منرفزين

[Tama Aliche]

السلام عليكم
موضوع النرفزة يا حبيبتي هم كبييييير راه عايش مع الناس
انا نحكي عن نفسي لالا مش منرفزة بزاف ويلا جرحني واحد زعما وحبيت ندير الشطارة ونرد عليه ههههه نرد ونرعش ومنقدرش نحكم راسي قلبي يضرب تحسبي راني رايحة للحرب هههه املا نحب دايما نبعد علي المشاكل الا لي يطوشيني لي نحاول نرد هههه
والنرفزة كاين ناس والله لاسقة عندهم فالنيف غي يحكي معاه واحد كلمة يطير ويعيط عليه ويقوم القيامة
ولي نخاف منها كي نروح نشري كانش زعما لبسة ليا ومتجيش قدي ونقولوا سمحلي صغيرة تامني نبدي سني ردة الفعل ديالوا لاخاطر العصبية راها تجري فدمهم الله يهديهم
والقلق من ناحية وحدخرا نتاع السيارات فالطريق يحبوا يطيروا وياويلوا لي يطول شويا ياكلوووه بالكلاكصونات واسم هذا
تروح تخرج كوارط تلقاي الحرب بيناتهم كل واحد يقول نفوت ههه
وبزاااااف بزاااف الله يجيب الخير
مشكورة حبيبتي ونوصيك متتقلقيش راهوا ماشي مليح للصحة
تحياتي

وعليكم السلام
هههههههههههههههههه يااا اختصرتي كلشي فسطور باهية
خلي يتنرفزو وحنا نضحكوا , ياويلي بعيد النرفزة علينا يقولوا تدير التجاعيد ههههه
الشكر لك اختي

 

[أم أُنٌَيسة]

السلام عليكم و رحمة الله تعالى و بركاته
طهورا ان شاء الله ، يارب تكوني ريحتي اليوم ان شاء الله
دائما نضحك من عند الله كيما لمهابل لكن ادا تقلقت غير بعديني و خاصة لما يحكو في امور الدين و القناعة فيها نجهل نورمال
اني موصية صحباتي لما يدخلو للقسم و يلقاوني معبية قلم رصاص و نكتب في خواطر بالانجليزي او نرسم غير يخطوني برك لاني ممكن نديرهم حبة حلوة و ناكلههم نورمال
لدا ضوك صحباتي كيما يلقوني هكداك يبعدوني طول وحدة ماتجي تحكي معي
لاني من قبل جربتها وحد المخلوق يقرا معي في الثانوي كان ديما يعلق عليا و مايهمنيش كانو ماراهش موجود لكن مرة طاح فيا منرفزة و قلقانة ضربت الطاولة بيدي و نضت في نص لكلاص و الاستاذة في لكلاص وقلتلو وااااااااااااااااش دخلللللللللللللللللللك ، قللي برك واش دخلك وعلاه تدخل في حاجة خاطيك اخطي عزريني او نضربك بمسطرة نكسرلك راسك و المسطرة تاعي هدية من عند صديقة 30 سم حديد هههههههه
تاني يوم لما رجعت لعقلي من الصباح و انا نقللو اسمحلي و الله ماقصدت ،قعد حال فمو قالولي راهو هو الغلطان يعني قلتلهم ولو موش بالطريقة هديك و قدام لكل و اعتطرت من الاستاذة والحمد لله تعرفني و جامي درت جاست كيما هدا قالتلي اصلا راكي صبرتي عليه بزاف ههههههههههه
وبلا لخرايب لخرين تع التنرفيز تاعي
اختي نخزر فيها وحد الخزرة تهرب عند امي تجري تقللها ياماما رايحة تقتلني هههههههههههه
اني قلتلك شغيغة وافتخر احم احم
الله يحفظك ان شاء الله حبيبتي
ضحكتيني شوي مع اني متعبة
اضحك الله سنكي
تحياتي القلبية احترامي و تقديري​

 

[أم أُنٌَيسة]

السلام عليكم
موضوع النرفزة يا حبيبتي هم كبييييير راه عايش مع الناس
انا نحكي عن نفسي لالا مش منرفزة بزاف ويلا جرحني واحد زعما وحبيت ندير الشطارة ونرد عليه ههههه نرد ونرعش ومنقدرش نحكم راسي قلبي يضرب تحسبي راني رايحة للحرب هههه املا نحب دايما نبعد علي المشاكل الا لي يطوشيني لي نحاول نرد هههه
والنرفزة كاين ناس والله لاسقة عندهم فالنيف غي يحكي معاه واحد كلمة يطير ويعيط عليه ويقوم القيامة
ولي نخاف منها كي نروح نشري كانش زعما لبسة ليا ومتجيش قدي ونقولوا سمحلي صغيرة تامني نبدي سني ردة الفعل ديالوا لاخاطر العصبية راها تجري فدمهم الله يهديهم
والقلق من ناحية وحدخرا نتاع السيارات فالطريق يحبوا يطيروا وياويلوا لي يطول شويا ياكلوووه بالكلاكصونات واسم هذا
تروح تخرج كوارط تلقاي الحرب بيناتهم كل واحد يقول نفوت ههه
وبزاااااف بزاااف الله يجيب الخير
مشكورة حبيبتي ونوصيك متتقلقيش راهوا ماشي مليح للصحة
تحياتي

