بردولي قلبي فيه و في اللي كيما هو...!!!

[سلفي والحمد لله]

موضوع مليح بزاف وظاهرة موجودة في مجتمعنا الاسلامي ولاحول ولاقوة الا بالله.
حبيت نقول بلي ربي سبحانو كي يحرم حاجة راهو ادرى بما ينفع ويضر عبادو
وربي سبحانو حرم الاختلاط والدليل الكوارث لي راهي تصرى بسببو...
منيش راح نحكيلك من باب الرزق وان الرزق ماوش في يد هاذ المدير لكن قد الانسان يضعف ويخاف يروحلو العمل ويبقى يخدم في هذيك البلاصة ويرضى بامور ويعفس على قلبو لكن
هذي صحبتك اكيد كبيرة وتعرف شوي صلاحها وتفهم من طريقة كلامو معاها بلي راهو ماوش مليح وراهو يغازل فيها صح ولا لا؟؟؟ وعلاش تبقى تخدم معاه؟؟؟ هنا غلطت صحبتك هذي وماعندها حتى عذر حتى وان على عاتقها 10 عايلات هي لي توكل فيهم
في الحق مع تشم ريحة الخبث فيه تهرب لكن للاسف هي رضات وبقات ولهذا منقولكش تستاهل لان كيما مانرضاهاش لختي منرضاهاش لبنت الناس لكن نقول ماتلوم حتى واحد تلوم نفسها فقط
وربي يفرج عليها وعلى جميع بنات المسلمين وربي يرزقها زوج صالح يسترها​

 

[nanoche]

انا راح نبدالك بوحد البيت شعري ...

من يهن يسهل الهوان عليه ..ما لجرح بميت إيلام

السيد هذا ماهوش غالط .. لان أمثالو بالملايين في مجتمعنا .. ولكن الغالطة هي اللي توصل روحها للامور هاذي


القانون لا يحمي المغفلين .. وزيد بزيادة قولي الحمد لله انوما فضلهاش البكارة و خلاها تتمرمد في لرض عار على والديها وتزيد تطالبو انو يتزوج بيها .. وبلاك تولي تاخذ طريق الانحراف ...

من اليوم لول .. من الدقيقة الاولى اذا شافت حاجة عوجة ..ترميلو المفاتح في وجهو و تروح ..ربي هو العاطي و الرازق .. مهوش وجه الشر هذاك .. ونتي راكي تقولي كانت تضحكلو و عاجبها الحال ... طالما الامور بقات في غزل عفيف ...

اي حاجة تمس شرفها نورمالمون تحبس هذيك الخدمة على الفور .. ان شاء الله حتى مس يدها .. و الدراهم مهمش سبة باش تقبل الوضع هذاك .. اذا كان الشرف ما يهمش في الخدمة عند الطفلة ..تروح تخدم فتاة تاع هوى وخلاص ..وش الفرق ؟؟ واحد يتحرش بيها و هي راضية على جال ما تخسرش وظيفتها .... الله يقطعها وظيفة منين خلقت ..

القصص كيما هاذو كاينين بزاف في مجتمعنا .. و يخلصو ديما بنهاية تراجيدية اكثر من هاذي ...و الاسباب واضحة .. النية تاع بعض البنات .. الدهاء تاع المدراء هاذو .. هدرة الناس و العيب اللي يقابل اي وحدة تحكي على المدير هذا ولا ذاك انو تحرش بيها .. مالا يبقى دايما عايش حياة عادية و مكانش اللي تتجرا وتشكي بيه ..

