شوف خويا مختار ونقولك صحا فطورك وربي يتقبل قبل كلش
نعلمك بلي هذ الناس دايرة ربي ماكانش نسو الله فأنساهم أنفسهم وهذي أية من القرأن الكريم في خواتم سورة الحشر الله أعلم وهذا الناس لي تقول أحيني اليوم وأقتلني غدوة وهذي إذا عندك فالتاريخ كانو الجهالة يقولوها بزاف وراهي تتعاود بصح نهار لي يطيح فالفخ يبدا يحوس على أي حاجا لوكان بمال الدنيا باش ربي ينجيه منها ومايلقاهاش وراك تشوف فيها بعينيك لي يوكل دارو بمال لحرام يظل يسوفري ونحكيلك قصة تاع واحد كتف عريض ملي تزوج وهو يسوفري من طبيب لطبيب ولادو مابراو مرتو كيف كيف يظلو طايحين مرضى دراهمو كامل تروح على الطبة ومانفع والو دورها طلبة من واحد لواحد وقال بالاك راهم مسحورين ولا حاجا كيف كيف جا نهار نصحو واحد قالو روح عند واحد مولا براكة وشيخ مشهودلو بالخير والبركة أيا راحلو منين ريح معاه سقساه قالو ياوليدي منين راك تصرف على داركم قالو راني نجيبلهم من الكازيرنة قالو أصرف عليهم من الدراهم لي تعرق عليهم ماشي من لحوايج لي خاطينك أيا راح ودار بكلام هذ الشيخ من هذاك النهار ماولاش يعرف كلمة طبيب وهذي قصة واقعية وإذا حبيت نقولك السيد شكون والشيخ شكون ومنها نعرفو بلي الناس راهي تخلص بصح ربي منسيهم في نفوسهم ما قدروش يراجعو نفوسهم باش يعرفو منين راهي جايتهم الضربة وكاين لي ظل ينهب في مال الناس وربي محرم عليه أبسط لحوايج باش يقلش بيهم نفسو واش من حالة هذي ونحكيلك خويا قصة ليا أنا منين راك كي خويا أنا وأعود بالله من كلمة أنا كنت خذام في شركة وهذ الشركة راحت للخوصصة بصح الإدارة باش تقسم الأسهم على العمال في جمعية عامة زورت الوثائق ومضات في بلاصت العمال وسرقو كامل الأسهم تاع الشركة ومتفاهمين مع المحضر القضائي تاعهم قاعدت الحالة مستورة حتى ربي بدى يكشف فالأمور واللولة جات فالمدير لي دار العفسة يعني دخل فيه كاميو دايم الله في ملكو على كل حال ربي يرحمو العمال منين سمعو قالو لي ماعندناش واحد ثقة ويتكفل بالقضية تاعنا كيما أنت أيا ماعليش تكفلت بالقضية وبديت نبحث فالأدلة والحمد لله وصلت لكل الأدلة وبالثبوت وحتى كاتب الجمعية وأعترف أمام قاضي التحقيق
لكن قبل هذا الشي الإدارة عرضت عليا 80 مليون ومنصب عضو مجلس إدارة وأقسم لك بربي خويا مختار ورانا في نهار رمضان وقالولي إذا ماعجباتكش 80 مليون تقدر تحط المبلغ لي تحبو وجبد روحك من القضية قلتلهم مانتباع مانتشرى راك تقول علاش من كامل الناس خيرتني الإدارة ونقولك على بالهم بلي الوحيد لي عندو فالقوانين وخاصة منين هدرت معاهم وجه لي وجه وقلتلهم ترجعو للناس حقوقها وإلا بيناتنا العدالة وقادر على شقايا أدعاو بالمعارف والدراهم قولتلهم هذو كامل مايخلعونيش وكامل عندنا ولي معاه ربي مايخاف حتى من واحد وزيد العمال مساكن كامل أميين يعني لمخير فيهم مايعرفش يقرى سطر باش مانطولش عليك وباش تفهم المغزى من الحكاية نقولك صح تحاوزت من الخدمة بصح الحمد لله مابقاش قد لي فات والحكم يخرج في صالح العمال ويرجع كل واحد بحقو ونزيد نقولك الإدارة هذي ماتبقاش يعني إدارتنا حنا لي رايحين نديروها من عندنا بربي إن شاء الله فالجمعية العامة
ومنها نقولك الصابر ينال خويا مختار مايغرك كتف مايغرك لحرام كلش فاني وربي يخلف على الشجرة ومايخلفش على قاطعها ونزيدك مقتارحين عليا رئيس مجلس الإدارة وراني رافضها جملة وتفصيلا ومانحبش المسؤولية وين كانت وراني حكيتلك قصتي ماشي للإشهار بصح باش نعطيك دليل بلي الصابر دايما ينال ومالازمش الواحد يسكت على حقو إذا كان عندو دليل يمشي بيه باش مانخلوش الإنتهازيين ياكلونا حنا لي فتحنا لهم البيبان باش يديرو رايهم فينا وإذا أنت وانا و واحد أخر كامل نضنا وقلنا يكفي ولي دارؤ يخلص والله غير يخافو على رواحهم
والله مايتحركو على خاطرش والله ياخويا مختار غير ربي مهبط عليهم واحد الذل غير الناس دايرتهم رجالة وهما ماكاين والو
وباش نزيدك من قضيتنا هذي ناضو العمال كامل لي عندو قضية وكان محقور فالولاية تاعنا منين نشرناها فالجورنال تاع الخبر وشاعت العمال كامل ناضو تاع الشركات الأخرى والحمد لله كامل راهم رابحين يعني 2 مدراء دخلوهم للحبس وكاين معاهم إداريين وكاينين لي راهم لاحقين يعني التغير لازم حنا لي نديروه وحتى واحد مارايح يحوس عليك وعليا إذا ماكشفناش هذا الخبثاء إسمحلي طولت عليك بزاف وأنا بغيت نعطيك هذ المعلومات باش نقولك دوام الحال من المحال وكلش يتبدل مع الوقت على خاطرش كاين ربي سبحانو منين يكثر لفساد في بلاد ربي يبعث لي يحارب هذا لفساد على خاطرش محرم الظلم على نفسو كيفاش يرضاه لعبادو
الله يتقبل منا ومنكم الصيام والقيام وصالح الأعمال وربي يحفظك ويفتح في وجهط كل بيبان الخير خويا مختار
