وقتاه نتعلموا نحترموا المشاعر تاع بعضانا !

[الورد الأحمر]

بــسم الله الــرحمان الــرحيم
السـلام عليكم ورحمة الله وبركاته
...
اليوم جيتكم وأنا حاكمة عالشعـرة والدمعة في عيــني من وحد
العفســة ما تعجبــش خــلاص خـلاص ...
يا خوتـي واش بينا احنا الشعــب الجزايري ما نعرفوش نهدروا
وما نعرفوش نحترموا بعضانا ونراعيو مشاعر بعضــانا ,,,
نعرفوا غير نقيسوا بعضانا ونطولوا لسانا ونستلذوا بالعفـسة هذي
...
درك نحكيلكم لحكاية لي بسبتها درت الموضوع هــذا ...
أولا ادعـــيو بالرحمـة للأم السكيكدية المتوفاة البارحـة صباحا
- رحمة الله عليها جعلها الله من أهـل الجنة -
اللهم اغفر لها وارحمها أنت مولاها فاعف عنهـا
...
هذي الأم صراتلها مشكلة صغـيرة في التنفس اضطروا يديوها لسبيطار
باتت تم ومع الصباح جات ليها بنتها (19 سنة) جايبتلها لحليب حكمتها
الفرملية في الكوغيدوغ قالتلها وين رايحة البنت جاوبت بلي رايحة عند
ماماها وسماتلها المريضة وكان رد الممرضة يصدم ... :
" آه هذيك أي ماتت مع الخمسة تاع الصباح وراهي في الكوغيدوغ
أرواحي تشوفيها " ودّات الطفلة هذيك وعراتلها على وجه أمها وشافتها
:-o بالبساطة هذي بلا تراعيها بلا تحترمهـا بلعياط والصماطة
...
الطفلة راحت للدار عادي جدا كلي ما صرا والو تحكي عادي وتقوللهم
ماما أي ماتت وهي لي كانت رايحة فرحانة تدي لحليب لماماها صدمتها
الفرملية بالطريقة لي خبرتها بموت ماماها ... وحتى بعد مدة وين استوعبت
الطفلة لخبر ودرك مسكينة راهي في حالة بالدواء تاع لمهابل راحت فيها
من الخلعة والصدمـة والطريقة هذيك لي مش مليحة في المعامــلة
...
ندعيو ربي يصــبرها ويقويها وأمها ربي يرحمها ويثبتــها
...
ونخرج من الموضوع هذا ونقول كلمــة يا خوتي علاش ما نتعلموش
حضارة الكلام نترقاو شوية من النيفو لي رانا فيه ... علاش عندنا
مشكل في التحاور مع لعرب وبين بعضانا ؟ وما نعرفوش خـلاص
واش معناها آداب الكلام :s ... خاصة في المواقف هذي موقف
موت / مرض / كارثة / ... علاش ما نراعيوش المعنــي ...
في المواقف هذي رانا ما نتعاملوش مع الشخص المعني رانا نتعاملوا
مع المشاعر تاعو ... وراح يتقبل لخبر على حسب الطريقة لي خبرناه
بيها مالا علاش ما نخيروش طريقة باهية حنينة نصبروا بيها المعني
مش نصدموه وندخلوه في صراع مع عقـلوا هو يحكم فيه وعقلو
هارب منو زي ما صرا للطفلة هذي ربي يشفيــها ...
...
هذا موقف برك من آلاف المواقف لي ما نعرفوش نهدروا فيهم
خليونا يا جمـاعة نسـgـمو رواحنا ونحسوا بالناس
اليوم في الناس غدوة فينا ونتمناهم يخبرونا بطرق حضارية
...
نتمنـى ما طلتش عليكم مي والله لا قلبي رايح يطرطق من
العفـسة هذي ربــي يهدي عبـادوا ...
في أمان اللـــه ... ســــلامي

​

 

[sami44]

هذا موقف برك من آلاف المواقف لي ما نعرفوش نهدروا فيهم
خليونا يا جمـاعة نسـgـمو رواحنا ونحسوا بالناس
اليوم في الناس غدوة فينا ونتمناهم يخبرونا بطرق حضارية
بالفعل موقف من الاف المواقف للاسف
مشكورة نور على المجهود الطيب

 

[الورد الأحمر]

هذا موقف برك من آلاف المواقف لي ما نعرفوش نهدروا فيهم
خليونا يا جمـاعة نسـgـمو رواحنا ونحسوا بالناس
اليوم في الناس غدوة فينا ونتمناهم يخبرونا بطرق حضارية
بالفعل موقف من الاف المواقف للاسف
مشكورة نور على المجهود الطيب