مجتمعنا راح في كيلة زيت ... و الطفلة العفيفة اللي تعرف وين تحط رجليها ..اللي ما تخرجش في سهرات ..لي ما تحضرش les gala و les booms .. اللي ما تعفسش البلايص الخالية و المختلطة .. اللي ما تدخلش للدار من ورا المغرب .. اللي ما تخدمش في بلايص عوج .. اللي ما تخرجش مع الاولاد تحت معنى التفتح .. اللي ما تخيبش تربية والديها و شرف عايلتها .... الطفلة هاذي عمرو ولا يقيسها الريح




​

السلام عليكم و رحمة الله و بركاته
ربي يحفظكم خاوتي على الردود دياولكم على هاذ القصة و بالخصوص انت يا أخي و نجاوبك نقطة بنقطة و نقلك راك غاط في البنت و حرام عليك "من يهن يسهل الهوان عليه" ما تنطبقش عليها لأنها أشرف من الشرف و راني مسؤولة في إدارة و راني نشوف الي يوصلو رواحهم و المكان اللي كانت تخدم فيه ماهوش خاص بل هو منصب حكومي و إذا كانت أي واحدة تتعرض للتحرش عن طريق الكلام مثل ما حدث مع صديقتي في الأول قبل ما يوصل للمحاولة عن طريق القوة فمكانش امراة رايحة تخرج تعمل ...و بالنسبة لردها بالتبسم ماشي لأنها كانت توافقو و أنا كنت قادرة نحذف العبارة هاذي لأني كنت متأكدة انكم رايحين تركزوا عليها و لكنني فضلت نحكي القصة كيما عاشتها و كيما عشت انا معاها بعض المواقف ... البنت كانت متخلقة لدرجة كبيرة و حياءها و احساسها بانها مكسورة الجناح لأنه لا يوجد من يحميها حتى القانون لما راحت تشتكي قالولها لازم 2 شهود وهو اللي خلاها تصبر على هاذيك الكلمات اللي كان يلوحها في وجهها و صبرت لأنها كيما قلت في احد الردود هي المعيل الوحيد لأسرة تتكون من 6 أشخاص و أم تعاني من مرض مزمن بالاضافة هو ما لمسش شعرة من راسها او حتى لمست يده عن طريق المصافحة و اللي حاول شحال من مرة يخمس معاها بصح اعتذرت منو كنت نتمنى تركزوا على رايكم في الناس اللي كيما هاذو و اللي راحو بزاف بنات فاميلية في رجليهم و كل واحدة و ظروفها لكني لقيت أغلب الردود ركزت على القشور و تركت لب الموضوع و اللي يده في الماء ماشي كيما اللي يده في النار
مع احترامي لكل ردودكم و شكرا

 

[Selma 30]

وعليكم السلام ورحمة الله وبركاته
ااختي nanoche أشخاص كيما هاذ الشيبوخ ربي وكيله راهم كثروا في زماننا للأسف
وكيما هو زير نساء يحسب بنات الناس كامل ماش مربيات بحالو
وكيما يقول : كل يرى الناس بطبع عينه

الحمد لله اللي صحبتك خرجت سلامات وربي سترها منو ومن شره
وقتنا هذا راه صعيب بزاااف ,والمراة اذا اضطرت وخرجت للمجتمع لازم
تكون واعية ومحاذرة على روحها والنية تنحيها

على كل حال ربي يفرج عليها ويعينها على ما ابتلاها
وصي صديقتي اختي تكثر من الاستغفار وفي كل وقت ربي يفتحلها بيبان الخير
قال تعالى : فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا
وحاجة الثانية اختي تكثر من الدعاء خاصة في الثلث الأخير من الليل
وأخر حاجة (وسمحيلي كثرت عليك ) وصيها اي خدمة تلقاها وتشك فيها ولا ماتعجبهاش خاصة لكان فيها اختلاط الأفضل تتجنبها وماتقولش الله غالب عايلة راهي تستنى فيا , لالا تخليها لوجه الله وربي سبحانه يعوضها ما خير فمن ترك شيئا لله عوضه الله خيرا منه
قال تعالى : وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا
ربي يرزقها ويفرج عليها ويحميها من كل شر ياااارب
ويحمي كل بنات امة نبينا محمد عليه الصلاة والسلام
​

 

[Moha le sage]

