اميرة الساحل
:: عضو مُتميز ::
- إنضم
- 4 جويلية 2010
- المشاركات
- 687
- نقاط التفاعل
- 164
- النقاط
- 19
السلام على الجميع ان شاء الله الكل بخير
اليوم جبتلكم نوع من الحلوى و هي حلوى خبز تونس تشبه البسبوسة و البسيمة و هي اقتصادية و لذيذة جدا لكن كل كيفية عندها ميزة خاصة بيها فخبز تونس يتعمل بالخبز يابس مرحي و لوز او كاوكاو مرحي و البسبوسة تتعمل بالسميد و البسيمة تتعمل بالفرينة و جوز الهند .....نتركم مع المقادير المرفوقة بالصور و ان شاء الله تنال اعجاب الجميع
المقادير :
- كاس كاوكاو مرحي و محمص
- 1/2 كاس خبز مرحي + 2 م ك اكل
- 1/2 كاس سكر عادي
- كاس بيض = 4 حبات بيض
- كيس سكر فاني
- 1 خمارة كيميائية
- مبشور حبة ليمون كبيرة و تكون صفراء
للشاربات :
- كاس سكر
- 3 كيسان ماء
- مغرف ماكلة عصير القارص
- 3 ملاعق كبار ماء الزهر
التحضير :
- اول حاجة نحضر الشاربات في كسرونة ندير الماء + سكر + عصير القارص و نخليه على نار هادئة حتى يبدى يغلي نزيدلو مدة 15 د و نطفي عليه ثم نضيف ماء الزهر
- في ليان نضرب البيض + سكر فاني + سكر عادي بالخلاط الكهربائي حتى تطلع كيما لاموس و يولي لونها فاتح
- من جهة اخرى نكون خلطنا خبز و خميرة الكيميائة و كاوكاو مع بعض نضيفهم لخليط البيض و نخلط بالملعقة من الاسفل الى الاعلى
- في الاخير نضيف مبشور الليمون و نخلط قليلا من الاسفل الى الاعلى
- في مول صغير و مدهون نفرغ الخليط
- ندخلها الفرن يكون ساخن من قبل و نخليها حتى تدي لون ذهبي و نلاحظ ان حجمها يضاعف
- من بعد كي نخرجها نسقيها بالشاربات بالتدريج مانقطعهاش حتى مرور 3 ساعات
- و تقدم بالصحة و الراحة
ملاحظة :
- لازم الكاس اللي عبرنا بيه نعبر بيه جميع المقادير
- لازم الخليط اللي فرغناه في المول مايجاوزش 1/2 ارتفاع الصينية
- نقدر نعوض الكاوكاو باللوز و لازم الكاوكاو يكون مرحي شوية متوسط كيما اللي نعملوه في العقدة نتاع بقلاوة
- لازم الشاربات تكون خفيفة او ماشي ثقيلة
تحياتي لكم جميعا
