محمد الشفيع
:: عضو مُشارك ::
- إنضم
- 22 جانفي 2008
- المشاركات
- 315
- نقاط التفاعل
- 1
- نقاط الجوائز
- 7
- محل الإقامة
- الجزائر
- الجنس
- ذكر
- آخر نشاط
ردا على كل من قال في الجزائر سوءٌ
من أبناءها اليائسين
ولا ييأس المؤمن من روح الله
راك وحدك يا راجل
راك وحدك
والمشكل
ما راكش في بلاد الناس
راك وحدك
في بلادك
بلادك اللي خلوها ولادها
وخلاوها
بلادك اللي خربوها
الحابسين والظالمين
بلادك وين راهي
راهي كاللميمة اللي تحوس على
اليتامى اللي ضاعوا منها
بلادنا روعة
بصح وين راهم اللي يحسوا بيها
تسمع الأغلبية يقلك
ما هيش بلاد
وانا اللي نعرفو
انو حنا اللي ما ناش عباد
البلاد عمرها ما ظلمت
البلاد منين خلقت وهي هازتنا
فوق أرضها وحاملتنا على ترابها
ولما نكبروا نقولوا بلاد الميكي
حرام علينا
حرام في حق الجزائر
علاه ما نخدموش
علاه ما نتحركوش
علاه ما نحترموش بلادنا وبعضانا
علاه برك نهدرو ونعيطو
من الصباح لليل وحنا عقاب البلاد
نفسدو ونبرحوا
يا الشبيبة
ارواحوا تشوفوا بلادكم كيفاه راهي
تبكي من العذاب
خليتوها ورحتو ورا الدنيا
ناس تحرق
وناس تسرق
وناس تقتل
وناس تنهب
وناس ماتت
وناس تاهت
وناس تندب
وناس تكذب
الجزائر مليحة
الجزائر ما راهيش راكعة
بربي ما هي راكعة
رغم اللي حصل ويحصل
انا وانت وانتم واحنا الكل نبنيوها
الشعب كامل
اللي يحكم واللي محكوم
وبركانا من الكلام والنفاق
بركاونا من الحفير ورا بعضانا
نتبعو الناس وننساو ارواحنا
نحكموا التاريخ ونسبوه
ونلعبوها خاطينا
واحنا اللي عملناه وصنعناه
الجزائر اللي حررها بن مهيدي
وبناها الأمير عبد القادر
وعلمها ابن باديس
وقراها بن نبي
ما طيحش غير لما يطيحوا ولادها
ارواحوا نخدموا
ما تركزوش على اليأس
وإثم عند ربي لما تقولوا
كون بقات فرنسا
حرام ومليار حرام
جدك مات علاجالك
ماماك ذاقت الويل علاجالك
تجي انتا تقول ما شفنا والوا
شوف يا خويا ويا اختي
الناس بلا بلاد عايشة
وانت عايش في جنة
ما رانيش نجيب من راسي
احمدوا ربي
واخدموا لربي
واتوكلوا عليه
واقرو التاريخ باه تتغيروا
مش باه تتقاتلوا وتهربوا للخارج
لما كل واحد يروح ويقعد ينقد ويقطع
شكون اللي رح يبقى هنا
بالاك وحدي
بالاك وحدي
بالاك وحدي
الله يلطف ويسترنا
ويقبضنا ليه غير مفتونين
