وتربّع الظلام.. مُسلسل حصري للمتنا الغالية

[أم راضية ~_]

رد: وتربّع الظلام.. مُسلسل حصري للمتنا الغالية

لا تخافي ميسون فأنا حجزت لي مكانا هنا في أحد الزوايا ربما لا أظهر لكنني متواجدة بصمت
إبداعكِ كبلني وقيدني بسلاسل الأمل فأنا مضطرة لأتابع مهما قَسَت الأحداث على بطلتنا إلاّ أنني أعود لأرى كيف يتسلل نور الأمل في ظلمة الظروف ..
أنا هنا
موفقة أنتِ في الدراسة و الكتابة ​

 

[وجع الظلم]

رد: وتربّع الظلام.. مُسلسل حصري للمتنا الغالية

بصح اسامة وليد خالتها
كيفاه ما تعرفش اخته الا اذا كانت اخته من الاب
على العموم حلقة شابة الله اخليك ويحفضك من كل عين حاسدة
اتهلاي في قرايتك مثل نهى وربي اجيب الخير
الله يرزقك زوج مثل اسامة قولي امين
بالتوفيق يا رب​

 

[Melia azedarach]

رد: وتربّع الظلام.. مُسلسل حصري للمتنا الغالية

بصح اسامة وليد خالتها

كيفاه ما تعرفش اخته الا اذا كانت اخته من الاب
على العموم حلقة شابة الله اخليك ويحفضك من كل عين حاسدة
اتهلاي في قرايتك مثل نهى وربي اجيب الخير
الله يرزقك زوج مثل اسامة قولي امين

بالتوفيق يا رب​

أهلا بوجع الظلم..
لو رديتي للحلقات الأولى راح تلقاي بلي أسامة وحيد خالتها لأنها مُطلّقة..
هذي اختو من الأب برك

ربي يحفظك انت ثانيك على تواجدك الممميز

يعطيك الصحة ورب يوفقنا كامل

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته

راح نشكركم كامل على الحضور المميّز


مع الحلقة الخامسة والعشرين:..

أيامي مُتشابهة .. وكل ما يعقب نهار نكون قريبة من هدفي..
والسنين راهي تجري وتجري..
أنا دائمًا كنت الماجور نتاع لبرومو نتاعي والحمد لله ... وهذا عامي السابع راح نتخرج ونولي طبيبة عامة
لكني حابة نواصل باه نولي أكثر من هاك
نولي طبيبة تعالج الأورام ..
ولانو انا الأولى عندي الحق أنو نخيّر أي تخصّص نحبو ..
حسيت روحي أنو رجعت نُهى لقديمة نتاع أيام الثانوي.. أيام تسبق الحادثة..
بمرحها وخفة ظلها..
عندي زميلات .. طبيبات كيفي.. كنت حكمت عنهم أنهم قليلات أدب لانهم ما يلبسوش حجاب..لانو فرض عين .. لكن بعد مخالطتي لقيت أنهم وشحالهم متربيين يمكن أحسن من يلي يلبسو نص حجاب..
وبهذا تعلّمت أنو المظاهر مراهيش نقطة نحكمو بيها على الناس..
حياتي ولات عندها معنى .. لأنو السلبيّـة راحت منها.. الخوف انعدم .. وكل شي مش مليح راح..
صررت نشوف كلشي بالجانب المشرق نتاعو.. ونتجنب المُظلم..
وحُبّي لأسامة كلّ يوم يزيد ويزيد..
احترامي ليه ثانيك ..
وليت نتفهم أنو طبيعة شغلو فيها العنصر الأنثوي.. ولازم عليا نتقبّل هذا الشي..
اندمجت مع المجتمع لجديد.. واديت حوايج شباب منو..
وليت نروح نصرف مع خالتي ونخرج..
وحتى أنو تكوّنت صداقة كبيرة بيني وبين سوسن..
حتى صرنا أكثر من اخوات..
لكن الشي الوحيد يلي كنت مخبياتو هو الجزء المظلم يلي تربّع على حياتي..في فترة قصيرة عددا طويلة معاناة..
مراانيش حابة نحكيلها عنو..لانو خايفة جرحي يرجع ينزف..

في الجامعة ... تعلمت كيف نفرّق بين الصالح والطالح ..منهم..
كاين أساتذة جايين يأدو واجبهم وهو التّعليم..
وآخرين باه يقضو وقت .. ويعمرو الفراغ يلي يدعو بلي مراواتهم مرهمش معمرين .. فيلعبو بالبنات.. متناسيين أنو اكيد يجي الدور على بناتهم..
ونفس الشي بالنسبة للطلاب..
لكن كاين شي تتمحور عنو هذي النتيجة هو سبب أنو البنات صارو يعاندو في المسلسلات
وغياب دور الام والأولياء.. متناسين أنو لازم البنت تتحلى بالحياء .. لانو هو الشي يلي يفرقهم عن البقية من الفئة الهابطة من المجتمع...
المهم ..

