السلام عليكم اختي ايمان
وعليكم السلام حنونة
والله واش نقولك الموضوع هذا اخطر
نشكرك عليه بزااف حبوبة
رفيقات السوء خطر عظيم يفتك بالأخلاق الحميدة للانسان
وبلاء يأتي على كل ذرة حميدة فيقتات منها
كليآ ليترك تلك الروح غارقة في مفاسد الدنيا و المعصية
قصص بزاف يصراوا وصراوا
وتقريبا كل وحدة منا عندها ميش قصة على رفيقات السوء
نحكي قصة صرات في الجامعة ميش لي نقرأ فيها وين تقرا
بنت عمي وهي لي حكاتنا القصة
وحدة بنت فاميلا ومتربية بحجابها وتصلي وكل شيء وهي زينة بزاف
داروا بيها بنات معندهمش اصل
وحاولوا يخرجوها على الطريق كيما داروا معها مانفع حاولوا
يقولوها نحي الحجاب لقاوها ماسمعتش لكلامهم
هي خاطيتهم وبعيدة عليهم مي هوما لصقوا فيها مرة قالولها
خلي الحجاب على روحك بصح ولي البسي سراول
و ليكات باهيين باه يبينو زينك هي رفضت ونصحتهم
كي مقدرولهاش ومقدروش يخرجوها على الطريق
تفاهموا بنات لي ميصلحوش وحكموها في الغرفة
وحرقولها وجهها و الله العظيم غير حرقوها مسكينة
لحد الساعة الوجه تاعها مزال عليه اثار الحريق وبكثرة
الله يحفظنا ويسترنا من هاد كاليتي وصلت بيهم لهاد دراجة حرام عليهم مي ماتخافيش يجي نهارهم وربي يخرج فيهم عمايلهم شوفي لمسكينة هنا بلى جا ليها كي ماحبتش تمشي معاهم شوفي واش صرالها صافي دوكة كما ديريلهم تحصلي
وحكاية اخرى من جامعتنا مع بنت نعرفها مليح مليح
هي بنت ماشاء الله اخلاقها حميدة لعام لي دخلت للجامعة
حدها حد روحها متخالطش خلاص
طاحت في شومبره مع زوج بنات غير تاع انحراف وتدخين
ملقات كيفاه دير مسكينة مرة شفتها قاعدة معاهم نعرفوهم
بلي اخلاقهم تحت الزيرو
ومايصلحوش هما من لبنات لي سيارة تجيب وسيارة تدي
و لقش غير اخر الصيحات الموضة رحت عيطتلها قلتلها نحتاجك
جاتني نصحتها قلتلها بعدي عليهم
اذا حابة ميهدروش فيك و يضعنوكش قاتللي هوما لي راهم يدوروا بيا
عارفتهم بلي ميش ملاح مي لم ينفع الامر وبقاوا يدوروا بيها
بالشوي بالشوي
سيرتو كي معاهم في الشموبرة علموها تتكيف وخرجت على الطريق
والله دارهم ماولات تروح ليها حتى في العطلة تقعد لتم وتخرج معاهم
ومع لولاد حتى لعبوا بيها و تفروها فيها ولات سيرتها على كل لسان في لجامعة
ادارة الجامعة وصلو لبباها لخبر بلي بنتو راهي بالحمل
و الله تصدم واش قالها ماكي بنتي ماني بباك انسي
مرة قالت لصحابتي ندمت لي مسمعتش كلمة صاحبتك كي نصحتني
مي هل ينفع الندم الان ؟
ندامة في لخر مادير والو مدام توصلك كونساي من وحدة تكون حابتلك لخير ماعليها غير دير بيها ماشي تكمل في طريق لي تدي ماتجيب غير الهم كانت قادرة تبدل شومبرا انا عندي هدي هي في عقلها كانت حابة تولي هكداك
رفيقات السوء يعرفوا شكون يستغلوا و يعرفوا على شكون يحطوا عينيهم
بصح انتي اختي احذري منهن
وحاولي انتي متلعبيهاش قافزة على خاطر لي تلعب روحها قافزة وشاطرة
هذيك هي لي طيح في الشباك تاعهم
وحدة تقولك انا عارفتهم مليح وين حابين يوصلوا خلي برك ودوك تشوفوا كيفاه نتوبهم
ساع ولات هي تدروقي و تشرب يعني جابوها في طريقهم و تلفولها
عقلها وضيعولها حياتها وراحوا عليها
باه يطيحوا وحدة اخرى
ايه خلاص ديلي تاعها لازك يغونوــليوها بوحدخرا وتخلاص ليستواغ LA MEME FIN
نصيحتي لكِ اختي سيرتو لي تقرا في الجامعة وبعيدة على دارهم التزمي حدودك
وماتخالطيش بزاااف وحدة ولا زوج يكونوا بنات فاميليا يغينوك على الكل
يقولك كثرت الصحاب تلف خيارهم
ويقولك تان كي تكتر صحاب تقعد بلا صاحب
واعرفي شكون تختاري ميش لي تضحكلك في وجهك و تقولك كلمة مليحة
تقولي صايي هاذي هي صحبتي
والافضل اذا مكونتيش تحسني الاختيار ان تبقي لوحدكِ يعني من صباح لخير
لمساء الخير ماتكثريش معهاهم
وحدة الإنسـان خير *** من جلوس السوء عنده
وجليس الصدق خير *** من جلوس المرء وحده
أنت في الناس تقـاس *** بمن اخترت خليلاً
فأصحاب الأخيار تعلو *** وتنل ذكراً جميلاً
حكايات بزااف صارييين وكل يوم نسمعوهم ونسمعوهم
بصح للاسف بنات يسمعوا ومايدوش العبرة من حكايات لي فاتوا
ويطيحوا في نفس الغلظة و يرجعوا نادمين وهوما بعد لي يولوا
هدي لي غايضتني يعرفو بهاد حكايات علاش مايدوش بلعبرة حتى كي طيح الفاس براس
يقنصوا في بنات الناس باه يطيحوهم كيما طاحوا
الله يهدي الجميع يارب وكاين لي تغير من وحدة تحرش عليها
بنات ميصلحوش و كاين لي دير فيها زكارة وخلي برك
المهم راني طولت اسمحولي
ربي يبعد علينا وعليكم بنات السوء وربي يسترنا ويستركم
و يطيحنا غير في بنات الاصل لي معدنهم ذهب مايتصدى
اختي ايمان بارك الله فيك على الموضوع الرآئع الذي يمس واقعنا
تحياتي لكِ ولفكرك النير
