تحية حائرة أزفها لاخواني واخواتي البائسين والبائسات عبر ربوع قارتنا الحبيبة ..
الله يحييك اخي الكريم ، و صحى فطورك
ايها الشعب الحائر .. اني نشوف في ناس كامل حايرة في مواضيعها ما لازمش نحيرو في حتى حاجة ببساطة لأننا افارقة .. ومن اعرافنا وتقاليدنا اننا نديرو حوايج بيزار اللي مش عاجباتو يروح يعطيها لروما ولا برشلونة في الطيارة ولا في البابور ..
:regards01::regards01:
نجيو للموضوع عارف عنوان مخربط حبيت نحكي اليوم على موضوع نعيشوه في حياتنا اليومة وكاين بزاف ناس يحتارفوه انه الشرررررررررات يا سادة ولا المعاني كيما يقولو العجايز الهدرة عليا والمعنى على جارتي .. كنت نخمم بيني بين روحي كون يديرو بطولة عالمية في الشرات راح نديو اللقب العالمي ونخلو كامل العالم يصفق ... حكيت المرة لي فاتت على التوسويس مي نورمالمو قبل ما نحكو فيه لازم نحكو على سبب لي خلا ناس موسوسة هو هدا الموضوع الشرات كيما قالو واحد ما عندي صاحبي ما يشرلي
بوه هل مشيت يوما وضربك احدهم بشرة وترك مسمرا في مكانك ؟؟
ام هل تعرضت لشرة وضحكت لأنك لم تفهمها ومبعد وصلك الميساج الحقيقي بعد عدة ايام وفقت مع روحك كم كنت غبي ؟؟
هههههههههههههههههههههههه
كل يوم تقريبا ، حتى تشرحلي اختي لما نحكيلها و تقللي راكي دابة حمارة
لو نحب ندير نبذة تاريخية و تعريف محترم للشرة نلبس كوستيم ونريح فوق كرسي ونجبد ورقة رسمية ونسقم الميكروفون ونقول احم احم هي عبارة عن رسالة ضمنية تحمل معاني حارقة واحيانا مدمرة ... كي تحب توصل لواحد ميساج لتحت لتحت اضربو بشرة واتركه تحت شعار اضربه بشرة دعه يمر في انتظار تصفيقاتكم الحارة -_-..
:bravo01::bravo01::bravo01::bravo01::bravo01::bravo01::bravo01::bravo01:
ولو نرجع للتاريخ احترف العرب قديما موضوع الشرات في حكايتهم المشهورة وافق شن طبق هادي باختصار واحد اسمو شن يمشي في طريق تلاقى مع واحد طريق كامل وهو يحكي بالشرات لي معاه ما فهم والو كي وصل هاد السيد لدار عرضو للغدا عندو طفلة يسموها طبق قالها سيد او قتلني بالشرات وهادي طبق فهمت الشرات كامل ايا ولاو زوجو كيف كيف وقالك وفق شن طبقة وولات مثل كي شغل عندنا حنا فولة ولقات ختها مي هادو تلاقاو في الشرات.
ونوصيكم كي تشرو حوايج جدد اكم تشبعو بالشرات وش هو انتوما تضحكو عندبالكم صح .. كي يجيك واحد يقلك والله جا عليك تريكو حمر راك وليت تشبه لكوكب المريخ انت فهمتها بلي راك شباب وهو حاب يقول يا ودي نحي علينا راهي حبة طماطم خير منك ... ولا تروح للخدمة ولا تقرا بكري وانت منين داك دير روطار يقولولك يا درا وش من حمار مات اليوم ولا عدت خاطيك شرات تلعبها فكاهي وتقولهم تاع جارنا قدور .. وتضححححك يا مصيبة بهدلت بينا
وكاين مرات وين يكونو زوج من الناس يحبو يتفاهمو على راس الثالث ويبداو فيه بالشرات حتى يديرولو تشنج في المخ تاعو ويبات مريض بالتوسويس ويحكمو التوهم ثانيك ويبدا يتوهم بلي هو بقرة حتى ابن سينا الله يرحمو ما عندناش حتى علاج .. وعادة لما يكونو زوج يشرو والثالث مش فاهم يحس نفسو كي الاطرش في الزفة ويحس روحو قديم على ساحة الشهدا ومش فاهم والو لازمو ميزاجور وش راه صاري في العالم وتلقاه اما يضحك وهو مش فاهم واما يسأل وعمرو مراح يجاوبو تلقاه غير وقتاه .. علاه .. كيفاه .. كيما حكاية المستورة في المنتدى ههه والله نشيعكم في المنتدى ايها الاشرار حتى نفهم ولا ما يبقى في الواد غير حجارو اخخخ
المهم انا تعايشت مع ناس عايشين بالشرات علخاطر مع الوقت اي تولي مرض في الانسان كثر من التفويد الله يعافينا .. انت تحكي نورمال معاه ومبعد يعجبك الحال تولي تحكي باسهاب حتى البصاق يطير من فمك (قريب دير فيضان ) والسيد يحكي معاك داخلها شرة من خارج بوحدة منهيه وانت في بالك راه يمدح فيك ولكن الحقيقة تقول تقدر تحكم هدرتو كامل وتفرض بللي هي المتغير س ومبعدا تضرب هدا السي س في -1 وراح تتوصل للمعنى الحقيقي وتحس نفسك كنت ابلها ودرت فيضان في الباطل كون وفرتو وسقيت بيه مزارع الفلاحين راح يكون المنتوج اوفر.
وانا نعتبر الناس لي ناجحين في الشرات هوما عادة ناس دبلوماسيين يصلحو في السياسة كثر من المجتمع لي ردوه كامل موسوس .. لي يحب يثري الموضوع يعطينا امثلة من حياتو اليومية وفي النهاية تقبلوا تحياتي ايتها الوجوه الشاحبة.
