احكمو دياركم واشي هذا

[خفيفة الروح]

هيا نحكيو شوي على عفسة ل pizzeria لتعلمناها حنا نسا تاع سطيف

لpizza مليحة مهما نديروها في الدار ما جيش كيما تاع برا هذي مفروغ منها ......

ما نعرف كمنتعبوش عليها ولا كي منغسلوش لماعن تاعها

المهم راني نشوف presque كل pizzeriat معمرين غير نسا و في كل وقت تلقانا تم

تقول ميتين بشر

تروووح صباح تلقانا على 12 تلقانا على 4 تلقانا على 6-7-8 surtoutفي صيف

عادو الرجالة يحشمو يدخلو مساكن انا خويا قالي ايلا نحب ناكل بيزا نروح فلييييييل

والله غير عيب علينا

كانت النسا تحشم تاكل برا بصح ذك عادت نووووووورمال قاعدين يشايخو و ياكلو على

طوابل بينهم و بين trotoireغييييير لكارو تاع la vitrine اللي رايح يشوف و اللي

جاي يشوف


واش تعلقو

 

[لؤلؤة قسنطينة]

رد: احكمو دياركم واشي هذا

السلام عليكم
تم الاعتماد غاليتي
وكأول محاولة ليك في قسم واش راك تهدر نقولك احسنتِ موضوع مميز
ولي عجبني في الموضوع كي قلتي حنا النسا هههههه
بصراحة يا أختي والله العظيم نحشم ونموت باه نخرج وناكل برا بحدا الرجال وهوما يتفرجو فيا
درتها مرة فقط او زوج وكنت مع وحدة من العائلة وبطلب منها ودخلنا لمكان محترم الحق وواسع وكبير وعبد مايشوفك
بصح تاع الصباح في البيتزيريا ولعشية في البيتزيريا هادي لالا
وبالعكس نحب البيتزا تاع الدار خير, نديروها في عقلنا وتكون نظيفة وناكلوها آلاز , خير مانروح في نص الطرق
ونحشر في الرجال باه ناكل طرف بيتزا , وانا عندي 4 سنوات في الجامعة, عمري لا خرجت وكليت براو مع انو مقابل باب
الجامعة آلاف البيتزيريات , بصح والله من الفطور تاع الصباح على 6 حتى نروح لعشية على 4 باه ناكل
يعني من نفسي بعد نحشم نخرج برا وناكل في بلاصة مخلطة والناس تتفرج فيك, عيب والله
درك كيما قلتيها ولاو الرجال يحشمو يدخلو لدرجة حكمولهم بلاصتهم النسا
نقولو ربي يهدينا برك هادا ماكان
شكرا حبيبتي على الموضوع ننتظر باقي ابداعاتك
تحياتي ​

 

[Salam Fleur]

رد: احكمو دياركم واشي هذا

السلام عليكم

اها اها ... انا نحكي على روحي ... كي كنت نقرا في الجامعة سكنت في البيتزيريا ماكانش عندي الوقت نهبط للدار و نعاود نولي .. بصح حكاية نحشروا الرجال هنا سمحيلي حنا كي كنا نروحوا كاين جهة للعائلات نقعدوا فيها باحترام و الحمد لله ... و مانطولوش يا ربي نص ساعة ....

لكن نوعية لي حكيتي عليها صح كاينة و نزيدك يوليوا يشايخوا مع لي يخدموا تم تقولي عليها راهوا خوها و لا عمها و كاين انا حضرتلها كنا قاعدين و كانت الجهة هاذيك تقريبا فارغة جاو زوج بنات و ماحبوش يقعدوا في الجهة تاع العائلات راحوا قعدوا برا و قابلوا لي جون لي تم و هاتليك الضحكة تسمعيها من الاسكا .....

و الواحدة تقعد باحترامها والوا عادي بصح لما تكن كيما هاذوا و الله ربي يهدي

شكرا على موضوعك الرائع

تحياتي ​

 

[@R@ZIK]

رد: احكمو دياركم واشي هذا

السلام عليكم
يعطيك الصحة أختي
شكون لي ما يحبش البيتزا مي كاين فئة من فئة
انا ملي كنت نقرا وناكل برا والآن في الخدمة نخرج نفطر في بيتزيرا مليحة ونقية
وساعات كي نلقى الغاشي بزاف نرفد الماكلة ونرجع للخدمة نفطر وهذي
تاع على 10 و12 و4 علاه واشبيهم قرضهم الشر واحد يخرج يفطر على 12
انا شفت بنات رافدين البيتزا ويمشو في الطريق وياكلوا بلا ادب ولا احترام تقولي عمرهم ما كلاو البيتزا
مي هاذو الفئة لي راكي تحكي عليه ربي يستر وخلاص
شكرا اختي على الموضوع
تحياتي​