أهـلا أخــي ســامي شكرا على الاعتمــاد
,,,
نعم للأســـف نحن شعب ليست له علاقة بالتحضــر
ومـعرف وقتاه نقرروا نديروا علاقة معاها
مشكور على المرور ... ســــلآمي
​

 

[miss A]

مشكورة على الموضوع
صح كاين منها كيما قصة وحدة دارت عملية في القلب ومع فطنت قالت نكلم حبيبتي ونبشرها
مع تكلمها ترفد وحدة من نسا ولادت حبيبتها وتقولها راها دارت اكسيدون وراجلها في الكوما هذيك المرا من الخلعة
تغاشات وما فطنتش لحد الان
وكاين مواقف الالاف من هذه المواقف
ومازال البعض ما يتعلمش كيفاه يحاور
شكرا لك تقبلي مروري

 

[كنزة]

يا لطيف وشنو هذا
و الفرمليات كشما تقولولهم يقولو حنا عاندنا الاف المرضى ما نتعاطفوش معاهم كامل
ياو طيري و خلي بلاصتك للناس لي تعرفلها
حسبنا الله و نعم الوكيل​

 

[nassim007]

غاااضتني بزااف طفلة هادي

حرام عليها

بصح ربي كااااين

شكرااااا
​

 

[عليلو 24]

هاذا قليل
ربي يرحمها ويوسع عليها

 

[أم راضية ~_]

السلام وعليكم
الله يرحمها هاد المرا و ربي يشفي هاد البنت و يصبر اهلهم
نهار يتعلمو الناس كيفاش ما يتكبروش وما يحسبوش رواحهم على ناس اوخرين وما يجرحوش مشاعرهم في الرخاء بكلمات و تعليقات يشوفوها هوما من التحضر !!
يتعلمو كيفاش يراعيو شعورهم و مشاعرهم في وقت الشدة والمصايب
حقيقة و واقع معاش في كل مكان
وقت الي تحن القلوب بالانسانية و الاخلاق يتسقم كلش
ربي يهدينا و يردنا الى ديننا ردا جميلا
السلام وعليكم
​

 

[souss]

سبحان الله اللهم إني أستغفرك و أتوب إليك
هادي فاتت التخلف وشبيها هكا ما مربياش قبل ما تكون مامتحضراش
ربي يرحم الوالدة ان شاء الله
و الله يكون في عون الطفلة مسكينة كانت ضحية لغباء و لاشعور وحدة متخلفة

آآآآه يا نور الله غالب كاين بزاف ناس هكا ما يحترموش مشاعر غيرهم ما نعرف هذا نقص أدب أو نقص دراية أو نقص وعي و تحضر أو...... أو...... أو.....
و مانعرف إذا يجي يوم و نشوفو العكس ولا لا​

 

[الورد الأحمر]

لـــ]ــي عودة أكيد للتعليق على كل رد
شكـــرا لردودكـــم ... سأعـــود ... ســــلآمي​

 

[joumane]

graaave sah
rabi ysabarha ltaflaaaa

 

[أمازيغي]

السّلام عليكم
ما نحبّذش في كثير من الأحيان أنّو نقارن بين الجزائر كتواجد والدّول الأخرى، ولكن هذه الحادثة ذكرتني بحادثة مشابهة في "الو م أ" وبسببها تمّ معاقبة الطّبيب والممرّضة بالطّرد وتغيير الجهاز الإداري للمستشفى.
(لست أدري كيف يتمّ تكوين الممرّض في الجزائر، ولكن على ما أظنّ أنّو يتلقّاو تكوين نفسي في التّعامل مع المريض وأهله)، وإن كان هذا يعكس درجة الانحطاط الذي وصل إليه قطاع الصحّة في الجزائر، وهذا غيض من فيض وقليل من كثير عافانا الله عزّ وجل.
شكرا
​

 

[السلطانة]

وعليكم السلام
الله يرحهم هاد السيدة ويصبر أهلها وبنتها لي صدمتها الممرضة
شعب غير واعي
ويحوس على التغيير تاع لبلاد
يحبلهم باه يسقمو روحهم ويجيو يطالبو بحقوقهم
هادي تهنات درك كي هلكت الطفلة هاكداك
لارحمة لاشفقة
صحيتي شريكتي
تقبلي مروري
سلامي

​

 

[Houda Chaouienne DZ]

يا لطيييف مسكينة .. شوكات المخلوقة
ماتعرفش توصل الخبر هاذي .. ولا ماعندهاش قلب
الله يرحم المخلوقة و ربي يصبر اهلها
....
هاذا هو العالم الثالث .. عقلية التخلف مغروسة في عقل كل فرد مهما كان مستواه
سلامي
​

 

[بيكهام]

