رسالة جديدة من : sharp طبعا اسم مستعار هو اللي اختارو طبعا اسم مستعار هو اللي اختارو
صلي على حبيبنا و سيدنا محمد - صلى الله عليه وسلم -
أولا يا ولدي مدام راك ادير هكدا تقتل في الوقت باه تنسى يعني راك تتهرب من وقاعك
يا ولدي ما تستناش ناس تجي من العدم او من المجهول و تحلك مشكلتك
كون واقعي و واجه مشاكلك و حاول تحلها
اذا كان في ضرر و لا بد حاول تحلها بأقل الأضرار
نجيوا ضرك للمشكلة :
يا ولدي انا نعرف الوليدات اللي يكون ملتزمين و نعرف واش يخليهم ايديروا هكدا
بلاك سوء تفاهم و هو أخذها فكرة عليك
انا نقلك لو انك حكيت معاه في هذاك الوقت و اقنعتو انو مخطئ في وجهة نظرو بلاك ما كانتش تلحق لهذا الحد
كاين يا ولدي واحد المثل يقول : " العجل الا طاح يكثروا الذباحة "
اما نقلك حاول تنوض بالعقل و الحكمة
اذا حبيت تأثر عليه و تخلي الرأي العام يحكم عليه بلي ظالمك
حاول تواجه امام الناس بكل هدوء و دون نرفة
و ذا خممت تقوم بالعمل هذا دير في حسابك انك راح تسمح في كبرياءك و عزة نفسك الى اقصى درجة
المهم انك ما تقلقش
لأنك لو تقلق راح ما تعرفش تهدر و تقنع الناس و بلاك تقول كلام يتحسب عليك فيما بعد
و اذا قدرت تقنع الناس اللي يكونوا معاكم حتى و لو يقتنع هو في هذاك الوقت
لكن من بعد راح الناس هاذوك يلوموه هو و ماشي انت و يزيد يريح مع روحو و يطلع حساباتو راح يبدى ينسى و يحاول يندمج معاك
لكن انا نقلك بلي الأمر هذا ما يجيش بين ليلة و ضحاها يجي يسلم عليك و يقلك صايي
المهم انت تعامل معاه عادي : عادي يعني دون زيادة او نقصان : ما تجبد روحك عليه و ما تضال تمدح فيه و تشكر فيه
اتعامل معاه بشكل طبيعي غير ملفت للإنتباه لأنو لو لاحظ الناس توددك ليه يعني انك كنت أنت الغالط و راك تمسح في غلطة نتاعك بالتودد هذاك
اقول و أكرر تعامل عادي كيما كان التعامل بيناتكم قبل المشكل اذا تراجع على كلامو بها و نعمة
و ذا ما تراجعش : يعني لازم تفهم انو مغزاه من اثارة المشكلة هو تشويه صورتك : و هنا نقلك كمل تعامل معاه عادي بدون اي حساسيات و كيما يقولوا : " اللسان الحلو يرضع اللبة "
قصة وقت برك راح يتراجع و لابد المهم انك ما تكرهش برك و تحاول تعايبو
فالدوام يا ولدي يثقب الرخام
و في الأخير نطلب ربي : ربي يصلحك امورك و يثبتك على الطريق المستقيم
ان شاء تكون اخذت ولو فكرة في كيفية التعامل مع الشخص هذا
ربي يكون معاك ولدي