السلام عليكم و رحمة الله و بركاته
ربي يحفظكم خاوتي على الردود دياولكم على هاذ القصة و بالخصوص انت يا أخي و نجاوبك نقطة بنقطة و نقلك راك غاط في البنت و حرام عليك "من يهن يسهل الهوان عليه" ما تنطبقش عليها لأنها أشرف من الشرف و راني مسؤولة في إدارة و راني نشوف الي يوصلو رواحهم و المكان اللي كانت تخدم فيه ماهوش خاص بل هو منصب حكومي و إذا كانت أي واحدة تتعرض للتحرش عن طريق الكلام مثل ما حدث مع صديقتي في الأول قبل ما يوصل للمحاولة عن طريق القوة فمكانش امراة رايحة تخرج تعمل ...و بالنسبة لردها بالتبسم ماشي لأنها كانت توافقو و أنا كنت قادرة نحذف العبارة هاذي لأني كنت متأكدة انكم رايحين تركزوا عليها و لكنني فضلت نحكي القصة كيما عاشتها و كيما عشت انا معاها بعض المواقف ... البنت كانت متخلقة لدرجة كبيرة و حياءها و احساسها بانها مكسورة الجناح لأنه لا يوجد من يحميها حتى القانون لما راحت تشتكي قالولها لازم 2 شهود وهو اللي خلاها تصبر على هاذيك الكلمات اللي كان يلوحها في وجهها و صبرت لأنها كيما قلت في احد الردود هي المعيل الوحيد لأسرة تتكون من 6 أشخاص و أم تعاني من مرض مزمن بالاضافة هو ما لمسش شعرة من راسها او حتى لمست يده عن طريق المصافحة و اللي حاول شحال من مرة يخمس معاها بصح اعتذرت منو كنت نتمنى تركزوا على رايكم في الناس اللي كيما هاذو و اللي راحو بزاف بنات فاميلية في رجليهم و كل واحدة و ظروفها لكني لقيت أغلب الردود ركزت على القشور و تركت لب الموضوع و اللي يده في الماء ماشي كيما اللي يده في النار
مع احترامي لكل ردودكم و شكرا

سلام من جديد اختي ...
نتي فتحتي الموضوع حتى تحكي بكل صراحة .. ونا جاوبتك بصراحتي لي نعرفها
قبل هذا انا مش امير مؤمنين و مش قاعد هنا باش نحكم على البنت هاذي .. و ماذكرتش في ردي انها مش شريفة ولا اتهمتها بالتواطئ مع المدير ... لكن حطيت اصبعي على المشكل بالذات و هو انها كان لازم تترك الخدمة ذيك .. و راكي تقولي بقات معاه مدة عامين ..

واش من لب و اش من قشور يا اختي و القضية واضحة كيما الشمس ... ياي من عينيه تعرفو اذا كان خبيث ولا طيب .. و من طريقة كلامو ...

حنا ما نلوموش المدير لانو شرير و انتهازي و مفترس ..لان المجتمع تاعنا مليان بيهم .. و لكن نلومو الطفلة اللي بدافع ما تروحلهاش الخدمة ترضى بالذل و تبقى ساكتة .. و راح تقوليلي في مدة عامين ما لاحلها شرة ولا حاول يتقرب منها ؟؟


وش تستناي منا نكتبو ؟؟ نحن نندد بهاذا المدير ؟ نحن نطالب بالعدالة ؟ نحن معرف واش ؟؟

راكي تعرفي مليح اننا صدقناك كي قلتي انو انسان فاسد ... و الشي اللي راني نلومو الطفلة عليه هو انها بقات معاه طول المدة هاذي


و اخر كلامي ياختي اني نقرى بين السطور و شايف و عايف حوايج بزاف ما شفتيهاش نتي ولا صاحبتك .. و كون نبدى نحكيلك راه منتدى و ما يكفينيش ...

اذا دخلنا للموضوع هذا نجاوبو خطراش حسينا بقضيتك و كلانا قلبنا على العوج .. و الحقيقة ديفوا مرة بصح لازم تتقال ...

