيتك المفضلة في السينما؟
ما هي شخصيتك المفضلة في الرياضة؟

أولاش ~ ماكاش ~​

ما هي تقاليدك المفضلة؟

نروح للباس
و نقولك الجبة القبائلية أكثر لباس تقليدي يعجبني
بكل أشكالها العصري و التقليدي الصحيح​

ما هي عاداتك المفضلة؟

النـــــــــــــوم​

. ما هي لغاتك المفضلة؟

الانجليزية​

ما هي أطباقك المفضلة؟

البركوكس​

لي عودة بإذن الله موووفقة .

شكرا
بانتظار عودتك​

 

[السلطانة]

صباح النور بما أنك قبائلية

حبيت تقوليلنا على حكاية المهر

يقولو القبايل يمدو بناتهم وميشرطوش غير مصحف ومبلغ صغير كاين منها ولاهدرة برك؟

 

[الامين محمد]

صباح النور بما أنك قبائلية

حبيت تقوليلنا على حكاية المهر

يقولو القبايل يمدو بناتهم وميشرطوش غير مصحف ومبلغ صغير كاين منها ولاهدرة برك؟

سؤال خطير دوك يشوفوه الاخوة اللي يفكروا في المثنى و غدوة يبكروا لبلاد القبايل
ديري حسابك اختي السلطانة ها ق تسقسي و خلاص هههههههه

 

[dahman kz]

صباح النور بما أنك قبائلية

حبيت تقوليلنا على حكاية المهر

يقولو القبايل يمدو بناتهم وميشرطوش غير مصحف ومبلغ صغير كاين منها ولاهدرة برك؟

ها السلطانة وخيتي تحوسي عل البلا وله كيفاش ههه

 

[dahman kz]

والله حبيت نسأل والاخوة طرحو اغلب الاسئلة تقريبا

هل اللقبائلية تختلف وتتفرق من منطقة لاخرى ام انها نفسها في مصطلحاتها وطريقة نطقها ومعانيها

ولاية جزائرية تعجبك من ناحية عادات وتقاليد اهلها

وش من لهجة جزاىرية تعجبك اكثر من غيرها

حلم او امنية ما تتمنبن تحقيقها في المستقبل

هل كانت لك زيارات خارج الجزائر وماهي الدول للي قمتي بزيارتها

 

[Tama Aliche]

السلام عليكم ورحمة الله
مرحبا بالضيفة الغالية والتي أخيرا تذكرت أنها كانت تحمل إسم "إكرام براءة" وتذكرتها فلله الحمد
أختي الغالية مثلك أحب تواجدك هنا في المنتدى و تعرفي عليك من أفضل الأمور التي حدثت معي في رمضان .. طيبتك وكلامك الرائع و هدوءك و آراءك اللطيفة كلها أشكرك عليها
لم أكن أعلم أنك تدرسين مجال الطب الحمد لله تعرفت عليك من خلال هذه الضيافة فأسأل الله لك التوفيق و النجاح والذهاب بعيدا حيث تريدين وفيما يرضي الله تعالى و أرى أنك لها وتستحقينها فقط لا تنسي ضميرك عندما تصبحين دكتورة إن شاء الله و كوني استثناءا يحمد له ..

أحبك غاليتي و نظن كثروا عليك الأسئلة و أعتذر عن التأخر لأنني وحيدة في المنزل كلش طاح عليا هههه مع القرءان و الصدمات اللي جاتني ضربة وحدة أصبحت مقصرة في كلشي مش غير فالمنتدى صدقيني ..
فأكتفي بسؤال واحد ألا وهو :
إلى أي مدى تحبين الوصول في حياتك قبل أن نرحل من هذه الدنيا.. غير الدراسة والعمل يعني ما هو الشيء الذي في قلبك و أعماقك تتمنين الحصول عليه ؟ ​

 

[لمعانُ الأحداق]

