- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 32
- محل الإقامة
- قسنطينة
- الجنس
- أنثى
السّلآم عليكم يآ ناس اللّمة الغاليين
أولاً شُكراً لكُم لاستِماعِكُم لحركةِ أقلآمِنا وهي تسرُد ما تبقى دآخل القلب من ذكريات
وثآنيــاً نشكر صاحبة الفكرة لأنها فتحت لنا مجآل للتعبير عن ما يجول بفكرنا
أما بعد ، كاين العديد من القصص لي مازالت راسخة بالذاركة واليوم رايحة نذكر وحدة منها
هاد الحكاية صراتلي بعد ما جبت الباك ، يعني أصلا كيفاه جبت الباك وحكاية طويلة لأني تعرضت للكثير من الصعاب ومرض وكل شي وراحلي العام كامل وماقريتش ،لدرجة واحد ماكان حاط بلي رايحة ننجح لكن بالعزيمة والإرادة لي عطاهالي ربي سبحانو نجحت والحمد لله وبمعدل 13 ، يعني الجميع تخلعو كيفاه لي كانت راقدة في الفراش ومادارتش ليكور نجحت؟ لكن في النهاية نجحت ومن بعدها درت عملية وشفيت من المرض والحمد لله ، المشكلة لي رايحة نحكي عليها هي لما دخلت للجامعة، المعروف أنو كل إنسان تحصل على شهادة الباكالوريا لما يكون رايح للجامعة اول مرة تحكمو الفرحة ولا على الأقل نقدرو نسميوه فضول ، لكن انا يا خاوتي النهار الأول لي كنت رايحة فيه للجامعة كان قلبي يخبط مليار في الثانية كلي رايحة للحبس، ومبعد قلت بالاك خلعة لأنو اول مرة رايحة للجامعة ، لكن المشكل أول مادخلت للجامعة صدقوني يا خاوتي شفتها ظلمة كلي شخص مطفيين عليه الضو ، بالرغم من أنو رانا مازال مادخلناش للبلوك رانا برا ونشوف في الظلمة كلي الجو فيه سحاب والجو والله صافي والسما زرقا ، أنا ضنيت أنو أول يوم برك ومبعد نوالف كي الناس،
وماكنتش علابالي بلي الظلام هادا رايح يكون معايا عام كامل ، والله عام كامل نهار ماشفتش فيه النور، مع ندخل للمحاضرة قلبي يضياق ونشوف المدرج مظلم كلي نور مافيه ويوليو دموعي في عيني كن مانخبيهمش الناس كامل تشوفهم، ومبعد وليت نهرب، اتخيلو نروح نقرا وماندخلش للمحاضرة ، ومارانيش من النوع لي يكره القراية بالعكس كل شي وإلا القراية غير قرايتي لي مانلعبش بيها، وليت كل صباح قبل مانروح للجامعة نبدا نبكي ودموعي يوليو شلال صدقوني كلي شخص رايحين يدبحوه ولا كلي تلميذ تاع إبتدائي قاعد يبكي قبل ما يروح يقرا، ماما تخلعت قاتلي إذا عندك مشاكل في الجامعة ولا كاش مضايقات قوليلي ، لكن أنا بنفسي ما علاباليش واش صايرلي، كنت ندخل للتطبيق غير بالسيف وإذا دخلت عقلي في بلاصة والدرس في بلاصة ، اتخيلو حتى كي نجي في الحافلة تاع الجامعة ما نحبسش قدام البلوك تاعنا نكمل مع الحافلة حتى لفوق ونجي على رجليا ، لدرجة البلاصة هاديك مانحملش حتى نهبط فيها ، لما يجيو الأمتحانات ونبدا نحفظ راسي يولي يوجع لدرجة ما تقدروش تتصوروها ،صدقوني عديت عام كحل، غير بكا وغير هم ، لدرجة اتخيلو لافيشاج ومارحتش شفتو ، اتخيلو ماشفتش إذا راني ناجحة ولالا حتى العام لي وراه كي بداو التسجيلات تأمنوها هادي ؟؟ ، نهار رحت للتسجيلات كان لازم على الناجحين كامل يجبو ورقة باه يسجلو ، وأنا مع دخلت الإدراة وهدرت مع لي تخدم تما قاتلي ماكانش ورقتك بيناتهم راكي عاودتي العام ، هاديك الدقيقة والله العظيم يا خاوتي مع قاتلي عاودتي العام الستار لكحل لي كان بين عينيا نزل ، صدقوني الظلمة هاديك مع سمعت الكلمة راحت ، أنا من الصدمة بداو غير دموعي ينزلو ماقدرتش نسكت ، مافهمتش إذا كنت نبكي كي عاودت العام ولا نبكي على الظلمة لي عشتها لمدة عام كامل ، صدقوني بعد البكا هاداك كامل وليت حييت حسيت كلي رجعت للدنيا ، الناس لما يسمعو عاودت العام يضحكو عليا يقولولي باينة ماقريتيش لكن انا مانحب نقولهم والو ومانحبش نبرر، نقولهم كانو عندي ظروف وخلاص ، صدقوني من وراها 3 سنين قريتهم كنت الأولى على مستوى الفوج تاعي ، كلي كنت نكدب من قبل ، بصراحة حبيت نبرهن للناس بلي ماشي أنا لي ماحبيتش نقرا الظروف كانت أقوى مني ،وهاد العام تحصلت على شهادة الليسانس وكنت في المرتبة السابعة من بين 154 شخص وكن ماش واحد الاستاذ كن راني من بين الخمسة الأوائل ، تأمنوها درك هادي يا خاوتي ؟؟ ، نشفا عليها نهار دخلت الجامعة بعد هاداك العام لكحل ، بقيت نشوف معاها وقلت لصاحبتي " ماجاتكش الجامعة ضاوية هاد العام؟؟" ولات تضحك عليا قاتلي تتمسخري بيا؟؟ رانا برا ؟؟ ، قلتلها هيه كلي بكري كان كاين السحاب، صدقوني تخلعت فيا وبقات تشوف معايا، صدقوني كي نتفكر هاداك العام يجيني حلم والبلوك لي قريت فيه العام الاول للدرك ماندخلوش إلا في حالة الضرورة ، كاين ناس لي حكيتهلم قالو هادا سحر وكاين لي قالو عين ، لكن أنا الشخص هادا لي نقولو صح زعما كاشما دارلي على القراية مانوكل عليه ربي ما ندعي عليه بالشر بالعكس نشكرو بزاف ، لأنو بسبتو زادت ثيقتي في نفسي، وبسبتو زدت تقربت من ربي وبسبتو تعرفت على ناس جدد وكسبت محبتهم، وبسبتو زدت تميزت كتر وكتر ، وربما كن ماعاودتش العام بالاك مانوصلش للتميز لي راني فيه درك ، خاطر نأمن بربي سبحانو كل شي من عندو خير ، ودايما كنت نقولو يا ربي إذا نجاحي فيه خير نجحني وإذا فيه شر ماتنجحنيش ، المهم اسمحولي بزااف طولت عليكم والهدف الاساسي تاعي كي حكيتلكم حكايتي خاطر علابالي ناس اللمة يفهموني ويحسو بيا،
المهم اتهلاو في روحكم وربي يوفق الجميع ، ســـلآم