 

[Hakan]

رد: احكمو دياركم واشي هذا

موضوع راائع وفي الصميم للكن الحااجة الليي اكتشفتهاا انو
النسااء ما راهمش يحشمو طوول
الله يرحم عجاايز بكري هذا ما نقول بارك الله فيك ختي البرينسيسة
واقع مؤلم
انا نقرى في الجاامعة ساعات تنفحلي نروح نتغدى في كااش ريسطورون داخلية وناكل سندويش
مي ماخلاونااش البنات وااش نديرو ربي يكون في العون برك
والله وصلت لوحد الدرجة رجعت نكره بنات حوااء كاامل ...​

 

[مريم.]

رد: احكمو دياركم واشي هذا

ربي يبارك في اخواني واخواتي على الردود لكن نقول كلمة وحدة الله غالب احنا بدينا نقلدو كل مانشوفو وخرجنا عن الاصالة والتقاليد​

 

[حكاية قمر]

رد: احكمو دياركم واشي هذا

السلام عليكم
هي الصح كاينه وانا شخصيا منهم لانو الله غالب نقرا بعيدة ع دار وديفوا تتحتم عليا نفطر برا مي ماشي في اي بيتزيريا ونظن ماشي حرام الا اذا كاين فتوى تحرم علينا هاد شي فالله يغفر لنا برك وادا هدرنا ع اختلاط فاسمحيلي اختلاط ما جاش غي على هاد لعفسة ياك غاديا تحكمي تابلا مع صحاباتك بعيدة ع رجال ولبس محتشم والله يبارك كاين بزاف غاشي يعني ماكاش انفراد ومام بيتزيريا بابها كبيرومفتوح وفي بلاصه عامره فمافهمتش وين راه العيب كي نمشي لبيتزيريا مع صحاباتي ونتغداو ونروحو

 

[بقايا إنسان]

رد: احكمو دياركم واشي هذا

سلام عليكم وبعد:يعطيك الصحة ع الموضوع خلاص غزاونا النساء هههه حتى في لقمة العيش ههههه
المفروض يكتبوا على باب البيتزيريا الصباح للنساء والمساء للرجال ههه
راني غي نضحك عن نفسي مشي مشكل ومتضايقنيش مرا في هذا الموطن وطبعا انا منذايقهاش
مشكورة مرة اخرى ع الطرح دمتي بود

 

[etmeriem]

رد: احكمو دياركم واشي هذا

بالنسبة لي شخصيا ندخل للبيتزيريا او المطعم مرتين في العام لأنو احيانا تدفعنا الظروف باه نقصدو المطاعم ... شكرا على الموضوع الحساس​

 

[tadjadit mohamed]

رد: احكمو دياركم واشي هذا

صاح كاينا النسا راهم بارتو ماشى غير فلبيتزيريا الرجال لى راهم غير يموتو او يهجرو مابقاش قد لى فات تولو وحدكم فى دزاير

 

[بنت الـ25]

رد: احكمو دياركم واشي هذا

اييييييييه فكرتيني في ايام زمان
ما نكدبش عليك وحد الوقت كنت نروح انا وصحاباتي للفاست فود نتغداو رغم انهم كانو يديوني تع سيف
(هي فالحقيقة نظيفة ونشوفوهم كيفاش يخدموها)
كنت نقولهم: ديك التبهديلة في عوض الراجل يقعد فالدار ومرتو ولا امو تحطلو ياكل
تعكست الآية رجعو النسا قاعدين برا والرجالة لي يحطولهم الماكلة
الفرق الوحيد انهم اللولين يخدمو باطل والتانيين بالصوارد ههههههههه

وكيما قالت خولة نشوفو بعض البنات كيفاش مداخصين الصنايعية ، الضحك والتقصار شيء مخزي
مي دوكا حلفت عليها وزاد راجلي حلفني ووكل عليا ربي كون ندخل بيزيريا من وراه ما تفراش
يقولي "ما كرهني فالمرا لي تاكل برا وتهوشر والرايح والجاي يتفرج فيها"
ووليت كي نديبلاصي انا وماما كشما نشريو نقولها نبقى بالشر والجوع حتى نرجع للدار

اما وين راني نخدم دايرين بيا لي ريسطورون وكامل تع عائلات وluxe مي منحبش ندخل
رغم ان اصحابها زبائن لوكالتنا وديما يعرضوني باش نجي نتغدى عندهم مي منقبلش
والحمدلله ربي عطانا اليدين والبيتزا أو لي سوفلي أو أي مأكولات سريعة تندار فالدار فالنظافة
صدقيني كون جاو يشوفو لي بيزيريا كيفاش راهم يخدمو فالوسخ ما يزيدو يضربو فيهم ضربة

