مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[fatouma2012]

chokraan om amiin 3la elijabaat elsarii7a w rabii ychaafiik nchallah

 

[أم أمين23]

مشكورين على المرور الطيب والاطراء ودلك من طيب اخلاقكن
لكن لم تخترن ضيفة جديدة يلا راني نستنى والا ضرك ندير طق طق هههههه
سميرة ما قلتي ليش نكملو في نفس الموضوع والا نديرو استضافة في موضوع جديد؟؟؟؟

 

[SAMIRA25]

ام امين خلينا نكملو في هدا الموضوع
​

 

[lina-67]

انا عندي اقتراح و هو كل وحدة اللي تكون تحت المجهر كي تكمل الحصة تاعها هي تقولنا شكون تجي موراها معناها ام امين دورك تقولنا شكون العضوة اللي تقترحها

 

[ام الحلوين]

سلام
ام امين ربي يجازيك اختي على الاجوبة الصريحة .
هيا بنا اختارو ضيفة هدا الاسبوع و كيما قالت جهاد لي تكمل دالتها تخير الضيفة لي بعدها يعني ام امين تقترح شكون .

 

[أم أمين23]

مالا يا حنونة مادامك كنتي اول من دخلت ورد على الموضوع وثاني اول من اقترح الي يكمل يخاير الي وراه ارواحي انت نورينا:
djihad-17
راح نبداك الالة :
عمرك؟
من وقتاش متزوجة؟
وين متغربة واش من بلاد وواش من بلاصة؟
وشحال عندك في الغربة؟
شحال عندك ولاد؟
وشحال فرق بينك وبين المخلوق؟
استرجعي انفاسك وهاو ليك كاس عصير برك وراجعة:

 

[ام الحلوين]

برافو ام امين
جهاد جاوبي على ام امين و شربي العصير و نبدا انا بالاسئلة .

 

[lina-67]

مالا يا حنونة مادامك كنتي اول من دخلت ورد على الموضوع وثاني اول من اقترح الي يكمل يخاير الي وراه ارواحي انت نورينا:
يآآ اقترحت حصلت هههه ماعليش مرحبا بكم و ان شاء الله نرد على الاسئلة
djihad-17
راح نبداك الالة :تفضلي
عمرك؟
23
من وقتاش متزوجة؟
من نوفمبر 2011
وين متغربة واش من بلاد وواش من بلاصة؟
في فرنسا و الضبط في ستراسبورغ حدود مع المانيا
وشحال عندك في الغربة؟
عام و نصف
شحال عندك ولاد؟
راهو في الطريق هههه
وشحال فرق بينك وبين المخلوق؟
15سنة
استرجعي انفاسك وهاو ليك كاس عصير برك وراجعة:

شكرا انعشتيني انا في الانتضار

 

[ام الحلوين]

الله يبارك جهاد و ربي يثبتلك حملك
ــ عدد الاخوة و الاخوات و ترتيبك بينهم ؟ ربي يحفظكم
ــ كيف تنادي لعجوزتك و شيخك ؟
ــ شحال هبطتي من مرة للبلاد ؟
ــ ما هو مستواك الدراسي ؟
ــ هل انت متحجبة ؟
ــ هل عندك اهلك او اهل زوجك عايشين في فرنسا ؟
ــ هل غلطتي و كليتي شيء مش حلال ؟

 

[fatouma2012]

سلام جهاد

عندك صديقات جزائريات ؟ يجو عندك الدار ؟ عرضوك في ديارهم ؟

واش يعجبك ف ستراسبورغ ؟

سافرتي الدول أخرى ؟

أول مرة خرجتي وحدك بلا راجلك كي فاتت ؟

 

[روعة انثى]

جهاد ربي يعطيك الصحة و يقويك انا تاني حبيت نسقسي :
- تخدمي و لا قاعدة فالدار ؟
- عندكم اعانات للمرا اللي قاعدة فالبيت و لا لالا ؟
-كيفاش تعرفتي بزوجك ؟
- فرق السن اللي بيناتكم يبانلك عادي و لا كبير زعمة وحدة تحب تتزوج و تقولك خطيبي كبير عليا بـ15 عام واش تنصحيها ؟
- واش الحاجة اللي عجباتك فالغربة مكانش فالبلاد ؟
- الفيزا شحال قعدت باش مدوهالك ؟ يعني من نهار عقدتي حتى اللي مدولك الفيزا شحال وقت ؟
-كي مدولك الفيزا شحال زدتي بعدها و رحتي ؟ رحتي وحدك و لا مع راجلك ؟

