ام محمد لاشروط لا والو ادخلي هنا راه غير النية والقلب الصافي
نانوس ومليكة واللي طلبو البونارين هاكم الطريقة نتاعو لكن راني مصورتش الخطوات نوعدكم نعاودو ونصورهم ونحطوموضوع
ن
بداو بسم الله
الحاجة الاولى نحطو حبة بطاطة متوسطة على النار تتشرشم في الما و الملح هنا كاين اللي ميديروش البطاطة يديرو في بلاصتها الخبز المرحي نص كاس بصح انا جربتهم في زوج ونتاع البطاطة يجي خير وكاين اللي يديروه لحم مرحي وحدو تاني جربتها و لقيت بلي البطاطة تطريه ميجيش ناشف متفاهمين؟
نجيبو حبة بصلة صغيرة نرابيوها و نذبلوها مليح في شوية زيت و زبدة ومبعد نضيفولها اللحم المرحي حوالي 250غ الى300غ نحطوه يتقلى مليح ثم نضيفولو الملح و الفلفل الاسود انا هنا ضفتلو تقريبا ثلث حبة جومبو ودرتش الملح خلاص
كي تنحيوه على النار امعسو بالفرشيطة حبة البطاطة و 3 حبات فرماج بورسيون او ما يعادلها انا خدمت بالشاف درت نص وضيفو المعدنوس كمشة مليحة يحب المعدنوس وفي الاخير كسرو عليه 2 بيضات الى 3 حسب الحجم
جيبو المول نتاعكم اي مول القلو الدائري هذوك نتاع القطايف مثلا اللي عندكم في الدار ادهنوه بالزبدة وذريو لاشابلير داخلهم رايحة تلسق في الزبدة وفرغو الزائد
بالملعقة فرغو الخليط نتاعكم داخل لي مول وعمروهم مليح ماراحينش يطلع ولا حاجة كي تعمروهم جيبو الفرماج نتاعكم و دخلو بالطرف داخل كل حبة ودخلوه للفوغ يطيب
في الاخير تلاحظو بلي راني حاطة طبقة بيضاء من فوق هذيك راهي مايوناز بالفرماج غالب عليها ذوق الفرماج اخدموها وحدكم واللي معنوش يخدم بالمشرية نورمال خطراكش البونارين في اصلو يحب لحماضة حنا كنا نقدموه بالقارص كي تديرو المايونيز تكونو عوضتو القارص وهذا الشكل النهائي للي مهيش مراجعة مليح:d
هذه الصورة تم تصغيرها. إضغط هنا لعرض الصورة بالحجم الطبيعي. أبعاد الصورة الأصلية هي 960×640.
الجماعة الباقين راني مزلت مقرعجتش شفت غير هذي الباجا سامحوني
سارة يعطيك الصحة امم شهيتينا كي العادة و فيما يخص لا بات بغيزي انا تاني متعجبنيش في لي كيش و لي صالي اون جينيغال نحبها سيكري تجي هاااايلة
ام محمد مرحبا بحلوياتك دخلتينا بالحلو ربي يحلي ايامك