نتمنى أنو نكون حققت لبابا جزء من حلمو يلي بناه عنّي..

خويا فؤاد راه دوك في الجامعة .. ونشوفه أغلب الأوقات راهو يدرس صيدلة ... هو تعب وعانى لحتى وصل لهنا..
كي نشوفه نشوف ملامح بابا .. نشوف فيه الأخلاق والشجاعة وكل شي مليح..
نتمنى أنو يبقى هاك وميتأثرش بيلي دايرين بيه..

كل يوم نكلّم ماما..نتطمن عليهم لانهم وحدهم هناك وغريبين بين أهلهم..

اليوم نضت صليت فجري وقريت القرءان..
دعيت أنو ربي يوفقني ويمدلي قد نيتي..
وراني رايحة للجامعة..
في طريقي تلاقيت مع وجه وشحال توحشت نشوفه ..
ننسمع صوته ...
كان وجه عممّو السعيد...
فرحت .. كي شفته .. لكن تفكرت أيامي السود
الأيام يلي احتجت فيهم لأب يضمني ويحميني من الناس.. لكن ما لقيتش ..
لكن مهما كان يبقى عمّي.. وكل واحد عندو أسبابو...ومعزتو في قلبي مزالها قايمة وعمرها ما راحت
كي شافني فرح .. لكن بان عنو انو حشم ..حشم أنو يطلب مني خدمة .. وهو لما كنت محتاجة ايد ما ساعدنيش باه نوض..
سلّمت عنو .. سألت عن حالو ... قتلو وشحالني توحشتو..
طمّني.. عن الأحوال وقالي بلي ليوم جايني يطلب مني شي..
قتلو تفضّل نطلعو للدار وتشرب قهوة ونحكو
لكن هوا ما حبّش.. قالي في طريقك للجامعة نحكو...
الموضوع كان حول ابنو فريد..ابنو راهو قد فؤاد تقريبا .. نجح الباك لكن بمعدل هابط يعني عشرة ولا...
وراهو مراهوش حاب يقرا في ولايتنا ..
حاب يجي لهنا..
قالي قولي لاسامة اذا قدر يبدلو .. ويحطو في أي فرع
لانو راهو زعفان وداير حالة ومراهوش يروح يقرا كامل..
طبعا أنا منقدرش نقولو راك متهني حتان نشوف أسامة ..



بإذن الله مع حلقة جديدة..
تحيّتي​

 

[أم راضية ~_]

رد: وتربّع الظلام.. مُسلسل حصري للمتنا الغالية

امممممممممممم يعني تم تم جازو سبع سنين و كلش راهو مليح
حبيت لوكان قرعجت شوية عليها في هاد السبع سنين هههههههههه
معليش هاو جانا عنصر تشويق وحدوخر وهو عمها وأفار المعريفة مع اسامة
عندي سؤال برك : هل القصة هادي كتبتيها من قبل ولا الآن راكي تكتبي فيها؟؟
موفقة,, وراني نسنى فالحكاية :-r​

 

[Achoik_Ps]

رد: وتربّع الظلام.. مُسلسل حصري للمتنا الغالية

بوركتِ حبيبتي ميســـون ،،
لا يسعنــي ســوى الوقوف تحيّةً لكـ و لقلمـــكـِ المبدع ..
قصّــة مؤثـّـرة ، حــتى و إن كانــت من نســج خيــالكـِ
صراحــة تأسّــفت كثيــرًا لمعانــاة نهــى مع كــلام النـّــاس ، و كيــف أنّها كانت على شفا التــخلّي عن حلــم حياتهــا ، و ( كَثـّـرْ خَيـْـرْ ) أسامــة لأنـّــه أعــاد إليــها نــور الحياة و بريقهــا ، فـبـفضلــه استطاعــت تحقيــق أمنيــة والدهــا - رحمــه الله -

ننتظــر التـّــكملة على أحرّ مــن الجمــر ،،
لا تحرميــنا مــن جديـــد قلمكــِ ..