سلام

المجتمع الجزائري معروف باختصار في كلامه , ولا يراعى شعوور واحاسيس الاخرين

الله يرحمها ويوسع عليها

وربي يجيب الصبر للطفلة

بخصوص خدامين في سبيطار : ماتت قلبوهم خلااااص يعنى منستناوش منهم الرحمة

مين ذاك تدخلى لسبيطارر تشوفى ناس تتراما ودم يسيل وهم لا حياة لمن تنداي

شكرا
​

 

[secret de coeur]

وعليگم السلآم نور
عآش من شآفگ خيتو
ربي يرحم هــآد المخلوقةة ويصبر أهلهــآ ويشفي بنتهــآ مسگينة
غآآضتني ..تاع صح شوگآتهآ الفرملية هآدي بلافاصون دو بآغل تاعها
ربي يسقم أحوآلنا ونولو نحسبو حسآب لهدراتنا قبل لا ننطقوهــآ
مرسي ع الموضوع
سلامو حبيبة
​

 

[amel amoula]

ربي يحفضنا وهادوك الفرمليات حاسبين رواحهم هوما الى يحكمو فى السبيطار

وزيد مايحتارمو ماوالو

مانعرف وشكون الى كدب عليهم وقاللهم السبيطار تاع باباهم ويقولك رانا نديرو فى خدمتنا

لازم يزيدولهم مادة مع قرايتهم هيا طريقة التعامل مع الاخرين وكيفاه يحتارمو الناس باه يحتارموهم

وكيفاش يهدرو مع الغاشى

 

[الورد الأحمر]

مشكورة على الموضوع
صح كاين منها كيما قصة وحدة دارت عملية في القلب ومع فطنت قالت نكلم حبيبتي ونبشرها
مع تكلمها ترفد وحدة من نسا ولادت حبيبتها وتقولها راها دارت اكسيدون وراجلها في الكوما هذيك المرا من الخلعة
تغاشات وما فطنتش لحد الان
وكاين مواقف الالاف من هذه المواقف
ومازال البعض ما يتعلمش كيفاه يحاور
شكرا لك تقبلي مروري

أهــلآ أخــتي نورتي موضوعـــي ...
ايه شفتي كيفاش اختي وهذي حكاية خلاف جبتيهالنا تبين بلـــي احنا شعب
مش تاع مواقف ما نعرفوش نحكيو خـلاص ولا نراعيو مريض ولا مشاعـر
هاي ندبت للمرا وهي غير وين دارت عملية على قلبها خلعتهولـها ...
ربي يهدينا برك هذا ما نقولو ... مغسي اختي على الاضافة يعطيك الصحة
ومرورك مشــكور ... ســــلامي :regards01:
​

غاااضتني بزااف طفلة هادي

حرام عليها

بصح ربي كااااين

شكرااااا
​

ايه تغيض شوكاتها المغبونة وهي جاية تفرج تجيب لحليب لماماها
ربـــي ينتقــم من الفرملية تحسب رايحة تربــح ... مغسي خويا
ســــلامي :regards01:
​

هاذا قليل
ربي يرحمها ويوسع عليها

اللهم آآمين ... وطبعا هذي قطرة من محيطات
الشعب الجزايري راه كي ألف ليلة وليلة ما يفضوش
حكاياتو مع التخـــلف ... ســــلآمي :regards01:
​

السلام وعليكم
الله يرحمها هاد المرا و ربي يشفي هاد البنت و يصبر اهلهم
نهار يتعلمو الناس كيفاش ما يتكبروش وما يحسبوش رواحهم على ناس اوخرين وما يجرحوش مشاعرهم في الرخاء بكلمات و تعليقات يشوفوها هوما من التحضر !!
يتعلمو كيفاش يراعيو شعورهم و مشاعرهم في وقت الشدة والمصايب
حقيقة و واقع معاش في كل مكان
وقت الي تحن القلوب بالانسانية و الاخلاق يتسقم كلش
ربي يهدينا و يردنا الى ديننا ردا جميلا
السلام وعليكم
​

أهــلا اختـــي نورتــــي ...
ربي يرحمها اللهم آمـــين ... ايه يا اختي نهار نتعلــموا هذوك لي ذكرتيهم كامل
نرجــعوا شعب متحضــر نوعا ما ما بقاش احترام ولا تقدير ... ربي يهدي عبادو
مغـــسي اختي يعطيك الصحـــة ... ســـلامي
​

سبحان الله اللهم إني أستغفرك و أتوب إليك
هادي فاتت التخلف وشبيها هكا ما مربياش قبل ما تكون مامتحضراش
ربي يرحم الوالدة ان شاء الله
و الله يكون في عون الطفلة مسكينة كانت ضحية لغباء و لاشعور وحدة متخلفة