يقلك خوذ راي اللي يبكيك و ما تخذش راي اللي يضحكك .. ونا هنا عطيتك رايي الصريح ... اي وحدة عاقلة تلقى اي حاجة مشبوهة صغيرة ..لازمها تخلي هذيك الخدمة ...حتى و لو تكون هازة عشر عايلات كيما قال خويازاكي .... و كي تجي للصح بلاصة المرا المحترمة في الخدمة هي التعليم ... ماشي سكرتيرة في مكتب مدير ........

ان شاء الله تكوني فهمتي كلامي ...

شايف مليح l'anem .. و l'adas .. ووش قاعد يصرى بليكونطرا تاعهم و كيفاش يخيروهم بالحبة ... شايف ثاني وش راه صاري مع كامل اللي حاكمين البيروات و سكرتيرات les auto écoles .. و خدامات البلدية ... و هلما جرا ... شايف الكثير من الشرف تاع بنات دزاير لي راه يروح في لعبات تحت اطار قانوني .. وتحت اطار التوظيف ......


ياي خدمة المرا .. هي دارها ...لا يديك لا يجيبك ...


خوك محمد

 

[nanoche]

سلام من جديد اختي ...

... ياي من عينيه تعرفو اذا كان خبيث ولا طيب .. و من طريقة كلامو ...

ياي خدمة المرا .. هي دارها ...لا يديك لا يجيبك ...


خوك محمد

مشكور على الرد خويا محمد و كلمة ياي ما حبيتهاش من عندك جابلي ربي هاذ المنتدى للجزايريين نتعاملو فيه بالمحبة و الاحترام
و حتى انا و الحمد لله مسؤولة و شفت و راني نشوف و ربي يسهل على كل واحد و كل واحدة كيما يقولو ناس زمان كل ماشية تتعلق من رجلها و انا ما قلت نخرجو نندد او نحتج او شي اخر انا الموضوع طرحته ماشي باش تحكمو على الصديقة ديالي انا حبيت رايكم في المسائيل اللي يستغلو العاملات اللي معاهم عندما يعرفو احتياجهم للعمل
و كي تقول المرا اذا خدمت في التعليم او البيت انا نقلك روح سقسي واش راهو يصرا في الامتحانات و المسابقات ديال التوظيف و المساومات اللي يتعرضو ليها الا من رحم ربي و حتى استاذات محترمات و بولادهم و ما سلموش من المضايقات يا خويا رانا نشوفو كيما انت راك تشوف
و هاذ البنت في مرة قاتلي لوكان ربي يفتح عليا و نتزوج و الله ما نعدي باب البيت اللي يديني يدبر محاينو و يخدم عليا و الحمد لله راضية بالقليل
هذا كان ردي مع خالص تحياتي ليك خويا محمد و سمحلي اذا ردي ما عجبكش رانا هنا باش نتناقشو و هاذ البنت ماهيش الوحيد اللي عانات كاين اللي مازالهم يعانو و حسبي الله نعم الوكيل في أي انسان يطمع في شرف البنت مهما كانت و ما يخممش بليك كاين اخته او زوجته او ابنته
و حقيقة اسعدني تفاعلك مع الموضوع
أختك في الله نانوش

 

[Moha le sage]

و كلمة ياي ما حبيتهاش من عندك جابلي ربي هاذ المنتدى للجزايريين نتعاملو فيه بالمحبة و الاحترام

:s :s

ياي هي طريقة تاع هدرة في سطيف و في ولايات خرين ..

نقلك : ياي كون تشوفيني وش تعبت البارح في الخدمة ... ياي وش صرا فيا في لاشان ...الخ ..

و نتي هنا معرف وش فهمتيها ؟؟!!


و الاحترام من مبادئي قبل ما نسجل في المنتدى اختي نانوش ..

المسابقات كل عام ندير فيها .. بلا ما نسقصي اني شايف كلش يا اختي ..

على العموم انا دخلت نعطي رايي في موضوعك ..مش نتهجم عليك ولا عليها و لا ندير روحي مفتي .. هذي هي صراحتي مدايرة هكذا ..

سلامي ليك