سلآم
​

 

[وجع الظلم]

رد: وتربّع الظلام.. مُسلسل حصري للمتنا الغالية

حلقة جميلة ومفيدة بصح سؤال
نهى من المفروض انها متزوجة مع اسامة
اين وصلت العلاقة بينهما يهمنا ذلك ؟
7سنين لا عشرة ولا اطفال ؟ فحتى الدين يحرم ذلك على ما اعتقد
نتمنى ان تعطينا صورة على الحياة التي تدوربينهما
لان النجاح في الدراسة شيء جميل لكن هل نهى نجحت في العلاقة الزوجية؟
يبقى السؤال مطروح لنعرفه في الحلقات القادمة
دمتي سالمة وربي يحفضك من كل شر يا رب
تحياتي يا الغالية​

 

[أم راضية ~_]

رد: وتربّع الظلام.. مُسلسل حصري للمتنا الغالية

حلقة جميلة ومفيدة بصح سؤال
نهى من المفروض انها متزوجة مع اسامة
اين وصلت العلاقة بينهما يهمنا ذلك ؟
7سنين لا عشرة ولا اطفال ؟ فحتى الدين يحرم ذلك على ما اعتقد
نتمنى ان تعطينا صورة على الحياة التي تدوربينهما
لان النجاح في الدراسة شيء جميل لكن هل نهى نجحت في العلاقة الزوجية؟
يبقى السؤال مطروح لنعرفه في الحلقات القادمة
دمتي سالمة وربي يحفضك من كل شر يا رب
تحياتي يا الغالية​

جميلة هاته التساؤلات أختي وجع الظلم
صحيح .. أين وصلت العلاقة بينهما , عرفنا بلي ولات تحبو وهو ؟؟؟
هل سوسن الي اخت راجلها ماهيش عارفة بحكايتها؟؟
هاد الحلقات الي راهم ناقصيني باش تكتمل الصورة
متشوقة نقرا المزيييد :-r:up:​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته..

مساؤكم ورد

نورتو كي العادة وزاد النور بوجودك حبيبتي أشواق.. ونشكرك على الإطراء..

بالنّسبة ليكم يا لبنات

راح نجاوبكم

يلديز غاليتي .. تصدقي أنو كلّ ليلة قبل ما نام نفكر في الحلقة الجديدة يلي نحطهالكم ..ونزيد تفاصيل ..
يعني الموضوع يلي متمحورة عليه القصة ثابت بصح التفاصيل كل مرة نتخيلها .. وندرسها مليح..

أنا نكتبها غير وقت ما ندخل باه نحطها ..

نورتي وصحيتي ..


وجع الظلم ..
بشوية بشوية.. خلي كل شي في وقتو حلو ..
راهي الحلقات جاية وراح يتّضح كل شي ..

هذا هو اسلوبي نحب نشوش الأفكار ونخلي الأسئلة تجري وراكم..
والتشويق ياكلكم..
أصبري ..
علابالي عييتك بهذي السلسلةّ..
:-r
ربّ يحفظك على الاهتمام وهذا الوفاء



تحياتي ليكم​

 

[yasmine 4ever]

رد: وتربّع الظلام.. مُسلسل حصري للمتنا الغالية

حلقات جميلة كالعادة و بانتظار القادم اللي على حساب ردك فيه بزاف جديد يا درا إلى إيجابي أو سلبي
ربي يوفقك يالحبيبة و دمت بحفظ الرحمان:d​

 

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

السلام عليييكم

هاني جييييت عندي قريب شهر غايبة بحكم القراية الله غالب

شفت تطورات بزااااااف في القصة يعطيك الصحة ميسون مازالو اسلوبك هايل و تعرفي كيفاه تعلقيلنا قلوبنا بهاد الحكاية "الدليل راني في شحاال ما جيتش و غي دخلت تفكرتها جيت نطل عليها "

ربي ينولك الي في بالك و يوفقك ان شا الله

بانتظار باقي الحلقات

في أمان الله
​

 

[أم راضية ~_]

رد: وتربّع الظلام.. مُسلسل حصري للمتنا الغالية

السلام عليكم
أين أنتِ يا سوسن ؟؟؟؟؟
وصل الشوق لأعلى مراتبه و الفضول لأقصى مستوياته
عساكِ بخير ؟
​

 

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

طولتي الغيبة تاع الصح يا سوسن ان شا الله المانع خير حبيبة

ربي ينولك الي في بالك و يوفقنا أجمعين
​

 

[Melia azedarach]

رد: وتربّع الظلام.. مُسلسل حصري للمتنا الغالية

السلام عليكم ورحمته تعالى وبركاته
أتمنى أن تكونوا بخير احبتي
اشتقت كثيرًا للتواجد بين احضان لمتنا الحبيبة
لكن تجري الرياح بما لا تشتهي السفن
هكدا هي الدنيا تصرفنا .. بماشاغلها عن الاحبة
اعتذر عن الانقطاع ...
وباذن المنان سأعوّض عن التأخر..
أشكركم على وفائكم
دعواتكم