صباح النور بما أنك قبائلية

حبيت تقوليلنا على حكاية المهر

يقولو القبايل يمدو بناتهم وميشرطوش غير مصحف ومبلغ صغير كاين منها ولاهدرة برك؟

صباح الخير

السؤال لي يسقسوه وين نروح
حكاية المهر اذا كاين منها

هي حساب العائلات اختي السلطانة
يعني في نفس المنطقة و تختلف من عائلة لأخرى

كاين لي الأب يقول للخاطب على مبلغ من المال - 20 مليون - مثلا
بعدها لما يجيبهم و يجي يوم - دفوع الشرط - يحط الأب - ولي البنت - قدامو المبلغ و يهز منو ورقة واحدة
- 100 ألف - و لا - 200 الف - ، المهم مبلغ رمزي فقط
و يرجع باقي المبلغ للرجل يقولو هذا هو المهر
خلي الباقي عندك دير بيهم حاجة خلاف [ نظرات الدهشة على وجه الرجل و عائلتو ]

( كاين لي يشرط حتى 40 مليون ممبعد يدي غير 20 الف منها
يُقال انها كامتحان للخاطب اذا قادر و لا لالا و اذا يكمل فيها و لا يبطل )
[ حاسة روحي نسرب في الأسرار ^^ ]

كاين حالة اخرى لي مايشرطوش " دراهم " و إنما ذهب فقط
يقولو لي قادر عليه جيبو مي " ذهب " مانشدش عليك دراهم
و احيانا الخاطب يُصر و يقولو حددلي و انا نجيب هيا يقولو مايقارب 20-30 مليون ذهب مثلا
( طقم من الذهب ) و يكون هذاك هو المهر
[ المهم الاب مايحبش يحدد في أغلب الحالات و يقولو قدما قدرت هذيك هي ]
يعني واضح الرجل مش رح يقلل من شان الطفلة و لا يحب يديها - باطل -

في حين كاين لي يكون مبلغ من المال ( من 10 حتى 20 مليون )
و طقم ذهب و أمور أخرى ( كيما الكبش مثلا )
مي عادة الكبش حتى هي بدات تروح و رجعو يمدو حقو دراهم ( كي تكون مسافة بعيدة خاصة )

و نحكي على حاجة اخرى منتشرة
يقولك القبايل يمدو بناتهم للعرب مي مايجيبوش من عندهم خخ
ماكاش منها هذي ، نديرو تبادل عادي ^^

هذي هي
انت و زهرك أخي المواطن وشمن العائلة جيت فيها و عاداتهم ^^

إن شاء الله نكون جاوبت
و فضحت أسرار الدولة

​

 

[لمعانُ الأحداق]

والله حبيت نسأل والاخوة طرحو اغلب الاسئلة تقريبا

اهلا بك من جديد​

هل اللقبائلية تختلف وتتفرق من منطقة لاخرى ام انها نفسها في مصطلحاتها وطريقة نطقها ومعانيها

حنا منطقة القبائل الكبرى ( تيزي وزو ، البويرة ، بجاية ) نفس اللهجة ماكاش اختلاف ، ممكن كلمات من و من لكن مانديروش عليهم ، أما مثلا سطيف و شوي من البرج نعم مختلفة علينا قليلا مي ماشي لدرجة ماتفهمش عليهم كامل
و إنما في النطق و بعض المفردات تاع تسمية الأشياء برك، فرق طفيف
​

ولاية جزائرية تعجبك من ناحية عادات وتقاليد اهلها

ولايتي​

وش من لهجة جزاىرية تعجبك اكثر من غيرها

لهجة سكان الشرق خاصة تبسة و ضواحيها ( قالمة ، عنابة .. )​

حلم او امنية ما تتمنبن تحقيقها في المستقبل

تكون عندي القدرة أني ناخذ أمي و أبي للعمرة أو الحج ^^​

هل كانت لك زيارات خارج الجزائر وماهي الدول للي قمتي بزيارتها​

لا ماخرجتش
وطني وطني

مي ممكن نروح يوما ما​

 

[لمعانُ الأحداق]

السلام عليكم ورحمة الله
مرحبا بالضيفة الغالية والتي أخيرا تذكرت أنها كانت تحمل إسم "إكرام براءة" وتذكرتها فلله الحمد ​

و عليكم السلام و رحمة الله
اهلا بفاطمة اللطيفة
سعيدة أنك تذكرتني
تشفاي قتلك اسم - الصحافية الساخرة - مش غريب عليا
الحمد لله ​

