ماذا ستطبخين اليوم سيدتي انستي الجزء **34 **

[samah06]

رد: ماذا ستطبخين اليوم سيدتي انستي الجزء **34 **

صباح الخير عليكم اخواتي واش راكم
راكم لاباس الحمد لله
اطباقكم رغم قلتها مع الشيء اللي مضى الا انها تكفي وتوفي ونحسو بلي كاين اهل للكوزينة وميخليوهاش خاوية
بسومة رغم نفاسك ومريومة الله يحفضها الا انك ما زلتي وفية ربي يشفيك لوليداتك ولينا ثاني لاننا كلنا نبغيوك
ام خديجة ام منصف ام فيروزايارا حاملة المسك واللي نسيتهم اطباقكم تشهي يعطيكم الصحة
انا راني مازلت في الركود تاعي راني مع لعراس وقرب عرس بنت اختي لازم نقومو بيه ثاني
وزادلنا العيد وكسوة الاولاد راهم يركلاميو مبغاوش الكبش وحدو
قلت اليوم في المساء نديهم ونخرجو كاشما نلقالهم خويجات ملاح
وزادو حاكميني غير بابا مكانش هنا وانت درتي رايك فينا ههههههههههههههه
سلامي ليكم كاملات دون ان انسى اخي معتز الله يحفضو
كاش اخبار على حدة هي اللي عندها الجديد راهي فوتت عرس وليد خوها لكبير

 

[ضوء الخيال]

رد: ماذا ستطبخين اليوم سيدتي انستي الجزء **34 **

السلام عليكم

من أجلِ إحياء القسم من جديد أريد مُشاركتكم اليوم ببعض مأكولاتنا كل مرة أضع صور بحسب الوقت الذي عندي

​

 

[oumsif]

رد: ماذا ستطبخين اليوم سيدتي انستي الجزء **34 **

صباحكم بالخير لبنات واش احوالكم ان شاء الله تكونوا بخير
جبتلكم اطباق من عرضة درتها البارح

الجاري بالفريك ما صورتوش هو الديسار والتاي

هدي الطابلة

هدا بريوش درتو للفطور الصباح

اللهم ادمها نعمة واحفظها من الزوال

 

[ام نوسه]

رد: ماذا ستطبخين اليوم سيدتي انستي الجزء **34 **

يعطيكم الصحة
وااااااااااااااااااااااااو سموره روعه كلشي بالطبع ربي يباركلك في سيفو عرضه وعليها الكلام
واذا حبيتي اعطيني وصفة البريوش
ام منصف محجوبه تسخف
ضوء الخيال الطاجين رايح ينطق يشهي
مرحبا بعودتك بسوم كلشي بالقدر

 

[oumsif]

رد: ماذا ستطبخين اليوم سيدتي انستي الجزء **34 **

الله يسلمك ام نوسة وعيشلك وليداتك
في ما يخص وصفة البريوش
20غ خميرة الخبز/500غ فرينة/5بيض/10غ ملح/60غ سكر/250غ زبدة/برش قارص
دوب الخميرة في شوية ماء دافي
في روبوا اوبيترا او قصعة حطي الفرينة السكر الملح خلطيهم مع بعض زيد اعليهم الخميرة والبيض وحدة بوحدة مع الخلط وزيد الزبدة طرية خلطي مليح خليها ترتاح 30د و من بعد حطها في المول مدهون وخليها تطلع حتي تضاعف حجمها ساعة اواكثر ومن بعد حطها في الفرن الطيب 30د علي 180 وشهية طيبة

 

[nada242008]

رد: ماذا ستطبخين اليوم سيدتي انستي الجزء **34 **

السلام عليكم لبنات
جيتكم وجبت طيابي تاع ليامات لي فاتت وكل مانقدر نصور ونشارك اكيد مانقدرش نتاخر عليكم
ان شاء الله الجميع بالف خير

تطبيقي لبينيي الغالية شهرا جا تحفة تحفة يعطيها الصحة وربي يحفظها

من داخل فارغ فكرني في الفريكاسي تاع ابتسام

حشيتو بالنوتيلا امممممممم

الاسبوع الجاي ان شاء الله مسافرة .. نقولكم تبقاو على خير وتهلاو في رواحكم واكيد لي عودة باذن الله

 

[ضوء الخيال]

رد: ماذا ستطبخين اليوم سيدتي انستي الجزء **34 **

بصحتكم كامل وش طيبتوا


تروحي وترجعي بالسلامة أختي أم ندى
​

 

[كوثر الوهرانية]

رد: ماذا ستطبخين اليوم سيدتي انستي الجزء **34 **

مساء الخير خوتاتي
مبروك العتبة الجديد
بصحتك لبنت واش طيبتوا اله يقوي الخير عليكم
اعدروني منيش نشارك بزاف سامحوني خوتاتي والله عندي ضروف راني كل ما نقدر نشارك هنا
اليوم الغداء لوبيا خضرة على طريقة اختتتي ياسمين و العشاء فريت و ستاك و سلاطة و الحمد الله
سمورة اف شكر على وصفة البريوش جاري التطبيق
ندوشة البيني جاك فوووووووووووووور بصحتكم تروحي و ترجعي بالسلامة في امان الله
تحياتي الحارة للجميع
بسومتي توحشتك ياسر برشة بوكوا