تحيتي

ميسون​

 

[وجع الظلم]

رد: وتربّع الظلام.. مُسلسل حصري للمتنا الغالية

السلام عليكم ورحمته تعالى وبركاته

أتمنى أن تكونوا بخير احبتي
اشتقت كثيرًا للتواجد بين احضان لمتنا الحبيبة
لكن تجري الرياح بما لا تشتهي السفن
هكدا هي الدنيا تصرفنا .. بماشاغلها عن الاحبة
اعتذر عن الانقطاع ...
وباذن المنان سأعوّض عن التأخر..
أشكركم على وفائكم
دعواتكم ​

تحيتي​

ميسون​

السلام عليكم
والله لما شفت المصباح شاعل
قلت اكيد القصة تنادينا
لكن:cray02::dunno01:
المهم اشتقنا اليك والى قصصك المشوقة
ان شاء الله تكوني بخير وعلى خير
تحياتي:regards01:​

 

[أم راضية ~_]

رد: وتربّع الظلام.. مُسلسل حصري للمتنا الغالية

السلام عليكم
لا عليكِ اختي ميسون
صح حنا رانا على نار تحرق ومتشوقيييييييييييييييييييييييييييييين نكملو القصة
بصح الحمد لله كي وليتي لينا بخير وعافية
وربي يوفقك في دراستك و تلقاي وقت تحطيلنا الحلقات ^^​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته...
نتمنى أنكم لاباس ,,
والله غير راني حشمانة بزاف ...
لأنو طوّلت عليكم ويمكن دخلكم الملل...
لكن والله غير الظروف القراية والانترنت ثقيلة أغلب الوقت مكانش..
البحوث تجري ورايا وكلشي...
عييت ,, والله غير توحشت أيام نقعد فيهم لهنا لساعات وساعات...
المهم كثّرت الكلام..
مع الحلقة السادسة والعشرين:

عمّو السعيد وشحال بان الشيب في راسو ,,
وشحال تبدل وجهه .. التعب أكل كلشي حتى ضحكتو
توحشتو أكثر مما نقدر نوصفه..
يمكن تقولو بلي راني حاقدة عنو لانو تخلا عني.. لكن شيء مليح انو الانسان يدفع بالتي هي أحسن..
طبعا طلبت منو يدخل للدار على الأقل يشرب قهوة..
مي محبّش قال عندو صوالح..
شوية الصمت غطا على اللقاء حبيت نكسره بقولتي : توحشتك عمو .
عمي عينيه دمعو.. قالي وأنا ثانيك ..كل ما نروح نشوف جداتك وداركم نحس فراغ كبير ,, بسبب غيابك وغياب خويا الله يرحمه...
ختم اللقاء بالسلام وراح..
كمّلت طريقي لجامعتي..
درست ..
وفي الرجوع قلت لأسامة قالي نشوف صحابي وان شاء الله نبدله...
الأيام مشات صح بسرعة لكن في السبع سنين يلي فاتو كانو أحسن سنين حياتي..
من جهة أنو تذوقت طعم الأمومة لخمسة أشهر لكن قدر الله أنو مشفتش التوأم يلي كانو في بطني..
وشحال بكيت.. لأنو كنت حابة يتملاو أيامي ببكية بيبي..ضحكتو .. ألعاب هنا ولهيك..
يمكن ربي شافلي الخير أنو ما نولدش التوام .. لربما انو يجو مرضا ولا يخرجو عاقين ولا ولاد مش صالحين وولالا
الحمد لله على كل شيء..
مي أنو تحسي شي في بطنك يتحرك يتغذى منك ..
وشحالو مليح الاحساس بالأمومة..تحس بالمسؤولية تجاه ولادك
لكن بقا شي من الخوف من المستقبل أنو بناتي لو كبرو .. كيفاه نحميهم من أنو يقيشو كيفي معاناة ..
أسامة كان داما يقلي .. تخلصتي من كل شي مزالتلك هذي الفكرة لازمك تنحيها من راسك
خليك تشوفي المستقبل لأولادنا مليح..مش لازم التاريخ يعيد نفسه...



نعتذر على الحلقة لقصيرة مي معليش... خير من مكانش
​

 

[نزهة الفلاح]

رد: وتربّع الظلام.. مُسلسل حصري للمتنا الغالية

الله يسعدك ميسون
متابعة
الله يزيدك من فضله حبيبتي
​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركــــــــــــــــــــــــــاته
ناس لمتنا الغالية

أهلين بنزهة نورتي أختي وبنت جارتنا المغرب لعزيزة
رب يحفظك ..