أختي الغالية مثلك أحب تواجدك هنا في المنتدى و تعرفي عليك من أفضل الأمور التي حدثت معي في رمضان .. طيبتك وكلامك الرائع و هدوءك و آراءك اللطيفة كلها أشكرك عليها ​

الله يعزك غاليتي
حتى انتِ ماشاء الله عليك
ربي يحفظك و يثبتك​

لم أكن أعلم أنك تدرسين مجال الطب الحمد لله تعرفت عليك من خلال هذه الضيافة فأسأل الله لك التوفيق و النجاح والذهاب بعيدا حيث تريدين وفيما يرضي الله تعالى و أرى أنك لها وتستحقينها فقط لا تنسي ضميرك عندما تصبحين دكتورة إن شاء الله و كوني استثناءا يحمد له .. ​

آمين
وفقنا الله و إياكم لكل خير فيه رضاه​

أحبك غاليتي و نظن كثروا عليك الأسئلة و أعتذر عن التأخر لأنني وحيدة في المنزل كلش طاح عليا هههه مع القرءان و الصدمات اللي جاتني ضربة وحدة أصبحت مقصرة في كلشي مش غير فالمنتدى صدقيني ..​

افهمك فاطمة
و هذا هو رمضان و انشغالاتو
بالكاد نلقاو وقت نشدو فيه الهاتف
و مع المسابقة تاعك أُقدِّر ذلك
ربي يوفقك و ماتتقلقيش منها بزاف
الخير فيما اختاره الله
و كيما في كل مرة نقولك
انت فائزة في كل الاحوال
قارئ القرآن مايستناش أجر و تقدير دنيوي
ثبتك الله ​

فأكتفي بسؤال واحد ألا وهو :
إلى أي مدى تحبين الوصول في حياتك قبل أن نرحل من هذه الدنيا.. غير الدراسة والعمل يعني ما هو الشيء الذي في قلبك و أعماقك تتمنين الحصول عليه ؟ ​

ماخممتش في حاجات خارج مجال الدراسة ، لأنو انحصرت فيه الآن
ممكن حابة نسافر نشوف العالم خارج الوطن ، مي زعما حاجة نتمناها بشدة ماكاينش ، الحمد لله
غير أني نفرَّح والداي ، هذيك عندي الدنيا و ما فيها


شكرا لك و لتواجدك فاطمة
سررت بمرورك

تمنياتي لك بكل خير​

 

[dahman kz]

الاخت اكرام بامكانك القاء كلمة اخيرة قبل اغلاق الموضوع و حتى تاخذ الضيفة الموالية حقها من المشاركات
@الامين محمد خوك راهو والع و داخل فيها لعب بالكادنا ليامات هاذي كاشما كاين ڨول هههه

 

[الامين محمد]

الاخت اكرام بامكانك القاء كلمة اخيرة قبل اغلاق الموضوع و حتى تاخذ الضيفة الموالية حقها من المشاركات
@الامين محمد خوك راهو والع و داخل فيها لعب بالكادنا ليامات هاذي كاشما كاين ڨول هههه

ههههههه
فعلا ننتظر الكلمة الاخيرة المهم سي دحمان ما تسقسييش الضيفة على فارس احلامها
كيف تتمناه هههههه
كيما سقسيت سمية ههههههه

 

[dahman kz]

ههههههه
فعلا ننتظر الكلمة الاخيرة المهم سي دحمان ما تسقسييش الضيفة على فارس احلامها
كيف تتمناه هههههه
كيما سقسيت سمية ههههههه

ههههههه
ايه و الله غير خممت فيها بالصح حشمت منها اكرام غالبتني بالقدر ههه

 

[لمعانُ الأحداق]

ختـــــــامًا

ممتنةٌ لكوني لمَّاوية
شُكرا لكل من مرَّ بالخَيمة
- و لمن وصل إلى هنا -

سُعدت بالاستضافة و استمتعتُ بالاجابة على تساؤلاتكم

طابت صُحبتكم ، و زادكم الله من فضله

دمتم بِود​