 

[samah06]

رد: ماذا ستطبخين اليوم سيدتي انستي الجزء **34 **

مساء النور لبنالتلا واش راكم
يعطيكم الصحة كامل
ضوء الخيال الطاجين رائع رائع رائع راح نبدا فيه من ليكرون
سمورة عرضة وعليها لكلام وحبيتك تقوليلي الكورنيات باه ملتيهم
ندوش شيفة الشيفات اطباقك تكاد تنطق وتشكرك بارك الله فيك اختي والباقيات الصالخات ليلة سعيدة حبيباتي
انا راني رحت لدار بابا نشايخ وعرضنا خويا تعشينا عندو
دارولنا جاري فريك وتليتلي والديسار عنب وايجاص وسلاطة خضراء بالطماطم والزيتون والمايوناز
وكوكا كولا والماء ورحمة ربي من فوق

 

[samah06]

رد: ماذا ستطبخين اليوم سيدتي انستي الجزء **34 **

ندوش سفر ممتع ليك اختي وربي يسرلك امورك وتروحي وترجعي بخير حبيبتي

 

[كوثر الوهرانية]

رد: ماذا ستطبخين اليوم سيدتي انستي الجزء **34 **

سماح بصحتك العشاء عند خوك تهنيتي من الطياب اليوم

 

[samah06]

رد: ماذا ستطبخين اليوم سيدتي انستي الجزء **34 **

اليوم انا قاعدا نشايخ والعشاء جاني متعبتش لكن كي روحت ندمت اني بقيت
لقيت هاذيك الكوزينة قريب شعلي
اتخيلو اللي يسخن القهوة وهي في لبراس واللي يقلي البيض في لتر زيت واللي يخط الطون في طبسي خاص بالبربوشة راني دخلتها غير نشرب خلعت قفلتها وخرجت خلعت منها

 

[samah06]

رد: ماذا ستطبخين اليوم سيدتي انستي الجزء **34 **

الله يسلمك كوثر اختي
علبالك خويا عندو 4 سنوات متزوج اليوم وين ذقت طبيخ مرتو

 

[samah06]

رد: ماذا ستطبخين اليوم سيدتي انستي الجزء **34 **

لبنات تصبحو على خير
اشواق راهي تنادي عليا حبت ترقد

 

[oumsif]

رد: ماذا ستطبخين اليوم سيدتي انستي الجزء **34 **

صح عشاكم لبنات
سماح بصحتك العرضة وطبيخ مرت خوك اما لكورني حشيتهم بالبطاطا مغلية مربعات والطون والفرماج مربعات
فريدة واش راكي اختي واش راهم لولاد ان شاء الله تكونوا بخير

 

[samah06]

رد: ماذا ستطبخين اليوم سيدتي انستي الجزء **34 **

صباح النور لبنات
والا مازالكم راقدات يا فنيانات والعيد جاي
نوضو اللي توجد شخشوخة واللي ادير مقروض واللي تنفض دارها
والقاعدا تدخل للمنتدى تقصر
حنا عندنا السخانة واحد لا يمسك بلاستو لا في نوم ولافي قعاد
راني فاتحا التواقي وندورو وخلاص الاولاد راحو يقراو بقيت انا سيقت وراني قاعدا

 

[ضوء الخيال]

رد: ماذا ستطبخين اليوم سيدتي انستي الجزء **34 **

السلام عليكم

صباح الخير عليكم يا الفحلات كل وحدة باسمها :-h

جبت صور في لاباراي عندي

شربة فريك بلحم الدجاج

حميس لوبيا خضراء باللحم الأحمر

شلاظة زروندية وشوي طوماطيش ودنجال حاجة خفيفة برك هههه

بصحتكم كامل واش طيبتوا [ اللهم أدمها نعمة واحفظها من الزوال ]
​

 

[oumsif]

رد: ماذا ستطبخين اليوم سيدتي انستي الجزء **34 **

صباحكم بالخير لبنات
خيال الضوء بصحتك الشربة
سماح خليهم يرقدوا :down:

 

[ندى الورود]

رد: ماذا ستطبخين اليوم سيدتي انستي الجزء **34 **

السلام عليكم
مساء الخير عليكم يا لماويات
إن شاء الله راكم كامل بخير الغائبات والمتواجدات
عدت من جديد الله غالب الميكرو تاعي كان معطل جات ورا بعضها عرس خويا وبعدها الميكرو تعطل



​

 

[samah06]

رد: ماذا ستطبخين اليوم سيدتي انستي الجزء **34 **

ندوش مرحبا بيك مرة اخرى بعد العطلة اللي اخذتيها
اكيد عندك صور لعرس خوك هيا يا فحلولة اللمة وريهالنا راني عندي عراس تاع الدار بالاك نسرقلك كاش فكرة
نعرفك ام الافكار