 

[SAMIRA25]

صباح الخير جهاد ربي يعينك راهم اجتامعو عليك
انا نقولك ربي يهنيك و يفرحك و لي عودة ان شاء الله :p​

 

[lina-67]

الله يبارك جهاد و ربي يثبتلك حملك
الله يسلمك و يخليلك الوليدات
ــ عدد الاخوة و الاخوات و ترتيبك بينهم ؟ ربي يحفظكم
احنا 3بنات و اخ واحد المازوزي فينا و ترتيبي الثانية
ــ كيف تنادي لعجوزتك و شيخك ؟
ما و بويي
ــ شحال هبطتي من مرة للبلاد ؟
مرة و راني رايحة ان شاء الله مور العيد
ــ ما هو مستواك الدراسي ؟
متخرجة من مدرسة التكوين شبه طبي و عندي دبلوم ممرضة
ــ هل انت متحجبة ؟
نعم
ــ هل عندك اهلك او اهل زوجك عايشين في فرنسا ؟
كاينين لافامي تاع زوجي بصح بعاد علينا مانروحو ما يجو
ــ هل غلطتي و كليتي شيء مش حلال ؟

مرة كليت الشكولا و كان فيها الشراب داخل و انا ماعلاباليش كي عضيتها حسيت بيه ايا رحت ديراكت رميتها بصح فاتت قطرة ولا زوج:$

 

[lina-67]

سلام جهاد
وعليكم السلام

عندك صديقات جزائريات ؟ يجو عندك الدار ؟ عرضوك في ديارهم ؟
عندي 3جزائريات و وحدة فرنسية مسلمة يجو عندي و نروح عندهم ووحداخرات نعرفم غير هاك ما يجو و مانروح
واش يعجبك ف ستراسبورغ ؟
يعجبوني الديار شحال شابيين يهبلو سيغتو اللي خارجين لافيل و يعجبني المسجد الكبير روووووووعة ما شاء الله و المارشيات ههههه

سافرتي الدول أخرى ؟
الدول رحت لالمانيا و سويسرا و لكسمبورغ و هنا في فرنسا رحت لباريس و مارساي كي جيت من البلا د اول مرة ماحوستهاش بزاف

أول مرة خرجتي وحدك بلا راجلك كي فاتت ؟

نورمال تسمى كنت موالفة نخرج معاه حفظت الطريق على بيها ما تودرتش:d

 

[lina-67]

جهاد ربي يعطيك الصحة و يقويك انا تاني حبيت نسقسي :
تفضلي مرحبا بيك
- تخدمي و لا قاعدة فالدار ؟
نخدم في الدار الطياب و لماعن هههه
- عندكم اعانات للمرا اللي قاعدة فالبيت و لا لالا ؟
كاينين اعانات سيغتو اللي عندها الدراري تتوشي كيما الخدامة
-كيفاش تعرفتي بزوجك ؟
يا اختي احنا نسكنو في نفس البلدية بصح ما نعرفو ما يعرفني و انا كنت نخدم في السبيطار ووحد المرة جا عند صاحبو يخدم معايا شافني سقساه عليا ايا عرف ابي باسكو كان يقرى عندو يومين موراها جاب امو واختو يخطبو:$
- فرق السن اللي بيناتكم يبانلك عادي و لا كبير زعمة وحدة تحب تتزوج و تقولك خطيبي كبير عليا بـ15 عام واش تنصحيها ؟
شوفي للعقلية تاع الراجل كيفاه انا الحمد لله ماني لاقية حتى صعوبة في التفاهم معاه دي فوا ننسى بلي بيناتنا 15سنة
- واش الحاجة اللي عجباتك فالغربة مكانش فالبلاد ؟
في الغربة كاين النظام و كاين لاجيستيس ما يحقروك ما يدولك حقك و ماكان لاهاذا بويو مدير لا هذا عندو المعرفة و يعجبني بزاف بزاف السيستام تاع السبيطارات و الطب ساهل كلش كاين و باطل و تروح تفوت ولا ادير اناليز نفوت انا اللي البارح جيت قدام واحد فرونسي زايد هنا كل واحد و دالتو ما كانش فرق و السبيطار اللي يداوي فيه المير و لا الوالي يداوي كيما هو اي واحد مهما كانت جنسيتو الناس سواسية بصح في البلاد ....انا خدمت في السبيطار كآارثة خلي برك وحوايج بزآآف خير من البلاد كيما قال راجلي الناس ماهيش تحرق في الفلوكة باطل بصح كاين تاني صوالح ملاح في البلاد ماكانش هنا
- الفيزا شحال قعدت باش مدوهالك ؟ يعني من نهار عقدتي حتى اللي مدولك الفيزا شحال وقت ؟
قعدت 4 اشهر ملي حط راجلي الدوسي
-كي مدولك الفيزا شحال زدتي بعدها و رحتي ؟ رحتي وحدك و لا مع راجلك ؟