آآآآه يا نور الله غالب كاين بزاف ناس هكا ما يحترموش مشاعر غيرهم ما نعرف هذا نقص أدب أو نقص دراية أو نقص وعي و تحضر أو...... أو...... أو.....
و مانعرف إذا يجي يوم و نشوفو العكس ولا لا​

أهـــلا بالسكيكدية ... شفــتي كيفاش ؟ راكي من هنا وتعرفي سبيطار تاعنا
وشفتـــي الفرمليات كيفاش دايرين ... المهنة تاعهم تستدعــي يكون عندهم
قلب حنين مع البشر وقلب قوي مع المشــاهد تاع الدم و و و مي هوما عكسوا
الآية يلعبوها يخافوا من المشاهد وضعاف وحنان مي مع البشـر قويين وينشعوا
يشيحولك ماء وجهك ... ربي يهدي عبادوا ومغسي على المرور يعطيك الصحة
ســــــلامي :regards01:
​

 

[الورد الأحمر]

graaave sah
rabi ysabarha ltaflaaaa

أهـــلا لاليشكــا ... وي قغااااف ... وربي يصبر أهلها وربي يرحم الوالدة
مغـــي عالمرور نورتــــي ... ســـلآمي :regards01:
​

السّلام عليكم
ما نحبّذش في كثير من الأحيان أنّو نقارن بين الجزائر كتواجد والدّول الأخرى، ولكن هذه الحادثة ذكرتني بحادثة مشابهة في "الو م أ" وبسببها تمّ معاقبة الطّبيب والممرّضة بالطّرد وتغيير الجهاز الإداري للمستشفى.
(لست أدري كيف يتمّ تكوين الممرّض في الجزائر، ولكن على ما أظنّ أنّو يتلقّاو تكوين نفسي في التّعامل مع المريض وأهله)، وإن كان هذا يعكس درجة الانحطاط الذي وصل إليه قطاع الصحّة في الجزائر، وهذا غيض من فيض وقليل من كثير عافانا الله عزّ وجل.
شكرا
​

أهــلا أخي الأمازيغـــي ... نورت الموضوع ...
طبعا لوكان نقارنو رانا نكرهو بــلادنا برك هذوك لي يسموهم العالم المتقدم
احنا راك تعرف وين ما كان لاه نهدرها يوجعني قلبي بــرك ... طاقم المستشفى
من نظري يلزم يكون واعي ومثقف ومتحضر قبل ما يكون قاري طـــب ...
مي رانا نشوفو في حالة المستشفيات تاعنا خمـاج فوضى اهمال ومن فوقها
طبة وفرامل تقول مش في سبيطار في الحبس وما يعاملوش الحباسة بالطريقة
هذيك ... ربي يهديهم خويا وربي يحنن قلوبهم وكيما قلت هذا غيض من فيض
عافانا الله ... مشكور على المـــرور ... ســـلامي لك :regards01:
- تصميمي في توقيعك أتشرف بهذا :-r -
​

 

[الورد الأحمر]

وعليكم السلام
الله يرحهم هاد السيدة ويصبر أهلها وبنتها لي صدمتها الممرضة
شعب غير واعي
ويحوس على التغيير تاع لبلاد
يحبلهم باه يسقمو روحهم ويجيو يطالبو بحقوقهم
هادي تهنات درك كي هلكت الطفلة هاكداك
لارحمة لاشفقة
صحيتي شريكتي
تقبلي مروري
سلامي

​

أهــلا الحــب ... اللهم آمين ربي يرحمــها
شفتـــي كيفاش هوما متخلفين ويحوسو على التقدم ...
عمرنا لا نتسقمو يا شوشو والله نموتو هكذا ... معرف بالاك راهي
ارتاحت درك كي عوقت الطفلة بنشعة وخبر مش مليح بطريقة مش
مليحة ... ماكانش رحمة في قلبها ربي يهديها ويحنن قلبها ...
مغسي بشبش على المــرور يعطيك الصحة ... ســـلآمي :regards01:
​

يا لطيييف مسكينة .. شوكات المخلوقة
ماتعرفش توصل الخبر هاذي .. ولا ماعندهاش قلب
الله يرحم المخلوقة و ربي يصبر اهلها
....
هاذا هو العالم الثالث .. عقلية التخلف مغروسة في عقل كل فرد مهما كان مستواه
سلامي
​

أهـــلا بالطبيبة المستقبلية :-r
شفتي كيفاش يا هدهج قريب قتلتها هي تاني ... لا قلب لا حنانة
ربي يرحم الوالدة ويصبر الطفلة ويردلها عقلها ...
فعــلا هذا هو العالم الثــالث ... ســـلامي :regards01:
​