تحكيلي صحبتي على وحدة جارتهم قاتلي جاو مدو عليها الكلمة
نهار الخطبة تعها شافها اخ راجلها فالتصاور قالو هادي هي لي خطبتها؟
راني نعرفها مليح تضل فالبيزيريا مع صحاباتها الضحك والترعوين
السيد من البخصة بطل عليها قالها ما تساعدنيش طفلة ضل فلي بيزيريا

مالا كيما قلتي في عنوانك احكمو دياركم يا نسا وشي هذا؟؟؟؟؟؟؟؟

​

 

[فارس الروح]

رد: احكمو دياركم واشي هذا

انا راي راجع لاخلاق البنت ترجع للعقلية والاخلاق
مش في بيتيزريا ولاو يزاحمو رجال في كل مكان وش تقولي ملاعب يروحو ليها ....
وش بقا حشمة راحت حيا راح ولا واحد يحشم يمشي مع خوه رانا في وقت تشوف العجب
شكرا على طرح الموضوع

 

[آمِيْرَتُه]

رد: احكمو دياركم واشي هذا

السلام عليكم ورحمة الله تعالى و بركاته
ممكن مراحش نوافقك في هذي آنا نعرف من بكري كاين نساء ياكلو برا كي نتاع بكري كي درك و شحال من مرة نتلاقا بعجايز في بيتزيريا
عن نفسي نخدم برا و نسكن بعيد كيفاه ندير نجيب معايا و ناكل البارد ؟ نشري و ندي معايا للخدمة مجاياش
مافيها والو اذا لوحدة دخلت تاكل و حكمت قدرها و فمها تدخل تاكل تخلص و تخرج

 

[آمِيْرَتُه]

رد: احكمو دياركم واشي هذا

بعض الردود قريتها كي شغل لي تاكل برا في بيتزيريا مش متربية ؟
كاين بيتزيريا نتاع العائلات يدخلو ليها غير العائلات يعني مكانش رجال وحدهم الا اذا كانت معاه مرأة
إذا هذا مكانش عندكم مش معنتها أن البيتزيريات لي في الولايات الاخرى تدل أن راهي مخلطة رجال و شيرات

 

[الورد الأحمر]

رد: احكمو دياركم واشي هذا

شغل حابين تفهموني درك كامل بلي عمركم لا كليتو برا ؟
نحكيو عالسرقة المنتدى الكل واحد ما سرق ونحكيو عالنفاق المنتدى الكل ما شاء الله عليه واحد ما منافق وكل صنعة نحكيو عليها يطلع الغاشي الكل خاطيه !! المنتدى زعمة فيه غير لمخيّر تاع الجزاير ؟
مالا أنا ناكل برا وتقريبا كل يوم الله غالب خدامة ومرات ما نرجعش للدار وتكون عندي طريق خلاف تضطرني ناكل برا ومرات نكون في الدار ونقرر نعرض خواتاتي وناكلو برا ولا صحاباتي ونظن كاين المطاعم المفروزة والمعروفة بسمعتها وما فيهاش الرعاع !! وعادي وفخورة بنفسي وكلشي على خاطر المشكل ماشي في تاكل برا المشكل في العقلية برك كي تعود رجعية وتاني المشكل في نظرة المجتمع التافهة لي تركز عالتفاهات والمشكل تاني في التربية بحذ ذاتها وكل وحدة ووين ترضى لروحها تكون ... تحب تكون مع الناس الراقيين تلقى روحها مع الرقي وتحب تكون مع الناس الأنذال تلقى روحها مع النذالة والرذالة ... من اللخر كلش متوفر في الدنيا هذي لحرام كاين ولحلال كاين وكل واحد يخير وين يكون ... ولمليح كاين والمش مليح كاين وكل واحد بعد يخير وين يكون.
كي قريت الردود تخيلت الغاشي الكل ياكل في الدار مالا معرف شكون هذوك لي برا ؟ اه هذوك لي مازال ما سجلوش في المنتدى يخي ؟ وكي قريت ردود الذكور فهمت بلي شغل حابين كل حاجة في لبلاد هذي تكون ليهم برك !! مالا احكمو نساكم وخواتاتكم في الدار تلقاو لبلاد فارغة ليكم وحدكم ماشي تخليو خواتاتكم مطيشين في الزقاق ونساكم وتقولو غزاونا وفي لخر تاع الشهر تقسمو الغلة معاهم وكاين لي يديلها دراهمها كامل ... النقطة هذي بينها وبين الطحين حيّز برك ! كون راجل تلقى الزقاق للرجال ... نقطة انتهى ^^