جا راجلي درنا العرس في البلا د و قعدت معاهم 10ايام و جينا

 

[lina-67]

صباح الخير جهاد ربي يعينك راهم اجتامعو عليك
انا نقولك ربي يهنيك و يفرحك و لي عودة ان شاء الله :p​

صباح النور راني صبحت نجاوب هههه راني نسنا فيك

 

[أم أمين23]

اعطيكم الصحة هكا نحبكم نشاط وحيوية يلا حبوبة راني جيت وما شاءا لله راه مزالك صغيرونة :
كي جيتي الايام الاولى كنت تمشي بالفيزا تاع البلاد ومن بعد كيفاش عملتي الاوراق؟؟
احنا هنا عندنا تسجيل في مركز الشرطة وتهزي البرمسو ومن بعد تروحي للقنصلية تسجلي الاولاد وتسجلي روحك انتوما كيفاش السيستام؟؟؟
القنصلية تاعكم وين؟؟؟
كي اعود عندكم مشكل كاين مركز خاص للمهادرين اعاونكم والا لا؟؟
جهاد هاد اسمك والا كنية برك؟؟
راجلك عنطك الجنسية والا لا وشحال عندو في فرانسا؟؟
وانت ناوية تعمليها والا لا؟؟
معولة ترجعي للبلاد والا راجل مع الغربة على طول العمر؟؟؟
في البلاد عندك دار والا كي تهبطي تكوني رحالة بين العجوز ودار باباك؟؟
عندك اخوة راجلك والا لا؟؟؟ ومتفاهمة معاهم والا لا؟؟؟
المخلوق تاعك خدمتو كيفاش يعني في الليل والا في النهار ؟ يخليك وحدك بزاف والا يقعد في الدار اكثرم ن يخرج برا؟؟؟؟

 

[أم أمين23]

نسيت نقولك ربي اكملك حملك على خير ان شاء الله
وقبل ما نزيد ننسى كاين حوايج العرب عندكم يعني الماكلة واللبسة ؟؟؟
واشنو الحاجة الي سخفتي عليها وما لقيتيهاش ؟
نولي ان شاءا لله واحد واحدة باش نكملو السمانة مليحة ههههه

 

[lina-67]

ام امين نكمل لغذاء و نجي نرد
هيا لبنات وينكم صبحتو راقدين

 

[ام الحلوين]

صباح النور على الجميع
جهاد
ــ قريتي اللغة في فرنسا ؟
ــ هل عندك البارمي ؟
ــ هل تهبطي هدايا لفامي ؟ و لا غير والديك و خاوتك ؟
ــ ما هو عطرك المفضل ؟
ــ ما هي الطبخة لي يحبها زوجك كثير ؟
ــ هل سبق و جات عجوزتك لفرنسا ؟
ــ شكون جيبي من البلاد يعاونك في النفاس ؟
ــ في اي مطعم تاكلي و ماذا تطلبين ؟
ــ دارك كرية و لا ملك راجلك ؟