نعتذر لأنو شكلي طفّشتكم من هنا.. وليتو ما تبانوش...لانو طولت عليكم يا لبنات..



مع الحلقة السابعة والعشرين:

رغم أنو عندي خوف من مستقبل ولادي..لا يكون مُظلم..
لكني حابة يكونو عندي..ونولي أم
وراح نحميهم راح نقتل علاجالهم وعلاجال لهنا نتاعهم..
اليوم .. الرونديفو نتاعي..عند لطبيبة ..
لأنو بديت رحلة العلاج بعدما ضيعت التوأم..
وكل شهر تقريبا نروحلها..
أصبحت صديقتي هذي الطبيبة الحنونة.. كي نشوفها نتفكر أستاذتي..
كان اسمها وئام..
على قدر ما نروح نعالج عندها على قدر ما نحكي معاها...
نفرغ قلبي..
كانت هي ثانيك ضحية مُجتمع ظالم..
لكن مش كيف حالتي..
هي تزوجت بالغصب من بن عمها..يلي كان سكير وكل الصفات البذيئة فيه..
أيامها كانت مُرّة معاه..
مقدرتش تعيش معاه..ومع القذارة نتاعو ..
هربت ..
راحت لبيت باباها..
باباها يلي مات وخلاها هي ويماها مع خوها ومرتو الشرانية..
ماماها مشلولة..
كانت تخدم فيها تقلها نخدمك طول عمري ولا نعيش مع هذاك الكلب..
مرت خوها كانت تسمها تقلها يا لعايبة ..
هرابة من بيت راجلها..
المهم مخلاتهاش تتهني في حياتها..بكلامها وفعايلها
كان وقتها عمرها 17 سنة..
أحلامها أكبر منها
مي لعين بصيرة واليد قصيرة..
ماتت يماها
وعاشت في جحيم..
حبت تتهنى منو..
أقنعت خوها بأنها لازم تواصل قرايتها وتنجح باه يتهنى من وصايتها ..
وطبعا خوها يهمو مالو..خلاها..متناسي أنها اختو من لحمو ودمو ولازمه يحميها ويرعاها
خلاها نجحت لباك دارت طب .. وتخصصت السنين يلي مرو عليها كانو مُرين ..
تعبت لكن في الأخير ريحت ..تحملت الجوع والبرد..وكل شي..
لكن راهي ضرك طبيبة تاكل واش تحب تلبس واش تحب ,,
خوها مات في حادث وراهي ضرك متكفلة بمرتو وولادو... رغم انو مرت خوها ذوقتها يلي ما يتذاقش...
قاتلي راهي ضركة .. تعاملها معاملة مليحة بعد ما تكوات وحست..وانها عقالت

هيه ... لما الواحد يشوف قصص كيف هاك ..
ياخذ جرعات زيادة من الأمل..ويدمن عن الصمود..
والانسان لازم يدفع بالتي هي أحسن ... ماشي الشينة بالشينة..
وبزاف قصص ..لكن متخبية..
كنت نحسب أنو قصص كيف هاك تصرا في المناطق المتخلفة النائية .. لكنها في كل مكان..لأنو البشر هو يلي يتحكم في افعالو ما شي المنطقة..



المهم .. قاتلي
بلي راني بالحمل في شهري الأول..
وقتها كنت في العام السادس..في لقراية
وشحالني فرحت..

كنت راح نطير..
روحت للدار
لقيت خالتي ..
أسامة كان يخدم في الميكرو..
كانو يحسابوني كيما العادة .. نروح نح ضيقة روحي..
لكني فاجأتهم بحملي..
خالتي وشحالها فرحت وأسامة ثانيك
يومها نتفكر أنو ما رقدتش
بايتة نصلي ونشكر في ربّي

 

[yasmine 4ever]

رد: وتربّع الظلام.. مُسلسل حصري للمتنا الغالية

ألف ألف ألف ألف حمد الله عالسلامة يا حبيبتي يا ميسون
شحال توحشت نشوف هاذيك اللومبة شاعلة ههههههه
ان شاء الله راكي مليحة و قرايتك رهي لاباس
الحلقات جميلة جدا و في انتظار التكملة كالعادة عزيزتي
شكرا جزيلا على مجهودك و ربي يوفقك في قرايتك و تفرحي عايلتك ان شاء الله
تحياتي لك أختي العزيزة^^​