- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يا ناس اللمة الغاليين
ان شاء الله راكم لاباس؟
(جاوبوني ولو لمرة وقولو رانا لاباس
)المهم ياخاوتي رايحة ندخل مباشرة في الموضوع ولي راهو واضح من عنوانو
ربما يبان الموضوع قديم وشفناه بزااف وكرهنا منو لكن قررت نطرحو غير باه نفرغ قلبي لي راهو معمر ورايح يطرطق
وليت نكره النهار لي نخرج فيه من الدار, مع انو خروجي غير للضرورة ومن الجامعة للدار ومن الدار للجامعة
أوّلا كرهنا من ظاهرة اسمها المضايقات تاع الشباب , وين ماتروح يعسو فيك في القراية , في الطريق, عند الحانوت, في دارك
ربما كاين لي يقول من اللبسة الفاضحة تاع لبنات, صح لي لبستها خارجة الطريق راهي باينة هي لي تجيب لبلا :down:
بصح ياخاوتي رانا نمشيو وعينينا في الأرض كاش نهار نخبطو في بوطو , قريب الكارلاج نحفروه بالنظرات تاعنا لدرجة الحشمة :$ وهكاك مايطلقوكش
غير تجي معدي حتى تسمع الهدرة هاديك الباهية تدخل في ودنك , نكره حياتي والله العظيم ونتمنى لوكان ماخرجتش خلاص من الدار
ووالله العظيم كن جا عندي خويا ولا كن جا بابا ما يخدمش كن نقولو يوصلني لباب الجامعة غير باه نتهنى من هاد العباد :sport01:
المهم لا علينا , نوليو للحافلات
ماش رايحة نحكي على الحشر هاداك وعلى الدبزة والتقابيد لي قايمة تما وغيرها من الأمور لأنو حكات عليها إحدى الأخوات في موضوعها
لكن لي رايحة نحكي عليها هي المضايقات وفي نص الحافلة
انا من عادتي دائما نروح في حافلة الجامعة ولكن ساعات تتحتم عليا نروح في الحافلات العمومية وتما تبدا المعاناة
لي يحشر فيك, لي يخزر فيك, لي يهدرلك كلمة خارجة الطريق وزيد غير يلقاو مرأة قاعدة وحدها يجيو يجريو شكون يقعد قدامها
روح اقعد قدام راجل علاه لاصق في جنابنا , والله شي ينطق
يعني تولي المرأة تحس انها ماشي في مكان آمن خلاص ,و تولي تحكمك الخلعة كي تكون رايح تركب في حافلة
( نحكي على لي تحشم ماش على لبنات لخرين خاطر هاديك راهي ترجعلو بابتسامة ولا دير معاه قصة طول )
والمشكل الأكبر نتا يا الأخ الجزائري ولا يا الأب الجزائري ولا يا الزوج الجزائري لما تكون راكب وتشوف في طفلة تتلقى مضايقات ماتقدرش تنطق؟ مايوجعكش قلبك؟
ولا على الأقل خليلها بلاصتك , مرة صراتلي كنت راكبة في الحافلة ورايحة لبلاصة قريبة يعني مشية 5 دقائق ونلحق وكنت واقفة
وكانو قاعدين زوج شباب مع بعضاهم ويحكيو ويضحكو وصواتهم طالعة, المهم واحد فيهم شاف فيا مليح ومن بعد جا ليا قالي اقعدي في بلاصتي
انا عن نفسي قتلو بارك الله فيك درك دقائق ونلحق وننزل, و هاداك هو الصح باقولي دقائق قليلة ونلحق وزيد ماعجبونيش بهدرتهم والضحك تاعهم كيفاه نروح نقعد قدامو ونحشر فيه؟ :down:
المهم لا علينا بقى يشوف معايا مليح ومن بعد قال " تعطيهم بلاصتك ويشنفو .. يخي تربية خاسرة "
درك قولولي انا لي مهبولة ولا هو لي مرفوع عليه القلم :s, انا لي قلقني ماش كي هدر, لي قلقني حافلة كاملة فيها رجال الله يبارك واحد فيهم مانطق
واليوم ركبت في الحافلة نفس الشي تلقاهم بهاديك الحركات البايخة وهاديك الابتسامات التافهة, وفي الأخير كي لحقت للبلاصة لي ننزل فيها
قلت للروسوفور راني ننزل هنا, لأني شفتو مكمل وماش رايح يحبس , ساع قالي "علابالي بلا ماتقولي اصلا نعرفك وراكي عام كامل ونتي تركبي معايا كيفاه تحبي ننساك "
لا حول ولا قوة إلا بالله :-o, بقيت نشوف معاه , رايحة نقولو كبير بشلاغمك وتكدب ؟؟ اصلا راني نركب في الحافلة تاع الجامعة وين تشوفني؟
واصلا كن جيت مانحشمش كن قتلو احترم نفسك ساع ومن بعد اهدر , ياخي عباد قلال تربية
صدقوني وصلت معايا للآخر , وليت مانضويش
يعني علاه ماكانش احترام بيناتنا كي نكونو راكبين في الحافلة ؟, علاه حتى نحشرو في بعضانا ونضايقو بعضانا؟
علاه حتى تقعد وتعس في جنابك, ماتمنع من شايب ماتمنع من شاب
يعني الشباب هادو ماعندهمش كرامة؟؟ اكيد حاشا لي مايستاهلش, يعني خلي روحك معزز ومكرم وعلاه حتى تبع في فلانة وتجري ورا فلانة وتضايق في فلانة
هادي لي راهي راكبة راهي في مقام اختك وبنتك ومرتك علاه حتى تخليلها هدرة خارجة الطريق ولا تضايقها ؟
مالقيت مانهدر وقلبي معمر صح نخلي المجال ليكم واذا راني غالطة قولولي راكي غالطة
تحياتي للجميع