و عليكم السلام و رحمة الله تعالى و بركاته
ايه انتي كي حالتي لما يتنرفز واحد وخاصة ابي نرجع نرعش مانقدرش نحكي معاه
حتى ولو يجي واحد يضربني نبقى في بلاصتي كيما لحمارة نجمد يدير فيا واش يحب لانو عندي الخلعة ههههههههههههههه
ايه ربي يهدينا برك
نحب ردودك جدا و تعجبيني بزاف اختي الكبيرة
تحياتي احترامي و تقديري​

 

["viola"]

سلااام عليكم ...وشراكي ختي نشالله لباس عليك ^^
يا اختي و الله خربتيلنا فالتقاليد خخخ يعني حنا شعب يتقربع وحدو وحدو و كيما قلتي يشعل بلا كبريت ههه
و الله تجي تشوفي مالضغط رانا هايلين نضحكوا مالوحدة و لهيه هههه
مشكل البطالة العنوسة الاختبارات الشاب يزيد سكينة مفتحتش الباب من ذاك العام يطبطب و ارواحي تشوفي خخخ
انا منكذبش عليك عصبية و بالزايد شوي بصح يعني كي صح صح تقلقني حاجة نشعل طول تقول زايدة فسوناطراك خخخ بصح مش هاك برك بلا سبة
يعني كي نوض صباح مقرمدة معناتها مرقدتش مليح خاطر لا رقدت مليح نصبح نورمال مش نضحك نضحك خخخخ بصح عادي يعني كي تقوليلي صباح الخير نردلك هههه
صحيتي و ما تتنرفزيش ساعفيني خخخ
السلام
​

 

[sosobibicha]

السلام عليكم
واش راكي فاطمة ؟ الله يعيطك الصحة الموضوع
الجزائريين معروفين بالنرفزة خاصة الصباح ينوض معادي كامل الناس غير بشوية يبقى يسامح فيهم هههه
كاين لي لازم يشربو قهوة و لا دخان باه يبقاو هادئين و ساكتين مي لي تحيرني تلقايهم يقولو حنا مش منرفزين و جربي برك قليلهم كلمة صغيرة تنوض الحرب من بعد يقولك انا نحكي هكا مش نرفزة
الصح انا مش منرفزة بزاف منين ذاك نوض زعفانة مش عارفة علاه ! و اذا خسرو معايا في الهدرة نستغفر و نشد روحي بسيف و اذا عاودوها يا حليلهم نردلهم الصرف مليح غير زوج و ثلاث كلمات يرجع كل واحد في مكانو هههه العكس نتقلق كي منردش نحس بتأنيب الضمير هههه
وين تروحي تلقاي زعاف و نرفزة تروحي تشري تلقايهم في الباب مشنفين تقول رايحة تسرقيهم و منحكوش على صحاب الادارة الله يبارك الشنافة زادو بيها علامة مميزة للاداريين (اكيد مش كامل ) و بزاااااف
شكرا على الموضوع بارك الله فيك
متقلقيش قالك واحد تقلق مات و حتى حاجة متستاهل تتنرفزي عليها " نقصر برك كاين عباد يجوز النرفزة و القلق و الزعاف و التشناف معاهم هههههه"
في امان الله
​

 

[Salah eddin]

السلام عليكم
و الله يا اختي شعبنا اصلا منرفز و مديقوتي من ذاك العام
ههلدرجة انها النرفزة اصبحت حاجة نورمال
تروح للحانوت تلقى مولى الحانوت منارفي و يشنف
تروح للبلدية و لا البوسطة كيف كيف
القاشي منرفز و مديقوتي تقول راه محتوم و لا يخدم مكره
وش نديرو
الله غالب
ههه
و اصلا لو كان نلاحظو انفسنا
نلقاو ثاني بلي رانا نتنرفزو ساعات هكذاك برك
لان مجتمعنا و محيطنا كيما هاك
النرفزة و الطريق القدام
هه
ايا السلام عليكم
و
شكرا​